ជំពូកទី១០
អង្គការមួយដែលធ្វើតាមបំណងព្រះហឫទ័យព្រះយេហូវ៉ា
របៀបដែលអ្នកអាចពង្រីក កិច្ចបម្រើរបស់អ្នក
ពេលដែលព្រះយេស៊ូចាត់សិស្សរបស់ទ្រង់ឲ្យធ្វើជាអ្នកផ្សព្វផ្សាយដំណឹងល្អអំពីព្រះរាជាណាចក្រ ទ្រង់បានមានបន្ទូលទៅពួកគាត់ថា៖ «ចំរូតធំណាស់ តែមានអ្នកច្រូតតិចទេ»។ ដោយសារមានកិច្ចការជាច្រើនដែលត្រូវធ្វើ នោះទ្រង់បានមានបន្ទូលបន្ថែមទៀតថា៖ «ចូរសូមអង្វរដល់ព្រះអម្ចាស់នៃចំរូត ឲ្យទ្រង់ចាត់អ្នកច្រូតមកក្នុងចំរូតទ្រង់»។ (ម៉ាថ. ៩:៣៧, ៣៨) ព្រះយេស៊ូបានបង្រៀនពួកសិស្សអំពីរបៀបដែលពួកគាត់អាចបំពេញកិច្ចផ្សព្វផ្សាយ។ បន្ទូលរបស់ទ្រង់បញ្ជាក់អំពីភាពបន្ទាន់មួយ។ ទ្រង់បានមានបន្ទូលថា៖ «អ្នករាល់គ្នានឹងដើរ មិនទាន់ដល់គ្រប់ទាំងទីក្រុងនៃសាសន៍អ៊ីស្រាអែលនៅឡើយ នោះកូនមនុស្សនឹងបានមកដល់ហើយ»។—ម៉ាថ. ១០:២៣
សព្វថ្ងៃនេះក៏មានសេចក្ដីត្រូវការដ៏ធំមួយក្នុងកិច្ចផ្សព្វផ្សាយដែរ។ ពេលវេលាដែលនៅសល់កាន់តែខ្លីទៅ ហើយដំណឹងល្អនៃព្រះរាជាណាចក្រត្រូវតែបានផ្សព្វផ្សាយមុននឹងទីបញ្ចប់មកដល់។ (ម៉ាក. ១៣:១០) ដោយសារពិភពលោកជាតំបន់ផ្សាយ នោះជាការពិតណាស់ដែលយើងត្រូវប្រឈមមុខនឹងស្ថានភាពស្រដៀងគ្នានឹងអ្វីដែលព្រះយេស៊ូនិងពួកអ្នកកាន់តាមទ្រង់បានឆ្លងកាត់។ ក៏ប៉ុន្តែអ្វីដែលយើងឆ្លងកាត់មានកម្រិតធំជាងឆ្ងាយពីអ្វីដែលព្រះយេស៊ូនិងពួកអ្នកកាន់តាមទ្រង់បានឆ្លងកាត់។ យើងក៏មានគ្នាតិចដែរ បើប្រៀបនឹងចំនួនមនុស្សរាប់ពាន់លាននៅក្នុងពិភពលោក ប៉ុន្តែយើងអាចទុកចិត្តថា ព្រះហស្តព្រះយេហូវ៉ាមិនខ្លីទេ។ ទ្រង់មានសមត្ថភាពធ្វើឲ្យដំណឹងល្អអំពីព្រះរាជាណាចក្រត្រូវប្រកាសផ្សាយទូទាំងផែនដី។ ដំណឹងល្អនឹងត្រូវប្រកាសប្រាប់ ហើយទីបញ្ចប់នឹងមកដល់ ទាន់ពេលវេលាដែលព្រះយេហូវ៉ាបានកំណត់។ នៅពេលទីបញ្ចប់នោះមកដល់ តើយើងនឹងត្រូវបានចាត់ទុកជាបុគ្គលដែលបំពេញភារកិច្ចរបស់យើងយ៉ាងស្មោះក្នុងកិច្ចផ្សព្វផ្សាយឬទេ? (អេសេ. ៣៣:៨, ៩) តើយើងនឹងទុកព្រះរាជាណាចក្ររបស់ព្រះជាអាទិភាពក្នុងជីវិតរបស់យើងឥឡូវនេះ ដើម្បីបំពេញកិច្ចបម្រើផ្សាយយ៉ាងពេញទំហឹងទេ? ដើម្បីធ្វើដូច្នេះ តើយើងខំប្រឹងបំពេញគោលដៅអ្វីខ្លះក្នុងកិច្ចបម្រើព្រះយេហូវ៉ា?
