អត្ថបទសិក្សា ២៣
ចម្រៀងលេខ២៨ ការចងមិត្តភាពជាមួយនឹងព្រះយេហូវ៉ា
ការអញ្ជើញដ៏ខ្ពង់ខ្ពស់ពីព្រះយេហូវ៉ាឲ្យធ្វើជាភ្ញៀវរបស់លោក
«ត្រសាលខ្ញុំនឹងនៅជាមួយនឹងពួកគេ ខ្ញុំនឹងទៅជាព្រះរបស់ពួកគេ»។—អេគ. ៣៧:២៧
ចំណុចផ្ដោត
ដើម្បីជួយយើងឲ្យយល់អំពីអត្ថន័យនៃការធ្វើជាភ្ញៀវក្នុងត្រសាលក្នុងន័យធៀបរបស់ព្រះយេហូវ៉ា និងរបៀបដែលលោកយកចិត្តទុកដាក់ចំពោះយើងក្នុងនាមជាអ្នកទទួលភ្ញៀវ។
១-២. តើព្រះយេហូវ៉ាអញ្ជើញអ្នកបម្រើដ៏ស្មោះភក្ដីរបស់លោកឲ្យធ្វើអ្វី?
ចំពោះអ្នក តើអ្នកចាត់ទុកព្រះយេហូវ៉ាជាអ្វី? អ្នកប្រហែលជាឆ្លើយថា ‹ព្រះយេហូវ៉ាជាបិតា ជាព្រះ និងជាមិត្តរបស់ខ្ញុំ›។ អ្នកប្រហែលជាអាចគិតអំពីរបៀបផ្សេងទៀតដើម្បីរៀបរាប់អំពីព្រះយេហូវ៉ា។ ប៉ុន្តែ តើអ្នកក៏ចាត់ទុកព្រះយេហូវ៉ាជាអ្នកទទួលភ្ញៀវឬទេ?
២ ស្ដេចដាវីឌបានប្រដូចមិត្តភាពរបស់ព្រះយេហូវ៉ាជាមួយនឹងអ្នកបម្រើដ៏ស្មោះភក្ដីរបស់លោក ទៅនឹងទំនាក់ទំនងរវាងអ្នកទទួលភ្ញៀវនិងភ្ញៀវរបស់គាត់។ ដាវីឌបានសួរថា៖ «ឱព្រះយេហូវ៉ា តើអ្នកណាអាចជាភ្ញៀវក្នុងត្រសាលរបស់លោក? តើអ្នកណាអាចអាស្រ័យនៅភ្នំបរិសុទ្ធរបស់លោក?»។ (ចសព. ១៥:១) តាមរយៈពាក្យនេះដែលសរសេរក្រោមការដឹកនាំរបស់ព្រះ យើងរៀនថាយើងអាចក្លាយជាភ្ញៀវរបស់ព្រះយេហូវ៉ា ពោលគឺជាមិត្តរបស់លោក។ នេះជាការអញ្ជើញដ៏ខ្ពង់ខ្ពស់ពីព្រះយេហូវ៉ាមែន!
ព្រះយេហូវ៉ាចង់ឲ្យយើងធ្វើជាភ្ញៀវរបស់លោក
៣. តើអ្នកណាជាភ្ញៀវដំបូងរបស់ព្រះយេហូវ៉ា ហើយតើព្រះយេហូវ៉ានិងភ្ញៀវរបស់លោកមានអារម្មណ៍យ៉ាងណាចំពោះគ្នា?
៣ មុនព្រះយេហូវ៉ាចាប់ផ្ដើមបង្កើតអ្វីៗទាំងអស់ គឺលោកនៅតែឯង។ ប៉ុន្តែក្រោយមក ព្រះយេហូវ៉ាបានបង្កើតបុត្រច្បងរបស់លោក។ ព្រះយេហូវ៉ាហាក់ដូចជាអញ្ជើញភ្ញៀវដំបូងនេះឲ្យចូលក្នុងត្រសាលលោក ហើយលោកសប្បាយចិត្តធ្វើដូច្នេះ។ គម្ពីរចែងថាព្រះយេហូវ៉ា«រីករាយក្រៃលែង»ចំពោះបុត្រលោក។ ភ្ញៀវដំបូងនោះក៏«ត្រេកអរខ្លាំងណាស់»នៅ«គ្រប់ពេលវេលាដែល[លោក]បាននៅជាមួយនឹង[ព្រះយេហូវ៉ា]»។—សុភ. ៨:៣០
៤. តើតាមរបៀបណាព្រះយេហូវ៉ាបានពង្រីកត្រសាលរបស់លោកបន្តិចម្ដងៗ?
