ចូរចាំយាម!
តើគ្រិស្តសាសនិកគួរមានការប្រព្រឹត្តបែបណា? តើគម្ពីរចែងយ៉ាងណា?
សព្វថ្ងៃនេះ មនុស្សជាច្រើនដែលអះអាងថាខ្លួនជាគ្រិស្តសាសនិក បែរជាធ្វើបាបអ្នកឯទៀត។ ពួកគេខ្លះគិតតែពីប្រយោជន៍ផ្ទាល់ខ្លួន ប្រព្រឹត្តមិនស្មោះត្រង់ឬមិនសប្បុរស។ ខ្លះទៀតប្រហែលជាផិតក្បត់នឹងគូរបស់ខ្លួនជាដើម។ ការប្រព្រឹត្តទាំងនេះធ្វើឲ្យមនុស្សជាច្រើនឆ្ងល់ថា‹តើគ្រិស្តសាសនិកគួរមានការប្រព្រឹត្តបែបណា?›។
របៀបដែលគ្រិស្តសាសនិកគួរប្រព្រឹត្ត
គឺស្រួលឲ្យបុគ្គលម្នាក់និយាយថាខ្លួនជាគ្រិស្តសាសនិក ប៉ុន្តែការនិយាយប៉ុណ្ណោះគឺមិនគ្រប់គ្រាន់ទេ។ យោងទៅតាមអ្វីដែលគម្ពីរចែង គ្រិស្តសាសនិកមានន័យថាជាអ្នកកាន់តាមលោកយេស៊ូ។ (សកម្មភាព ១១:២៦) លោកយេស៊ូបានមានប្រសាសន៍ថា៖«ប្រសិនបើអ្នករាល់គ្នាធ្វើតាមសេចក្ដីបង្រៀនរបស់ខ្ញុំជានិច្ច នោះអ្នករាល់គ្នាពិតជាអ្នកកាន់តាមខ្ញុំមែន»។ (យ៉ូហាន ៨:៣១) ច្បាស់ណាស់ គ្មានអ្នកណាអាចធ្វើតាមសេចក្ដីបង្រៀនរបស់លោកយេស៊ូបានយ៉ាងល្អឥតខ្ចោះទេ។ តែទោះជាយ៉ាងនោះក្ដី គ្រិស្តសាសនិកគួរខំព្យាយាមធ្វើតាមសេចក្ដីបង្រៀនរបស់លោកជារៀងរាល់ថ្ងៃ ហើយរស់នៅស្របតាមសេចក្ដីបង្រៀននោះ។ សូមពិចារណាឧទាហរណ៍ខ្លះ។
គ្រិស្តសាសនិកពិតបង្ហាញសេចក្ដីស្រឡាញ់ដែលមិនគិតពីប្រយោជន៍ខ្លួន
លោកយេស៊ូមានប្រសាសន៍ថា៖ «ខ្ញុំឲ្យបញ្ញត្ដិថ្មីមួយដល់អ្នករាល់គ្នា គឺអ្នករាល់គ្នាត្រូវស្រឡាញ់គ្នាទៅវិញទៅមក។ អ្នករាល់គ្នាត្រូវស្រឡាញ់គ្នាទៅវិញទៅមក ដូចខ្ញុំបានស្រឡាញ់អ្នករាល់គ្នា។ យ៉ាងនេះ មនុស្សគ្រប់គ្នានឹងដឹងថាអ្នករាល់គ្នាជាអ្នកកាន់តាមខ្ញុំ បើអ្នករាល់គ្នាស្រឡាញ់គ្នា»។—យ៉ូហាន ១៣:៣៤, ៣៥
អ្វីដែលលោកយេស៊ូបានធ្វើ៖ លោកយេស៊ូបានបង្ហាញសេចក្ដីស្រឡាញ់ដែលមិនគិតពីប្រយោជន៍ខ្លួនដល់មនុស្សទាំងអស់ ដោយធ្វើឲ្យមនុស្សឈឺជាសះស្បើយ ផ្ដល់អាហារដល់អ្នកស្រេកឃ្លាន ហើយថែមទាំងលះបង់ជីវិតរបស់លោកដើម្បីសង្គ្រោះមនុស្សឯទៀត។—ម៉ាថាយ ១៤:១៤-២១; ២០:២៨
អ្វីដែលគ្រិស្តសាសនិកពិតធ្វើ៖ គ្រិស្តសាសនិកបង្ហាញសេចក្ដីស្រឡាញ់ដែលមិនគិតពីប្រយោជន៍ខ្លួន ដោយបង្ហាញចិត្តទូលាយ មិនរើសមុខ និងអភ័យទោស។ ពួកគេជួយអ្នកដែលត្រូវការជំនួយ និងសុខចិត្តលះបង់ប្រយោជន៍ខ្លួនដើម្បីប្រយោជន៍អ្នកឯទៀត។—យ៉ូហានទី១ ៣:១៦
គ្រិស្តសាសនិកពិតប្រព្រឹត្តស្មោះត្រង់
លោកយេស៊ូមានប្រសាសន៍ថា៖ «ខ្ញុំជា . . . សេចក្ដីពិត»។—យ៉ូហាន ១៤:៦
