បណ្ណាល័យអ៊ីនធឺណិតរបស់ប៉មយាម

របៀបចាប់ផ្ដើមការសិក្សាក្នុងសៀវភៅព្រះគម្ពីរបង្រៀន

២០០៦ កិច្ចបម្រើព្រះ | សីហា
- របៀបចាប់ផ្ដើមការសិក្សាក្នុងសៀវភៅព្រះគម្ពីរបង្រៀន
  
  យើងជាច្រើននាក់នឹងមានចិត្តសប្បាយ បើអាចមានសិស្សព្រះគម្ពីរ ប៉ុន្តែយើងមានការពិបាកក្នុងការលើកទឹកចិត្តគេឲ្យចាប់ផ្ដើមសិក្សាជាមួយយើង។ សៀវភៅថ្មីតើព្រះគម្ពីរពិតជាបង្រៀនយ៉ាងណា? អាចជួយឲ្យយើងចាប់ផ្ដើមការសិក្សាបាន។ សេចក្ដីផ្ដើមនៅទំព័រ៣-៧ត្រូវបានរៀបចំឡើងដើម្បីលើកទឹកចិត្តម្ចាស់ផ្ទះឲ្យចូលរួមពិភាក្សាអំពីបទគម្ពីរដោយប្រើសៀវភៅនោះ។ សូម្បីតែអ្នកថ្មីដែលមានបទពិសោធន៍បន្ដិចបន្តួចក្នុងកិច្ចបម្រើផ្សាយក៏ងាយស្រួលប្រើសៀវភៅនោះដើម្បីចាប់ផ្ដើមការសិក្សាដែរ។
  
  ◼ អ្នកអាចសាកល្បងវិធីនេះដោយប្រើទំព័រទី៣:
  
  បន្ទាប់ពីបានរៀបរាប់អំពីព្រឹត្ដិការណ៍ថ្មីៗឬបញ្ហាណាមួយដែលធ្វើឲ្យមនុស្សក្នុងតំបន់ផ្សាយរបស់អ្នកខ្វល់ខ្វាយ សូមទាញអារម្មណ៍ម្ចាស់ផ្ទះទៅលើសំណួរជាអក្សរដិតនៅទំព័រ៣ ហើយសុំឲ្យគាត់បញ្ចេញមតិ។ បន្ទាប់មក សូមបើកទៅទំព័រ៤-៥។
  
  ◼ ឬមួយប្រហែលជាអ្នកចង់ចាប់ផ្ដើមដោយលើកបញ្ជាក់ទំព័រ៤-៥:
  
  អ្នកអាចនិយាយថា «ប្រសិនបើស្ថានភាពដែលបានបង្ហាញក្នុងសៀវភៅនេះពិតជានឹងកើតមានឡើង នេះជាអ្វីដែលគួរឲ្យសប្បាយរីករាយណាស់មែនទេ?»។ ឬអ្នកអាចសួរថា «ក្នុងចំណោមសេចក្ដីសន្យាទាំងនេះ តើលោកអ្នកចង់ឃើញសេចក្ដីសន្យាមួយណាបានសម្រេច?»។ ចូរស្ដាប់ចម្លើយរបស់គាត់ដោយយកចិត្តទុកដាក់។
  
  បើម្ចាស់ផ្ទះមានចំណាប់អារម្មណ៍ខ្លាំងទៅលើបទគម្ពីរណាមួយ ចូរបង្ហាញគាត់ថាតើព្រះគម្ពីរបង្រៀនយ៉ាងណាអំពីចំណុចនោះ ដោយពិនិត្យមើលវគ្គក្នុងសៀវភៅព្រះគម្ពីរបង្រៀនដែលពិភាក្សាអំពីបទគម្ពីរនោះ។ (សូមមើលប្រអប់នៅសន្លឹកបន្ថែមនៃទំព័រនេះ) ចូរពិភាក្សាអំពីព័ត៌មាននោះដូចដែលអ្នកពិភាក្សាជាមួយសិស្សព្រះគម្ពីរ។ ការពិភាក្សានេះអាចធ្វើឡើងក្នុងរយៈពេលប្រាំទៅ១០នាទី ពេលជួបគេលើកដំបូងនៅមាត់ទ្វារផ្ទះ។
  
