អត្ថបទសិក្សា ១១
ចម្រៀងលេខ៥៧ ចូរផ្សព្វផ្សាយដល់មនុស្សគ្រប់ប្រភេទ
ចូរមានចិត្តខ្នះខ្នែងក្នុងកិច្ចបម្រើផ្សាយដូចលោកយេស៊ូ
«លោកម្ចាស់ . . . ចាត់ពួកគេជាគូៗឲ្យចូលគ្រប់ក្រុងនិងគ្រប់ទីកន្លែងដែលលោកបម្រុងនឹងទៅ»។—លូក. ១០:១
ចំណុចផ្ដោត
របៀបបួនយ៉ាងដែលអ្នកអាចមានចិត្តខ្នះខ្នែងក្នុងកិច្ចបម្រើផ្សាយដូចលោកយេស៊ូ។
១. តើរាស្ត្ររបស់ព្រះយេហូវ៉ាខុសគ្នាយ៉ាងណាពីអ្នកឯទៀតដែលអះអាងថាជាគ្រិស្តសាសនិក?
អ្វីមួយដែលធ្វើឲ្យអ្នកបម្រើរបស់ព្រះយេហូវ៉ាខុសពីអ្នកឯទៀតដែលអះអាងថាជាគ្រិស្តសាសនិក គឺចិត្តខ្នះខ្នែងaរបស់ពួកគេចំពោះកិច្ចបម្រើផ្សាយ។ (ទីត. ២:១៤) ប៉ុន្តែជួនកាល អ្នកប្រហែលជាពិបាកមានចិត្តរំភើបចំពោះកិច្ចបម្រើផ្សាយ។ អ្នកប្រហែលជាមានអារម្មណ៍ដូចអ្នកចាស់ទុំម្នាក់ដែលខំប្រឹងយ៉ាងនឿយហត់។ គាត់និយាយថា៖ «ជួនកាលខ្ញុំមិនសូវចង់ផ្សព្វផ្សាយទេ»។
២. ហេតុអ្វីជួនកាលពិបាកមានចិត្តខ្នះខ្នែងចំពោះកិច្ចបម្រើផ្សាយ?
២ យើងប្រហែលជាមានចិត្តរំភើបចូលរួមកិច្ចបម្រើពិសិដ្ឋផ្សេងៗជាងចូលរួមក្នុងកិច្ចបម្រើផ្សាយ។ ហេតុអ្វី? ដោយសារពេលយើងសាងសង់ឬថែទាំសាលប្រជុំ ផ្ដល់ជំនួយដល់បងប្អូនដែលរងទុក្ខដោយគ្រោះមហន្តរាយ ឬលើកទឹកចិត្តពួកគេនៅពេលផ្សេងទៀត យើងអាចឃើញលទ្ធផលល្អភ្លាមៗ ហើយនោះធ្វើឲ្យយើងសប្បាយ។ យើងចូលចិត្តបរិយាកាសសុខសាន្តនិងកក់ក្ដៅដែលយើងមានពេលធ្វើការជាមួយបងប្អូនរបស់យើង ហើយយើងដឹងថាពួកគេឲ្យតម្លៃចំពោះអ្វីដែលយើងធ្វើ។ ប៉ុន្តែ យើងប្រហែលជាផ្សព្វផ្សាយនៅតំបន់ផ្សាយដដែលៗអស់ជាច្រើនឆ្នាំ ហើយមិនសូវជួបអ្នកចាប់អារម្មណ៍ ឬយើងប្រហែលជាជួបមនុស្សដែលបដិសេធដំណឹងដែលយើងផ្សាយ។ យើងក៏ដឹងដែរថា កាលដែលទីបញ្ចប់ជិតមកដល់ យើងនឹងទទួលការប្រឆាំងកាន់តែខ្លាំង។ (ម៉ាថ. ១០:២២) ដូច្នេះ តើអ្វីអាចជួយយើងឲ្យរក្សាឬបង្កើនចិត្តខ្នះខ្នែងរបស់យើងចំពោះកិច្ចបម្រើផ្សាយ?
៣. តើលូកា ១៣:៦-៩បង្ហាញយ៉ាងណាអំពីចិត្តខ្នះខ្នែងរបស់លោកយេស៊ូ?
