ជំនួយសម្រាប់ក្រុមគ្រួសារ
ការនិយាយជាមួយកូនអំពីគ្រឿងស្រវឹង
ឪពុកម្នាក់ឈ្មោះអាឡិចសេនដឺ បានរៀបរាប់ថា៖«លើកដំបូងដែលយើងនិយាយជាមួយកូនស្រីរបស់យើងអំពីគ្រឿងស្រវឹង គឺពេលនាងមានអាយុ៦ឆ្នាំ។ យើងភ្ញាក់ផ្អើលណាស់ ព្រោះយើងមិននឹកស្មានសោះថានាងដឹងច្រើនអំពីគ្រឿងស្រវឹង»។
អ្វីដែលអ្នកគួរដឹង
ការនិយាយជាមួយកូនអំពីគ្រឿងស្រវឹងគឺសំខាន់។ សូមកុំចាំរហូតដល់កូនពេញជំទង់ ទើបនិយាយជាមួយគាត់អំពីរឿងនោះឡើយ។ ឪពុកម្នាក់ឈ្មោះហាមីតនៅប្រទេសរុស្ស៊ី បានរៀបរាប់ថា៖«ស្ដាយដែលខ្ញុំមិនបាននិយាយអំពីគ្រឿងស្រវឹងជាមួយកូនប្រុសខ្ញុំតាំងពីគាត់នៅក្មេង។ ព្រោះក្រោយមក ទើបខ្ញុំដឹងថាកូនប្រុសខ្ញុំមានទម្លាប់ផឹកស្រាតាំងពីគាត់អាយុ១៣ឆ្នាំមកម្ល៉េះ។ ដូច្នេះ ខ្ញុំទាញមេរៀនថាខ្ញុំមិនគួរបង្អែបង្អង់ក្នុងការនិយាយជាមួយគាត់អំពីរឿងនោះទេ»។
ហេតុអ្វីអ្នកគួរបារម្ភអំពីរឿងនេះ?
ព្រោះកូនរបស់អ្នកអាចទទួលឥទ្ធិពលពីមិត្តភក្តិ ការផ្សាយពាណិជ្ជកម្ម និងការផ្សាយតាមទូរទស្សន៍។
យោងទៅតាមមជ្ឈមណ្ឌលត្រួតពិនិត្យនិងបង្ការជំងឺឆ្លងនៅសហរដ្ឋអាម៉េរិក បានឃើញថាក្មេងមិនទាន់គ្រប់អាយុចំនួន១១ភាគរយបានពិសាគ្រឿងស្រវឹង ហើយនេះគ្រាន់តែជាតួលេខក្នុងសហរដ្ឋអាម៉េរិកប៉ុណ្ណោះ។
ហេតុនេះ រដ្ឋមន្ត្រីក្រសួងសុខាភិបាល បានលើកទឹកចិត្តឪពុកម្ដាយឲ្យអប់រំកូនរបស់ពួកគេតាំងពីក្មេងអំពីគ្រោះថ្នាក់នៃការពិសាគ្រឿងស្រវឹង។ តើអ្នកអាចធ្វើដូច្នេះតាមរបៀបណា?
