YURI LASHOV/AFP via Getty Images
ចូរចាំយាម!
តើគ្រិស្តសាសនិកគួរគាំទ្រសង្គ្រាមឬទេ? តើគម្ពីរចែងយ៉ាងណា?
យើងឃើញថានៅក្នុងអំឡុងសង្គ្រាមនៅប្រទេសអ៊ុយក្រែន អ្នកដឹកនាំគ្រិស្តសាសនាជាច្រើនបានលើកទឹកចិត្តមនុស្សឲ្យចូលរួមធ្វើសង្គ្រាម។ សូមកត់សម្គាល់របៀបដែលបព្វជិតគាំទ្រសង្គ្រាម។
នៅថ្ងៃទី១៦ ខែមីនា ឆ្នាំ២០២២ សារព័ត៌មានមួយបានរាយការណ៍ថា សម្ដេចប៉ាបអេភីហ្វេននៀសទី១ នៃក្រុងឃីយីវ បាននិយាយថា៖«គឺពិតជាមានកិត្តិយសនិងចិត្តដឹងគុណណាស់ចំពោះទាហានដ៏អង់អាចទាំងអស់របស់យើងដែលបានការពារប្រទេសអ៊ុយក្រែន ពីអ្នកដែលឈ្លានពាន។ . . . យើងតែងតែគិត អធិដ្ឋានអស់ពីចិត្ត និងគាំទ្រអ្នករាល់គ្នាជានិច្ច»(The Jerusalem Post)។
នៅថ្ងៃទី៣ ខែមេសា ឆ្នាំ២០២២ ព័ត៌មានទាន់ហេតុការណ៍មួយបានរាយការណ៍ថា៖«មេដឹកនាំវិហារសាសនាអូធូដុក្ស នៅប្រទេសរុស្ស៊ីបានប្រារព្ធពិធីមួយនៅថ្ងៃអាទិត្យសម្រាប់ទាហានរុស្ស៊ីដើម្បីលើកទឹកចិត្តពួកគេដោយប្រាប់ថា‹មានតែពួករុស្ស៊ីទេដែលអាច›ការពារប្រទេសរបស់ខ្លួន ខណៈពេលដែលទាហានរុស្ស៊ីនៅក្រុងមូស្គូកំពុងសមយុទ្ធច្បាំងនឹងប្រទេសអ៊ុយក្រែន»(Reuters)។
តើគ្រិស្តសាសនិកគួរចូលរួមធ្វើសង្គ្រាមឬទេ? តើគម្ពីរចែងយ៉ាងណា?
អ្វីដែលគម្ពីរចែង
គម្ពីរចែងថាអស់អ្នកដែលពិតជាកាន់តាមលោកយេស៊ូគ្រិស្តមិនចូលរួមធ្វើសង្គ្រាមទេ។
«ចូរស៊កដាវរបស់អ្នកទៅក្នុងស្រោមវិញ ព្រោះអស់អ្នកដែលប្រើដាវ ក៏នឹងស្លាប់ដោយដាវដែរ»។—ម៉ាថាយ ២៦:៥២
តើបុគ្គលដែលគាំទ្រសង្គ្រាមឬចូលច្បាំងដោយផ្ទាល់ពិតជាស្ដាប់បង្គាប់លោកយេស៊ូឬទេ?
«ខ្ញុំឲ្យបញ្ញត្ដិថ្មីមួយដល់អ្នករាល់គ្នា គឺអ្នករាល់គ្នាត្រូវស្រឡាញ់គ្នាទៅវិញទៅមក។ អ្នករាល់គ្នាត្រូវស្រឡាញ់គ្នាទៅវិញទៅមក ដូចខ្ញុំបានស្រឡាញ់អ្នករាល់គ្នា។ យ៉ាងនេះ មនុស្សគ្រប់គ្នានឹងដឹងថាអ្នករាល់គ្នាជាអ្នកកាន់តាមខ្ញុំ បើអ្នករាល់គ្នាស្រឡាញ់គ្នា»។—យ៉ូហាន ១៣:៣៤, ៣៥
តើបុគ្គលដែលគាំទ្រសង្គ្រាមបង្ហាញសេចក្ដីស្រឡាញ់ដែលលោកយេស៊ូមានប្រសាសន៍អំពីសញ្ញាសម្គាល់នៃអ្នកកាន់តាមលោកឬទេ?
ដើម្បីទទួលព័ត៌មានថែមទៀត សូមអានអត្ថបទដែលមានចំណងជើងថា«តើគ្រិស្តសាសនិកគួរធ្វើសង្គ្រាមទេ?»
នៅសព្វថ្ងៃនេះ តើគ្រិស្តសាសនិកគួរគាំទ្រសង្គ្រាមឬទេ?
តើសមហេតុផលទេឲ្យរំពឹងថាគ្រិស្តសាសនិកនឹងមិនចូលរួមធ្វើសង្គ្រាមនៅសព្វថ្ងៃនេះ? គឺសមហេតុផល។ ហេតុអ្វីយើងដឹង? ព្រោះគម្ពីរបានប្រកាសទុកជាមុនថានៅគ្រាដែលយើងរស់នៅដែលជា«គ្រាចុងក្រោយបង្អស់» នឹងមានមនុស្សពីគ្រប់ជាតិសាសន៍«មិនរៀនធ្វើសង្គ្រាមទៀត»ទេ។ ពួកគេធ្វើដូច្នេះ ដោយសារពួកគេធ្វើតាមសេចក្ដីបង្រៀនរបស់លោកយេស៊ូ។—អេសាយ ២:២, ៤
ដើម្បីស្វែងយល់ថែមទៀត សូមអានទស្សនាវដ្ដីប៉មយាម អត្ថបទតភាគដែលមានចំណងជើងថា«តើព្រះមានទស្សនៈយ៉ាងណាចំពោះសង្គ្រាម?»។
មិនយូរទៀត ព្រះយេហូវ៉ាaដែលជា«ព្រះនៃសេចក្ដីសុខសាន្ត»នឹងប្រើរដ្ឋាភិបាលរបស់លោកដែលនៅស្ថានសួគ៌ឲ្យសង្គ្រោះមនុស្សដែលកំពុងរងទុក្ខ«ពីការសង្កត់សង្កិននិងអំពើឃោរឃៅ»។—ភីលីព ៤:៩; ចម្រៀងសរសើរព្រះ ៧២:១៤
ដើម្បីយល់ថែមទៀត សូមមើលវីដេអូតើរាជាណាចក្ររបស់ព្រះជាអ្វី?
a យេហូវ៉ាជានាមរបស់ព្រះ។—ចម្រៀងសរសើរព្រះ ៨៣:១៨