៤ ក្រោយមក ព្រះយេហូវ៉ាបានបង្កើតបុគ្គលវិញ្ញាណឯទៀត ហើយពួកគេក៏បានត្រូវអញ្ជើញឲ្យធ្វើជាភ្ញៀវរបស់លោកដែរ។ គម្ពីរបានហៅទេវតារបស់លោកថាជា«កូនព្រះ» ហើយបង្ហាញថាពួកគេត្រេកអរនៅជាមួយនឹងព្រះយេហូវ៉ា។ (យ៉ូប ៣៨:៧; ដាន. ៧:១០) អស់ជាច្រើនឆ្នាំ ភ្ញៀវរបស់ព្រះយេហូវ៉ាមានតែពួកអ្នកដែលរស់នៅជាមួយលោកនៅស្ថានសួគ៌ប៉ុណ្ណោះ។ ប៉ុន្តែ ក្រោយមកលោកបានបង្កើតមនុស្ស ហើយពួកគេក៏អាចទៅជាភ្ញៀវរបស់លោកដែរ។ ពួកអ្នកដែលនៅក្នុងចំណោមភ្ញៀវទាំងនោះមានដូចជាអេណុក ណូអេ អាប្រាហាំ និងយ៉ូប។ បុគ្គលទាំងនោះដែលជាអ្នកគោរពប្រណិប័តន៍ពិតបានត្រូវរាប់ជាមិត្តរបស់ព្រះ ឬជាបុគ្គលដែលដើរ«ជាមួយនឹងព្រះពិត»។—ដក. ៥:២៤; ៦:៩; យ៉ូប ២៩:៤; អេ. ៤១:៨
៥. តើយើងអាចរៀនអ្វីពីទំនាយនៅអេសេគាល ៣៧:២៦, ២៧?
៥ អស់រាប់រយឆ្នាំ ព្រះយេហូវ៉ាបានបន្ដអញ្ជើញមិត្តរបស់លោកឲ្យធ្វើជាភ្ញៀវលោក។ (សូមអាន អេសេគាល ៣៧:២៦, ២៧) ជាឧទាហរណ៍ តាមរយៈទំនាយរបស់អេសេគាល យើងរៀនថាព្រះចង់ឲ្យអ្នកបម្រើដ៏ស្មោះភក្ដីរបស់លោកមានចំណងមិត្តភាពជិតស្និទ្ធជាមួយលោក។ លោកសន្យាថាលោកនឹងធ្វើ«កិច្ចព្រមព្រៀងសន្តិភាពជាមួយនឹងពួកគេ»។ ទំនាយនោះសំដៅទៅលើគ្រាដែលពួកអ្នកដែលមានសេចក្ដីសង្ឃឹមឡើងទៅស្ថានសួគ៌និងពួកអ្នកដែលមានសេចក្ដីសង្ឃឹមរស់នៅផែនដី នឹងរួបរួមគ្នានៅក្នុងត្រសាលរបស់លោកជា«ហ្វូងតែមួយ»។ (យ៉ូន. ១០:១៦) នេះកំពុងកើតឡើងនៅសព្វថ្ងៃនេះ!
ព្រះយកចិត្តទុកដាក់ចំពោះយើងមិនថាយើងនៅទីណា
៦. តើបុគ្គលណាម្នាក់ក្លាយទៅជាភ្ញៀវក្នុងត្រសាលរបស់ព្រះយេហូវ៉ាយ៉ាងដូចម្ដេច ហើយតើត្រសាលរបស់លោកនៅឯណា?