  ◼ វិធីមួយទៀតគឺសួរសំណួរនៅទំព័រ៦ដើម្បីឲ្យគេប្រាប់ពីទស្សនៈរបស់ខ្លួន:
  
  ចូរទាញអារម្មណ៍ម្ចាស់ផ្ទះទៅលើសំណួរនៅចុងទំព័រហើយសួរថា «តើលោកអ្នកធ្លាប់ឆ្ងល់អំពីសំណួរណាមួយនៅទំព័រនេះទេ?»។ ប្រសិនបើគាត់ចាប់អារម្មណ៍ទៅលើសំណួរណាមួយ ចូរបើកទៅវគ្គដែលឆ្លើយនឹងសំណួរនោះ។ (សូមមើលប្រអប់នៅសន្លឹកបន្ថែមនៃទំព័រនេះ) ពេលដែលអ្នកពិភាក្សាព័ត៌មាននេះជាមួយគេ នោះអ្នកកំពុងតែដឹកនាំការសិក្សាព្រះគម្ពីរហើយ។
  
  ◼ អ្នកអាចប្រើទំព័រ៧ដើម្បីបង្ហាញរបៀបសិក្សាព្រះគម្ពីរ:
  
  ចូរអានបីឃ្លាដំបូងនៃទំព័រ៧ រួចបើកទៅជំពូក៣ ហើយបង្ហាញរបៀបសិក្សាដោយប្រើវគ្គ១-៣។ ចូរណាត់ពេលដើម្បីត្រឡប់មកពិភាក្សាអំពីចម្លើយទៅនឹងសំណួរក្នុងវគ្គ៣នេះវិញ។
  
  ◼ របៀបនិយាយដើម្បីណាត់ពេលត្រឡប់ទៅជួប:
  
  ពេលចប់ការសិក្សាលើកដំបូងហើយ ចូរណាត់ពេលដើម្បីបន្តការពិភាក្សា។ អ្នកអាចនិយាយថា «គ្រាន់តែប៉ុន្មាននាទីប៉ុណ្ណោះ យើងបានរៀនអំពីអ្វីដែលព្រះគម្ពីរបង្រៀនអំពីចំណុចដ៏សំខាន់មួយ។ លើកក្រោយ យើងអាចពិភាក្សាគ្នា [សូមទុកសំណួរមួយដែលនឹងត្រូវពិភាក្សាពេលត្រឡប់ទៅជួប]។ សប្ដាហ៍ក្រោយ តើខ្ញុំអាចត្រឡប់មកនៅថ្ងៃនិងម៉ោងដដែលបានទេ?»។
  
  កាលដែលពេលកំណត់របស់ព្រះយេហូវ៉ាកាន់តែជិតមកដល់ នោះទ្រង់បន្តផ្ដល់ជំនួយឲ្យយើងសម្រេចកិច្ចការដែលយើងត្រូវធ្វើ។ (ម៉ាថ. ២៨:១៩, ២០; ២ធី. ៣:១៧) សូមឲ្យយើងប្រើឧបករណ៍ថ្មីដ៏ល្អនេះដោយប្រសិទ្ធភាពដើម្បីចាប់ផ្ដើមការសិក្សាព្រះគម្ពីរ។

ក្យផ្សាយសម្រាប់ចែកសៀវភៅព្រះគម្ពីរបង្រៀន

២០០៦ កិច្ចបម្រើព្រះ | សីហា
- ពាក្យផ្សាយសម្រាប់ចែកសៀវភៅព្រះគម្ពីរបង្រៀន
  
  សន្លឹកបន្ថែមនេះជួយជាយោបល់ផ្សេងៗអំពីពាក្យផ្សាយសម្រាប់ចែកសៀវភៅព្រះគម្ពីរបង្រៀន។ ដើម្បីមានប្រសិទ្ធភាពបំផុត ចូរកែសម្រួលពាក្យផ្សាយទាំងនេះឲ្យសមស្របតាមតំបន់ផ្សាយ តាមរបៀបដែលស្រួលនិយាយសម្រាប់អ្នក។ ម្យ៉ាងទៀត ចូររកចំណុចផ្សេងៗក្នុងសៀវភៅព្រះគម្ពីរបង្រៀនដែលអាចយកមកពិភាក្សាជាមួយម្ចាស់ផ្ទះ។ អ្នកក៏អាចប្រើពាក្យផ្សាយផ្សេងទៀតដែលមានប្រសិទ្ធភាពក្នុងតំបន់ផ្សាយរបស់អ្នកដែរ។—សូមមើលកិច្ចបម្រើព្រះរាជាណាចក្រយើង ខែមករា ឆ្នាំ២០០៥ ទំព័រ៨
  
