អត្ថបទសិក្សា ៣៦
រាស្ត្ររបស់ព្រះយេហូវ៉ា ស្រឡាញ់សេចក្ដីសុចរិត
«អស់អ្នកដែលស្រេកឃ្លានចំពោះសេចក្ដីសុចរិត នោះមានសុភមង្គលហើយ»។—ម៉ាថ. ៥:៦
ចម្រៀងលេខ៩ ព្រះយេហូវ៉ាជាស្ដេចរបស់យើង!
សេចក្ដីសង្ខេបa
១. តើយ៉ូសែបបានជួបការល្បងលអ្វី ហើយតើគាត់មានប្រតិកម្មយ៉ាងណា?
យ៉ូសែបដែលជាកូនប្រុសរបស់យ៉ាកុប ជួបការល្បងលដ៏ពិបាកមួយ។ ស្ត្រីម្នាក់បាននិយាយមកកាន់គាត់ថា៖ «ចូរមករួមដំណេកជាមួយនឹងខ្ញុំ»។ នាងគឺជាប្រពន្ធរបស់ប៉ូទីផាដែលជាចៅហ្វាយគាត់។ យ៉ូសែបមិនព្រមធ្វើតាមនាងទេ។ អ្នកខ្លះនៅសព្វថ្ងៃនេះប្រហែលជាឆ្ងល់ថា ‹ម៉េចបានជាយ៉ូសែបមិនព្រមធ្វើតាមនាងទៅ?› ព្រោះថានៅពេលនោះ ប៉ូទីផាមិននៅទេ។ មួយវិញទៀត យ៉ូសែបគឺជាអ្នកបម្រើនៅក្នុងផ្ទះនោះ ដូច្នេះស្ត្រីនេះអាចធ្វើឲ្យគាត់រស់នៅមិនបានសុខ ដោយសារគាត់មិនធ្វើតាមនាង។ ប៉ុន្តែ យ៉ូសែបនៅតែបន្តបដិសេធមិនរួមដំណេកជាមួយនាង។ ហេតុអ្វី? គាត់បាននិយាយថា៖ «តើខ្ញុំអាចប្រព្រឹត្តអំពើខុសឆ្គងចំពោះព្រះ ដោយធ្វើអំពើដ៏អាក្រក់ក្រៃលែងដូចនេះម្ដេចបាន?»។—ដក. ៣៩:៧-១២
២. តើយ៉ូសែបបានដឹងយ៉ាងដូចម្ដេចថាអំពើផិតក្បត់ជាអំពើខុសឆ្គងចំពោះព្រះ?
២ តើយ៉ូសែបដឹងយ៉ាងដូចម្ដេចថាព្រះរបស់គាត់ចាត់ទុកអំពើផិតក្បត់ជា«អំពើដ៏អាក្រក់ក្រៃលែង»? ពីររយឆ្នាំក្រោយមក ទើបច្បាប់ម៉ូសេមានបង្គាប់យ៉ាងច្បាស់ថា៖ «អ្នករាល់គ្នាមិនត្រូវផិតក្បត់»។ (ដច. ២០:១៤) ទោះជាយ៉ាងនោះក៏ដោយ យ៉ូសែបបានស្គាល់ព្រះយេហូវ៉ាច្រើនល្មមដើម្បីដឹងថាលោកមិនពេញចិត្តនឹងអំពើផិតក្បត់ទេ។ ជាឧទាហរណ៍ យ៉ូសែបប្រាកដជាដឹងថាព្រះយេហូវ៉ារៀបចំអាពាហ៍ពិពាហ៍រវាងបុរសម្នាក់និងស្ត្រីម្នាក់។ ម្យ៉ាងទៀត គាត់ទំនងជាបានឮអំពីរបៀបដែលព្រះយេហូវ៉ាចាត់វិធានការការពារសារ៉ាដែលជាយាយទួតរបស់គាត់អស់ពីរដង ដើម្បីជួយនាងឲ្យរក្សាភាពស្មោះត្រង់ចំពោះប្ដី ពេលស្ថិតក្នុងស្ថានភាពដែលអាចនាំឲ្យគេបំពានរាងកាយនាង។ ស្រដៀងគ្នាដែរ ព្រះបានចាត់វិធានការដើម្បីការពាររេបិកាដែលជាប្រពន្ធរបស់អ៊ីសាក។ (ដក. ២:២៤; ១២:១៤-២០; ២០:២-៧; ២៦:៦-១១) កាលដែលយ៉ូសែបបានវែកញែកអំពីអ្វីទាំងនេះ គាត់យល់អំពីអ្វីដែលខុសនិងអ្វីដែលត្រូវតាមទស្សនៈរបស់ព្រះ។ ដោយសារយ៉ូសែបស្រឡាញ់ព្រះរបស់គាត់ គាត់ក៏ស្រឡាញ់ខ្នាតតម្រាដ៏សុចរិតរបស់លោកដែរ ហើយគាត់បានតាំងចិត្តកាន់ខ្ជាប់តាមខ្នាតតម្រាទាំងនោះ។
៣. តើយើងនឹងពិចារណាអ្វីខ្លះ?