ដោយប្រាប់អ្វីដែលព្រះយេហូវ៉ាតម្រូវពីយើងម្នាក់ៗជាអ្នកបម្រើដែលបានឧទ្ទិសថ្វាយខ្លួន ព្រះយេស៊ូបានប្រាប់ថា៖ «ឯងត្រូវស្រឡាញ់ ដល់ព្រះអម្ចាស់[ព្រះយេហូវ៉ា] ជាព្រះនៃឯង ឲ្យអស់អំពីចិត្ត អស់អំពីព្រលឹង អស់អំពីគំនិត ហើយអស់អំពីកំឡាំងនៃឯង»។ (ម៉ាក. ១២:៣០) ព្រះតម្រូវឲ្យយើងទាំងអស់គ្នាបម្រើទ្រង់យ៉ាងស្មោះអស់ពីចិត្ត។ នេះមានន័យថា ដោយធ្វើអស់ពីសមត្ថភាពក្នុងកិច្ចបម្រើផ្សាយ យើងម្នាក់ៗអាចសម្ដែងភក្ដីភាពរបស់យើងខ្លាំងប៉ុណ្ណា ហើយសម្ដែងពីការឧទ្ទិសថ្វាយខ្លួនរបស់យើងដោយចិត្តស្មោះស។ (២ធី. ២:១៥) តាមកាលៈទេសៈនិងសមត្ថភាព យើងម្នាក់ៗមានរបៀបជាច្រើនដើម្បីពង្រីកកិច្ចបម្រើផ្សាយ។ សូមពិចារណាពីរបៀបខ្លះៗទាំងនេះ ហើយសម្រេចចិត្តថាគោលដៅខាងកិច្ចបម្រើព្រះមួយណា ដែលអ្នកនឹងខំប្រឹងបំពេញក្នុងកិច្ចផ្សព្វផ្សាយរបស់អ្នក។
ការបម្រើជាអ្នកផ្សាយក្នុងក្រុមជំនុំ
អស់អ្នកដែលក្រសោបយកសេចក្ដីពិតមានឯកសិទ្ធិប្រកាសផ្សាយដំណឹងល្អ។ នេះជាកិច្ចការដ៏ចាំបាច់ដែលព្រះយេស៊ូប្រគល់ឲ្យសិស្សរបស់ទ្រង់ធ្វើ។ (ម៉ាថ. ២៤:១៤; ២៨:១៩, ២០) ធម្មតាពេលដែលសិស្សព្រះយេស៊ូទទួលស្គាល់នូវតម្លៃនៃដំណឹងល្អ នោះគាត់ចាប់ផ្ដើមនិយាយជាមួយអ្នកឯទៀត។ នេះជាអ្វីដែលអនទ្រេ ភីលីព កូនេលាស និងអ្នកឯទៀតបានធ្វើ។ (យ៉ូន. ១:៤០, ៤១, ៤៣-៤៥; កិច្ច. ១០:១, ២, ២៤; ១៦:១៤, ១៥, ២៥-៣៤) តើនេះមានន័យថាបុគ្គលម្នាក់អាចចូលរួមក្នុងការផ្សាយដំណឹងល្អមុនដែលបានត្រូវជ្រមុជទឹកឬទេ? ពិតមែន។ នៅពេលដែលបុគ្គលម្នាក់មានលក្ខណៈគ្រប់គ្រាន់ដើម្បីបម្រើជាអ្នកផ្សាយដែលមិនទាន់ជ្រមុជទឹកនៅក្នុងក្រុមជំនុំ គាត់អាចចូលរួមក្នុងការផ្សព្វផ្សាយពីផ្ទះមួយទៅផ្ទះមួយ។ ម្យ៉ាងទៀត តាមកាលៈទេសៈនិងសមត្ថភាព គាត់អាចចូលរួមយ៉ាងទៀងទាត់ក្នុងវិធីផ្សព្វផ្សាយឯទៀតជាពួកគ្រិស្តសាសនិក។
