បណ្ណាល័យអ៊ីនធឺណិតរបស់ប៉មយាម

ជំនួយសម្រាប់ក្រុមគ្រួសារ

២០១១ កិច្ចបម្រើព្រះ | មករា
- ជំនួយសម្រាប់ក្រុមគ្រួសារ
  
  ១. តើថ្ងៃឈប់សម្រាករាល់សប្ដាហ៍មានប្រយោជន៍យ៉ាងណាខ្លះដល់ក្រុមគ្រួសារអ៊ីស្រាអែល?
  
  ^១ ថ្ងៃឈប់សម្រាកដែលព្រះយេហូវ៉ាបានរៀបចំដោយសេចក្ដីស្រឡាញ់នោះ បានផ្ដល់ប្រយោជន៍ដល់ក្រុមគ្រួសារ។ ជនជាតិអ៊ីស្រាអែលបានឈប់សម្រាកពីការងារប្រចាំថ្ងៃ ហើយមានពេលសញ្ជឹងគិតអំពីគុណធម៌របស់ព្រះយេហូវ៉ានិងអំពីចំណងមិត្តភាពរបស់ពួកគេជាមួយនឹងលោក។ ឪពុកម្ដាយអាចឆ្លៀតឱកាសនេះប្រិតប្រៀនឬបង្រៀនកូនឲ្យចាំជាប់ក្នុងចិត្តនូវច្បាប់របស់ព្រះ។ (ចោ. ៦:៦, ៧) ថ្ងៃឈប់សម្រាកផ្ដល់ពេលរាល់សប្ដាហ៍ឲ្យបណ្ដារាស្ត្ររបស់ព្រះយេហូវ៉ាប្រមូលអារម្មណ៍ទៅលើចំណងមិត្តភាពរបស់ពួកគេជាមួយនឹងលោក។
  
  ២. តើថ្ងៃឈប់សម្រាកបង្រៀនយើងអ្វីអំពីព្រះយេហូវ៉ា?
  
  ^២ ព្រះយេហូវ៉ាលែងតម្រូវឲ្យក្រុមគ្រួសារកាន់ថ្ងៃឈប់សម្រាកទៀតហើយ។ ក៏ប៉ុន្តែ ច្បាប់នេះបង្រៀនយើងអ្វីមួយអំពីព្រះរបស់យើង។ លោកតែងតែយកចិត្តទុកដាក់យ៉ាងខ្លាំងចំពោះអ្វីដែលជួយរាស្ត្ររបស់លោកឲ្យទទួលប្រយោជន៍ពីការមានចំណងមិត្តភាពដ៏ជិតស្និទ្ធជាមួយនឹងលោក។ (អេ. ៤៨:១៧, ១៨) សព្វថ្ងៃនេះ របៀបមួយដែលព្រះយេហូវ៉ាបង្ហាញថាលោកយកចិត្តទុកដាក់ចំពោះរាស្ត្ររបស់លោក គឺតាមរយៈការរៀបចំឲ្យមានល្ងាចមួយសម្រាប់គោរពប្រណិប័តន៍ជាក្រុមគ្រួសារ។
  
  ៣. តើអ្វីជាគោលបំណងនៃការគោរពប្រណិប័តន៍ជាក្រុមគ្រួសារនៅល្ងាចមួយ?
  
  ^៣ តើអ្វីជាគោលបំណងនៃការគោរពប្រណិប័តន៍ជាក្រុមគ្រួសារនៅល្ងាចមួយ? នៅខែមករា ឆ្នាំ២០០៩ ការសិក្សាសៀវភៅតាមក្រុមជំនុំបានចាប់ផ្ដើមធ្វើនៅល្ងាចដែលមានសាលាកិច្ចបម្រើផ្សាយនិងការប្រជុំអប់រំកិច្ចបម្រើ។ មូលហេតុមួយដែលមានការកែសម្រួលនេះ គឺដើម្បីឲ្យក្រុមគ្រួសារមានឱកាសពង្រឹងចំណងមិត្តភាពជាមួយនឹងព្រះយេហូវ៉ា ដោយកំណត់ល្ងាចមួយរាល់សប្ដាហ៍ដើម្បីគោរពប្រណិប័តន៍ជាក្រុមគ្រួសារ។ គ្រួសារនីមួយៗបានត្រូវលើកទឹកចិត្តឲ្យលើកការសិក្សាជាក្រុមគ្រួសារមកធ្វើនៅល្ងាចដែលពីមុនជាល្ងាចដែលមានការសិក្សាសៀវភៅតាមក្រុមជំនុំ បើអាចធ្វើបាន ហើយប្រើពេលនោះសម្រាប់ការពិភាក្សាគម្ពីរតាមសម្រួល និងសិក្សាស្របតាមសេចក្ដីត្រូវការនៃគ្រួសារនីមួយៗ។
  