៣ តើអ្នកស្រឡាញ់សេចក្ដីសុចរិតឬទេ? អ្នកប្រាកដជាស្រឡាញ់។ ប៉ុន្តែ យើងទាំងអស់គ្នាជាមនុស្សមិនល្អឥតខ្ចោះ ហេតុនេះបើយើងមិនប្រយ័ត្នទេ ទស្សនៈរបស់ពិភពលោកស្ដីអំពីភាពសុចរិត អាចងាយជះឥទ្ធិពលមកលើយើង។ (អេ. ៥:២០; រ៉ូម ១២:២) ដូច្នេះ យើងនឹងពិចារណាថាអ្វីជាសេចក្ដីសុចរិត និងប្រយោជន៍ដែលយើងទទួលពីការស្រឡាញ់សេចក្ដីសុចរិត។ បន្ទាប់មក យើងនឹងពិចារណាអំពីអ្វីបីយ៉ាងដែលអាចជួយយើងឲ្យកាន់តែស្រឡាញ់ខ្នាតតម្រារបស់ព្រះយេហូវ៉ា។
តើសេចក្ដីសុចរិតគឺជាអ្វី?
៤. តើមនុស្សជាច្រើនមានទស្សនៈមិនត្រឹមត្រូវអ្វីស្ដីអំពីសេចក្ដីសុចរិត?
៤ អ្នកខ្លះចាត់ទុកថាខ្លួនជាមនុស្សសុចរិត ទោះជាពួកគេជាបុគ្គលមានអំណួត រិះគន់អ្នកឯទៀត ឬគិតថាខ្លួនគ្រាន់បើជាងគេក្ដី។ ប៉ុន្តែ ព្រះមិនចូលចិត្តលក្ខណៈបែបនេះទាល់តែសោះ។ ពេលលោកយេស៊ូនៅផែនដី លោកបានផ្ដន្ទាទោសពួកអ្នកដឹកនាំសាសនានៅសម័យរបស់លោក ដោយសារពួកគេបង្កើតខ្នាតតម្រាខ្លួនឯងអំពីសេចក្ដីសុចរិត។ (អទ. ៧:១៦; លូក. ១៦:១៥) បុគ្គលដែលសុចរិតពិតប្រាកដ មិនគិតថាខ្លួនគ្រាន់បើជាងអ្នកឯទៀតឡើយ។
៥. តាមគម្ពីរ តើសេចក្ដីសុចរិតគឺជាអ្វី? សូមលើកឧទាហរណ៍។
៥ សេចក្ដីសុចរិតគឺជាគុណសម្បត្តិដ៏ថ្លៃថ្លា ហើយនិយាយឲ្យស្រួលយល់ គឺមានន័យថាការធ្វើអ្វីដែលត្រឹមត្រូវស្របតាមទស្សនៈរបស់ព្រះយេហូវ៉ា។ នៅក្នុងគម្ពីរ ពាក្យដែលបានត្រូវបកប្រែថា«សុចរិត» អាចសំដៅទៅលើការរស់នៅស្របតាមខ្នាតតម្រាដ៏ខ្ពង់ខ្ពស់ ពោលគឺខ្នាតតម្រារបស់ព្រះយេហូវ៉ា។ ជាឧទាហរណ៍ ព្រះយេហូវ៉ាបានបង្គាប់អ្នកជួញដូរថាពួកគេគួរប្រើ‹កូនជញ្ជីងត្រឹមត្រូវ›។ (បច. ២៥:១៥) ពាក្យដើមជាភាសាហេប្រឺដែលបានត្រូវបកប្រែថា«ត្រឹមត្រូវ» ក៏អាចបកប្រែថា«សុចរិត»ដែរ។ ដូច្នេះ គ្រិស្តសាសនិកដែលចង់ឲ្យព្រះរាប់ជាបុគ្គលសុចរិត នឹងប្រព្រឹត្តដោយទៀងត្រង់ទាំងស្រុងក្នុងគ្រប់មុខរបររកស៊ីរបស់គាត់។ បុគ្គលសុចរិតក៏ស្រឡាញ់យុត្តិធម៌ដែរ។ គាត់ស្អប់អំពើអយុត្តិធម៌។ ម្យ៉ាងទៀត «ដើម្បីធ្វើឲ្យ[ព្រះយេហូវ៉ា]ពេញចិត្តទាំងស្រុង» បុគ្គលដែលសុចរិតពិតប្រាកដ គិតពិចារណាអំពីទស្សនៈរបស់លោកចំពោះការសម្រេចចិត្តផ្សេងៗរបស់គាត់។—កូឡ. ១:១០
៦. ហេតុអ្វីយើងអាចទុកចិត្តទៅលើខ្នាតតម្រារបស់ព្រះយេហូវ៉ាស្ដីអំពីអ្វីដែលខុសនិងអ្វីដែលត្រូវ? (អេសាយ ៥៥:៨, ៩)