ជាសមាជិកនៃក្រុមជំនុំដែលបានត្រូវជ្រមុជទឹក អ្នកពិតជាចង់ធ្វើអស់ពីសមត្ថភាពដើម្បីជួយអ្នកឯទៀតរៀនអំពីដំណឹងល្អ។ ទាំងបុរសទាំងស្ត្រីមានឯកសិទ្ធិចូលរួមក្នុងកិច្ចផ្សព្វផ្សាយដែលព្រះបង្គាប់ឲ្យមនុស្សធ្វើ។ យើងទាំងអស់គ្នាគួរទុកគំរូដ៏ល្អក្នុងការបំពេញតួនាទីរបស់ខ្លួនក្នុងក្រុមជំនុំ។ (១ធី. ២:៩-១៥; ទីត. ២:១-១០; ១ពេ. ៥:៥) កាលណាភាពចាស់ទុំរបស់បុរសក្នុងក្រុមជំនុំកាន់តែប្រសើរឡើងៗក្នុងការថ្វាយបង្គំព្រះ ហើយមានលក្ខណៈគ្រប់គ្រាន់តាមសេចក្ដីតម្រូវក្នុងព្រះគម្ពីរ នោះប្រហែលអាចតែងតាំងជាអ្នកងារជំនួយ។ (១ធី. ៣:៨-១០, ១២, ១៣) អ្នកងារជំនួយដែលចង់ទទួលភារកិច្ចជាអ្នកចាស់ទុំ ហើយគាត់មានលក្ខណៈគ្រប់គ្រាន់តាមសេចក្ដីតម្រូវនៅព្រះគម្ពីរ ត្រូវបានតែងតាំងឲ្យបម្រើជាអ្នកចាស់ទុំ។ ពួកគេបង្រៀននិងគង្វាលក្នុងក្រុមជំនុំ។ (១ធី. ៣:១-៧; ទីត. ១:៥-៩) គឺជាឯកសិទ្ធិមែនសូម្បីតែមានចំណែកបន្ដិចបន្តួចក៏ដោយ ដើម្បីឲ្យប្រយោជន៍ព្រះរាជាណាចក្ររបស់ព្រះរីកចម្រើនកាន់តែច្រើនឡើង។ អ្នកណាដែលអាចពង្រីកកិច្ចបម្រើផ្សាយរបស់ខ្លួនដើម្បីទទួលឯកសិទ្ធិបម្រើបន្ថែម ច្បាស់ជាមានសុភមង្គលមែន។
ការបម្រើនៅកន្លែងដែលត្រូវការអ្នកផ្សាយច្រើនជាង
ប្រហែលអ្នកបម្រើនៅក្រុមជំនុំដែលតំបន់ផ្សាយបានធ្វើជារឿយៗ ហើយក្រុមជំនុំកំពុងផ្សព្វផ្សាយយ៉ាងល្អនៅទីនោះ។ បើដូច្នេះ អ្នកប្រហែលមានអារម្មណ៍ថា អាចពង្រីកកិច្ចបម្រើផ្សាយរបស់អ្នក ដោយផ្លាស់ទៅតំបន់ដែលត្រូវការអ្នកផ្សព្វផ្សាយច្រើនជាង។ (កិច្ច. ១៦:៩) អ្នកត្រួតពិនិត្យមណ្ឌលរបស់អ្នកប្រហែលមានយោបល់នូវរបៀបដែលអ្នកអាចជួយក្រុមជំនុំឯទៀតនៅក្នុងមណ្ឌល។ ប្រសិនបើអ្នកមានចិត្តចង់បម្រើនៅតំបន់ឯទៀតក្នុងប្រទេសរបស់អ្នក អ្នកអាចសរសេរសំបុត្រសុំព័ត៌មានពីការិយាល័យសាខា។ ប្រសិនបើអ្នកកំពុងតែបម្រើជាអ្នកចាស់ទុំឬអ្នកងារជំនួយ ប្រហែលមានក្រុមជំនុំឯទៀតនៅក្នុងប្រទេសរបស់អ្នក ដែលនឹងអបអរពីជំនួយរបស់អ្នកក្នុងការបំពេញសេចក្ដីត្រូវការរបស់ក្រុមជំនុំនោះ។