  ៤. តើក្រុមគ្រួសារត្រូវកំណត់ពេលសម្រាប់ការពិភាក្សាត្រឹមតែមួយម៉ោងឬ? សូមពន្យល់។
  
  ^៤ ដើម្បីទៅការសិក្សាសៀវភៅតាមក្រុមជំនុំ យើងត្រូវការពេលដើម្បីស្លៀកពាក់ និងធ្វើដំណើរជាដើម។ សម្រាប់យើងជាច្រើននាក់ យើងត្រូវការពេលច្រើនជាងមួយម៉ោងដើម្បីមានវត្តមាននៅកិច្ចប្រជុំនោះដែលមានតែមួយម៉ោងប៉ុណ្ណោះ។ ដោយសារមានការកែសម្រួលកិច្ចប្រជុំ ឥឡូវនេះយើងមានល្ងាចមួយដើម្បីគោរពប្រណិប័តន៍ជាគ្រួសារ។ ហេតុនេះ យើងមិនចាំបាច់កំណត់ពេលសម្រាប់ការគោរពប្រណិប័តន៍របស់យើងជាក្រុមគ្រួសារត្រឹមតែមួយម៉ោងប៉ុណ្ណោះទេ។ ផ្ទុយទៅវិញ យើងគួរគិតអំពីសេចក្ដីត្រូវការនិងអ្វីដែលគ្រួសារយើងអាចធ្វើបាន ហើយកំណត់ពេលសមស្របតាមនោះ។
  
  ៥. តើត្រូវចំណាយពេលទាំងអស់ក្នុងការពិភាក្សាជាក្រុមគ្រួសារឬទេ? សូមពន្យល់។
  
  ^៥ តើត្រូវចំណាយពេលទាំងអស់ក្នុងការពិភាក្សាជាក្រុមគ្រួសារឬ? កាលណាគូស្វាមីភរិយានិងក្រុមគ្រួសារដែលមានកូនពិភាក្សាគ្នាអំពីប្រធានបទណាមួយស្តីអំពីគម្ពីរជាមួយគ្នា នោះពួកគេលើកទឹកចិត្តគ្នាទៅវិញទៅមក។ (រ៉ូម ១:១២) គ្រួសារនោះកាន់តែជិតស្និទ្ធគ្នាឡើង។ ដូច្នេះ ការពិភាក្សាអំពីបទគម្ពីរគួរជាផ្នែកសំខាន់បំផុតនៃការគោរពប្រណិប័តន៍ជាក្រុមគ្រួសារ។ ក៏ប៉ុន្តែ សមាជិកគ្រួសារម្នាក់ៗក៏អាចចំណាយពេលសិក្សាដោយខ្លួនឯងដែរ។ ជាឧទាហរណ៍ បន្ទាប់ពីពិភាក្សាគ្នាជាក្រុម គ្រួសារអាចនៅជាមួយគ្នា ពេលដែលសមាជិកម្នាក់ៗបន្តសិក្សាដាច់ដោយឡែកពីគ្នា អ្នកខ្លះប្រហែលជាបញ្ចប់ការរៀបចំកិច្ចប្រជុំ ឬអំណានទស្សនាវដ្ដី។ គ្រួសារខ្លះសម្រេចចិត្តមិនបើកទូរទស្សន៍ពេញមួយល្ងាចនោះ។
  
  ៦. តើយើងអាចដឹកនាំការពិភាក្សាយ៉ាងដូចម្ដេច?
  