៦ នៅសម័យគម្ពីរ ត្រសាលរបស់បុគ្គលម្នាក់គឺជាកន្លែងដែលអាចសម្រាកនិងការពារខ្លួនពីអាកាសធាតុ។ ភ្ញៀវនៅក្នុងត្រសាលនោះអាចរំពឹងថាគាត់នឹងទទួលការមើលថែយ៉ាងល្អ។ ពេលយើងប្រគល់ជីវិតរបស់យើងជូនព្រះយេហូវ៉ា យើងក្លាយជាភ្ញៀវរបស់ព្រះនៅក្នុងត្រសាលក្នុងន័យធៀបរបស់លោក។ (ចសព. ៦១:៤) យើងសប្បាយទទួលសេចក្ដីបង្រៀនដែលប្រៀបដូចជាអាហារជាបរិបូរ ហើយមានមិត្តភាពជាមួយអ្នកឯទៀតដែលជាភ្ញៀវរបស់ព្រះយេហូវ៉ាដែរ។ ត្រសាលរបស់ព្រះយេហូវ៉ាក្នុងន័យធៀប មិនមែនមានតែនៅទីតាំងណាមួយទេ។ ជាឧទាហរណ៍ អ្នកប្រហែលជាធ្លាប់ធ្វើដំណើរទៅប្រទេសណាមួយ ហើយចូលរួមមហាសន្និបាតពិសេស។ នៅទីនោះ អ្នកបានជួបបុគ្គលឯទៀត ដែលសប្បាយចិត្តនៅក្នុងត្រសាលរបស់ព្រះ។ ត្រសាលរបស់ព្រះយេហូវ៉ានៅកន្លែងណាក៏ដោយដែលមានអ្នកគោរពប្រណិប័តន៍ដ៏ស្មោះត្រង់របស់លោក។—បប. ២១:៣
៧. ហេតុអ្វីយើងអាចនិយាយថាបុគ្គលស្មោះត្រង់ដែលបានស្លាប់នៅតែជាភ្ញៀវក្នុងត្រសាលរបស់ព្រះយេហូវ៉ា? (សូមមើលរូបភាពផងដែរ)
៧ ចុះយ៉ាងណាបុគ្គលស្មោះត្រង់ដែលបានស្លាប់? តើសមហេតុផលឬទេឲ្យយើងសន្និដ្ឋានថាពួកគេនៅតែជាភ្ញៀវក្នុងត្រសាលរបស់ព្រះយេហូវ៉ា? គឺសមហេតុសមផលមែន! ហេតុអ្វីយើងអាចនិយាយដូច្នេះ? ដោយសារក្នុងការចងចាំរបស់ព្រះយេហូវ៉ា បុគ្គលទាំងនេះកំពុងរស់នៅ។ លោកយេស៊ូបានពន្យល់ថា៖ ‹ការពិតក្នុងកំណត់ហេតុអំពីគុម្ពបន្លា ម៉ូសេក៏បានបញ្ជាក់ថាមនុស្សស្លាប់នឹងត្រូវប្រោសឲ្យរស់ឡើងវិញដែរ ពេលគាត់ហៅព្រះយេហូវ៉ាថា«ព្រះរបស់អាប្រាហាំ ព្រះរបស់អ៊ីសាក និងព្រះរបស់យ៉ាកុប»។ លោកមិនមែនជាព្រះរបស់មនុស្សស្លាប់ទេ តែជាព្រះរបស់មនុស្សរស់វិញ ព្រោះលោកចាត់ទុកថាពួកគេទាំងអស់គ្នាកំពុងរស់នៅ›។—លូក. ២០:៣៧, ៣៨
សូម្បីតែពួកអ្នកបម្រើដ៏ស្មោះត្រង់ដែលបានស្លាប់ហើយ ក៏នៅតែអាចជាភ្ញៀវក្នុងត្រសាលរបស់ព្រះ (សូមមើលវគ្គ៧)
យើងទទួលប្រយោជន៍ តែក៏ទទួលភារកិច្ច
៨. តើភ្ញៀវរបស់ព្រះយេហូវ៉ាទទួលប្រយោជន៍យ៉ាងណាពីការនៅក្នុងត្រសាលរបស់លោក?