៣ យើងអាចរៀនអំពីចិត្តខ្នះខ្នែងក្នុងកិច្ចបម្រើផ្សាយ ដោយពិចារណាអំពីគំរូរបស់លោកយេស៊ូ។ ពេលលោកយេស៊ូនៅផែនដីលោកមិនដែលឈប់ព្យាយាមផ្សព្វផ្សាយដល់មនុស្សទេ។ តាមពិត កាលដែលពេលវេលាកន្លងទៅ លោកបានបង្កើនសកម្មភាពរបស់លោកក្នុងកិច្ចបម្រើព្រះ។ (សូមអាន លូកា ១៣:៦-៩) ដូចអ្នកថែចម្ការទំពាំងបាយជូរដែលបានចំណាយពេលបីឆ្នាំដើម្បីមើលថែដើមល្វាតូចដែលមិនចេញផ្លែ លោកយេស៊ូចំណាយពេលប្រហែលបីឆ្នាំដើម្បីផ្សព្វផ្សាយដល់ជនជាតិយូដា តែពួកគេភាគច្រើនមិនបានទៅជាអ្នកកាន់តាមលោកទេ។ ដូចអ្នកថែចម្ការទំពាំងបាយជូរមិនអស់សង្ឃឹមចំពោះដើមល្វាតូច លោកយេស៊ូក៏មិនបានអស់សង្ឃឹមចំពោះមនុស្ស ឬកាត់បន្ថយកិច្ចបម្រើផ្សាយរបស់លោកឡើយ។ ផ្ទុយទៅវិញ លោកបានព្យាយាមកាន់តែខ្លាំងឡើងដើម្បីផ្សព្វផ្សាយដល់ជនជាតិយូដា ហើយជួយពួកគេឲ្យទទួលយកដំណឹងល្អ។
៤. តើយើងនឹងរៀនចំណុចបួនយ៉ាងអ្វីពីគំរូរបស់លោកយេស៊ូ?
៤ ក្នុងអត្ថបទនេះ យើងនឹងពិចារណាអំពីរបៀបដែលលោកយេស៊ូបង្ហាញចិត្តខ្នះខ្នែង ជាពិសេសក្នុងអំឡុង៦ខែចុងក្រោយនៃកិច្ចបម្រើផ្សាយរបស់លោក។ (លូក. ១០:១) ការរៀនពីសេចក្ដីបង្រៀនរបស់លោកយេស៊ូនិងការយកតម្រាប់តាមអ្វីដែលលោកធ្វើ នឹងជួយយើងឲ្យរក្សាចិត្តខ្នះខ្នែងនៅសព្វថ្ងៃនេះ។ សូមឲ្យយើងពិចារណាចំណុចបួនយ៉ាងដែលយើងអាចរៀនពីគំរូរបស់លោកយេស៊ូ៖ (១) លោកផ្ដោតអារម្មណ៍លើបំណងប្រាថ្នារបស់ព្រះយេហូវ៉ា (២) លោកយល់និងប្រព្រឹត្តស្របតាមទំនាយក្នុងគម្ពីរ (៣) លោកមានទំនុកចិត្តថាព្រះយេហូវ៉ានឹងជួយគាំទ្រលោក និង(៤) លោករក្សាទស្សនៈត្រឹមត្រូវថាអ្នកខ្លះនឹងស្ដាប់លោក។
លោកផ្ដោតអារម្មណ៍លើបំណងប្រាថ្នារបស់ព្រះយេហូវ៉ា
៥. តើលោកយេស៊ូបង្ហាញយ៉ាងណាថាលោកផ្ដោតអារម្មណ៍លើការធ្វើតាមបំណងប្រាថ្នារបស់ព្រះ?
៥ លោកយេស៊ូផ្សព្វផ្សាយ«ដំណឹងល្អអំពីរាជាណាចក្ររបស់ព្រះ»យ៉ាងខ្នះខ្នែង ដោយសារលោកដឹងថានេះគឺជាកិច្ចការដែលព្រះចង់ឲ្យលោកធ្វើ។ (លូក. ៤:៤៣) ចំពោះលោកយេស៊ូ ការផ្សព្វផ្សាយដំណឹងល្អគឺជាកិច្ចការដ៏សំខាន់បំផុតក្នុងជីវិតលោក។ សូម្បីតែក្នុងប៉ុន្មានខែចុងក្រោយនៃកិច្ចបម្រើរបស់លោក ក៏លោកធ្វើដំណើរ«ពីក្រុងមួយទៅក្រុងមួយ និងពីភូមិមួយទៅភូមិមួយ»ដើម្បីបង្រៀនអ្នកឯទៀត។ (លូក. ១៣:២២) លោកក៏បង្ហាត់បង្រៀនពួកអ្នកកាន់តាមថែមទៀតដែរ ដើម្បីឲ្យពួកគេចូលរួមកិច្ចបម្រើផ្សាយជាមួយនឹងលោក។—លូក. ១០:១
៦. តើកិច្ចបម្រើផ្សាយជាប់ទាក់ទងយ៉ាងណានឹងភារកិច្ចឯទៀតដែលយើងមាន? (សូមមើលរូបភាពផងដែរ)