៦ គម្ពីររៀបរាប់ថាព្រះយេហូវ៉ាជាប្រភពនៃសេចក្ដីសុចរិត។ ហេតុនេះ លោកបានត្រូវហៅថាជា«លំនៅដ៏សុចរិត»។ (យេ. ៥០:៧) ក្នុងនាមជាអ្នកបង្កើត គឺមានតែព្រះយេហូវ៉ាប៉ុណ្ណោះដែលមានសិទ្ធិកំណត់អំពីអ្វីដែលខុសនិងអ្វីដែលត្រូវ។ ព្រះយេហូវ៉ាល្អឥតខ្ចោះ ហេតុនេះទស្សនៈរបស់លោកចំពោះអ្វីដែលខុសនិងអ្វីដែលត្រូវគឺខ្ពង់ខ្ពស់ជាងឆ្ងាយពីទស្សនៈរបស់យើង ដែលច្រើនតែទទួលឥទ្ធិពលពីភាពមិនល្អឥតខ្ចោះនិងភាពខុសឆ្គងរបស់យើង។ (សុភ. ១៤:១២; សូមអាន អេសាយ ៥៥:៨, ៩) ប៉ុន្តែ ដោយសារយើងបានត្រូវបង្កើតឲ្យមានភាពដូចព្រះ យើងអាចរស់នៅស្របតាមខ្នាតតម្រារបស់លោកស្ដីអំពីសេចក្ដីសុចរិត។ (ដក. ១:២៧) ម្យ៉ាងទៀត យើងចូលចិត្តធ្វើដូច្នេះ។ សេចក្ដីស្រឡាញ់របស់យើងចំពោះបិតាយើង ជំរុញចិត្តយើងឲ្យយកតម្រាប់លោកអស់ពីសមត្ថភាព។—អេភ. ៥:១
៧. ហេតុអ្វីយើងត្រូវការខ្នាតតម្រាដ៏ច្បាស់និងគួរឲ្យទុកចិត្ត? សូមលើកឧទាហរណ៍។
៧ យើងទទួលប្រយោជន៍ពីការធ្វើតាមខ្នាតតម្រារបស់ព្រះយេហូវ៉ាស្ដីអំពីអ្វីដែលខុសនិងអ្វីដែលត្រូវ។ ហេតុអ្វី? សូមស្រមៃគិតថាតើនឹងមានអ្វីកើតឡើង បើគ្រប់ធនាគារកំណត់តម្លៃរូបិយប័ណ្ណរៀងៗខ្លួន ឬបើក្រុមហ៊ុនសំណង់កំណត់រង្វាស់រង្វាល់ផ្សេងៗពីគ្នា? លទ្ធផលគឺច្របូកច្របល់។ ឬមួយក៏បើគ្រូពេទ្យមិនធ្វើតាមស្តង់ដារនៃការព្យាបាលដូចៗគ្នាទេ អ្នកជំងឺខ្លះអាចបាត់បង់ជីវិត។ យើងឃើញច្បាស់ថា ស្តង់ដារឬខ្នាតតម្រាដែលគួរឲ្យទុកចិត្តនិងកំណត់ច្បាស់លាស់ គឺការពារមនុស្ស។ ស្រដៀងគ្នាដែរ ខ្នាតតម្រារបស់ព្រះស្ដីអំពីអ្វីដែលខុសនិងអ្វីដែលត្រូវ ការពារយើង។
៨. តើពួកអ្នកដែលស្រឡាញ់សេចក្ដីសុចរិតនឹងទទួលពរអ្វី?
៨ ព្រះយេហូវ៉ាឲ្យពរពួកអ្នកដែលព្យាយាមរស់នៅស្របតាមខ្នាតតម្រារបស់លោក។ លោកសន្យាថា៖ «មនុស្សសុចរិតនឹងបានផែនដីជាមត៌ក ហើយពួកគេនឹងរស់នៅផែនដីជារៀងរហូត»។ (ចសព. ៣៧:២៩) តើអ្នកអាចស្រមៃឃើញថាមនុស្សជាតិនឹងមានសាមគ្គីភាព សន្តិភាព និងសប្បាយយ៉ាងណាពេលដែលគ្រប់គ្នាធ្វើតាមខ្នាតតម្រារបស់ព្រះយេហូវ៉ាឬទេ? ព្រះយេហូវ៉ាចង់ឲ្យអ្នកសប្បាយនឹងជីវិតបែបនោះ។ យើងម្នាក់ៗច្បាស់ជាមានមូលហេតុល្អឲ្យស្រឡាញ់សេចក្ដីសុចរិត។ តើយើងអាចស្រឡាញ់គុណសម្បត្តិនេះកាន់តែខ្លាំងឡើងតាមរបៀបណា? សូមយើងពិចារណាអំពីអ្វីបីយ៉ាងដែលយើងអាចធ្វើ។
ចូរស្រឡាញ់ខ្នាតតម្រារបស់ព្រះយេហូវ៉ាកាន់តែខ្លាំងឡើង
៩. តើអ្វីនឹងជួយយើងឲ្យស្រឡាញ់សេចក្ដីសុចរិត?
៩ ទី១: ចូរស្រឡាញ់បុគ្គលដែលជាអ្នកកំណត់ខ្នាតតម្រា។ ដើម្បីស្រឡាញ់សេចក្ដីសុចរិត យើងត្រូវបណ្ដុះសេចក្ដីស្រឡាញ់ឲ្យកាន់តែខ្លាំង ចំពោះបុគ្គលដែលកំណត់ខ្នាតតម្រាអំពីអ្វីដែលខុសនិងអ្វីដែលត្រូវ។ ពេលយើងកាន់តែស្រឡាញ់ព្រះយេហូវ៉ា យើងនឹងកាន់តែចង់រស់នៅស្របតាមខ្នាតតម្រាដ៏សុចរិតរបស់លោក។ ជាឧទាហរណ៍ បើអាដាមនិងអេវ៉ាស្រឡាញ់ព្រះយេហូវ៉ា ពួកគេមុខជានឹងមិនបំពានច្បាប់របស់លោកនោះទេ។—ដក. ៣:១-៦, ១៦-១៩
១០. តើអាប្រាហាំបានធ្វើអ្វីដើម្បីយល់ច្បាស់ជាងអំពីរបៀបគិតគូររបស់ព្រះយេហូវ៉ា?