  ^៦ តើយើងអាចដឹកនាំការពិភាក្សានោះយ៉ាងដូចម្ដេច? ការពិភាក្សាមិនចាំបាច់ធ្វើឡើងជាសំណួរនិងចម្លើយជានិច្ចនោះទេ។ ដើម្បីធ្វើឲ្យការគោរពប្រណិប័តន៍ជាក្រុមគ្រួសារមានភាពរស់រវើកនិងគួរឲ្យចាប់អារម្មណ៍ គ្រួសារជាច្រើនមានកម្មវិធីដែលស្រដៀងគ្នានឹងសាលាកិច្ចបម្រើផ្សាយនិងកិច្ចប្រជុំអប់រំកិច្ចបម្រើ។ ពួកគេបែងចែកការពិភាក្សាជាផ្នែកផ្សេងៗ ហើយធ្វើការពិភាក្សាតាមវិធីផ្សេងៗ។ ជាឧទាហរណ៍ ពួកគេប្រហែលជាអានគម្ពីរជាមួយគ្នា រៀបចំកិច្ចប្រជុំមួយផ្នែក ហើយហាត់ពាក្យផ្សព្វផ្សាយ។ នៅទំព័រទី៦មានយោបល់ថែមទៀត។
  
  ៧. តើឪពុកម្ដាយគួរព្យាយាមធ្វើឲ្យមានបរិយាកាសបែបណា?
  
  ^៧ តើឪពុកម្ដាយគួរព្យាយាមធ្វើឲ្យមានបរិយាកាសបែបណា ពេលគោរពប្រណិប័តន៍ជាក្រុមគ្រួសារ? គ្រួសាររបស់អ្នកនឹងរៀនបានល្អបំផុតក្នុងបរិយាកាសធូរស្រាលនិងប្រកបដោយសេចក្ដីស្រឡាញ់។ ជួនកាល អ្នកអាចសិក្សានៅក្រៅផ្ទះបើអាកាសធាតុល្អ។ សូមឈប់សម្រាកបន្ដិចបើចាំបាច់។ គ្រួសារខ្លះរៀបចំឲ្យមានអាហារបន្ដិចបន្តួចឬភេសជ្ជៈក្រោយកម្មវិធី។ ឪពុកម្ដាយនឹងមិនយកពេលគោរពប្រណិប័តន៍ជាក្រុមគ្រួសារដើម្បីស្តីបន្ទោសឬប្រដៅកូនឡើយ តែពួកគេប្រហែលជាត្រូវយកពេលខ្លះដើម្បីពិភាក្សាអំពីទម្លាប់មួយឬបញ្ហាជាក់លាក់ណាមួយដែលពួកគេបានដឹង។ ក៏ប៉ុន្តែ បើកូនមានបញ្ហាផ្ទាល់ខ្លួនណាមួយដែលអាចធ្វើឲ្យគាត់ខ្មាសបងប្អូនគាត់ នោះប្រហែលជាការល្អបើឪពុកម្ដាយពិភាក្សាជាមួយនឹងកូនដោយឡែកពីគេ នៅពេលមួយផ្សេងទៀតក្នុងសប្ដាហ៍នោះ។ ការគោរពប្រណិប័តន៍ជាក្រុមគ្រួសារមិនគួរជាឱកាសមួយដ៏គួរឲ្យធុញទ្រាន់ ហើយតឹងរឹងពេកទេ តែគួរឆ្លុះបញ្ចាំងឲ្យឃើញព្រះដែលមានសេចក្ដីសប្បាយដែលយើងគោរពប្រណិប័តន៍។—១ធី. ១:១១
  
  ៨, ៩. តើមេគ្រួសារត្រូវរៀបចំអ្វីខ្លះ?
  