៦ នៅសព្វថ្ងៃនេះដែរ កិច្ចការផ្សព្វផ្សាយដំណឹងល្អគឺជាកិច្ចការចម្បងដែលព្រះយេហូវ៉ានិងលោកយេស៊ូចង់ឲ្យយើងធ្វើ។ (ម៉ាថ. ២៤:១៤; ២៨:១៩, ២០) កិច្ចការណាក៏ដោយដែលយើងធ្វើដើម្បីព្រះយេហូវ៉ា គឺជាប់ទាក់ទងនឹងកិច្ចការផ្សព្វផ្សាយ។ ជាឧទាហរណ៍ ដើម្បីគាំទ្រសេចក្ដីត្រូវការក្នុងកិច្ចបម្រើផ្សាយនៅតំបន់ផ្សេងៗ យើងចូលរួមធ្វើកិច្ចការសាងសង់អគារសម្រាប់ការគោរពប្រណិប័តន៍ព្រះឬបម្រើនៅបេតអែល។ ពេលមានគ្រោះមហន្តរាយយើងធ្វើឲ្យប្រាកដថា បងប្អូនរបស់យើងទទួលអ្វីដែលពួកគេត្រូវការ ដើម្បីពួកគេអាចចូលរួមកិច្ចប្រជុំនិងចាប់ផ្ដើមផ្សព្វផ្សាយម្ដងទៀត។ ពេលយើងទទួលស្គាល់សារៈសំខាន់នៃកិច្ចការផ្សព្វផ្សាយនិងចាំថានោះជាកិច្ចការចម្បងដែលព្រះយេហូវ៉ាចង់ឲ្យយើងធ្វើ នោះនឹងជំរុញចិត្តយើងឲ្យផ្សព្វផ្សាយយ៉ាងច្រើនបំផុត។ បងប្រុសយ៉ាណុសដែលជាអ្នកចាស់ទុំនៅប្រទេសហុងគ្រីនិយាយថា៖ «ខ្ញុំរំលឹកខ្លួនឯងថា គ្មានកិច្ចការណាក្នុងអង្គការព្រះដែលអាចជំនួសកិច្ចការផ្សព្វផ្សាយបានឡើយ។ នេះគឺជាភារកិច្ចសំខាន់ចម្បងរបស់យើង»។
នៅសព្វថ្ងៃនេះ កិច្ចការផ្សព្វផ្សាយគឺជាកិច្ចការចម្បងដែលព្រះយេហូវ៉ានិងលោកយេស៊ូចង់ឲ្យយើងធ្វើ (សូមមើលវគ្គ៦)
៧. ហេតុអ្វីព្រះយេហូវ៉ាចង់ឲ្យយើងបន្តផ្សព្វផ្សាយ? (ធីម៉ូថេទី១ ២:៣, ៤)
៧ យើងអាចមានចិត្តខ្នះខ្នែងកាន់តែខ្លាំងចំពោះកិច្ចបម្រើផ្សាយ បើយើងមានទស្សនៈដូចព្រះយេហូវ៉ាចំពោះមនុស្ស។ លោកចង់ឲ្យមនុស្សច្រើនបំផុតឮដំណឹងល្អ ហើយទទួលយកសេចក្ដីពិតអំពីលោក។ (សូមអាន ធីម៉ូថេទី១ ២:៣, ៤) យ៉ាងនេះ លោកបង្ហាត់បង្រៀនយើងឲ្យកាន់តែមានប្រសិទ្ធភាពក្នុងការផ្សព្វផ្សាយដំណឹងល្អដែលសង្គ្រោះជីវិតមនុស្ស។ ជាឧទាហរណ៍ សៀវភៅស្ដើងស្រឡាញ់មនុស្ស ជួយគេឲ្យក្លាយជាអ្នកកាន់តាមគ្រិស្ត មានយោបល់ដែលអាចជួយយើងឲ្យចាប់ផ្ដើមការសន្ទនាដោយមានគោលដៅជួយមនុស្សឲ្យក្លាយជាអ្នកកាន់តាមគ្រិស្ត។ ទោះបីជាមនុស្សមិនចាប់ផ្ដើមបម្រើព្រះយេហូវ៉ានៅឥឡូវនេះក្ដី ពួកគេប្រហែលជាអាចមានឱកាសចាប់ផ្ដើមបម្រើលោកមុនទីបញ្ចប់នៃគ្រាទុក្ខវេទនាជាខ្លាំង។ ដូច្នេះ អ្វីដែលយើងប្រាប់ពួកគេនៅឥឡូវនេះ ប្រហែលជានឹងជំរុញចិត្តពួកគេឲ្យចង់បម្រើព្រះយេហូវ៉ានៅថ្ងៃអនាគត។ ប៉ុន្តែ នេះអាចកើតឡើងបានលុះត្រាតែយើងបន្តផ្សព្វផ្សាយ។
លោកយល់និងប្រព្រឹត្តស្របតាមទំនាយក្នុងគម្ពីរ
៨. តើការស្គាល់ទំនាយក្នុងគម្ពីរជះឥទ្ធិពលយ៉ាងណាទៅលើរបៀបដែលលោកយេស៊ូប្រើពេលវេលារបស់លោក?