  ព្រះគម្ពីរ
  
  ◼ «មនុស្សជាច្រើននិយាយថាព្រះគម្ពីរជាព្រះបន្ទូលរបស់ព្រះ។ តើលោកអ្នកធ្លាប់ឆ្ងល់ទេ ពីមូលហេតុដែលយើងអាចនិយាយយ៉ាងត្រឹមត្រូវថា ព្រះគម្ពីរជាព្រះបន្ទូលរបស់ព្រះ ទោះជាអ្នកសរសេរព្រះគម្ពីរជាមនុស្សក៏ដោយ? [ទុកឲ្យគេឆ្លើយ។ រួចអានពេត្រុសទី២ ១:២១ និងទំព័រ២១-២២ វគ្គ៥] សៀវភៅនេះពន្យល់អ្វីដែលព្រះគម្ពីរចែងជាចម្លើយចំពោះសំណួរដូចតទៅ»។ បង្ហាញសំណួរនៅទំព័រ៦។
  
  ◼ «នៅសម័យនេះ មនុស្សអាចទទួលបានព័ត៌មានច្រើនបំផុត។ ក៏ប៉ុន្តែតាមយោបល់របស់លោកអ្នក តើយើងអាចទទួលឱវាទដ៏ល្អត្រឹមត្រូវដែលនាំឲ្យមានជីវិតដ៏គាប់ចិត្តពីប្រភពណា? [ទុកឲ្យគេឆ្លើយ។ រួចអានធីម៉ូថេទី២ ៣:១៦, ១៧ ហើយទំព័រ២៥ វគ្គ១២] សៀវភៅនេះពន្យល់នូវរបៀបរស់នៅដែលធ្វើឲ្យព្រះសព្វព្រះហឫទ័យថែមទាំងមានប្រយោជន៍ដល់យើងផងដែរ»។ បង្ហាញតារាងនិងរូបភាពនៅទំព័រ១៤០-១៤១។
  
  សេចក្ដីស្លាប់និងការប្រោស ឲ្យរស់ឡើងវិញ
  
  ◼ «មនុស្សជាច្រើនឆ្ងល់ពីអ្វីដែលពិតជាកើតឡើងពេលដែលយើងស្លាប់ទៅ។ តើលោកអ្នកគិតថាយើងអាចដឹងបានទេ? [ទុកឲ្យគេឆ្លើយ។ រួចអានសាស្ដា ៩:៥ ហើយទំព័រ៦៥-៦៦ វគ្គ៥-៦] សៀវភៅនេះពន្យល់ពីអត្ថន័យនៃសេចក្ដីសន្យាក្នុងព្រះគម្ពីរស្តីអំពីការប្រោសមនុស្សស្លាប់ឲ្យរស់ឡើងវិញ»។ បង្ហាញរូបភាពនៅទំព័រ៨៥។
  
  ◼ «នៅពេលមនុស្សជាទីស្រឡាញ់ស្លាប់ទៅ ជាការធម្មតាទេដែលយើងចង់ជួបពួកគេម្ដងទៀត មែនទេ? [ទុកឲ្យគេឆ្លើយ] មនុស្សជាច្រើនបានទទួលការសម្រាលទុក្ខពីសេចក្ដីសន្យាក្នុងព្រះគម្ពីរស្តីអំពីការប្រោសឲ្យមនុស្សស្លាប់រស់ឡើងវិញ។ [អានយ៉ូហាន ៥:២៨, ២៩ និងទំព័រ៨១-៨២ វគ្គ១៦-១៧] ជំពូកនេះក៏ឆ្លើយសំណួរដូចតទៅនេះ»។ បង្ហាញសំណួរដើមជំពូកនៅទំព័រ៧៤។
  