៨ ដូចត្រសាលជាកន្លែងដែលមនុស្សអាចសម្រាកនិងជាទីជ្រកពីអាកាសធាតុ ត្រសាលរបស់ព្រះយេហូវ៉ាការពារភ្ញៀវរបស់លោកពីអ្វីណាក៏ដោយដែលអាចបង្ខូចចំណងមិត្តភាពរបស់ពួកគេជាមួយនឹងលោក ហើយផ្ដល់ឲ្យពួកគេនូវសេចក្ដីសង្ឃឹមដ៏ពិតប្រាកដសម្រាប់ថ្ងៃអនាគត។ ពេលយើងបន្ដជិតស្និទ្ធជាមួយនឹងព្រះយេហូវ៉ា សាថានមិនអាចធ្វើអ្វីដែលនាំឲ្យយើងរងទុក្ខរហូតទេ។ (ចសព. ៣១:២៣; ១យ៉ូន. ៣:៨) នៅក្នុងពិភពលោកថ្មី ព្រះយេហូវ៉ានឹងបន្ដការពារមិត្តដ៏ស្មោះត្រង់របស់លោក មិនគ្រាន់តែពីអ្វីដែលអាចបង្ខូចចំណងមិត្តភាពរបស់ពួកគេជាមួយលោកប៉ុណ្ណោះទេ តែក៏ការពារពួកគេពីសេចក្ដីស្លាប់ដែរ។—បប. ២១:៤
៩. តើព្រះយេហូវ៉ាតម្រូវឲ្យភ្ញៀវរបស់លោកប្រព្រឹត្តយ៉ាងណា?
៩ ពិតជាកិត្តិយសណាស់ក្នុងការធ្វើជាភ្ញៀវក្នុងត្រសាលរបស់ព្រះយេហូវ៉ា ពោលគឺមានចំណងមិត្តភាពជិតស្និទ្ធដែលអាចស្ថិតស្ថេរជារៀងរហូតជាមួយលោក។ តើយើងគួរប្រព្រឹត្តយ៉ាងណាបើយើងចង់បន្ដធ្វើជាភ្ញៀវរបស់លោក? បើអ្នកបានត្រូវអញ្ជើញឲ្យទៅផ្ទះអ្នកណាម្នាក់ អ្នកនឹងចង់ផ្គាប់ចិត្តគាត់។ ជាឧទាហរណ៍ គាត់ប្រហែលជាតម្រូវឲ្យអ្នកដោះស្បែកជើងមុនចូលផ្ទះ ហើយអ្នកនឹងសុខចិត្តធ្វើដូច្នេះ។ ស្រដៀងគ្នាដែរ យើងច្បាស់ជាចង់ដឹងថាតើព្រះយេហូវ៉ាតម្រូវអ្វីពីពួកអ្នកដែលចង់បន្ដធ្វើជាភ្ញៀវក្នុងត្រសាលរបស់លោក។ សេចក្ដីស្រឡាញ់របស់យើងចំពោះព្រះយេហូវ៉ាជំរុញចិត្តយើងឲ្យធ្វើអ្វីណាក៏ដោយដែលយើងអាចធ្វើបាន«ដើម្បីធ្វើឲ្យលោកពេញចិត្តទាំងស្រុង»។ (កូឡ. ១:១០) ម្យ៉ាងទៀត ទោះជាយើងចាត់ទុកព្រះយេហូវ៉ាជាមិត្តសម្លាញ់របស់យើងក្ដី យើងទទួលស្គាល់ថាលោកក៏ជាព្រះនិងជាបិតារបស់យើងដែលសមនឹងទទួលការគោរពពីយើង។ (ចសព. ២៥:១៤) យើងគួរចងចាំចំណុចនេះ ហើយត្រូវគោរពព្រះយេហូវ៉ាយ៉ាងជ្រាលជ្រៅជានិច្ច។ ការគោរពដ៏ជ្រាលជ្រៅនេះនឹងជួយយើងឲ្យជៀសវាងពីការប្រព្រឹត្តណាដែលធ្វើឲ្យលោកទាស់ចិត្ត។ យើងប្រាកដជាចង់‹ដើរជាមួយព្រះដោយចិត្តសុភាព›។—មីកា ៦:៨
ព្រះយេហូវ៉ាមិនរើសមុខក្នុងតំបន់ស្ងាត់ជ្រងំ
១០-១១. តើការប្រព្រឹត្តរបស់ព្រះយេហូវ៉ាចំពោះពួកអ៊ីស្រាអែលនៅតំបន់ស្ងាត់ជ្រងំស៊ីណាយបង្ហាញយ៉ាងណាថាលោកមិនរើសមុខ?
