[ពីឆ្វេងទៅស្ដាំ] បងម៉ាសិឡូ បងយ៉ូម៉ារ៉ា និងបងអិវ៉ា។ ពួកគាត់ម្នាក់ៗកាន់សេចក្ដីបកប្រែពិភពលោកថ្មី ជាអក្សរផុសភាសាអេស្ប៉ាញ
ពួកគាត់បានទទួលសេចក្ដីស្រឡាញ់ពីក្រុមជំនុំ
បងស្រីយ៉ូម៉ារ៉ានិងប្អូនប្រុសៗរបស់គាត់ម៉ាសិឡូ ព្រមទាំងអិវ៉ារស់នៅភូមិដ៏តូចមួយ នៅប្រទេសក្វាតេម៉ាឡា។ បងយ៉ូម៉ារ៉ាបានចាប់ផ្ដើមសិក្សាគម្ពីរជាមួយសាក្សីព្រះយេហូវ៉ា ហើយក្រោយមកប្អូនប្រុសៗរបស់គាត់ក៏បានចាប់ផ្ដើមសិក្សាដែរ។ ប៉ុន្តែមានបញ្ហាមួយគឺបងប្អូនទាំងបីនាក់នេះពិការភ្នែក ហើយមិនចេះអានអក្សរផុសទេ។ ដូច្នេះ អ្នកបង្រៀនគម្ពីរបានអានវគ្គនីមួយៗនិងខគម្ពីរក្នុងមេរៀនឲ្យពួកគាត់ស្ដាប់។
ពួកគាត់ក៏ពិបាកចូលរួមកិច្ចប្រជុំដែរ។ ពួកគាត់មិនអាចធ្វើដំណើរ៤០នាទីដើម្បីទៅសាលប្រជុំដែលជិតជាងគេបំផុតដោយខ្លួនឯងបានទេ។ ប៉ុន្តែ បងប្អូនក្រុមជំនុំបានជួយពួកគាត់ឲ្យទៅកិច្ចប្រជុំទាំងអស់។ ម្យ៉ាងទៀត ពេលបងប្អូនបង្កើតបីនាក់នោះបានចាប់ផ្ដើមថ្លែងសុន្ទរកថាជាសិស្សក្នុងកិច្ចប្រជុំសម្រាប់កិច្ចបម្រើនិងជីវិតជាគ្រិស្តសាសនិក បងប្អូនក្នុងក្រុមជំនុំបានជួយពួកគាត់ឲ្យទន្ទេញចាំផ្នែករបស់ពួកគាត់។
នៅខែឧសភា ឆ្នាំ២០១៩ ចាប់ផ្ដើមមានកិច្ចប្រជុំក្រុមជំនុំនៅភូមិរបស់ពួកគាត់។ នៅពេលនោះ ប្ដីប្រពន្ធមួយគូដែលជាអ្នកត្រួសត្រាយពេញពេលបានរើទៅភូមិនោះ។ ប្ដីប្រពន្ធនោះមិនចេះអាននិងសរសេរអក្សរផុសទេ ប៉ុន្តែពួកគេចង់បង្រៀនបងប្អូនបីនាក់ដែលពិការភ្នែកទាំងនេះឲ្យចេះអាននិងសរសេរអក្សរនោះ។ ដូច្នេះ ពួកគេបានទៅបណ្ណាល័យមួយដើម្បីរៀនអំពីរបៀបបង្រៀនអ្នកឯទៀតឲ្យចេះប្រើអក្សរផុស។
បងម៉ាសិឡូឆ្លើយក្នុងអំឡុងកិច្ចប្រជុំ
ក្នុងរយៈពេលប៉ុន្មានខែ បងប្អូនបង្កើតបីនាក់នោះចេះអានអក្សរផុសយ៉ាងស្រួល ហើយនោះបានឲ្យពួកគាត់បណ្ដុះចំណងមិត្តភាពកាន់តែជិតស្និទ្ធជាមួយព្រះយេហូវ៉ា។a ឥឡូវនេះ បងយ៉ូម៉ារ៉ា បងម៉ាសិឡូ និងបងអិវ៉ាបម្រើជាអ្នកត្រួសត្រាយពេលពេល ហើយបងម៉ាសិឡូជាជំនួយការខាងកិច្ចបម្រើ។ ពួកគាត់ជាប់រវល់ណាស់ក្នុងកិច្ចបម្រើព្រះយេហូវ៉ារាល់ថ្ងៃ។ ពួកគាត់មានចិត្តខ្នះខ្នែងជាខ្លាំង រហូតដល់អស់អ្នកដែលនៅជុំវិញពួកគាត់ក៏មានចិត្តខ្នះខ្នែងដូចពួកគាត់ដែរ។
បងប្អូនបង្កើតទាំងបីនាក់នោះមានចិត្តកតញ្ញូចំពោះការគាំទ្រដែលប្រកបដោយសេចក្ដីស្រឡាញ់ពីក្រុមជំនុំ។ បងយ៉ូម៉ារ៉ានិយាយថា៖ «ចាប់តាំងពីយើងបានជួបសាក្សីព្រះយេហូវ៉ាជាលើកដំបូង ពួកគេបានបង្ហាញសេចក្ដីស្រឡាញ់ជាគ្រិស្តសាសនិកពិតចំពោះយើង»។ បងម៉ាសិឡូបន្ថែមថា៖ «យើងមានមិត្តសម្លាញ់ក្នុងក្រុមជំនុំយើង ហើយយើងមានក្រុមគ្រួសារមួយនៅទូទាំងពិភពលោកដែលមានសាមគ្គីភាពនិងសេចក្ដីស្រឡាញ់»។ បងយ៉ូម៉ារ៉ានិងប្អូនប្រុសៗរបស់គាត់ទន្ទឹងរង់ចាំគ្រាដែលពួកគាត់នឹងឃើញផែនដីប្រែក្លាយទៅជាសួនឧទ្យាន។—ចសព. ៣៧:១០, ១១; អេ. ៣៥:៥
a សៀវភៅស្ដើងដែលមានចំណងជើងថា ចូររៀនអានអក្សរផុស(Learn to Read Braille) បានត្រូវរៀបចំឡើងដើម្បីជួយបុគ្គលដែលងងឹតភ្នែក ឬពិការភ្នែកឲ្យរៀនអំពីរបៀបអាននិងសរសេរអក្សរផុស។