sinceLF/E+ via Getty Images
ចូរចាំយាម!
តើអ្នកណានឹងសង្គ្រោះជនស្លូតត្រង់? តើគម្ពីរចែងយ៉ាងណា?
អង្គការសហប្រជាជាតិ បានរាយការណ៍ថា៖
តាំងពីថ្ងៃទី៧ រហូតដល់ថ្ងៃទី២៣ ខែតុលា ឆ្នាំ២០២៣ សង្គ្រាមរវាងតំបន់កាសានិងអ៊ីស្រាអែល បានបណ្ដាលឲ្យមនុស្សជាង៦.៤០០នាក់ស្លាប់ ហើយមនុស្សជាង១៥.២០០នាក់រងរបួស។ ពួកគេភាគច្រើនគឺជាជនស្លូតត្រង់។ បន្ថែមទៅទៀត មនុស្សរាប់សែននាក់បានត្រូវបង្ខំចិត្តចាកចេញពីផ្ទះ។
មកដល់ត្រឹមថ្ងៃទី២៤ ខែកញ្ញា ឆ្នាំ២០២៣ សង្គ្រាមរវាងរុស្ស៊ីនិងអ៊ុយក្រែនបានសម្លាប់ជនស្លូតត្រង់អស់៩.៧០១នាក់ ហើយមនុស្ស១៧.៧៤៨នាក់បានរងរបួស។
តើគម្ពីរផ្ដល់សេចក្ដីសង្ឃឹមអ្វីដល់អ្នកដែលរងទុក្ខដោយសារសង្គ្រាម?
មូលហេតុដែលមានសង្ឃឹម
គម្ពីរបានប្រាប់ទុកជាមុនថា ព្រះនឹងធ្វើឲ្យ«ផែនដីទាំងមូលលែងមានសង្គ្រាមទៀត»។ (ចម្រៀងសរសើរព្រះ ៤៦:៩) លោកនឹងតាំងរដ្ឋាភិបាលឬរាជាណាចក្រនៅស្ថានសួគ៌ឲ្យគ្រប់គ្រងជំនួសរដ្ឋាភិបាលរបស់មនុស្ស។ (ដានីយ៉ែល ២:៤៤) រាជាណាចក្ររបស់ព្រះនឹងនាំមកនូវសេចក្ដីសុខសាន្តដល់មនុស្សជាតិ។
សូមស្វែងយល់អំពីអ្វីដែលលោកយេស៊ូគ្រិស្តជាស្ដេចនៃរាជាណាចក្រព្រះនឹងធ្វើ៖
«គាត់នឹងស្រោចស្រង់ជនក្រីក្រដែលស្រែករកជំនួយ ព្រមទាំងសង្គ្រោះមនុស្សទន់ទាបនិងមនុស្សគ្រប់រូបដែលគ្មានអ្នកណាជួយ។ គាត់នឹងអាណិតអាសូរមនុស្សទន់ទាបនិងមនុស្សក្រីក្រ គាត់នឹងសង្គ្រោះជីវិតជនតោកយ៉ាក។ គាត់នឹងរំដោះពួកគេឲ្យរួចផុតពីការសង្កត់សង្កិននិងអំពើឃោរឃៅ»។—ចម្រៀងសរសើរព្រះ ៧២:១២-១៤
តាមរយៈរាជាណាចក្ររបស់ព្រះ លោកនឹងបំបាត់ចោលទុក្ខវេទនា និងការឈឺចាប់ដែលបណ្ដាលមកពីសង្គ្រាមនិងអំពើហិង្សា។
«លោកនឹងជូតអស់ទាំងទឹកភ្នែកចេញពីភ្នែករបស់ពួកគេ ហើយសេចក្ដីស្លាប់នឹងលែងមានទៀត ទុក្ខព្រួយ ការស្រែកយំ និងការឈឺចាប់ ក៏នឹងលែងមានទៀតដែរ។ អ្វីៗដែលធ្លាប់កើតឡើងពីមុន នោះបានកន្លងបាត់អស់ហើយ»។—ការបើកបង្ហាញ ២១:៤
មិនយូរទៀត រាជាណាចក្រព្រះនឹងដោះស្រាយបញ្ហាទាំងអស់នៅផែនដី។ គម្ពីរបានប្រាប់ទុកជាមុនថា យើងនឹងឃើញ«សង្គ្រាម ហើយនឹងឮគេនិយាយអំពីសង្គ្រាម»ដែលកំពុងកើតឡើងនៅសព្វថ្ងៃនេះ។ (ម៉ាថាយ ២៤:៦) ព្រឹត្តិការណ៍ទាំងនេះ និងព្រឹត្តិការណ៍ឯទៀតបង្ហាញថាយើងកំពុងរស់នៅ«គ្រាចុងក្រោយបង្អស់»ក្រោមការគ្រប់គ្រងរបស់មនុស្ស។—ធីម៉ូថេទី២ ៣:១