បណ្ណាល័យអ៊ីនធឺណិតរបស់ប៉មយាម

ចូរថ្វាយព្រះយេហូវ៉ានូវរបស់ដ៏ល្អបំផុតរបស់យើង

២០០៤ កិច្ចបម្រើព្រះ | មេសា
- ចូរថ្វាយព្រះយេហូវ៉ានូវរបស់ដ៏ល្អបំផុតរបស់យើង
  
  ^១ ច្បាប់របស់ព្រះយេហូវ៉ាសំរាប់សាសន៍អ៊ីស្រាអែលបានចែងយ៉ាងជាក់លាក់ថា សត្វដែលត្រូវថ្វាយទ្រង់ជាយញ្ញបូជា នោះត្រូវជាសត្វ«ឥតខ្ចោះ»។ សត្វណាដែលពិការ នោះទ្រង់មិនសព្វព្រះហឫទ័យឡើយ។ (លេវី. ២២:១៨-២០; ម៉ាឡ. ១:៦-៩) ម្យ៉ាងវិញទៀត ពេលថ្វាយសត្វជាយញ្ញបូជា នោះខ្លាញ់ទាំងអស់ដែលជាអ្វីដ៏ល្អបំផុតត្រូវជារបស់ព្រះយេហូវ៉ា។ (លេវី. ៣:១៤-១៦) ព្រះយេហូវ៉ាសមទទួលនូវរបស់ដ៏ល្អបំផុត ពីព្រោះទ្រង់ជាព្រះវរបិតានិងជាចៅហ្វាយដ៏ឧត្តមរបស់សាសន៍អ៊ីស្រាអែល។
  
  ^២ សព្វថ្ងៃនេះ ព្រះក៏យកព្រះទ័យទុកដាក់នឹងគុណភាពនៃដង្វាយរបស់យើង ដូចនៅពីសម័យបុរាណនោះដែរ។ កិច្ចបំរើរបស់យើងគួរបង្ហាញនូវការគោរពដ៏ត្រឹមត្រូវចំពោះព្រះយេហូវ៉ា។ ពិតហើយ មនុស្សម្នាក់ៗមានកាលៈទេសៈផ្សេងៗគ្នា។ ក៏ប៉ុន្តែ យើងមានមូលហេតុល្អក្នុងការពិចារណាមើលខ្លួន ដើម្បីធ្វើឲ្យប្រាកដថា យើងកំពុងតែបំរើទ្រង់អស់ពីសមត្ថភាពរបស់យើង។—អេភ. ៥:១០
  
  ^៣ កិច្ចបំរើអស់ពីដួងចិត្ត: ដើម្បីឲ្យកិច្ចបំរើផ្សាយរបស់យើងលើកកិត្ដិយសព្រះយេហូវ៉ា និងមានអានុភាពលើចិត្តរបស់អ្នកស្ដាប់ នោះកិច្ចបំរើរបស់យើងមិនអាចធ្វើឡើងឲ្យគ្រាន់តែបង្គ្រប់កិច្ចនោះឡើយ។ ពាក្យសំដីរបស់យើងអំពីព្រះនិងគោលបំណងដ៏អស្ចារ្យរបស់ទ្រង់ គួរចេញពីដួងចិត្តដែលពោរពេញទៅដោយការដឹងគុណ។ (ទំនុក. ១៤៥:៧) នេះបញ្ជាក់នូវសារៈសំខាន់នៃការរក្សាឲ្យមានកម្មវិធីដ៏ល្អចំពោះការអានព្រះគម្ពីរនិងការសិក្សាផ្ទាល់ខ្លួន។—សុ. ១៥:២៨
  
  ^៤ ការខំប្រឹងបំរើព្រះយេហូវ៉ាអស់ពីសមត្ថភាពយើង ក៏រួមបញ្ចូលការយកតម្រាប់តាមសេចក្ដីស្រឡាញ់របស់ទ្រង់ចំពោះមនុស្សដែរ។ (អេភ. ៥:១, ២) ការស្រឡាញ់មនុស្សនឹងជំរុញចិត្តយើងឲ្យខំរកជួបមនុស្សកាន់តែច្រើននាក់ទៀត ឲ្យគេទទួលស្ដាប់សារពីព្រះគម្ពីរដែលប្រទានឲ្យជីវិត។ (ម៉ាក. ៦:៣៤) ការស្រឡាញ់មនុស្សជំរុញចិត្តយើងឲ្យបង្ហាញចំណាប់អារម្មណ៍ទៅលើអស់អ្នកដែលយើងនិយាយជាមួយនោះ។ នេះនឹងធ្វើឲ្យយើងគិតអំពីគេក្រោយពីបានជួបដំបូង ក៏ជំរុញឲ្យយើងត្រឡប់ទៅជួបបុគ្គលនោះម្ដងទៀតដែរ។ នេះនឹងជំរុញចិត្តយើងឲ្យខំប្រឹងអស់ពីសមត្ថភាព ដើម្បីជួយគេឲ្យរីកចំរើនខាងវិញ្ញាណ។—កិច្ច. ២០:២៤; ២៦:២៨, ២៩
  