  ជីវិតជារៀងរហូត
  
  ◼ «មនុស្សភាគច្រើនចង់មានសុខភាពល្អនិងជីវិតយូរអង្វែង។ ប៉ុន្តែប្រសិនបើមានលទ្ធភាព តើលោកអ្នកចង់រស់ជារៀងរហូតទេ? [ទុកឲ្យគេឆ្លើយ។ រួចអានវិវរណៈ ២១:៣, ៤ ហើយទំព័រ៦០-៦១ វគ្គ១៧] សៀវភៅនេះពន្យល់វិធីដែលយើងអាចទទួលបានជីវិតជារៀងរហូត ហើយប្រាប់ថាជីវិតនឹងមានលក្ខណៈយ៉ាងណាពេលដែលសេចក្ដីសន្យានោះបានសម្រេច»។
  
  ក្រុមគ្រួសារ
  
  ◼ «យើងទាំងអស់គ្នាចង់មានសុភមង្គលក្នុងក្រុមគ្រួសារ មែនទេ? [ទុកឲ្យគេឆ្លើយ] ព្រះគម្ពីរពន្យល់អ្វីមួយដែលមនុស្សទាំងអស់ក្នុងក្រុមគ្រួសារអាចធ្វើដើម្បីមានសុភមង្គលគ្រួសារ ពោលគឺបង្ហាញសេចក្ដីស្រឡាញ់តាមគំរូរបស់ព្រះ»។ អានអេភេសូរ ៥:១, ២ ហើយទំព័រ១៥៥-១៥៦ វគ្គ៤។
  
  ផ្ទះសម្បែង
  
  ◼ «នៅប្រទេសជាច្រើន គឺកាន់តែពិបាករកផ្ទះល្អសមរម្យដែលមិនថ្លៃពេក។ តើលោកអ្នកគិតថានឹងមានពេលមួយដែលមនុស្សទាំងអស់អាចមានផ្ទះល្អសម្រាប់រស់នៅទេ? [ទុកឲ្យគេឆ្លើយ។ រួចអានអេសាយ ៦៥:២១, ២២ ហើយទំព័រ៣៨ វគ្គ២០] សៀវភៅនេះពន្យល់របៀបដែលសេចក្ដីសន្យានេះរបស់ព្រះនឹងបានសម្រេច»។
  
  ព្រះយេហូវ៉ា
  
  ◼ «មនុស្សជាច្រើនជឿថាមានព្រះ ហើយពួកគេចង់មានភាពជិតស្និទ្ធនឹងទ្រង់។ តើលោកអ្នកដឹងទេថាព្រះគម្ពីរអញ្ជើញឲ្យយើងចូលទៅជិតព្រះដើម្បីមានភាពជិតស្និទ្ធនឹងទ្រង់? [ទុកឲ្យគេឆ្លើយ។ រួចអានយ៉ាកុប ៤:៨ក ហើយទំព័រ១៨ វគ្គ២០] សៀវភៅនេះបានត្រូវរៀបចំដើម្បីជួយឲ្យមនុស្សរៀនថែមទៀតអំពីព្រះដោយប្រើព្រះគម្ពីរ»។ បង្ហាញសំណួរនៅដើមទំព័រ៨។
  
  ◼ «មនុស្សជាច្រើនអធិស្ឋានសុំឲ្យព្រះនាមរបស់ព្រះបានបរិសុទ្ធ។ តើលោកអ្នកធ្លាប់ឆ្ងល់ទេថា ព្រះនាមរបស់ព្រះគឺអ្វី? [ទុកឲ្យគេឆ្លើយ។ រួចអានទំនុកដំកើង ៨៣:១៨ ហើយទំព័រ២២៥ វគ្គ២-៣] សៀវភៅនេះពន្យល់អ្វីដែលព្រះគម្ពីរពិតជាបង្រៀនអំពីព្រះយេហូវ៉ានិងគោលបំណងរបស់ទ្រង់សម្រាប់មនុស្ស»។
  
  ព្រះយេស៊ូគ្រីស្ទ
  
  ◼ «មនុស្សទូទាំងផែនដីធ្លាប់ឮអំពីព្រះយេស៊ូគ្រីស្ទ។ មនុស្សខ្លះប្រាប់ថាទ្រង់ត្រឹមតែជាបុរសល្អម្នាក់ប៉ុណ្ណោះ។ អ្នកឯទៀតថ្វាយបង្គំទ្រង់ជាព្រះដ៏ខ្ពស់បំផុត។ តើលោកអ្នកគិតថាអ្វីដែលយើងជឿអំពីព្រះយេស៊ូគ្រីស្ទគឺសំខាន់ទេ?»។ ទុកឲ្យគេឆ្លើយ។ រួចអានយ៉ូហាន ១៧:៣ ហើយទំព័រ៤១-៤២ វគ្គ៣។ បង្ហាញសំណួរនៅដើមទំព័រនោះក្រោមចំណងជើងជំពូក។
  