១០ យើងច្បាស់ជាមិនចង់ធ្វើខុសដូចអាដាមនិងអេវ៉ាទេ។ យើងអាចជៀសវាងពីលទ្ធផលបែបនោះ បើយើងបន្តរៀនអំពីព្រះយេហូវ៉ា ឲ្យតម្លៃគុណសម្បត្តិរបស់លោក និងព្យាយាមយល់អំពីរបៀបគិតគូររបស់លោក។ កាលដែលយើងធ្វើដូច្នេះ យើងនឹងស្រឡាញ់ព្រះយេហូវ៉ាកាន់តែខ្លាំងឡើង។ សូមគិតអំពីអាប្រាហាំ។ គាត់ពិតជាស្រឡាញ់ព្រះយេហូវ៉ា។ សូម្បីតែនៅពេលគាត់ពិបាកយល់អំពីការសម្រេចចិត្តរបស់ព្រះយេហូវ៉ា ក៏គាត់មិនបះបោរដែរ។ ផ្ទុយទៅវិញ គាត់ព្យាយាមស្គាល់លោកឲ្យបានច្បាស់ជាង។ ជាឧទាហរណ៍ ពេលអាប្រាហាំឮថាព្រះយេហូវ៉ាសម្រេចចិត្តបំផ្លាញក្រុងសូដុមនិងក្រុងកូម៉ូរ៉ា នៅដើមដំបូងគាត់បារម្ភថា«ចៅក្រមនៃផែនដី»នឹងបំផ្លាញមនុស្សសុចរិតជាមួយមនុស្សទុច្ចរិត។ អាប្រាហាំយល់ថាលោកមិនអាចធ្វើដូច្នេះឡើយ។ ហេតុនេះដោយបង្ហាញការគោរព គាត់បានសួរព្រះយេហូវ៉ានូវសំណួរខ្លះៗ។ ព្រះយេហូវ៉ាបានតបឆ្លើយគាត់ដោយចិត្តអត់ធ្មត់។ ក្រោយមក អាប្រាហាំបានយល់ថា ព្រះយេហូវ៉ាពិនិត្យមើលចិត្តរបស់មនុស្សគ្រប់រូប ហើយថាលោកមិនដាក់ទោសបុគ្គលដែលគ្មានកំហុសជាមួយនឹងបុគ្គលដែលធ្វើខុសឡើយ។—ដក. ១៨:២០-៣២
១១. តើអាប្រាហាំបានបង្ហាញថាគាត់ស្រឡាញ់ព្រះយេហូវ៉ានិងទុកចិត្តលោកយ៉ាងដូចម្ដេច?
១១ ក្រោយពីអាប្រាហាំបានសន្ទនាជាមួយព្រះយេហូវ៉ាអំពីក្រុងសូដុមនិងក្រុងកូម៉ូរ៉ា គាត់បានរៀនច្រើន។ គាត់ច្បាស់ជាស្រឡាញ់និងគោរពព្រះយេហូវ៉ាកាន់តែខ្លាំងជាងមុនទៅទៀត។ ប៉ុន្តែ ច្រើនឆ្នាំក្រោយមក អាប្រាហាំជួបស្ថានភាពមួយដែលអាចធ្វើឲ្យគាត់ពិបាកបង្ហាញទំនុកចិត្តទៅលើព្រះយេហូវ៉ា។ លោកបានសុំគាត់ឲ្យយកអ៊ីសាកជាកូនជាទីស្រឡាញ់របស់គាត់មកធ្វើជាគ្រឿងបូជា។ ប៉ុន្តែ ពេលនោះអាប្រាហាំបានស្គាល់ព្រះយេហូវ៉ាច្បាស់ជាង ដូច្នេះលើកនេះគាត់មិនសួរលោកទេ។ អាប្រាហាំធ្វើតាមអ្វីដែលលោកបានសុំ។ សូមស្រមៃគិតថាអាប្រាហាំឈឺចិត្តយ៉ាងណាពេលគាត់រៀបចំដើម្បីបំពេញភារកិច្ចនោះ! អាប្រាហាំទំនងជាបានគិតយ៉ាងស៊ីជម្រៅចំពោះអ្វីដែលគាត់បានរៀនអំពីព្រះយេហូវ៉ា។ គាត់ដឹងថាលោកនឹងមិនធ្វើអ្វីដែលមិនសុចរិតឬមិនប្រកបដោយសេចក្ដីស្រឡាញ់នោះទេ។ សាវ័កប៉ូលបានសរសេរថា អាប្រាហាំវែកញែកថាព្រះយេហូវ៉ាអាចប្រោសកូនប្រុសសំណព្វរបស់គាត់ឲ្យរស់ឡើងវិញ។ (ហេ. ១១:១៧-១៩) គាត់ប្រហែលជាគិតដូច្នេះ ដោយសារព្រះយេហូវ៉ាបានសន្យាថាអ៊ីសាកនឹងធ្វើជាឪពុកនៃប្រជាជាតិមួយ តែនៅពេលនោះអ៊ីសាកមិនទាន់មានកូនទេ។ អាប្រាហាំស្រឡាញ់ព្រះយេហូវ៉ា ដូច្នេះគាត់ទុកចិត្តថាលោកនឹងប្រព្រឹត្តដោយសុចរិតជានិច្ច។ ទោះជាពិបាកក្ដី ជំនឿរបស់គាត់ជំរុញចិត្តគាត់ឲ្យស្ដាប់បង្គាប់។—ដក. ២២:១-១២
១២. តើយើងអាចយកតម្រាប់អាប្រាហាំតាមរបៀបណា? (ចម្រៀងសរសើរព្រះ ៧៣:២៨)
១២ តើយើងអាចយកតម្រាប់អាប្រាហាំយ៉ាងដូចម្ដេច? ដូចគាត់ យើងត្រូវបន្តរៀនអំពីព្រះយេហូវ៉ា។ កាលដែលយើងធ្វើដូច្នេះ យើងនឹងចូលកាន់តែជិតលោក ហើយស្រឡាញ់លោកកាន់តែខ្លាំង។ (សូមអាន ចម្រៀងសរសើរព្រះ ៧៣:២៨) សមត្ថភាពវិនិច្ឆ័យរបស់យើងនឹងទទួលការបង្វឹកបង្ហាត់ដើម្បីមានរបៀបគិតគូរដូចព្រះ។ (ហេ. ៥:១៤) យ៉ាងនេះ ពេលបុគ្គលណាម្នាក់ព្យាយាមល្បួងយើងឲ្យធ្វើអ្វីមិនត្រឹមត្រូវ យើងនឹងបដិសេធ។ យើងនឹងមិនថែមទាំងគិតអំពីការធ្វើអ្វីដែលនឹងនាំឲ្យបិតាយើងឈឺចិត្ត ហើយនឹងបង្ខូចចំណងមិត្តភាពរបស់យើងជាមួយលោកឡើយ។ ប៉ុន្តែ តើយើងអាចបង្ហាញថាយើងស្រឡាញ់សេចក្ដីសុចរិតតាមរបៀបណាទៀត?
១៣. តើយើងអាចព្យាយាមឲ្យមានសេចក្ដីសុចរិតតាមរបៀបណា? (សុភាសិត ១៥:៩)
១៣ ទី២: ចូរព្យាយាមបង្កើនសេចក្ដីស្រឡាញ់ចំពោះសេចក្ដីសុចរិតពីមួយថ្ងៃទៅមួយថ្ងៃ។ ជាឧទាហរណ៍ បើយើងចង់ឲ្យសាច់ដុំមាំមួន យើងត្រូវខំប្រឹងហាត់ប្រាណរាល់ថ្ងៃ។ ដូចគ្នាដែរ គឺត្រូវការការខំប្រឹងដើម្បីបណ្ដុះឲ្យមានសេចក្ដីស្រឡាញ់ចំពោះសេចក្ដីសុចរិតរបស់ព្រះ។ នេះជាអ្វីមួយដែលយើងអាចធ្វើជារៀងរាល់ថ្ងៃ។ ព្រះយេហូវ៉ាគឺសមហេតុសមផល ហើយលោកមិនដែលតម្រូវឲ្យយើងធ្វើលើសពីសមត្ថភាពរបស់យើងឡើយ។ (ចសព. ១០៣:១៤) លោកពង្រឹងទំនុកចិត្តយើងថា «លោកស្រឡាញ់អ្នកណាដែលព្យាយាមប្រព្រឹត្តអំពើសុចរិត»។ (សូមអាន សុភាសិត ១៥:៩) តាមធម្មតា បើយើងមានគោលដៅណាមួយក្នុងកិច្ចបម្រើព្រះយេហូវ៉ា យើងត្រូវបន្តខំព្យាយាមសម្រេចគោលដៅនោះ។ គឺដូចគ្នាពេលដែលយើងព្យាយាមប្រព្រឹត្តអំពើសុចរិត។ ម្យ៉ាងទៀត ព្រះយេហូវ៉ានឹងជួយយើងឲ្យរីកចម្រើនទៅមុខរហូតបន្តិចម្ដងៗ។—ចសព. ៨៤:៥, ៧
១៤. តើ«សេចក្ដីសុចរិតជាអាវការពារដើមទ្រូង»គឺជាអ្វី ហើយហេតុអ្វីយើងត្រូវពាក់វា?