  ^៥ «ថ្វាយពាក្យសរសើរ . . . ទុកជាគ្រឿងបូជា»: វិធីមួយទៀតដែលយើងថ្វាយព្រះយេហូវ៉ានូវរបស់ដ៏ល្អបំផុតរបស់យើង គឺដោយការព្យាយាមក្នុងកិច្ចបំរើផ្សាយ។ នៅពេលដែលយើងរៀបចំបានយ៉ាងល្អនិងប្រមូលអារម្មណ៍លើកិច្ចបំរើផ្សាយ នោះយើងអាចសម្រេចបានប្រយោជន៍យ៉ាងល្អបំផុតក្នុងពេលវេលាដែលនៅសល់នោះ។ (១ធី. ៤:១០) ការរៀបចំបានយ៉ាងល្អជួយយើងឲ្យនិយាយបានយ៉ាងច្បាស់និងដោយមានទំនុកចិត្ត ហេតុនេះហើយនឹងបង្កើននូវការតបឆ្លើយដ៏វិជ្ជមានពីអ្នកស្ដាប់ផងដែរ។ (សុ. ១៦:២១) កាលដែលយើងចែកប្រាប់នូវដំណឹងល្អដល់អ្នកដទៃ នោះពាក្យសំដីដែលចេញពីដួងចិត្តអាចហៅយ៉ាងត្រឹមត្រូវថាជាការ«ថ្វាយពាក្យសរសើរ . . . ទុកជាគ្រឿងបូជា»។—ហេ. ១៣:១៥

យុវជនអើយ! ចូរអានព្រះបន្ទូលរបស់ព្រះ!

២០០៤ កិច្ចបម្រើព្រះ | មេសា
- យុវជនអើយ! ចូរអានព្រះបន្ទូលរបស់ព្រះ!
  
  ^១ យុវវ័យគឺជាគ្រាដែលគេជួបប្រទះបញ្ហាជាច្រើន និងជាគ្រាដែលត្រូវធ្វើការសម្រេចចិត្តសំខាន់ៗដែរ។ ជារៀងរាល់ថ្ងៃ ប្អូនៗយុវជនគ្រីស្ទានជាច្រើនជួបប្រទះការបង្ខិតបង្ខំឲ្យបំពានលើខ្នាតតម្រារបស់ព្រះស្តីអំពីកិរិយាប្រព្រឹត្ត។ មុននឹងប្អូនចាប់ផ្ដើមធ្វើការសម្រេចចិត្តស្តីអំពីការអប់រំ ការងារ និងរឿងអាពាហ៍ពិពាហ៍ នោះប្អូនត្រូវរៀបចំគោលដៅខាងវិញ្ញាណជាមុនសិន។ តាមរបៀបនេះ ប្អូនអាចធ្វើការសម្រេចចិត្តផ្សេងៗទៀតដែលនឹងនាំឲ្យប្អូនទទួលប្រយោជន៍អស់មួយជីវិត។ ការមានគោលដៅខាងវិញ្ញាណជាក់លាក់នឹងជួយប្អូនឲ្យប្រព្រឹត្តដោយប្រាជ្ញា និងការអ្វីដែលប្អូនធ្វើនោះនឹងទទួលជោគជ័យទៀតផង។ ដោយអាននិងរំពឹងគិតលើព្រះបន្ទូលរបស់ព្រះជាទៀងទាត់ នោះប្អូននឹងត្រូវជំរុញចិត្តឲ្យរស់នៅស្របតាមឱវាទដែលព្រះបណ្ដាលឲ្យតែងនោះ និងការខំប្រឹងដ៏ត្រឹមត្រូវរបស់ប្អូននឹងទទួលជោគជ័យ។—យ៉ូស. ១:៨; ទំនុក. ១:២, ៣
  