  សេចក្ដីអធិស្ឋាន
  
  ◼ «តើលោកអ្នកធ្លាប់ឆ្ងល់ទេថាព្រះតបឆ្លើយនឹងសេចក្ដីអធិស្ឋានតាមរបៀបណា? [ទុកឲ្យគេឆ្លើយ។ រួចអានយ៉ូហានទី១ ៥:១៤, ១៥ ហើយទំព័រ១៩៧-១៩៩ វគ្គ១៦-១៨] ជំពូកនេះក៏ពន្យល់មូលហេតុដែលយើងគួរអធិស្ឋានថ្វាយព្រះ ហើយអ្វីដែលយើងត្រូវធ្វើ នោះទើបទ្រង់ព្រះសណ្ដាប់សេចក្ដីអធិស្ឋានរបស់យើង»។
  
  សាសនា
  
  ◼ «សព្វថ្ងៃនេះមនុស្សជាច្រើនបែរជាមានទស្សនៈថាសាសនាជាដើមហេតុនៃបញ្ហាមនុស្សជាតិ មិនមែនជាដំណោះស្រាយនោះទេ។ តើលោកអ្នកគិតថាសាសនាកំពុងតែនាំមនុស្សទៅតាមផ្លូវល្អទេ? [ទុកឲ្យគេឆ្លើយ។ រួចអានម៉ាថាយ ៧:១៣, ១៤ ហើយទំព័រ១៦៨ វគ្គ៥] ជំពូកនេះពន្យល់យ៉ាងស៊ីជម្រៅនូវលក្ខណៈ៦យ៉ាងដែលជួយឲ្យយើងសម្គាល់សាសនាមួយណាដែលព្រះសព្វព្រះហឫទ័យ»។ បង្ហាញលក្ខណៈទាំង៦នោះនៅទំព័រ១៦៩។
  
  ទុក្ខវេទនានិងរឿងខ្លោចផ្សា
  
  ◼ «នៅពេលមានរឿងខ្លោចផ្សាកើតឡើង មនុស្សជាច្រើនឆ្ងល់ថាតើព្រះពិតជាយកព្រះទ័យទុកដាក់ចំពោះមនុស្ស និងកត់សម្គាល់ទុក្ខវេទនារបស់ពួកគេទេ? តើលោកអ្នកធ្លាប់ឆ្ងល់អំពីបញ្ហានោះទេ? [ទុកឲ្យគេឆ្លើយ។ រួចអានពេត្រុសទី១ ៥:៧ ហើយទំព័រ១២ វគ្គ១១] សៀវភៅនេះពន្យល់របៀបដែលព្រះនឹងបំបាត់ទុក្ខវេទនាចេញពីពិភពលោក»។ បង្ហាញសំណួរនៅទំព័រ១២១ក្រោមចំណងជើងជំពូក។
  
  សង្គ្រាមនិងសន្ដិភាព
  
  ◼ «មនុស្សនៅគ្រប់ប្រទេសចង់បានសន្ដិភាពណាស់។ តើលោកអ្នកគិតថាពិតជានឹងមានសន្ដិភាពពិភពលោកទេ? [ទុកឲ្យគេឆ្លើយ។ រួចអានទំនុកដំកើង ៤៦:៨, ៩] សៀវភៅនេះពន្យល់របៀបដែលព្រះនឹងសម្រេចគោលបំណងរបស់ទ្រង់ ហើយវិធីដែលទ្រង់នឹងធ្វើឲ្យមានសន្ដិភាពពិភពលោក»។ បង្ហាញរូបភាពនៅទំព័រ៣៩ ហើយពិភាក្សាវគ្គ១៧-២១ នៅទំព័រ៣៧-៣៨។
  
  [ប្រអប់នៅទំព័រ៥]
  