១០ ព្រះយេហូវ៉ាប្រព្រឹត្តទៅលើភ្ញៀវរបស់លោកដោយមិនរើសមុខ។ (រ៉ូម ២:១១) យើងអាចរៀនចំណុចនេះពីរបៀបដែលលោកប្រព្រឹត្តទៅលើពួកអ៊ីស្រាអែលនៅតំបន់ស្ងាត់ជ្រងំស៊ីណាយ។
១១ ក្រោយពីព្រះយេហូវ៉ាបានសង្គ្រោះរាស្ត្ររបស់លោកពីភាពជាខ្ញុំបម្រើនៅស្រុកអេហ្ស៊ីប លោកបានតែងតាំងពួកសង្ឃឲ្យបម្រើនៅត្រសាល។ លោកបានផ្ដល់ភារកិច្ចឲ្យពួកលេវីធ្វើកិច្ចការផ្សេងទៀតនៅឯត្រសាល។ តើពួកអ្នកដែលបម្រើនៅត្រសាល ឬពួកអ្នកដែលបោះជំរំនៅជិតត្រសាលទទួលការយកចិត្តទុកដាក់ខ្លាំងជាងអ្នកឯទៀតពីព្រះយេហូវ៉ាឬទេ? មិនមែនទេ! ព្រះយេហូវ៉ាមិនរើសមុខឡើយ។
១២. តើរបៀបដែលព្រះយេហូវ៉ាប្រព្រឹត្តចំពោះជនជាតិអ៊ីស្រាអែលនៅតំបន់ស្ងាត់ជ្រងំ បង្ហាញយ៉ាងណាថាលោកមិនរើសមុខ? (ដំណើរចាកចេញ ៤០:៣៨) (សូមមើលរូបភាពផងដែរ)
១២ ជនជាតិអ៊ីស្រាអែលគ្រប់រូបនៅក្នុងជំរំ មានឱកាសធ្វើជាមិត្តរបស់ព្រះយេហូវ៉ាមិនថាពួកគេមានភារកិច្ចពិសេសឬមិនមាន ឬថារស់នៅឆ្ងាយឬជិតពីត្រសាលក្ដី។ ជាឧទាហរណ៍ ព្រះយេហូវ៉ាធ្វើឲ្យប្រាកដថាប្រជាជាតិទាំងមូលអាចឃើញអព្ភូតហេតុដែលជាបង្គោលពពកនិងបង្គោលភ្លើងនៅពីលើត្រសាល។ (សូមអាន ដំណើរចាកចេញ ៤០:៣៨) ពេលពពកចាប់ផ្ដើមប្ដូរទិសដៅថ្មី នោះសូម្បីតែពួកអ្នកដែលនៅឆ្ងាយជាងគេពីត្រសាលក៏អាចមើលឃើញ ហើយរៀបចំអីវ៉ាន់ រើត្រសាលរបស់ខ្លួន និងចេញទៅទាន់បណ្ដាជនឯទៀត។ (ជប. ៩:១៥-២៣) ពួកគេទាំងអស់អាចឮសំឡេងខ្លាំងៗរបស់ត្រែប្រាក់ពីរដែលផ្ដល់សញ្ញាឲ្យពួកគេចាប់ផ្ដើមចេញដំណើរ។ (ជប. ១០:២) ដូច្នេះ ការរស់នៅជិតត្រសាលមិនបង្ហាញថា បុគ្គលណាម្នាក់មានចំណងមិត្តភាពជិតស្និទ្ធជាមួយព្រះយេហូវ៉ាជាងពួកអ្នកដែលនៅឆ្ងាយពីត្រសាលទេ។ ផ្ទុយទៅវិញ ជនជាតិអ៊ីស្រាអែលគ្រប់រូបអាចធ្វើជាភ្ញៀវរបស់លោក ហើយអាចប្រាកដថានឹងទទួលការណែនាំនិងការការពារពីលោក។ ស្រដៀងគ្នាដែរ នៅសព្វថ្ងៃនេះមិនថាយើងរស់នៅកន្លែងណានៅលើផែនដី យើងអាចទទួលប្រយោជន៍ពីសេចក្ដីស្រឡាញ់ ការមើលថែ និងការការពារពីព្រះយេហូវ៉ា។
ការដែលត្រសាលនៅកណ្ដាលជំរំបង្ហាញថាព្រះយេហូវ៉ាមិនរើសមុខ (សូមមើលវគ្គ១២)
ព្រះយេហូវ៉ាមិនរើសមុខនៅសព្វថ្ងៃនេះ
១៣. តើព្រះយេហូវ៉ាបង្ហាញថាលោកមិនរើសមុខនៅសព្វថ្ងៃនេះតាមរបៀបណា?