អ្វីដែលអ្នកគួរធ្វើ
ត្រៀមចម្លើយដើម្បីឆ្លើយនឹងសំណួររបស់កូន។ តាមធម្មតាក្មេងតូចពូកែឆ្ងល់ រីឯក្មេងធំ កាន់តែពូកែឆ្ងល់ជាងនោះទៅទៀត។ ដូច្នេះ សូមអ្នកត្រៀមចម្លើយដើម្បីទុកឆ្លើយនឹងសំណួររបស់ពួកគេ។ ជាឧទាហរណ៍៖
បើកូនរបស់អ្នកឆ្ងល់ថាគ្រឿងស្រវឹងមានរសជាតិបែបណា អ្នកអាចប្រាប់កូនថា ស្រាទំពាំងបាយជូរស្រដៀងនឹងទឹកផ្លែឈើ តែរាងជូរបន្តិច។ ចំណែកឯស្រាបៀរវិញ មានរសជាតិល្វីង។
បើកូនរបស់អ្នកចង់ភ្លក់គ្រឿងស្រវឹង អ្នកអាចប្រាប់កូនថា គ្រឿងស្រវឹងវាខ្លាំងពេកសម្រាប់រាងកាយកុមារ។ សូមប្រាប់អំពីផលប៉ះពាល់ផងដែរ ដូចជាវាធ្វើឲ្យមានអារម្មណ៍ងងុយគេង ហើយបើផឹកច្រើនពេកធ្វើឲ្យវិលមុខ ប្រព្រឹត្តល្ងីល្ងើ និងនិយាយផ្ដេសផ្ដាសជាដើម។—សុភាសិត ២៣:២៩-៣៥
អប់រំខ្លួន។ គម្ពីរចែងថា៖«មនុស្សឈ្លាសវៃប្រព្រឹត្តដោយចំណេះដឹង»។ (សុភាសិត ១៣:១៦) សូមស្វែងយល់អំពីផលប៉ះពាល់ដែលមកពីការពិសាគ្រឿងស្រវឹង និងត្រូវដឹងថាច្បាប់នៅប្រទេសអ្នកអនុញ្ញាតឲ្យពិសាគ្រឿងស្រវឹងចាប់ពីអាយុប៉ុន្មាន។
ផ្ដើមនិយាយជាមួយកូនអំពីរឿងនេះ។ ឪពុកម្នាក់ឈ្មោះម៉ាកនៅប្រទេសអង់គ្លេស បានរៀបរាប់ថា៖«យុវវ័យជាច្រើនមានការយល់ច្រឡំអំពីការពិសាគ្រឿងស្រវឹង។ ដូច្នេះ ខ្ញុំបានសួរកូនប្រុសខ្ញុំដែលមានអាយុ៨ឆ្នាំថា តើគាត់គិតថាការពិសាគ្រឿងស្រវឹងខុសឬក៏ត្រូវ។ ដំបូងខ្ញុំនិយាយពីនេះពីនោះសិន រួចទាញចូលរឿងនោះ ហើយទុកពេលឲ្យគាត់ប្រាប់ពីអារម្មណ៍និងទស្សនៈគាត់។ ដោយធ្វើដូច្នេះជួយគាត់ឲ្យនិយាយអស់ពីចិត្តជាង»។
បើអ្នកឧស្សាហ៍លើកឡើងប្រធានបទនោះជាមួយកូន អ្នកនឹងយល់អារម្មណ៍គាត់កាន់តែច្បាស់ជាង។ អ្នកអាចបង្រៀនកូនតាមកម្រិតអាយុរបស់គាត់។ អ្នកអាចប្រាប់កូននូវផលវិបាកដែលមកពីការពិសាគ្រឿងស្រវឹងច្រើនពេក ដូចជាបណ្ដាលឲ្យមានគ្រោះថ្នាក់ចរាចរណ៍ និងប្រព្រឹត្តអំពើប្រាសចាកសីលធម៌ខាងផ្លូវភេទជាដើម។
ទុកគំរូ។ កូនប្រៀបដូចជាអេប៉ុង ពួកគេនឹងស្រូបយកអ្វីដែលនៅជុំវិញពួកគេ។ ឯកសារយោងមួយបានរៀបរាប់ថាកូនទទួលឥទ្ធិពលពីឪពុកម្ដាយខ្លាំងជាងគេ។ នេះមានន័យថា បើអ្នកពិសាគ្រឿងស្រវឹងដើម្បីរម្ងាប់អារម្មណ៍ឬបន្ធូរការតានតឹងចិត្ត នោះកូនរបស់អ្នកនឹងគិតថាគ្រឿងស្រវឹងជួយបំបាត់ការថប់បារម្ភ។ ដូច្នេះ សូមទុកគំរូល្អដល់កូន ហើយសូមប្រាកដថាអ្នកពិសាគ្រឿងស្រវឹងដោយមានទំនួលខុសត្រូវ។
កូនរបស់អ្នកនឹងរៀនពីគំរូរបស់អ្នកអំពីការពិសាគ្រឿងស្រវឹង