  របៀបប្រាប់អំពីការជូនវិភាគទាន
  
  «ប្រសិនបើលោកអ្នកស្ម័គ្រចិត្តធ្វើវិភាគទានដើម្បីជួយគាំទ្រកិច្ចការនេះដែលយើងធ្វើទូទាំងពិភពលោក ខ្ញុំរីករាយនឹងទទួល»។
  
  «ទោះជាយើងជូនសៀវភៅរបស់យើងដោយមិនគិតថ្លៃក៏ពិតមែន តែយើងសុខចិត្តទទួលវិភាគទានបន្ដិចបន្តួចសម្រាប់គាំទ្រកិច្ចការនេះដែលយើងធ្វើទូទាំងពិភពលោក»។
  
  «លោកអ្នកប្រហែលជាឆ្ងល់ថាតើយើងបានថវិកាពីណាមកដើម្បីធ្វើកិច្ចការនេះ។ កិច្ចការទូទាំងពិភពលោកដែលយើងកំពុងតែធ្វើនេះត្រូវគាំទ្រដោយវិភាគទាន។ ប្រសិនបើលោកអ្នកចង់ធ្វើវិភាគទានបន្ដិចបន្តួច យើងសប្បាយនឹងទទួល»។

ជំហានបីយ៉ាងគឺ: (១) សំណួរ (២) បទគម្ពីរ (៣) ជំពូក

២០០៦ កិច្ចបម្រើព្រះ | សីហា
- ជំហានបីយ៉ាងគឺ: (១) សំណួរ (២) បទគម្ពីរ (៣) ជំពូក
  
  របៀបដ៏ស្រួលមួយដើម្បីស្នើផ្ដល់សៀវភៅតើព្រះគម្ពីរពិតជាបង្រៀនយ៉ាងណា? គឺ:(១) លើកសំណួរមួយដើម្បីដឹងពីទស្សនៈរបស់គេ (២) អានបទគម្ពីរមួយដែលត្រូវនឹងសំណួរ (៣) បង្ហាញជំពូកមួយនៅក្នុងសៀវភៅដែលពន្យល់ចំណុចនោះ ហើយអានសំណួរក្រោមចំណងជើងជំពូក។ បើម្ចាស់ផ្ទះមានចំណាប់អារម្មណ៍ អ្នកអាចបង្ហាញរបៀបសិក្សាព្រះគម្ពីរដោយប្រើពីរបីវគ្គដំបូងនៃជំពូកនោះ។ វិធីនេះអាចប្រើដើម្បីចាប់ផ្ដើមការសិក្សាពេលជួបម្ចាស់ផ្ទះលើកដំបូងឬពេលត្រឡប់ទៅជួប។
  
  ◼ «តើលោកអ្នកគិតថាមនុស្សអាចស្គាល់ព្រះជាអ្នកបង្កើតដ៏មានគ្រប់ព្រះចេស្ដា ដូចបញ្ជាក់ក្នុងសៀវភៅបុរាណនេះទេ?»។ សូមអានកិច្ចការ ១៧:២៦, ២៧ រួចទុកឲ្យគេឆ្លើយ។ បន្ទាប់មក សូមបើកទៅជំពូកទី១។
  
  ◼ «ដោយសារយើងត្រូវប្រឈមមុខនឹងបញ្ហាជាច្រើនសព្វថ្ងៃនេះ តើលោកអ្នកគិតថាយើងអាចទទួលការសម្រាលទុក្ខនិងមានសេចក្ដីសង្ឃឹមដូចបានរៀបរាប់នៅទីនេះទេ?»។ សូមអានរ៉ូម ១៥:៤ រួចទុកឲ្យគេឆ្លើយ។ បន្ទាប់មក សូមបើកទៅជំពូកទី២។
  
  ◼ «បើលោកអ្នកមានសមត្ថភាពអាចធ្វើបាន តើលោកអ្នកចង់ធ្វើឲ្យមានស្ថានភាពដូចតទៅនេះទេ?»។ សូមអានវិវរណៈ ២១:៤ រួចទុកឲ្យគេឆ្លើយ។ បន្ទាប់មក សូមបើកទៅជំពូកទី៣។
  
  ◼ «តើលោកអ្នកគិតថាកូនៗរបស់យើងនឹងអាចរស់នៅដោយសប្បាយក្នុងស្ថានភាពដែលចម្រៀងពីបុរាណនេះបានពណ៌នាទេ?»។ សូមអានទំនុកដំកើង ៣៧:១០, ១១ រួចទុកឲ្យគេឆ្លើយ។ បន្ទាប់មក សូមបើកទៅជំពូកទី៣។
  