៨ លោកយេស៊ូបានដឹងអំពីរបៀបដែលទំនាយក្នុងគម្ពីរនឹងត្រូវសម្រេច។ លោកបានដឹងថាកិច្ចបម្រើរបស់លោកនៅផែនដីនឹងមានរយៈពេលតែបីឆ្នាំកន្លះប៉ុណ្ណោះ។ (ដាន. ៩:២៦, ២៧) លោកក៏ដឹងដែរអំពីអ្វីដែលបានត្រូវប្រកាសទុកជាមុនស្ដីអំពីពេលណា និងរបៀបណាដែលលោកនឹងត្រូវស្លាប់។ (លូក. ១៨:៣១-៣៤) ដោយសារលោកស្គាល់អ្វីដែលបានត្រូវប្រកាសទុកជាមុន លោកយេស៊ូប្រើពេលវេលារបស់លោកឲ្យកើតប្រយោជន៍ច្រើនបំផុត។ ជាលទ្ធផល លោកផ្សព្វផ្សាយដោយចិត្តខ្នះខ្នែងដើម្បីបង្ហើយកិច្ចការដែលព្រះយេហូវ៉ាបានប្រគល់ឲ្យលោក។
៩. ហេតុអ្វីទំនាយក្នុងគម្ពីរជំរុញចិត្តយើងឲ្យផ្សព្វផ្សាយយ៉ាងខ្នះខ្នែង?
៩ ការយល់ទំនាយក្នុងគម្ពីរអាចជំរុញចិត្តយើងឲ្យផ្សព្វផ្សាយយ៉ាងខ្នះខ្នែង។ យើងដឹងថាមិនយូរទៀតរបៀបរបបពិភពលោកនេះនឹងដល់ទីបញ្ចប់។ យើងទទួលស្គាល់ថាព្រឹត្តិការណ៍ដែលកំពុងកើតឡើង និងចិត្តគំនិតរបស់មនុស្សនៅសព្វថ្ងៃនេះ គឺសមស្របនឹងអ្វីដែលគម្ពីរប្រកាសទុកជាមុនថាជាសញ្ញាសម្គាល់នៃគ្រាចុងក្រោយបង្អស់។ យើងយល់ថាការប្រឆាំងគ្នាដើម្បីបានអំណាចរវាងមហាអំណាចអង់គ្លេសអាម៉េរិក ហើយប្រទេសរុស្ស៊ីនិងប្រទេសឯទៀតដែលសហការជាមួយ កំពុងសម្រេចទំនាយក្នុងគម្ពីរ ស្ដីអំពីស្ដេចខាងជើងនិងស្ដេចខាងត្បូង«នៅគ្រាចុងក្រោយ»។ (ដាន. ១១:៤០) យើងក៏យល់ដែរថាមហាអំណាចអង់គ្លេសអាម៉េរិកជាតំណាងប្រអប់ជើងនៃរូបធំសម្បើម ដែលបានរៀបរាប់នៅដានីយ៉ែល ២:៤៣-៤៥។ ដូចទំនាយនោះបង្ហាញ យើងជឿជាក់ថាមិនយូរទៀតរាជាណាចក្ររបស់ព្រះនឹងបំផ្លាញរដ្ឋាភិបាលរបស់មនុស្ស។ ទំនាយទាំងអស់នេះបង្ហាញថា យើងកំពុងរស់នៅគ្រាណា ហើយជំរុញចិត្តយើងឲ្យផ្សព្វផ្សាយជាបន្ទាន់។
១០. តើទំនាយក្នុងគម្ពីរអាចលើកទឹកចិត្តយើងយ៉ាងណាឲ្យបន្តផ្សព្វផ្សាយ?