  ^៨ តើមេគ្រួសារអាចរៀបចំយ៉ាងដូចម្ដេច? ក្រុមគ្រួសារនឹងទទួលប្រយោជន៍ច្រើនបំផុត បើមេគ្រួសាររៀបចំជាមុនសម្រាប់ល្ងាចនីមួយៗដែលមានការគោរពប្រណិប័តន៍ជាក្រុមគ្រួសារ ដោយសម្រេចថាពួកគេនឹងពិភាក្សារឿងអ្វី ហើយសម្រេចថាវិធីណាគឺល្អបំផុតដើម្បីពិភាក្សាអំពីរឿងនោះ។ (សុភ. ២១:៥) ប្ដីគួរពិគ្រោះជាមួយនឹងប្រពន្ធគាត់អំពីរឿងនេះ។ (សុភ. ១៥:២២) ជាមេគ្រួសារ ម្ដងម្កាល អ្នកក៏គួរសួរមតិកូនៗរបស់អ្នកដែរ។ បើអ្នកធ្វើដូច្នោះ អ្នកនឹងយល់ធ្លុះជ្រៅអំពីអ្វីដែលពួកគេចាប់អារម្មណ៍និងអ្វីដែលធ្វើឲ្យពួកគេខ្វល់ខ្វាយ។
  
  ^៩ នៅសប្ដាហ៍ភាគច្រើន មេគ្រួសារនឹងមិនចាំបាច់ចំណាយពេលច្រើនពេកដើម្បីរៀបចំទេ។ ក្រុមគ្រួសារទំនងជានឹងសប្បាយចិត្តបើមានផ្នែកខ្លះដែលពួកគេធ្វើរាល់សប្ដាហ៍ ហើយមេគ្រួសារនឹងមិនចាំបាច់បង្កើតកម្មវិធីថ្មីទាំងស្រុងរាល់លើកទេ។ គាត់ប្រហែលជានឹងឃើញថាមានប្រយោជន៍បើគាត់រៀបចំកម្មវិធី ក្រោយការសិក្សានោះចប់ កាលដែលគាត់នៅចាំអំពីសេចក្ដីត្រូវការរបស់ក្រុមគ្រួសារ។ មេគ្រួសារខ្លះសរសេរយ៉ាងខ្លីនូវអ្វីដែលក្រុមគ្រួសារត្រូវពិភាក្សានៅសប្ដាហ៍នោះ ហើយបិទនៅកន្លែងដែលពួកគេអាចឃើញដោយងាយ ដូចជានៅទូទឹកកកជាដើម។ នេះធ្វើឲ្យក្រុមគ្រួសាររំភើបចិត្ត ហើយគិតទុកជាមុន ថែមទាំងទុកពេលឲ្យពួកគេរៀបចំ បើចាំបាច់។
  
  ១០. តើអ្នកដែលរស់នៅតែម្នាក់ឯងអាចប្រើយ៉ាងដូចម្ដេចនូវល្ងាចដែលទុកសម្រាប់ការគោរពប្រណិប័តន៍ជាក្រុមគ្រួសារ?
  
  ^១០ ចុះយ៉ាងណាបើខ្ញុំមានតែម្នាក់ឯងឬមិនមានក្រុមគ្រួសារជាអ្នកជឿ? អ្នកដែលរស់នៅម្នាក់ឯងអាចប្រើល្ងាចដែលទុកសម្រាប់ការគោរពប្រណិប័តន៍ជាក្រុមគ្រួសារ ដើម្បីធ្វើការសិក្សាដោយខ្លួនឯង។ កម្មវិធីសិក្សាដោយខ្លួនឯងដ៏ល្អគួររួមបញ្ចូលអំណានគម្ពីរ ការរៀបចំកិច្ចប្រជុំ និងការអានទស្សនាវដ្ដីប៉មយាម។ បន្ថែមនឹងនេះ អ្នកផ្សាយខ្លះស្រាវជ្រាវអំពីប្រធានបទណាមួយដែលពួកគេចាប់អារម្មណ៍។ ម្ដងម្កាល ពួកគេប្រហែលជាអាចអញ្ជើញអ្នកផ្សាយម្នាក់ទៀតឬក្រុមគ្រួសារមួយទៀតមកចូលរួមជាមួយនឹងពួកគេដើម្បីពិភាក្សាគម្ពីរហើយលើកទឹកចិត្តគ្នាទៅវិញទៅមក។
  
  ១១, ១២. តើការគោរពប្រណិប័តន៍ជាក្រុមគ្រួសារជាទៀងទាត់នៅល្ងាចមួយនាំឲ្យមានប្រយោជន៍អ្វីខ្លះ?
  