១៣ អ្នកខ្លះនៅក្នុងចំណោមរាស្ត្ររបស់ព្រះនៅសព្វថ្ងៃនេះ រស់នៅជិតមន្ទីរចាត់ការពិភពលោក ឬការិយាល័យសាខារបស់សាក្សីព្រះយេហូវ៉ា។ អ្នកខ្លះទៀតបម្រើនៅអគារទាំងនោះតែម្ដង។ ដោយហេតុនេះ បុគ្គលទាំងនេះអាចរួមចំណែកក្នុងកិច្ចការជាច្រើនដែលធ្វើឡើងនៅទីតាំងទាំងនោះ ហើយមានទំនាក់ទំនងដោយផ្ទាល់ជាមួយពួកអ្នកដែលនាំមុខ។ អ្នកខ្លះបម្រើជាអ្នកធ្វើដំណើរត្រួតពិនិត្យ ឬបំពេញកិច្ចបម្រើពេញពេលពិសេសផ្សេងទៀត។ បើអ្នកនៅក្នុងចំណោមបងប្អូនភាគច្រើនដែលមិនស្ថិតក្នុងស្ថានភាពទាំងនេះនៅសព្វថ្ងៃ អ្នកអាចជឿជាក់ថាអ្នកនៅតែជាភ្ញៀវរបស់ព្រះយេហូវ៉ា ហើយថាលោកស្រឡាញ់អ្នក។ លោកស្គាល់អ្នកយ៉ាងច្បាស់ ហើយលោកផ្ដល់អ្វីដែលអ្នកត្រូវការ។ (១ពេ. ៥:៧) ព្រះយេហូវ៉ាផ្ដល់សេចក្ដីបង្រៀនដែលប្រៀបដូចជាអាហារដល់អ្នកបម្រើម្នាក់ៗរបស់លោក ហើយលោកណែនាំនិងការពារពួកគេ។
១៤. តើព្រះយេហូវ៉ាបង្ហាញថាលោកមិនរើសមុខតាមរបៀបណាទៀត?