១០ យើងចង់ប្រាប់ទំនាយដែលមាននៅក្នុងគម្ពីរដល់អ្នកឯទៀត។ បងស្រីខារីដែលបម្រើនៅសាធារណរដ្ឋដូមីនីកនិយាយថា៖ «សេចក្ដីសន្យាដ៏កក់ក្ដៅរបស់ព្រះយេហូវ៉ាអំពីអនាគតដ៏ប្រសើរជាង ជំរុញចិត្តខ្ញុំឲ្យចង់ប្រាប់អ្នកឯទៀត»។ គាត់បន្ថែមថា៖ «ពេលខ្ញុំឃើញបញ្ហាដែលមនុស្សមាននៅសព្វថ្ងៃ ខ្ញុំទទួលស្គាល់ថាសេចក្ដីសន្យាទាំងនោះ មិនគ្រាន់តែសម្រាប់ខ្ញុំប៉ុណ្ណោះទេ តែក៏សម្រាប់ពួកគេដែរ»។ ទំនាយនៅក្នុងគម្ពីរជំរុញចិត្តយើងឲ្យបន្តផ្សព្វផ្សាយ ពីព្រោះយើងដឹងថាព្រះយេហូវ៉ាគាំទ្រកិច្ចការផ្សព្វផ្សាយរបស់យើង។ បងស្រីលេឡាដែលរស់នៅប្រទេសហុងគ្រីនិយាយថា៖ «អេសាយ ១១:៦-៩ជំរុញចិត្តខ្ញុំឲ្យផ្សព្វផ្សាយដំណឹងល្អ សូម្បីតែដល់ពួកអ្នកដែលមើលទៅមិនទទួលយកដំណឹងនោះ។ ខ្ញុំដឹងថា អ្នកណាក៏អាចធ្វើការកែប្រែបានដែរដោយមានជំនួយពីព្រះយេហូវ៉ា»។ បងប្រុសគ្រិស្តតូហ្វើពីប្រទេសសំប៊ីនិយាយថា៖ «ដូចម៉ាកុស ១៣:១០បានប្រាប់ទុកជាមុន ដំណឹងល្អកំពុងឮសុសសាយនៅទូទាំងពិភពលោក ហើយខ្ញុំមានអារម្មណ៍ថាការជួយសម្រេចទំនាយនោះគឺជាកិត្តិយសណាស់»។ ចុះអ្នកវិញ តើទំនាយអ្វីនៅក្នុងគម្ពីរជំរុញចិត្តអ្នកឲ្យបន្តផ្សព្វផ្សាយ?
លោកមានទំនុកចិត្តថាព្រះយេហូវ៉ានឹងជួយគាំទ្រលោក
១១. ហេតុអ្វីលោកយេស៊ូត្រូវពឹងផ្អែកលើព្រះយេហូវ៉ាដើម្បីជួយលោកឲ្យបន្តផ្សព្វផ្សាយយ៉ាងខ្នះខ្នែង? (លូកា ១២:៤៩, ៥៣)
១១ លោកយេស៊ូទុកចិត្តថាព្រះយេហូវ៉ានឹងជួយលោកឲ្យបន្តផ្សព្វផ្សាយយ៉ាងខ្នះខ្នែង។ ទោះជាលោកយេស៊ូនិយាយដោយគោរពពេលផ្សព្វផ្សាយដំណឹងល្អដល់អ្នកឯទៀតក្ដី លោកដឹងថាដំណឹងអំពីរាជាណាចក្រព្រះនឹងនាំឲ្យមនុស្សខ្លះខឹង ហើយមនុស្សជាច្រើននឹងប្រឆាំងដំណឹងនោះយ៉ាងខ្លាំង។ (សូមអាន លូកា ១២:៤៩, ៥៣) ពួកអ្នកដឹកនាំសាសនាមិនពេញចិត្តអ្វីដែលលោកយេស៊ូបានផ្សព្វផ្សាយទេ។ ដូច្នេះ ពួកគេព្យាយាមសម្លាប់លោកម្ដងហើយម្ដងទៀត។ (យ៉ូន. ៨:៥៩; ១០:៣១, ៣៩) ប៉ុន្តែ លោកយេស៊ូបន្តផ្សព្វផ្សាយ ដោយសារលោកដឹងថាព្រះយេហូវ៉ានៅជាមួយលោក។ លោកមានប្រសាសន៍អំពីបិតាលោកថា៖ «លោកដែលបានចាត់ខ្ញុំឲ្យមកក៏នៅជាមួយនឹងខ្ញុំដែរ។ លោកមិនបានចោលខ្ញុំឲ្យនៅតែម្នាក់ឯងទេ ពីព្រោះខ្ញុំតែងតែធ្វើអ្វីដែលលោកពេញចិត្ត»។—យ៉ូន. ៨:២៩
១២. តើតាមរបៀបណាលោកយេស៊ូជួយពួកអ្នកកាន់តាមឲ្យត្រៀមខ្លួនបន្តផ្សព្វផ្សាយទោះជាមានការបៀតបៀនក្ដី?