  ^១១ តើការគោរពប្រណិប័តន៍ជាក្រុមគ្រួសារជាទៀងទាត់នៅល្ងាចមួយនាំឲ្យមានប្រយោជន៍អ្វីខ្លះ? អ្នកដែលចូលរួមយ៉ាងស្មោះអស់ពីចិត្តក្នុងការគោរពប្រណិប័តន៍ពិត ពួកគេនឹងចូលកាន់តែជិតស្និទ្ធជាមួយនឹងព្រះយេហូវ៉ា។ ម្យ៉ាងទៀត សមាជិកក្រុមគ្រួសារដែលគោរពប្រណិប័តន៍ជាមួយគ្នា ពង្រឹងទំនាក់ទំនងរវាងគ្នាកាន់តែខ្លាំងឡើង។ ស្វាមីភរិយាមួយគូបានសរសេរអំពីពរដែលពួកគេបានទទួលថា៖ «ជាប្ដីប្រពន្ធដែលជាអ្នកត្រួសត្រាយដែលគ្មានកូន យើងពិតជាទន្ទឹងរង់ចាំយប់ដែលយើងគោរពប្រណិប័តន៍ជាគ្រួសារ។ យើងមានអារម្មណ៍ថា យើងកាន់តែជិតស្និទ្ធនឹងគ្នា ហើយចូលទៅកាន់តែជិតបិតារបស់យើងនៅស្ថានសួគ៌។ ឥឡូវ ពេលភ្ញាក់ឡើងនៅថ្ងៃដែលយើងបានកំណត់ទុកសម្រាប់សិក្សាជាមួយគ្នា នោះយើងសួរគ្នាថា៖ ‹តើយប់នេះជាយប់អី? ជាយប់នៃការគោរពប្រណិប័តន៍ជាក្រុមគ្រួសារ!›»។
  
  ^១២ ការរៀបចំឲ្យមានល្ងាចសម្រាប់គោរពប្រណិប័តន៍ជាក្រុមគ្រួសារក៏ជួយក្រុមគ្រួសារដែលរវល់ដែរ។ ម្ដាយម្នាក់ដែលគ្មានគូ ជាអ្នកត្រួសត្រាយពេញពេល ហើយត្រូវចិញ្ចឹមកូនប្រុសពីរនាក់បានសរសេរថា៖ «នៅអតីតកាល ការសិក្សារបស់ក្រុមគ្រួសារយើងមិនបានល្អទេ។ យើងធ្វើការសិក្សាយូរៗម្ដង ហើយលើកថ្ងៃរហូត ពីព្រោះខ្ញុំនឿយហត់។ ខ្ញុំមិនដឹងថាត្រូវធ្វើយ៉ាងណាទេ។ ហេតុនេះ ខ្ញុំសរសេរសំបុត្រទៅបងប្អូនដើម្បីអរគុណច្រើនណាស់ ចំពោះការរៀបចំឲ្យមានការគោរពប្រណិប័តន៍ជាក្រុមគ្រួសារនៅល្ងាចមួយ។ យើងបានសិក្សាជាក្រុមគ្រួសារយ៉ាងទៀងទាត់ ហើយបានទទួលប្រយោជន៍ពីការសិក្សានោះ»។
  
  ១៣. តើប្រយោជន៍ដែលគ្រួសារអ្នកទទួលពីរបៀបរៀបចំនេះគឺអាស្រ័យទៅលើអ្វី?
  
