៣ | គំរូនៅក្នុងគម្ពីរអាចជួយអ្នក
គម្ពីររៀបរាប់អំពី . . . បុរសនិងស្ត្រីដ៏ស្មោះត្រង់ដែល«ជាមនុស្សដូចយើងដែរ»។—យ៉ាកុប ៥:១៧
នេះមានន័យថា
គម្ពីរគឺពោរពេញទៅដោយជីវប្រវត្តិរបស់បុរសនិងស្ត្រីជាច្រើននាក់ដែលធ្លាប់មានអារម្មណ៍ផ្សេងៗ។ កាលដែលយើងអានបទពិសោធន៍របស់ពួកគេ យើងប្រហែលជាឃើញថា បុគ្គលខ្លះក៏មានអារម្មណ៍ដូចយើងដែរ។
របៀបដែលនេះអាចជួយយើង
យើងទាំងអស់គ្នាចង់ឲ្យអ្នកឯទៀតយល់អារម្មណ៍របស់យើង ហើយនេះកាន់តែសំខាន់ជាពិសេសនៅពេលដែលយើងកំពុងស៊ូទ្រាំនឹងបញ្ហាសុខភាពផ្លូវចិត្ត។ ពេលដែលយើងអានគម្ពីរ យើងរៀនអំពីបុគ្គលឯទៀតដែលមានរបៀបគិតគូរនិងអារម្មណ៍ដូចយើងដែរ។ ជាលទ្ធផល ពេលយើងជួបការថប់បារម្ភ និងមានអារម្មណ៍ឈឺចាប់ យើងឃើញថាមិនមែនមានតែយើងប៉ុណ្ណោះទេដែលមានបញ្ហានេះ។
គម្ពីរកត់ទុកអំពីពាក្យសម្ដីជាច្រើនរបស់អ្នកដែលមានអារម្មណ៍អស់សង្ឃឹមនិងគិតថាគ្មានអ្នកណាអាចជួយពួកគេបាន។ តើអ្នកធ្លាប់មានអារម្មណ៍ថា ‹ខ្ញុំមិនអាចទ្រាំទៀតបានទេ›? ម៉ូសេ អេលីយ៉ា និងដាវីឌក៏ធ្លាប់មានអារម្មណ៍បែបនេះដែរ។—ជំរឿនបណ្ដាជន ១១:១៤; បណ្ដាស្ដេចទី១ ១៩:៤; ចម្រៀងសរសើរព្រះ ៥៥:៤
គម្ពីរប្រាប់យើងអំពីស្ត្រីម្នាក់ឈ្មោះហាណា ដែលមានអារម្មណ៍«ជូរចត់ក្នុងចិត្តខ្លាំងណាស់» ដោយសារនាងមិនអាចមានកូនបាន ហើយត្រូវប្រពន្ធចុងរបស់ប្ដីនាង រករឿងឈ្នានីសឥតឈប់។—សាំយូអែលទី១ ១:៦, ១០
យើងក៏ប្រហែលជាអាចយល់អារម្មណ៍របស់បុរសម្នាក់ក្នុងគម្ពីរឈ្មោះយ៉ូប។ ទោះជាគាត់មានជំនឿរឹងមាំទៅលើព្រះក៏ដោយ តែគាត់ធ្លាប់មានអារម្មណ៍ឈឺចាប់យ៉ាងខ្លាំង ហើយបាននិយាយថា៖ «ខ្ញុំស្អប់ខ្ពើមជីវិតរបស់ខ្ញុំណាស់ ខ្ញុំមិនចង់រស់នៅតទៅទៀតទេ»។—យ៉ូប ៧:១៦
ដោយរៀនអំពីរបៀបដែលបុគ្គលទាំងនេះ បានយកឈ្នះគំនិតអវិជ្ជមានរបស់ពួកគេ នោះយើងក៏អាចមានកម្លាំងដែលយើងត្រូវការដើម្បីស៊ូទ្រាំនឹងទុក្ខលំបាករបស់យើងផងដែរ។