១៤ ព្រះយេហូវ៉ារំលឹកយើងដោយសេចក្ដីស្រឡាញ់ថា សេចក្ដីសុចរិតមិនមែនជាបន្ទុកទេ។ (១យ៉ូន. ៥:៣) ផ្ទុយទៅវិញ វាការពារយើង ហើយយើងត្រូវការនោះរាល់ថ្ងៃ។ សូមនឹកចាំអំពីគ្រឿងចម្បាំងដែលសាវ័កប៉ូលបានរៀបរាប់។ (អេភ. ៦:១៤-១៨) តើផ្នែកមួយណាការពារបេះដូងរបស់ទាហាន? គឺ«សេចក្ដីសុចរិតជាអាវការពារដើមទ្រូង» ដែលជាតំណាងខ្នាតតម្រាដ៏សុចរិតរបស់ព្រះយេហូវ៉ា។ ដូចអាវការពារដើមទ្រូងបានការពារបេះដូង ខ្នាតតម្រាដ៏សុចរិតរបស់ព្រះយេហូវ៉ាអាចការពារចិត្តរបស់យើង។ នេះគឺជាមូលហេតុសំខាន់ដែលគ្រឿងចម្បាំងរបស់យើងគួររួមបញ្ចូលអាវការពារដើមទ្រូង។—សុភ. ៤:២៣
១៥. តើអ្នកអាចពាក់សេចក្ដីសុចរិតជាអាវការពារដើមទ្រូងយ៉ាងដូចម្ដេច?
១៥ តើអ្នកអាចពាក់សេចក្ដីសុចរិតជាអាវការពារដើមទ្រូងយ៉ាងដូចម្ដេច? គឺដោយគិតអំពីអ្វីដែលព្រះចង់ឲ្យអ្នកធ្វើពេលអ្នកធ្វើការសម្រេចចិត្តរាល់ថ្ងៃ។ ពេលអ្នកធ្វើការសម្រេចចិត្តអំពីចម្រៀង ការកម្សាន្ត សៀវភៅ ឬអ្វីដែលអ្នកនឹងនិយាយ សូមសួរខ្លួនអ្នកជាមុនសិនថា ‹តើនោះនឹងមានឥទ្ធិពលយ៉ាងណាមកលើចិត្តខ្ញុំ? តើអ្វីនោះធ្វើឲ្យព្រះយេហូវ៉ាពេញចិត្តឬទេ? ឬតើនោះលើកស្ទួយអំពើប្រាសចាកសីលធម៌ អំពើហិង្សា ការលោភលន់ ឬការគិតប្រយោជន៍ផ្ទាល់ខ្លួន ជាអ្វីដែលព្រះយេហូវ៉ាចាត់ទុកថាមិនសុចរិតឬ?›។ (ភី. ៤:៨) បើការសម្រេចចិត្តរបស់អ្នកសមស្របតាមបំណងប្រាថ្នារបស់ព្រះយេហូវ៉ា អ្នកកំពុងឲ្យសេចក្ដីសុចរិតរបស់លោកការពារចិត្តអ្នក។
សេចក្ដីសុចរិតរបស់អ្នក អាច«ដូចជារលកសមុទ្រ» (សូមមើលវគ្គ១៦-១៧)
១៦-១៧. តើតាមរបៀបណាអេសាយ ៤៨:១៨ ពង្រឹងទំនុកចិត្តយើងថាយើងអាចរស់នៅស្របតាមខ្នាតតម្រារបស់ព្រះយេហូវ៉ាជារៀងរហូត?
១៦ តើអ្នកធ្លាប់បារម្ភថាអ្នកមិនអាចបន្តរស់នៅស្របតាមខ្នាតតម្រាដ៏សុចរិតរបស់ព្រះយេហូវ៉ាពីមួយថ្ងៃទៅមួយថ្ងៃ ឬពីមួយឆ្នាំទៅមួយឆ្នាំឬទេ? សូមគិតអំពីឧទាហរណ៍មួយដែលព្រះយេហូវ៉ាប្រើនៅក្នុងអេសាយ ៤៨:១៨។ (សូមអាន) ព្រះយេហូវ៉ាសន្យាថា សេចក្ដីសុចរិតរបស់យើងអាចប្រៀប«ដូចជារលកសមុទ្រ»។ សូមស្រមៃគិតថាអ្នកកំពុងឈរនៅលើច្រាំងសមុទ្រដ៏ធំល្វឹងល្វើយ ហើយសម្លឹងមើលទៅរលកដែលបក់បោកឥតឈប់ មួយហើយមួយទៀត។ នៅក្នុងបរិយាកាសដ៏ស្ងប់នោះ តើនៅសុខៗអ្នកនឹងបារម្ភថានៅថ្ងៃណាមួយរលកទាំងនោះនឹងឈប់បក់មកឬទេ? អ្នកប្រាកដជានឹងមិនគិតដូច្នេះទេ! អ្នកដឹងថារលកបានបក់បោកមកលើច្រាំងនោះអស់រាប់ពាន់ឆ្នាំមកហើយ ហើយវានឹងបន្តបក់បោកមករហូត។
១៧ សេចក្ដីសុចរិតរបស់អ្នកអាចប្រៀបដូចជារលកសមុទ្រ! តើតាមរបៀបណា? ពេលអ្នកត្រូវធ្វើការសម្រេចចិត្តណាមួយ សូមពិចារណាជាមុនសិនអំពីអ្វីដែលព្រះយេហូវ៉ាចង់ឲ្យអ្នកធ្វើ។ បន្ទាប់មក សូមធ្វើនោះ។ មិនថាការសម្រេចចិត្តពិបាកយ៉ាងណាក្ដី បិតាដែលស្រឡាញ់អ្នកនឹងតែងតែផ្ដល់កម្លាំងឲ្យអ្នក ហើយជួយអ្នកឲ្យបន្តធ្វើអ្វីដែលត្រឹមត្រូវជារៀងរាល់ថ្ងៃ។—អេ. ៤០:២៩-៣១
១៨. ហេតុអ្វីយើងត្រូវជៀសវាងវិនិច្ឆ័យអ្នកឯទៀតតាមខ្នាតតម្រារបស់ខ្លួន?
