ជំនះភាពឯកោដោយរាប់អានមិត្ត តើគម្ពីរអាចជួយយ៉ាងណា?
ក្នុងឆ្នាំ២០២៣ អ្នកជំនាញខាងសុខភាពបានទទួលស្គាល់ថាភាពឯកោគឺជាបញ្ហាសុខភាពធ្ងន់ធ្ងរដែលយើងកំពុងព្រួយបារម្ភ។ តើអាចយកឈ្នះបញ្ហានេះបានទេ?
វេជ្ជបណ្ឌិតវីវីក មើធី នៅសហរដ្ឋអាម៉េរិក បានរៀបរាប់ថា៖«ពេលយើងមានអារម្មណ៍ឯកោនិងផ្ដាច់ខ្លួនពីអ្នកឯទៀត នោះអាចបង្ខូចសុខភាពរបស់យើង ហើយធ្វើឲ្យយើងលែងសប្បាយរីករាយទៀត។ ប៉ុន្តែ មានអ្វីមួយដែលយើងអាចធ្វើស្ដីអំពីរឿងនេះ»។ តើយើងអាចធ្វើអ្វីខ្លះ? គាត់ប្រាប់ថា៖«យើងអាចធ្វើអ្វីបន្តិចបន្តួចជារៀងរាល់ថ្ងៃដើម្បីរាប់អានមិត្តភក្តិ»។a
អារម្មណ៍ឯកោអាចកើតមានឡើង មិនគ្រាន់តែពេលយើងនៅម្នាក់ឯងទេ។ អ្នកខ្លះប្រហែលជាមានអារម្មណ៍ឯកោ ទោះជាគាត់កំពុងនៅជាមួយមនុស្សជាច្រើនក្ដី។ មិនថាមានមូលហេតុណាក៏ដោយដែលធ្វើឲ្យអ្នកមានអារម្មណ៍ឯកោ សូមកុំអស់សង្ឃឹមឡើយ ព្រោះគម្ពីរអាចជួយអ្នកបាន។ គម្ពីរមានយោបល់ល្អៗអំពីរបៀបពង្រឹងមិត្តភាពជាមួយអ្នកឯទៀតដើម្បីយកឈ្នះអារម្មណ៍ឯកោ។
គោលការណ៍គម្ពីរដែលអាចជួយបាន
និយាយផង ស្ដាប់ផង។ អ្នកមិនគ្រាន់តែប្រាប់អារម្មណ៍របស់ខ្លួនប៉ុណ្ណោះទេ តែអ្នកក៏ត្រូវចេះស្ដាប់អ្នកឯទៀតវិញដែរ។ ពេលអ្នកបង្ហាញការយកចិត្តទុកដាក់ចំពោះអ្នកឯទៀតកាន់តែច្រើន នោះចំណងមិត្តភាពរវាងអ្នកនិងគាត់កាន់តែរឹងមាំដែរ។
គោលការណ៍គម្ពីរ៖ «ចូរបន្តយកចិត្តទុកដាក់ចំពោះអ្នកឯទៀត មិនត្រូវគិតតែអំពីរឿងផ្ទាល់ខ្លួនប៉ុណ្ណោះទេ»។—ភីលីព ២:៤
ព្យាយាមរាប់អានមិត្តភក្តិផ្សេងៗ។ សូមព្យាយាមរាប់អានមនុស្សឯទៀត មិនថាមានអាយុប៉ុណ្ណា មានវប្បធម៌បែបណា ឬជាតិសាសន៍ណាក្ដី។
គោលការណ៍គម្ពីរ៖ «ចូរអ្នករាល់គ្នាបើកចិត្តឲ្យទូលាយ»។—កូរិនថូសទី២ ៦:១៣
ដើម្បីបានព័ត៌មានថែមទៀតអំពីរបៀបបង្កើនចំណងមិត្តភាពជាមួយអ្នកឯទៀត សូមអានអត្ថបទដែលមានចំណងជើងថា«តើត្រូវធ្វើយ៉ាងណាដើម្បីមានមិត្តភក្ដិ?»។
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.