១២ លោកយេស៊ូរំលឹកពួកអ្នកកាន់តាមរបស់លោកថា ពួកគេអាចពឹងផ្អែកព្រះយេហូវ៉ាឲ្យគាំទ្រពួកគេ។ លោកពង្រឹងទំនុកចិត្តពួកគេម្ដងហើយម្ដងទៀតថា ព្រះយេហូវ៉ានឹងជួយពួកគេ ទោះបីជាពេលដែលពួកគេប្រឈមមុខនឹងការបៀតបៀនក្ដី។ (ម៉ាថ. ១០:១៨-២០; លូក. ១២:១១, ១២) ដោយសារលោកយេស៊ូដឹងថាមនុស្សជាច្រើននឹងប្រឆាំងដំណឹងល្អ លោកបានប្រាប់ពួកអ្នកកាន់តាមឲ្យប្រុងប្រយ័ត្ន។ (ម៉ាថ. ១០:១៦; លូក. ១០:៣) លោកយេស៊ូក៏បានប្រាប់ពួកអ្នកកាន់តាមដែរថា បើមានអ្នកណាមិនចង់ស្ដាប់ មិនចាំបាច់បង្ខំអ្នកនោះទេ។ (លូក. ១០:១០, ១១) លោកក៏ប្រាប់ពួកអ្នកកាន់តាមឲ្យរត់ចេញ បើពួកគេទទួលការបៀតបៀន។ (ម៉ាថ. ១០:២៣) ទោះជាលោកយេស៊ូមានចិត្តខ្នះខ្នែង ហើយទុកចិត្តព្រះយេហូវ៉ាក្ដី លោកបានជៀសវាងពីស្ថានភាពដែលមានគ្រោះថ្នាក់ពេលដែលអាចធ្វើបាន។—យ៉ូន. ១១:៥៣, ៥៤
១៣. ហេតុអ្វីអ្នកអាចប្រាកដថាព្រះយេហូវ៉ានឹងជួយអ្នក?
១៣ យើងត្រូវការជំនួយពីព្រះយេហូវ៉ាដើម្បីបន្តផ្សព្វផ្សាយយ៉ាងខ្នះខ្នែងពេលជួបការប្រឆាំងនៅសព្វថ្ងៃ។ (បប. ១២:១៧) ហេតុអ្វីអ្នកអាចប្រាកដថាព្រះយេហូវ៉ានឹងគាំទ្រអ្នក? សូមគិតអំពីសេចក្ដីអធិដ្ឋានរបស់លោកយេស៊ូដែលបានកត់ទុកនៅយ៉ូហាន ជំពូកទី១៧។ លោកយេស៊ូបានសុំព្រះយេហូវ៉ាឲ្យការពារពួកសាវ័ក ហើយព្រះយេហូវ៉ាបានធ្វើតាមសំណូមពរនោះមែន។ សៀវភៅសកម្មភាពរៀបរាប់អំពីរបៀបដែលព្រះយេហូវ៉ាបានជួយពួកសាវ័កឲ្យផ្សព្វផ្សាយដោយចិត្តខ្នះខ្នែង ទោះជាមានការបៀតបៀនក្ដី។ ក្នុងសេចក្ដីអធិដ្ឋានរបស់លោកយេស៊ូ លោកក៏បានសុំព្រះយេហូវ៉ាឲ្យការពារពួកអ្នកដែលបង្ហាញជំនឿលើដំណឹងដែលពួកសាវ័កផ្សព្វផ្សាយនិងក្លាយទៅជាអ្នកកាន់តាម មិនគ្រាន់តែនៅសម័យនោះ តែនៅថ្ងៃខាងមុខដែរ រួមបញ្ចូលសម័យយើង។ ដូច្នេះ នេះក៏រួមបញ្ចូលអ្នកដែរ។ ព្រះយេហូវ៉ាមិនឈប់ធ្វើតាមសំណូមពររបស់លោកយេស៊ូក្នុងសេចក្ដីអធិដ្ឋាននោះទេ។ ព្រះយេហូវ៉ានឹងជួយអ្នកដូចដែលលោកបានជួយពួកសាវ័កដែរ។—យ៉ូន. ១៧:១១, ១៥, ២០
១៤. ហេតុអ្វីយើងជឿជាក់ថាយើងអាចផ្សព្វផ្សាយដោយចិត្តខ្នះខ្នែងទោះជានៅពេលលំបាកក្ដី? (សូមមើលរូបភាពផងដែរ)
១៤ កាលដែលទីបញ្ចប់កាន់តែខិតជិតមកដល់ យើងប្រហែលជានឹងកាន់តែពិបាកផ្សព្វផ្សាយដំណឹងល្អ។ ប៉ុន្តែ លោកយេស៊ូពង្រឹងទំនុកចិត្តយើងថា យើងនឹងមានអ្វីដែលយើងត្រូវការដើម្បីរក្សាចិត្តខ្នះខ្នែងក្នុងកិច្ចការនេះ។ (លូក. ២១:១២-១៥) ដូចលោកយេស៊ូនិងពួកអ្នកកាន់តាមរបស់លោក យើងទុកឲ្យមនុស្សសម្រេចចិត្តថា ពួកគេស្ដាប់ឬមិនស្ដាប់ដំណឹងដែលយើងប្រាប់ពួកគេ ហើយយើងជៀសវាងពីការឈ្លោះប្រកែកជាមួយពួកគេ។ សូម្បីតែនៅពេលដែលកិច្ចការរបស់យើងបានត្រូវដាក់កម្រិត ក៏បងប្អូនរបស់យើងបានបន្តប្រកាសដំណឹងល្អដែរ ដោយសារពួកគេពឹងផ្អែកលើព្រះយេហូវ៉ា មិនមែនលើកម្លាំងរបស់ពួកគេទេ។ ដូចព្រះយេហូវ៉ាផ្ដល់ឫទ្ធានុភាពដល់អ្នកបម្រើរបស់លោកនៅសតវត្សរ៍ទី១ លោកក៏ផ្ដល់ឫទ្ធានុភាពដល់យើងនៅសព្វថ្ងៃនេះដែរ ដើម្បីយើងអាច«ផ្សព្វផ្សាយយ៉ាងសព្វគ្រប់»ស្របតាមបំណងប្រាថ្នារបស់ព្រះ។ (២ធី. ៤:១៧) អ្នកអាចប្រាកដថា បើអ្នកពឹងផ្អែកលើព្រះយេហូវ៉ា អ្នកនឹងអាចបន្តផ្សព្វផ្សាយដោយចិត្តខ្នះខ្នែង។