  ^១៣ ដូចថ្ងៃឈប់សម្រាកដែរ ការគោរពប្រណិប័តន៍ជាក្រុមគ្រួសារនៅល្ងាចមួយគឺជាអំណោយមួយពីបិតារបស់យើងនៅស្ថានសួគ៌ ជាអំណោយដែលអាចជួយក្រុមគ្រួសារ។ (យ៉ា. ១:១៧) ជំនួយដែលក្រុមគ្រួសារអ៊ីស្រាអែលបានទទួលក្នុងការពង្រឹងចំណងមិត្តភាពជាមួយនឹងព្រះ គឺអាស្រ័យទៅលើក្រុមគ្រួសារទាំងនោះប្រើពេលវេលានៅថ្ងៃឈប់សម្រាកដើម្បីធ្វើអ្វីខ្លះ។ ស្រដៀងគ្នាដែរ ប្រយោជន៍ដែលគ្រួសារយើងនឹងទទួលគឺអាស្រ័យទៅលើរបៀបដែលយើងប្រើល្ងាចដែលបានត្រូវរៀបចំឲ្យយើងសម្រាប់ការគោរពប្រណិប័តន៍ជាក្រុមគ្រួសារ។ (២កូ. ៩:៦; កាឡ. ៦:៧, ៨; កូឡ. ៣:២៣, ២៤) ដោយចេះប្រើរបៀបរៀបចំនេះ គ្រួសារអ្នកអាចពោលដូចអ្នកតែងទំនុកតម្កើងដែលថា៖ «ឯទូលបង្គំ ដែលទូលបង្គំចូលទៅជិតព្រះ នោះជាការល្អដល់ទូលបង្គំ ទូលបង្គំបានយកព្រះអម្ចាស់យេហូវ៉ាទុកជាទីពឹងហើយ»។—ទំនុក. ៧៣:២៨
  
  [ឃ្លាអក្សរធំនៅទំព័រ៥]
  
  ល្ងាចដែលមានការគោរពប្រណិប័តន៍ជាក្រុមគ្រួសារមិនគួរជាឱកាសមួយគួរឲ្យធុញទ្រាន់ ហើយតឹងរឹងពេកទេ តែគួរជាឱកាសដែលបង្ហាញឲ្យឃើញថាព្រះដែលយើងគោរពប្រណិប័តន៍ ជាព្រះដែលមានសេចក្ដីសប្បាយ
  
  [ប្រអប់នៅទំព័រ៦]
  
  សូមរក្សាទុក
  
  យោបល់ខ្លះសម្រាប់ប្រើនៅល្ងាចដែលគោរពប្រណិប័តន៍ជាក្រុមគ្រួសារ
  
  គម្ពីរ:
  
  • អានមួយផ្នែកនៃអំណានប្រចាំសប្ដាហ៍ជាមួយគ្នា។ បើកំណត់ហេតុក្នុងគម្ពីរហុចឱកាស នោះបុគ្គលម្នាក់អាចអានពាក្យរបស់អ្នកពោល ហើយអ្នកឯទៀតអាចអានពាក្យសម្ដីរបស់តួអង្គផ្សេងៗ។
  
  • ដើរតួផ្នែកណាមួយក្នុងអំណានគម្ពីរ។
  
  • ឲ្យសមាជិកគ្រួសារម្នាក់ៗអានជំពូកក្នុងគម្ពីរទុកជាមុន ហើយកត់សំណួរមួយឬពីរដែលគាត់ឆ្ងល់អំពីជំពូកនោះ។ បន្ទាប់មកធ្វើការស្រាវជ្រាវជាមួយគ្នាអំពីសំណួររបស់សមាជិកម្នាក់ៗ។
  
  • រាល់សប្ដាហ៍ ចូរកាត់ក្រដាសតូចមួយ ហើយសរសេរបទគម្ពីរមួយលើក្រដាសនោះ បន្ទាប់មកខំទន្ទេញឲ្យចាំ រួចពន្យល់បទគម្ពីរនោះ។ សន្សំទុកក្រដាសនោះឲ្យបានច្រើន ហើយមើលសាឡើងវិញរាល់សប្ដាហ៍ដើម្បីដឹងថាអ្នកចាំបទគម្ពីរបានប៉ុន្មាន។
  
  កិច្ចប្រជុំ:
  