  ^២ តើប្អូនទទួលប្រយោជន៍ពីការអានព្រះគម្ពីរយ៉ាងដូចម្ដេច? លោកីយ៍របស់សាតាំងគឺមានពោរពេញទៅដោយការល្បួងផ្សេងៗ ដើម្បីឲ្យប្អូនប្រព្រឹត្តអំពើខុសឆ្គង។ (១យ៉ូន. ២:១៥,១៦) ប្អូនប្រហែលជាស្គាល់មិត្តរួមថ្នាក់ឬអ្នកដទៃដែលមានអាយុស្រករប្អូន ដែលបានជួបក្ដីអន្តរាយដោយសារធ្វើតាមការបង្ខំពីពួកម៉ាក។ ការធ្វើតាមឱវាទក្នុងព្រះគម្ពីរនឹងផ្ដល់ឲ្យប្អូនមានកម្លាំងខាងសីលធម៌និងកម្លាំងខាងវិញ្ញាណ ដើម្បីបដិសេធនូវការដើរតាមគន្លងជីវិតជាអ្នកធ្វើអំពើបាប។ ម្យ៉ាងវិញទៀត ឱវាទនៃព្រះបន្ទូលរបស់ព្រះអាចជួយប្អូនឲ្យជៀសវាងនូវអន្ទាក់ទាំងប៉ុន្មានដែលមើលពុំឃើញរបស់សាតាំង។ (២កូ. ២:១១; ហេ. ៥:១៤) ការដើរតាមផ្លូវរបស់ព្រះនឹងធ្វើឲ្យប្អូនមានសុភមង្គលពិត គឺស្កប់ចិត្តចំពោះគន្លងជីវិតរបស់ប្អូន។—ទំនុក. ១១៩:១, ៩, ១១
  
  ^៣ គោលការណ៍របស់ព្រះដែលមិនចេះផ្លាស់ប្រែគឺប្រសើរជាងប្រាជ្ញារបស់មនុស្ស។ (ទំនុក. ១១៩:៩៨-១០០) ការមានចំណេះដឹងអំពីគោលការណ៍ព្រះគម្ពីរនិងការរំពឹងគិតលើគោលបំណងរបស់ព្រះយេហូវ៉ាដែលត្រូវបង្ហាញឲ្យឃើញ រួមទាំងការអធិស្ឋានអស់ពីចិត្តអាចជួយប្អូនឲ្យចងមិត្តភាពកាន់តែជិតស្និទ្ធជាមួយនឹងព្រះយេហូវ៉ាជាអ្នកនិពន្ធព្រះគម្ពីរដែលមានសព្វប្រាជ្ញា។ ទ្រង់សន្យាថា៖ «អញនឹងបង្ហាត់បង្រៀនឲ្យឯងស្គាល់ផ្លូវដែលឯងត្រូវដើរ។ អញនឹងទូន្មានឯង ដោយភ្នែកអញមើលឯងជាប់»។—ទំនុក. ៣២:៨
  
  ^៤ ចូរឆ្លៀតពេលអានព្រះគម្ពីរ: យុវតីគ្រីស្ទានម្នាក់បានតាំងចិត្តអានព្រះគម្ពីរទាំងមូលឲ្យបានចប់ ហើយក្នុងមួយឆ្នាំនាងបានអានព្រះគម្ពីរទាំងមូលចប់។ តើនាងទទួលប្រយោជន៍យ៉ាងដូចម្ដេច? នាងនឹកចាំថា៖ «ខ្ញុំបានរៀនដឹងច្រើនអំពីព្រះយេហូវ៉ា ព្រមទាំងលក្ខណៈដ៏ល្អរបស់ទ្រង់ដែលធ្វើឲ្យខ្ញុំចូលកាន់តែជិតទ្រង់ និងធ្វើឲ្យខ្ញុំចង់កោតខ្លាចទ្រង់អស់មួយជីវិតរបស់ខ្ញុំ»។ (យ៉ា. ៤:៨) តើប្អូនធ្លាប់អានព្រះគម្ពីរទាំងមូលចប់ឬទេ? បើមិនធ្លាប់ ចូរមានគោលដៅអានព្រះគម្ពីរទាំងមូលឲ្យចប់! ព្រះយេហូវ៉ាប្រាកដជានឹងប្រទានពរដល់ការខំប្រឹងរបស់ប្អូន ហើយប្អូននឹងទទួលបានពរយ៉ាងវិសេសវិសាលជាក់ជាពុំខាន។