អ្វីដែលលោកយេស៊ូបានធ្វើ៖ លោកយេស៊ូស្មោះត្រង់ទាំងក្នុងពាក្យសម្ដី និងការប្រព្រឹត្ត។ លោកមិនដែលនិយាយកុហក ឬប្រើពាក្យបោកបញ្ឆោតអ្នកឯទៀតនោះទេ។ លោកបានត្រូវគេស្គាល់ថាជាមនុស្សស្មោះត្រង់ទោះជាលោកស្ថិតក្នុងស្ថានភាពដ៏ពិបាកក្ដី។—ម៉ាថាយ ២២:១៦; ២៦:៦៣-៦៧
អ្វីដែលគ្រិស្តសាសនិកពិតធ្វើ៖ គ្រិស្តសាសនិកមិនកុហកឬលួចទេ។ ពួកគេតែងតែបង់ពន្ធ ហើយស្មោះត្រង់ក្នុងការងាររបស់ពួកគេជានិច្ច។ (រ៉ូម ១៣:៥-៧; អេភេសូរ ៤:២៨) មិនត្រឹមតែប៉ុណ្ណោះ ពួកគេក៏មិនបោកបញ្ឆោតអ្នកឯទៀត មិនលួចមើលពេលប្រឡង មិនបន្លំប្រវត្តិរូបរបស់ខ្លួនឬឯកសារឯទៀតឡើយ។—ហេប្រឺ ១៣:១៨
គ្រិស្តសាសនិកពិតប្រព្រឹត្តសប្បុរស
លោកយេស៊ូមានប្រសាសន៍ថា៖ «អស់អ្នកដែលធ្វើការនឿយហត់ ហើយមានបន្ទុកធ្ងន់អើយ! ចូរមកឯខ្ញុំចុះ នោះខ្ញុំនឹងធ្វើឲ្យអ្នកមានកម្លាំងចិត្តឡើងវិញ។ ចូរយកនឹមរបស់ខ្ញុំដាក់លើអ្នករាល់គ្នា ហើយរៀនពីខ្ញុំចុះ ពីព្រោះខ្ញុំស្លូត ក៏មានចិត្តរាបទាបផង នោះអ្នករាល់គ្នានឹងមានកម្លាំងចិត្តឡើងវិញ។ ព្រោះនឹមរបស់ខ្ញុំស្រួលពាក់ ហើយបន្ទុកខ្ញុំក៏ស្រាល»។—ម៉ាថាយ ១១:២៨-៣០
អ្វីដែលលោកយេស៊ូបានធ្វើ៖ លោកយេស៊ូជាមនុស្សដែលអ្នកឯទៀតស្រួលសុំជំនួយ និងមានចិត្តស្លូតបូត។ លោកធ្វើឲ្យក្មេងៗមានអារម្មណ៍ស្រួលចូលមកជិត លោកសម្រាលទុក្ខពួកអ្នកដែលធ្លាក់ទឹកចិត្ត ហើយលោកប្រព្រឹត្តចំពោះអ្នកឯទៀតដោយការគោរព។—ម៉ាកុស ១០:១៣-១៥; លូកា ៩:១១
អ្វីដែលគ្រិស្តសាសនិកពិតធ្វើ៖ ពួកគេតែងតែនិយាយសម្ដីសប្បុរស មិនប្រព្រឹត្តដោយគ្មានសុជីវធម៌ឬប្រមាថមើលងាយអ្នកឯទៀតឡើយ។ (អេភេសូរ ៤:២៩, ៣១, ៣២) ពួកគេយកចិត្តទុកដាក់ចំពោះអ្នកឯទៀត ហើយព្យាយាមរកឱកាសដើម្បីជួយគេ។—កាឡាទី ៦:១០
គ្រិស្តសាសនិកពិតស្មោះត្រង់ចំពោះគូអាពាហ៍ពិពាហ៍
លោកយេស៊ូមានប្រសាសន៍ថា៖ «កុំឲ្យអ្នកណាពង្រាត់គូដែលព្រះបានផ្សំផ្គុំឡើយ»។—ម៉ាកុស ១០:៩
អ្វីដែលលោកយេស៊ូបានធ្វើ៖ ទោះជាលោកយេស៊ូមិនដែលរៀបការក្ដី តែលោកតែងតែលើកទឹកចិត្តឲ្យគូអាពាហ៍ពិពាហ៍បន្តស្មោះត្រង់ចំពោះគ្នា។ (ម៉ាថាយ ១៩:៩) លោកបានព្រមានពួកគេអំពីការប្រព្រឹត្តខ្លះដែលអាចបង្ខូចចំណងអាពាហ៍ពិពាហ៍របស់ពួកគេ។—ម៉ាថាយ ៥:២៨
អ្វីដែលគ្រិស្តសាសនិកពិតធ្វើ៖ គ្រិស្តសាសនិកជៀសវាងពីការប្រព្រឹត្តណាដែលមិនឲ្យតម្លៃដល់គូអាពាហ៍ពិពាហ៍។ (ហេប្រឺ ១៣:៤) ពួកគេក៏ប្រព្រឹត្តចំពោះគ្នាដោយសេចក្ដីស្រឡាញ់និងការគោរពដែរ។—អេភេសូរ ៥:២៨, ៣៣