១៨ ទី៣: ចូរទុកឲ្យព្រះយេហូវ៉ាជាអ្នកវិនិច្ឆ័យ។ កាលដែលយើងព្យាយាមរស់នៅស្របតាមខ្នាតតម្រាដ៏សុចរិតរបស់ព្រះយេហូវ៉ា យើងត្រូវជៀសវាងវិនិច្ឆ័យអ្នកឯទៀត ហើយជៀសវាងពីការជឿជាក់ថាខ្លួនជាមនុស្សសុចរិត។ ជាជាងមើលងាយអ្នកឯទៀត ហាក់ដូចជាយើងមានសិទ្ធិវិនិច្ឆ័យពួកគេស្របទៅតាមខ្នាតតម្រារបស់ខ្លួន យើងគួរចាំថាព្រះយេហូវ៉ាគឺជា«ចៅក្រមនៃផែនដី»។ (ដក. ១៨:២៥) ព្រះយេហូវ៉ាមិនបានប្រគល់ភារកិច្ចឲ្យយើងវិនិច្ឆ័យអ្នកឯទៀតឡើយ។ តាមពិត លោកយេស៊ូបង្គាប់ថា៖ «ឈប់វិនិច្ឆ័យអ្នកឯទៀត ដើម្បីកុំឲ្យអ្នកទទួលការវិនិច្ឆ័យ»។—ម៉ាថ. ៧:១b
១៩. តើយ៉ូសែបបានបង្ហាញយ៉ាងណាថាគាត់ទុកចិត្តលើការវិនិច្ឆ័យរបស់ព្រះយេហូវ៉ា?
១៩ សូមគិតម្ដងទៀតអំពីគំរូរបស់យ៉ូសែបដែលជាបុរសដ៏សុចរិត។ គាត់បានជៀសវាងពីការវិនិច្ឆ័យអ្នកឯទៀត សូម្បីតែពួកអ្នកដែលប្រព្រឹត្តអាក្រក់មកលើគាត់ ក៏គាត់មិនវិនិច្ឆ័យដែរ។ បងប្រុសៗរបស់គាត់បានធ្វើបាបគាត់ លក់គាត់ឲ្យធ្វើជាអ្នកបម្រើ និងបន្លំឪពុកពួកគេឲ្យជឿថាយ៉ូសែបបានស្លាប់។ ច្រើនឆ្នាំក្រោយមក យ៉ូសែបបានជួបជុំក្រុមគ្រួសាររបស់គាត់វិញ។ ពេលនោះ យ៉ូសែបជាអ្នកគ្រប់គ្រងដែលមានអំណាច ដូច្នេះគាត់អាចវិនិច្ឆ័យបងប្រុសៗរបស់គាត់ដោយឥតមេត្តានិងរកវិធីសងសឹកពួកគេបាន។ បងប្រុសៗរបស់យ៉ូសែបខ្លាចថាគាត់នឹងធ្វើដូច្នេះ ទោះជាពួកគេពិតជាបានស្ដាយក្រោយយ៉ាងស្មោះចំពោះអ្វីដែលពួកគេបានធ្វើក្ដី។ ប៉ុន្តែ យ៉ូសែបបានប្រាប់ពួកគេថា៖ «សូមពួកបងកុំខ្លាចអី។ ខ្ញុំមិនមែនជាព្រះទេ ខ្ញុំគ្មានសិទ្ធិវិនិច្ឆ័យបងៗឡើយ»។ (ដក. ៣៧:១៨-២០, ២៧, ២៨, ៣១-៣៥; ៥០:១៥-២១) ដោយចិត្តរាបទាប យ៉ូសែបបានទុករឿងនោះឲ្យព្រះយេហូវ៉ាវិនិច្ឆ័យ។
២០-២១. តើយើងអាចជៀសវាងពីការជឿជាក់ថាខ្លួនសុចរិតយ៉ាងដូចម្ដេច?