  • រៀបចំជាមួយគ្នានូវផ្នែកណាមួយនៃកិច្ចប្រជុំ។
  
  • ហាត់ច្រៀងចម្រៀងរាជាណាចក្រសម្រាប់កិច្ចប្រជុំនៅសប្ដាហ៍ខាងមុខ។
  
  • បើអ្នកណាម្នាក់ក្នុងគ្រួសារមានសុន្ទរកថានៅសាលាកិច្ចបម្រើផ្សាយឬមានការសម្ដែងនៅការប្រជុំអប់រំកិច្ចបម្រើ សូមពិភាក្សាគ្នាអំពីរបៀបរៀបចំសុន្ទរកថាឬការសម្ដែងនោះ ឬហាត់ពាក្យនោះនៅមុខក្រុមគ្រួសារ។
  
  សេចក្ដីត្រូវការរបស់ក្រុមគ្រួសារ:
  
  • ពិភាក្សាព័ត៌មានក្នុងសៀវភៅរឿងព្រះគម្ពីររបស់ខ្ញុំឬគន្លឹះនៃសុភមង្គលគ្រួសារ។
  
  • ហាត់អំពីរបៀបដែលអាចប្រព្រឹត្តពេលប្រឈមមុខនឹងបញ្ហាណាមួយដែលទំនងជាកើតឡើងនៅសាលា។
  
  • ហាត់ដោយឲ្យឪពុកម្ដាយដើរតួជាកូនៗ ឯកូនៗធ្វើជាឪពុកម្ដាយ។ កូនៗស្រាវជ្រាវប្រធានបទមួយ បន្ទាប់មកបញ្ជាក់ហេតុផលប្រាប់ឪពុកម្ដាយ។
  
  កិច្ចបម្រើផ្សាយ:
  
  • ហាត់ពាក្យផ្សាយដែលអាចប្រើក្នុងកិច្ចបម្រើនៅថ្ងៃសៅរ៍និងថ្ងៃអាទិត្យ។
  
  • ពិភាក្សាអំពីគោលដៅដែលក្រុមគ្រួសារអាចសម្រេចបាន ដើម្បីពង្រីកកិច្ចបម្រើផ្សាយក្នុងអំឡុងខែដែលមានពិធីរំលឹកឬនៅពេលមានវិស្សមកាល។
  
  • ទុកពេលឲ្យសមាជិកគ្រួសារម្នាក់ៗពីរបីនាទីដើម្បីស្រាវជ្រាវរកចម្លើយចំពោះសំណួរមួយដែលម្ចាស់ផ្ទះប្រហែលជាសួរពេលផ្សព្វផ្សាយ។ រួចមកហាត់អំពីរបៀបឆ្លើយ។
  
  យោបល់បន្ថែម:
  
  • អានជាមួយគ្នានូវអត្ថបទមួយពីទស្សនាវដ្ដីថ្មី។
  
  • សុំសមាជិកគ្រួសារម្នាក់ៗអានជាមុនពីទស្សនាវដ្ដីថ្មីនូវអត្ថបទមួយដែលគាត់ចាប់អារម្មណ៍ ហើយឲ្យគាត់រៀបរាប់អំពីអត្ថបទនោះ។
  
  • ម្ដងម្កាល សូមអញ្ជើញអ្នកផ្សព្វផ្សាយម្នាក់ឬគូស្វាមីភរិយាឲ្យចូលរួមជាមួយអ្នកក្នុងការគោរពប្រណិប័តន៍ជាក្រុមគ្រួសារ ហើយប្រហែលជាសម្ភាសពួកគាត់។
  
  • ពិភាក្សាជាមួយគ្នានូវអត្ថបទ «ចូរបង្រៀនកូនរបស់អ្នក»ឬ «ការស្រាវជ្រាវខាងគម្ពីរសម្រាប់ប្អូនៗ»ពីទស្សនាវដ្ដីប៉មយាម។
  
