ចូរចាំយាម!
សង្គ្រាមនៅប្រទេសអ៊ុយក្រែនធ្វើឲ្យមានការខ្វះស្បៀងអាហារនៅទូទាំងពិភពលោក
នៅថ្ងៃទី១៩ ខែឧសភា ឆ្នាំ២០២២ក្រុមប្រឹក្សាសន្តិសុខសហប្រជាជាតិបានទទួលដំណឹងពីមន្ត្រីជាន់ខ្ពស់ច្រើនជាង៧៥នាក់ដែលថា៖ «រោគរាតត្បាតកូវីដ -១៩ និងបម្រែបម្រួលអាកាសធាតុបានជះឥទ្ធិពលយ៉ាងខ្លាំងមកលើយើងរួចទៅហើយ តែឥឡូវយើងមានការខ្វះស្បៀងអាហារដោយសារសង្គ្រាមនៅអ៊ុយក្រែន ដែលអាចនាំឲ្យមានការអត់ឃ្លាននៅកន្លែងខ្លះនៅជុំវិញពិភពលោក»។ មិនយូរក្រោយមក មានទស្សនាវដ្ដីមួយដែលរាយការណ៍អំពីសេដ្ឋកិច្ចបានឲ្យដឹងថា៖ «សង្គ្រាមកំពុងតែធ្វើឲ្យមនុស្សកាន់តែច្រើនថែមទៀតជួបការអត់ឃ្លាន»។ (The Economist) គម្ពីរបានទាយទុកជាមុនអំពីការខ្វះស្បៀងអាហារបែបនេះនៅសម័យយើង ហើយគម្ពីរក៏អាចជួយយើងឲ្យស៊ូទ្រាំនឹងស្ថានភាពបែបនេះដែរ។
គម្ពីរប្រកាសទុកជាមុនអំពីការអត់ឃ្លាន
លោកយេស៊ូបានទាយថា៖ «ប្រជាជាតិមួយនឹងលើកទ័ពទៅច្បាំងនឹងប្រជាជាតិមួយ ហើយរាជាណាចក្រមួយនឹងលើកទ័ពទៅច្បាំងនឹងរាជាណាចក្រមួយ ក៏នឹងមានការអត់ឃ្លាន»។—ម៉ាថាយ ២៤:៧
ក្នុងគម្ពីរសៀវភៅការបើកបង្ហាញបានប្រាប់អំពីអ្នកជិះសេះទាំងបួនក្នុងន័យធៀប។ អ្នកជិះសេះមួយក្នុងចំណោមនោះគឺតំណាងឲ្យសង្គ្រាម។ ហើយក្រោយមកមានអ្នកជិះសេះម្នាក់ទៀតដែលតំណាងឲ្យការអត់ឃ្លាន ជាពេលដែលមនុស្សពិបាករកស្បៀងអាហារ ហើយគេនឹងលក់ស្បៀងក្នុងតម្លៃថ្លៃហួសហេតុ។ គម្ពីរចែងថា៖ «ខ្ញុំឃើញសេះមួយសម្បុរខ្មៅ ហើយអ្នកដែលជិះសេះនោះមានជញ្ជីងនៅដៃ។ រួចមក ខ្ញុំឮសំឡេងមួយ . . . ថា៖‹ស្រូវសាលីមួយឃ្វាត់តម្លៃមួយឌីណារី ឯស្រូវបាលីបីឃ្វាត់តម្លៃមួយឌីណារី›»។—ការបើកបង្ហាញ ៦:៥, ៦
ទំនាយទាំងនេះអំពីការខ្វះស្បៀងអាហារបានត្រូវសម្រេចនៅសព្វថ្ងៃនេះដែលគម្ពីរហៅថា៖ «គ្រាចុងក្រោយបង្អស់»។ (ធីម៉ូថេទី២ ៣:១) ដើម្បីរៀនថែមទៀតអំពី«គ្រាចុងក្រោយបង្អស់» សូមទស្សនាវីដេអូពិភពលោកបានប្រែប្រួលតាំងពីឆ្នាំ១៩១៤។
របៀបដែលគម្ពីរអាចជួយអ្នក
គម្ពីរមានការណែនាំល្អៗដែលអាចជួយយើងឲ្យស៊ូទ្រាំនឹងការពិបាកផ្សេងៗរួមមាន ទំនិញឡើងថ្លៃ ឬសូម្បីតែការខ្វះស្បៀងអាហារជាដើម។ សូមមើលការណែនាំល្អខ្លះក្នុងអត្ថបទ«ការពាររបៀបចិញ្ចឹមជីវិតរបស់អ្នក»។
គម្ពីរក៏ផ្ដល់សេចក្ដីសង្ឃឹមដល់យើងដែលថាអ្វីៗនឹងល្អប្រសើរឡើងវិញ។ គម្ពីរសន្យាថានឹងមានពេលមួយដែល«ផែនដីនឹងមានស្រូវជាបរិបូរ» ហើយមនុស្សទាំងអស់នឹងមានអាហារគ្រប់គ្រាន់។ (ចម្រៀងសរសើរព្រះ ៧២:១៦) ដើម្បីរៀនថែមទៀតអំពីសេចក្ដីសន្យាក្នុងគម្ពីរសម្រាប់ថ្ងៃអនាគត និងមូលហេតុដែលអ្នកអាចទុកចិត្តសេចក្ដីសន្យាទាំងនោះ សូមអានអត្ថបទ«សេចក្ដីសង្ឃឹមដ៏ពិតប្រាកដកំពុងរង់ចាំអ្នក»។