តើអ្នកចង់ឲ្យផលប្រយោជន៍ព្រះរាជាណាចក្រនៅប្រទេសក្រៅរីកចម្រើនឬទេ? ប្រសិនបើអ្នកចង់ អ្នកត្រូវពិចារណាអំពីរឿងនេះដោយប្រយ័ត្នប្រយែង។ ការផ្លាស់ប្រទេសពិតជាមានឥទ្ធិពលលើអ្នក និងអស់អ្នកដែលទៅជាមួយអ្នក។ (លូ. ១៤:២៨) ប្រសិនបើអ្នកមិនមានគម្រោងនៅទីនោះយូរទេ ប្រហែលល្អជាងបើអ្នកគិតអំពីការបម្រើនៅតំបន់ក្នុងប្រទេសខ្លួន។
មុនអាចទទួលឈ្មោះពីក្រុមជំនុំដែលអ្នកអាចជួយបាន ការិយាល័យសាខានៅប្រទេសអ្នកឬប្រទេសឯទៀត ត្រូវការសំបុត្រពីគណៈកម្មាធិការកិច្ចបម្រើក្រុមជំនុំរបស់អ្នក ដែលបញ្ជាក់ថាអ្នកមានលក្ខណៈគ្រប់គ្រាន់។ មិនថាអ្នកកំពុងបម្រើជាអ្នកចាស់ទុំ អ្នកងារជំនួយ អ្នកត្រួសត្រាយ ឬក៏អ្នកផ្សាយក៏ដោយ សំបុត្រនេះត្រូវការជាចាំបាច់។ គណៈកម្មាធិការកិច្ចបម្រើក្រុមជំនុំនឹងផ្ញើសំបុត្រនោះជាមួយនឹងសំណួររបស់អ្នកទៅដល់ការិយាល័យសាខានៅប្រទេសដែលអ្នកចង់បម្រើ។
ប្រសិនបើអ្នកមានចិត្តចង់បម្រើនៅកន្លែងដែលត្រូវការអ្នកផ្សាយច្រើនជាង សូមពិភាក្សារឿងនេះជាមួយពួកអ្នកចាស់ទុំនៅក្នុងក្រុមជំនុំរបស់អ្នក។ ពួកអ្នកចាស់ទុំប្រហែលអាចជួយអ្នកដែលមានលក្ខណៈគ្រប់គ្រាន់ចង់ផ្លាស់ទៅរស់នៅតំបន់ថ្មី ឬពួកអ្នកចាស់ទុំរកវីធីណាក៏ដោយដែលអ្នកអាចមានលក្ខណៈគ្រប់គ្រាន់នៅថ្ងៃមុខដើម្បីអាចបម្រើនៅទីនោះបាន។
ការបម្រើក្នុងក្រុមជំនុំដែលនិយាយភាសាផ្សេង
អ្នកអាចគិតអំពីការរៀនភាសាណាមួយទៀត ដែលរួមទាំងភាសាគ ដើម្បីពង្រីកកិច្ចបម្រើរបស់អ្នក។ នៅក្នុងក្រុមគ្រួសារដែលចេះនិយាយពីរភាសា មានទាំងមាតាបិតាទាំងយុវវ័យបម្រើនៅក្នុងក្រុមជំនុំដែលនិយាយភាសាផ្សេង ដើម្បីស្វែងរកប្រយោជន៍ព្រះរាជាណាចក្រឲ្យបានពេញទំហឹង។ ប្រសិនបើអ្នកមានគោលដៅរៀនភាសាមួយទៀតដើម្បីផ្សព្វផ្សាយ សូមពិភាក្សាជាមួយពួកអ្នកចាស់ទុំនិងអ្នកត្រួតពិនិត្យមណ្ឌល។ ពួកគេអាចជូនយោបល់ និងផ្ដល់ការលើកទឹកចិត្តដែលពិតជាត្រូវការ។ នៅក្រោមការណែនាំរបស់ការិយាល័យសាខា មានមណ្ឌលខ្លះៗបានរៀបចំថ្នាក់រៀនភាសា ដើម្បីចេះផ្សព្វផ្សាយដល់ជនអន្ដោប្រវេសន៍នៅតំបន់នោះ។