ទោះជាកិច្ចការរបស់យើងបានត្រូវគេដាក់កម្រិតក្ដី បងប្អូនរកវិធីប្រាប់អ្នកឯទៀតអំពីដំណឹងល្អដោយប្រុងប្រយ័ត្ន (សូមមើលវគ្គ១៤)b
លោករក្សាទស្សនៈត្រឹមត្រូវ
១៥. តើអ្វីបង្ហាញថាលោកយេស៊ូមានទស្សនៈត្រឹមត្រូវចំពោះកិច្ចបម្រើផ្សាយ?
១៥ លោកយេស៊ូមានទស្សនៈត្រឹមត្រូវអំពីកិច្ចបម្រើផ្សាយ ហើយនោះជួយលោកឲ្យបន្តមានចិត្តរំភើបចំពោះកិច្ចការផ្សព្វផ្សាយរបស់លោក។ ជាឧទាហរណ៍ នៅចុងឆ្នាំ៣០ គ.ស. លោកយេស៊ូឃើញថាមានមនុស្សជាច្រើនចង់ស្ដាប់ដំណឹងល្អ ហើយលោកបានប្រៀបប្រដូចពួកគេទៅនឹងវាលស្រូវដែលទុំល្មមច្រូតហើយ។ (យ៉ូន. ៤:៣៥) ប្រហែលមួយឆ្នាំក្រោយមក លោកបានប្រាប់ពួកអ្នកកាន់តាមលោកថា៖ «ផលដំណាំដែលត្រូវប្រមូលមានច្រើន»។ (ម៉ាថ. ៩:៣៧, ៣៨) ក្រោយមក លោកលើកបញ្ជាក់ម្ដងទៀតថា៖ «ផលដំណាំដែលត្រូវប្រមូលមានច្រើនមែន . . . ចូរអង្វរសុំម្ចាស់នៃកិច្ចការប្រមូលផលដំណាំ ចាត់កម្មករថែមទៀតឲ្យចូលរួមធ្វើកិច្ចការរបស់លោក»។ (លូក. ១០:២) លោកយេស៊ូរក្សាទំនុកចិត្តថានឹងមានមនុស្សដែលនឹងស្ដាប់ដំណឹងល្អ ហើយលោកសប្បាយពេលពួកគេធ្វើដូច្នេះ។—លូក. ១០:២១
១៦. តើឧទាហរណ៍របស់លោកយេស៊ូជួយពួកអ្នកកាន់តាមឲ្យមានទស្សនៈត្រឹមត្រូវចំពោះកិច្ចបម្រើផ្សាយយ៉ាងដូចម្ដេច? (លូកា ១៣:១៨-២១) (សូមមើលរូបភាពផងដែរ)
១៦ លោកយេស៊ូបង្រៀនពួកអ្នកកាន់តាមលោកឲ្យបន្តមានទស្សនៈត្រឹមត្រូវចំពោះដំណឹងដែលពួកគេផ្សព្វផ្សាយ ហើយនោះនឹងលើកទឹកចិត្តពួកគេឲ្យរក្សាចិត្តខ្នះខ្នែង។ ជាឧទាហរណ៍ សូមគិតអំពីឧទាហរណ៍ពីររបស់លោក។ (សូមអាន លូកា ១៣:១៨-២១) លោកយេស៊ូបានប្រើឧទាហរណ៍អំពីគ្រាប់មូស្ដាតដើម្បីបង្រៀនថា ដំណឹងអំពីរាជាណាចក្រនឹងឮសុសសាយតាមរបៀបដ៏អស្ចារ្យ ហើយគ្មានអ្នកណាអាចបញ្ឈប់ការរីកចម្រើននោះបានឡើយ។ ម្យ៉ាងទៀត លោកយេស៊ូបានប្រើឧទាហរណ៍អំពីដំបែដើម្បីបង្ហាញរបៀបដែលដំណឹងអំពីរាជាណាចក្ររីករាលដាលយ៉ាងច្រើនក្រៃលែង ហើយធ្វើឲ្យមានការផ្លាស់ប្ដូរដែលមិនងាយកត់សម្គាល់ភ្លាមៗនោះទេ។ យ៉ាងនេះ លោកយេស៊ូបានជួយអ្នកកាន់តាមរបស់លោកឲ្យឃើញថា ដំណឹងដែលពួកគេផ្សព្វផ្សាយនឹងជួយមនុស្សជាច្រើន។
ដូចលោកយេស៊ូ យើងរក្សាទស្សនៈត្រឹមត្រូវថាអ្នកខ្លះនឹងទទួលយកដំណឹងដែលយើងផ្សាយ (សូមមើលវគ្គ១៦)
១៧. តើយើងមានមូលហេតុអ្វីខ្លះឲ្យរក្សាទស្សនៈត្រឹមត្រូវចំពោះកិច្ចបម្រើផ្សាយ?