  ◼ «តើលោកអ្នកគិតថាពាក្យទាំងនេះនឹងបានសម្រេចនៅពេលអនាគតឬទេ?»។ សូមអានអេសាយ ៣៣:២៤ រួចទុកឲ្យគេឆ្លើយ។ ក្រោយមក សូមបើកទៅជំពូកទី៣។
  
  ◼ «តើលោកអ្នកធ្លាប់ឆ្ងល់ថាមនុស្សស្លាប់ដឹងថាមនុស្សដែលនៅរស់កំពុងតែធ្វើអ្វីទេ?»។ រួចទុកឲ្យគេឆ្លើយ។ បន្ទាប់មក សូមអានសាស្ដា ៩:៥ រួចបើកទៅជំពូកទី៦។
  
  ◼ «តើលោកអ្នកគិតថានៅពេលអនាគតយើងនឹងឃើញម្ដងទៀតនូវអ្នកជាទីស្រឡាញ់របស់យើងដែលបានស្លាប់ទៅ ដូចព្រះយេស៊ូបានមានបន្ទូលនៅខទាំងនេះឬទេ?»។ សូមអានយ៉ូហាន ៥:២៨, ២៩ រួចទុកឲ្យគេឆ្លើយ។ បន្ទាប់មក បើកទៅជំពូកទី៧។
  
  ◼ «តាមគំនិតរបស់លោកអ្នក តើតាមរបៀបណាដែលបំណងព្រះហឫទ័យរបស់ព្រះនឹងបានសម្រេចនៅលើផែនដីក៏ដូចនៅស្ថានសួគ៌ ដូចសេចក្ដីអធិស្ឋាននេះរៀបរាប់?»។ សូមអានម៉ាថាយ ៦:៩, ១០ រួចទុកឲ្យគេឆ្លើយ។ បន្ទាប់មក បើកទៅជំពូកទី៨។
  
  ◼ «តើលោកអ្នកគិតថាយើងកំពុងតែរស់នៅក្នុងគ្រាដែលត្រូវបានរៀបរាប់ក្នុងទំនាយនេះទេ?»។ សូមអានធីម៉ូថេទី២ ៣:១-៤ រួចទុកឲ្យគេឆ្លើយ។ បន្ទាប់មក បើកទៅជំពូកទី៩។
  
  ◼ «មនុស្សជាច្រើនឆ្ងល់ថាហេតុអ្វីបានជាបញ្ហារបស់មនុស្សជាតិហាក់ដូចជាកាន់តែអាក្រក់ទៅៗយ៉ាងនេះ។ តើលោកអ្នកគិតថាដើមហេតុនៃបញ្ហានោះអាចបណ្ដាលមកពីអ្វីដែលពន្យល់នៅទីនេះទេ?»។ សូមអានវិវរណៈ ១២:៩ រួចទុកឲ្យឆ្លើយ។ បន្ទាប់មក បើកទៅជំពូកទី១០។
  
  ◼ «តើលោកអ្នកធ្លាប់ចង់ដឹងចម្លើយចំពោះសំណួរដូចនេះទេ?»។ សូមអានយ៉ូប ២១:៧ ហើយទុកឲ្យឆ្លើយ។ រួចបើកទៅជំពូកទី១១។
  
  ◼ «តើលោកអ្នកគិតថាការអនុវត្តតាមឱវាទក្នុងសៀវភៅណែនាំពីបុរាណនេះនឹងជួយមនុស្សឲ្យមានជីវភាពគ្រួសារដ៏សប្បាយរីករាយទេ?»។ សូមអានអេភេសូរ ៥:៣៣ រួចទុកឲ្យគេឆ្លើយ។ បន្ទាប់មកបើកទៅជំពូកទី១៤។
  
  កាលណាអ្នកបានបង្រៀនពីរដងក្រោយពីបានបង្ហាញរបៀបសិក្សាដើមដំបូង ហើយបើអ្នកយល់ថាបុគ្គលនោះនឹងបន្តសិក្សា អ្នកអាចរាប់ជាការសិក្សាព្រះគម្ពីរបាន។