១៤ របៀបមួយទៀតដែលព្រះយេហូវ៉ាបង្ហាញថាលោកមិនរើសមុខ គឺដោយធ្វើឲ្យប្រាកដថាមនុស្សទាំងអស់នៅទូទាំងពិភពលោកអាចអានគម្ពីរបាន។ បទគម្ពីរបរិសុទ្ធបានត្រូវសរសេរលើកដំបូងជាបីភាសាគឺ៖ ភាសាហេប្រឺ ភាសាអេរ៉ាម និងភាសាក្រិច។ តើពួកអ្នកដែលអាចអានបទគម្ពីរជាភាសាដើមមានចំណងមិត្តភាពជិតស្និទ្ធជាមួយនឹងព្រះយេហូវ៉ាជាងពួកអ្នកដែលមិនចេះភាសាទាំងនោះឬ? មិនមែនទេ។—ម៉ាថ. ១១:២៥
១៥. តើអ្វីបង្ហាញថាព្រះយេហូវ៉ាមិនរើសមុខ? (សូមមើលរូបភាពផងដែរ)
១៥ ការពេញចិត្តពីព្រះយេហូវ៉ាមិនអាស្រ័យទៅលើការអប់រំ ឬការចេះភាសាទេ។ ព្រះយេហូវ៉ាធ្វើឲ្យមនុស្សទាំងអស់នៅទូទាំងពិភពលោកអាចទទួលប្រាជ្ញាពីលោក មិនគ្រាន់តែអ្នកដែលមានការអប់រំខ្ពស់ប៉ុណ្ណោះទេ។ គម្ពីរដែលជាបណ្ដាំរបស់លោកបានត្រូវបកប្រែរាប់ពាន់ភាសា ដូច្នេះមនុស្សនៅទូទាំងពិភពលោកអាចទទួលប្រយោជន៍ពីសេចក្ដីបង្រៀនក្នុងគម្ពីរ ហើយរៀនអំពីរបៀបដែលពួកគេអាចទៅជាមិត្តសម្លាញ់របស់លោក។—២ធី. ៣:១៦, ១៧
តើការដែលគម្ពីរបានត្រូវបកប្រែជាច្រើនភាសាបង្ហាញយ៉ាងណាថាព្រះយេហូវ៉ាមិនរើសមុខ? (សូមមើលវគ្គ១៥)
ចូរបន្ដធ្វើឲ្យព្រះយេហូវ៉ា«ពេញចិត្ត»
១៦. យោងទៅតាមសកម្មភាព ១០:៣៤, ៣៥ តើតាមរបៀបណាយើងអាចបន្ដធ្វើឲ្យព្រះយេហូវ៉ាពេញចិត្ត?
១៦ គឺជាឯកសិទ្ធិណាស់ដែលព្រះយេហូវ៉ាទទួលស្វាគមន៍យើងជាភ្ញៀវក្នុងត្រសាលរបស់លោក។ លោកជាបុគ្គលដែលសប្បុរសជាងគេ និងមានសេចក្ដីស្រឡាញ់ខ្លាំងជាងគេ ហើយជាអ្នកទទួលភ្ញៀវដោយរាក់ទាក់ជាងគេ។ បន្ថែមទៅទៀត លោកមិនរើសមុខឡើយ។ លោកស្វាគមន៍យើង ទោះជាយើងរស់នៅទីណា មានប្រវត្តិ ការអប់រំ ពូជសាសន៍ កុលសម្ព័ន្ធ អាយុ ឬភេទណាក៏ដោយ។ ក៏ប៉ុន្តែ មានតែពួកអ្នកដែលធ្វើតាមខ្នាតតម្រារបស់លោកប៉ុណ្ណោះអាចធ្វើជាភ្ញៀវរបស់លោក។—សូមអាន សកម្មភាព ១០:៣៤, ៣៥
១៧. តើយើងនឹងរកព័ត៌មានបន្ថែមអំពីការធ្វើជាភ្ញៀវក្នុងត្រសាលរបស់ព្រះយេហូវ៉ានៅឯណា?
១៧ ដូចបានត្រូវកត់ទុកនៅចម្រៀងសរសើរព្រះ ១៥:១ ដាវីឌបានលើកសំណួរថា៖ «ឱព្រះយេហូវ៉ា តើអ្នកណាអាចជាភ្ញៀវក្នុងត្រសាលរបស់លោក? តើអ្នកណាអាចអាស្រ័យនៅភ្នំបរិសុទ្ធរបស់លោក?»។ អ្នកតែងចម្រៀងសរសើរព្រះបានឆ្លើយសំណួរទាំងនេះក្រោមការដឹកនាំពីព្រះ។ ក្នុងអត្ថបទបន្ទាប់ យើងនឹងពិចារណាអ្វីមួយចំនួនដែលយើងត្រូវធ្វើដើម្បីរក្សាខ្លួនជាមនុស្សដែលព្រះយេហូវ៉ាពេញចិត្ត។
ចម្រៀងលេខ៣២ ចូរមកខាងព្រះយេហូវ៉ា!