១៧ ការគិតអំពីអ្វីដែលកំពុងសម្រេចនៅទូទាំងពិភពលោកនៅសព្វថ្ងៃនេះ ជំរុញចិត្តយើងឲ្យបន្តផ្សព្វផ្សាយយ៉ាងខ្នះខ្នែង។ ជារៀងរាល់ឆ្នាំ អ្នកចាប់អារម្មណ៍រាប់លាននាក់ចូលរួមពិធីរំលឹកនិងសិក្សាគម្ពីរជាមួយយើង។ បុគ្គលរាប់សែននាក់ទទួលការជ្រមុជទឹក ហើយចូលរួមផ្សព្វផ្សាយជាមួយយើង។ យើងមិនដឹងថាមានមនុស្សប៉ុន្មាននាក់ទៀតនឹងទទួលយកដំណឹងដែលយើងផ្សព្វផ្សាយទេ។ ប៉ុន្តែយើងដឹងថា ព្រះយេហូវ៉ាកំពុងប្រមូលមនុស្សមួយក្រុមធំដែលនឹងរួចជីវិតនៅគ្រាទុក្ខវេទនាជាខ្លាំងដែលជិតមកដល់។ (បប. ៧:៩, ១៤) ព្រះយេហូវ៉ាដែលជាម្ចាស់នៃកិច្ចការប្រមូលផលដំណាំជឿជាក់ថា មនុស្សជាច្រើននាក់ទៀតនឹងទទួលយកដំណឹងល្អ ដូច្នេះយើងនឹងបន្តផ្សព្វផ្សាយ។
១៨. តើយើងចង់ឲ្យអ្នកឯទៀតកត់សម្គាល់អ្វីអំពីយើង?
១៨ តាំងពីដើមមក ពួកអ្នកកាន់តាមលោកយេស៊ូបានត្រូវគេស្គាល់ថាជាអ្នកផ្សព្វផ្សាយយ៉ាងខ្នះខ្នែង។ ពេលមនុស្សឃើញពួកសាវ័កនិយាយដោយចិត្តក្លាហាន «ទើបពួកគេដឹងថាពួកគាត់ធ្លាប់នៅជាមួយនឹងលោកយេស៊ូ»។ (សកម្ម. ៤:១៣) ដូចគ្នាដែរ យើងចង់ផ្សព្វផ្សាយដំណឹងល្អដោយចិត្តក្លាហាននិងដោយមានចិត្តរំភើប ហើយជាលទ្ធផលមនុស្សប្រហែលជានឹងកត់សម្គាល់ឃើញថាយើងក៏យកតម្រាប់គំរូលោកយេស៊ូដែរ។
ចម្រៀងលេខ៥៨ ចូរស្វែងរកអ្នកដែលចង់បានសេចក្ដីសុខ
a ការពន្យល់ពាក្យ៖ ក្នុងអត្ថបទនេះ«ចិត្តខ្នះខ្នែង»សំដៅទៅលើចិត្តរំភើបដែលគ្រិស្តសាសនិកមានក្នុងការគោរពប្រណិប័តន៍ព្រះយេហូវ៉ា។
b ការពណ៌នាអំពីរូបភាព៖ បងប្រុសម្នាក់ផ្សព្វផ្សាយដល់បុរសម្នាក់នៅការ៉ាស់សាំងដោយប្រុងប្រយ័ត្ន។