  • អាន ហើយពិភាក្សាមួយផ្នែកពីសៀវភៅថ្មីដែលបានចេញនៅមហាសន្និបាត។
  
  • បន្ទាប់ពីបានចូលរួមមហាសន្និបាតឬសន្និបាត សូមពិនិត្យសាឡើងវិញនូវចំណុចសំខាន់ៗ។
  
  • ទៅមើលអ្វីដែលព្រះយេហូវ៉ាបានបង្កើត ហើយពិភាក្សាពីអ្វីនោះបង្រៀនយើងអំពីព្រះយេហូវ៉ា។
  
  • ធ្វើកិច្ចការអ្វីមួយជាមួយគ្នា ដូចជាគូរផែនទីឬតារាង ឬធ្វើគំរូពីរបស់ណាមួយដែលមានក្នុងគម្ពីរ។

សប្ដាហ៍ចាប់ផ្ដើមថ្ងៃទី២៤ ខែមករា

២០១១ កិច្ចបម្រើព្រះ | មករា
- សប្ដាហ៍ចាប់ផ្ដើមថ្ងៃទី២៤ ខែមករា
  
  សប្ដាហ៍ចាប់ផ្ដើមថ្ងៃទី២៤ ខែមករា
  
  ចម្រៀងលេខ៥៣ និងសេចក្ដីអធិដ្ឋាន
  
  □ ការសិក្សាគម្ពីរជាក្រុមជំនុំ:
  
  cl ជំពូកទី៣០ វគ្គ១-៩ (២៥នាទី)
  
  □ សាលាកិច្ចបម្រើផ្សាយ:
  
  អំណានគម្ពីរ: អែសរ៉ា ៦-១០ (១០នាទី)
  
  ទី១: អែសរ៉ា ៧:១-១៧ (៤នាទី ឬខ្លីជាង)
  
  ទី២: តើលោកយេស៊ូបានបង្ហាញយ៉ាងណាថា លោកសមនឹងគ្រប់គ្រងជាស្តេច? (៥នាទី)
  
  ទី៣: តើមាតាបិតាអាចទាញមេរៀនអ្វីពីលោកយេស៊ូ?—bh ទំព័រ១៦១-១៦២ វគ្គ១៤-១៦ (៥នាទី)
  
  □ ការប្រជុំអប់រំកិច្ចបម្រើ:
  
  ចម្រៀងលេខ៣០
  
  ៥ នាទី: សេចក្ដីជូនដំណឹង។ សូមប្រាប់ពីឧបករណ៍ផ្សាយសម្រាប់ខែកុម្ភៈ ហើយធ្វើការសម្ដែងមួយ។
  
  ២០ នាទី: «ជំនួយសម្រាប់ក្រុមគ្រួសារ»។—ផ្នែកទី១ (វគ្គ១-៦ និងប្រអប់នៅទំព័រ៦) សំណួរនិងចម្លើយ។ សូមលើកទឹកចិត្តអ្នកស្ដាប់ឲ្យសាកធ្វើតាមយោបល់ខ្លះក្នុងប្រអប់នៅទំព័រ៦នៅលើកក្រោយ ពេលដែលមានការគោរពប្រណិប័តន៍ជាក្រុមគ្រួសារ។ ក្នុងកម្មវិធីប្រជុំនៅសប្ដាហ៍ក្រោយ ពួកគេនឹងមានឱកាសប្រាប់ពីគំនិតរបស់ពួកគេអំពីរបៀបដែលក្រុមគ្រួសាររបស់ពួកគេបានទទួលប្រយោជន៍ ពេលដែលពិភាក្សាវគ្គដែលនៅសល់ក្នុងអត្ថបទនេះ។
  
  ១០ នាទី: មូលហេតុដែលគ្រិស្តសាសនិកពិតមិនប្រើឈើឆ្កាង។ ការពិគ្រោះជាមួយនឹងអ្នកស្ដាប់ដែលមានមូលដ្ឋានលើសេចក្ដីពន្យល់បន្ថែមផ្នែកទី៥ក្នុងសេចក្ដីបកប្រែពិភពលោកថ្មីពីបទគម្ពីរគ្រិស្តសាសនិកជាភាសាក្រិច។
  
  ចម្រៀងលេខ៣២ និងសេចក្ដីអធិដ្ឋាន