២០ ដូចយ៉ូសែប យើងទុកឲ្យព្រះយេហូវ៉ាជាអ្នកវិនិច្ឆ័យ។ ជាឧទាហរណ៍ យើងមិនដឹងអំពីបំណងចិត្តរបស់បងប្អូនយើងពេលពួកគេធ្វើអ្វីមួយនោះទេ។ យើងមិនអាចមើលឃើញចិត្តរបស់អ្នកឯទៀតឡើយ គឺមានតែព្រះយេហូវ៉ាប៉ុណ្ណោះដែល«ពិនិត្យមើលបំណងចិត្ត»។ (សុភ. ១៦:២) លោកស្រឡាញ់មនុស្សគ្រប់ប្រភេទ មិនថាមកពីមជ្ឈដ្ឋាននិងវប្បធម៌ណាក៏ដោយ។ ម្យ៉ាងទៀត ព្រះយេហូវ៉ាលើកទឹកចិត្តយើងឲ្យ«បើកចិត្តឲ្យទូលាយ»។ (២កូ. ៦:១៣) យើងព្យាយាមស្រឡាញ់បងប្អូនរបស់យើងទាំងអស់ មិនមែនវិនិច្ឆ័យពួកគេទេ។
២១ នេះក៏មានន័យថាយើងមិនវិនិច្ឆ័យពួកអ្នកដែលនៅខាងក្រៅក្រុមជំនុំដែរ។ (១ធី. ២:៣, ៤) តើអ្នកនឹងវិនិច្ឆ័យសាច់ញាតិណាម្នាក់ដែលមិនមែនជាសាក្សីឬទេ ដោយនិយាយថា «គាត់ម្នាក់ហ្នឹងមុខជាគ្មានថ្ងៃចូលសេចក្ដីពិតទេ»? មិនមែនទេ។ ការធ្វើដូច្នេះគឺហួសពីសិទ្ធិរបស់ខ្លួន ហើយបង្ហាញថាអ្នកជឿជាក់ថាខ្លួនសុចរិត។ ព្រះយេហូវ៉ានៅតែផ្ដល់ឱកាសដល់«មនុស្សជាតិនៅគ្រប់ទីកន្លែង»ឲ្យប្រែចិត្ត។ (សកម្ម. ១៧:៣០) សូមចាំជានិច្ចថាការជឿជាក់ថាខ្លួនសុចរិតគឺជាអ្វីមួយដែលមិនសុចរិតទេ។
២២. ហេតុអ្វីអ្នកតាំងចិត្តស្រឡាញ់សេចក្ដីសុចរិត?
២២ សូមឲ្យសេចក្ដីស្រឡាញ់របស់យើងចំពោះខ្នាតតម្រាដ៏សុចរិតរបស់ព្រះយេហូវ៉ានាំឲ្យយើងអរសប្បាយ ហើយធ្វើជាគំរូល្អដល់អ្នកឯទៀត ដើម្បីយើងអាចជួយពួកគេឲ្យចូលកាន់តែជិតយើងនិងព្រះរបស់យើង។ សូមយើងកុំឈប់«ស្រេកឃ្លានចំពោះសេចក្ដីសុចរិត»ឡើយ។ (ម៉ាថ. ៥:៦) សូមជឿជាក់ថាព្រះយេហូវ៉ាកត់សម្គាល់ការខំព្យាយាមរបស់អ្នក ហើយថាលោកពេញចិត្តអ្នកកាលដែលអ្នកព្យាយាមកាន់តែខ្លាំងដើម្បីធ្វើអ្វីដែលត្រឹមត្រូវ។ កាលដែលមនុស្សក្នុងពិភពលោកនេះកាន់តែមិនសុចរិត យើងអាចទទួលការសម្រាលទុក្ខដោយចាំជានិច្ចថា «ព្រះយេហូវ៉ាស្រឡាញ់មនុស្សសុចរិត»។—ចសព. ១៤៦:៨
ចម្រៀងលេខ១៣៩ សូមស្រមៃឃើញខ្លួននៅពិភពលោកថ្មី
a ក្នុងពិភពលោកនេះ មិនងាយរកឃើញមនុស្សសុចរិតទេ។ ប៉ុន្តែ មនុស្សរាប់លាននាក់នៅសព្វថ្ងៃនេះកំពុងដើរតាមមាគ៌ាដ៏សុចរិតមួយ។ អ្នកច្បាស់ជានៅក្នុងចំណោមពួកគេដែរ។ អ្នកព្យាយាមរស់នៅស្របតាមមាគ៌ានោះដោយសារអ្នកស្រឡាញ់ព្រះយេហូវ៉ា ហើយដោយសារព្រះយេហូវ៉ាស្រឡាញ់សេចក្ដីសុចរិត។ តើយើងអាចស្រឡាញ់សេចក្ដីសុចរិតកាន់តែខ្លាំងឡើងយ៉ាងដូចម្ដេច? ក្នុងអត្ថបទនេះ យើងនឹងពិចារណាថា តើសេចក្ដីសុចរិតជាអ្វី និងប្រយោជន៍ដែលយើងទទួលពីការស្រឡាញ់សេចក្ដីសុចរិត។ យើងក៏នឹងពិចារណាអំពីអ្វីដែលយើងអាចធ្វើដើម្បីកាន់តែស្រឡាញ់គុណសម្បត្តិនេះ។
b ជួនកាល ពួកអ្នកចាស់ទុំក្នុងក្រុមជំនុំត្រូវវិនិច្ឆ័យរឿងផ្សេងៗ ដែលរួមមានការប្រព្រឹត្តអំពើខុសឆ្គងធ្ងន់ធ្ងរនិងការប្រែចិត្ត។ (១កូ. ៥:១១; ៦:៥; យ៉ា. ៥:១៤, ១៥) ប៉ុន្តែ ពួកគេនឹកចាំដោយចិត្តរាបទាបថា ពួកគេមិនអាចមើលចិត្តមនុស្សធ្លុះ ហើយថាពួកគេកំពុងវិនិច្ឆ័យតាងនាមព្រះយេហូវ៉ា។ (សូមពិនិត្យបន្ថែម ប្រវត្តិហេតុទី២ ១៩:៦) ពួកគេធ្វើតាមខ្នាតតម្រាយុត្តិធម៌របស់ព្រះ ដែលសមហេតុសមផលនិងប្រកបដោយសេចក្ដីមេត្តាករុណា។