៦៨
ក្មេងប្រុសពីរនាក់ដែលរស់ឡើងវិញ
ប្រសិនជាអ្នកស្លាប់ទៅ រួចត្រូវបានប្រោសឲ្យមានជីវិតរស់ឡើងវិញ តើម្ដាយរបស់អ្នកនឹងមានអារម្មណ៍យ៉ាងណាទៅ? គាត់ច្បាស់ជានឹងសប្បាយចិត្តណាស់! ប៉ុន្តែ តើមនុស្សម្នាក់ដែលបានស្លាប់ទៅហើយ អាចរស់ឡើងវិញបានទេ? តើការនេះមានដែលធ្លាប់កើតឡើងពីមុនមកទេ?
សូមក្រឡេកមើលបុរស ស្ត្រីនិងក្មេងប្រុសតូចនៅកន្លែងនេះ។ បុរសនេះជាព្យាការីអេលីយ៉ា។ រីឯស្ត្រីនេះជាមេម៉ាយពីក្រុងសារិបតា ហើយក្មេងប្រុសនេះជាកូនរបស់នាង។ នៅថ្ងៃមួយ កូននេះក៏ចាប់ឈឺកាន់តែខ្លាំងឡើងៗរហូតដល់ទីបំផុតក៏ត្រូវស្លាប់ទៅ។ បន្ទាប់មក លោកអេលីយ៉ាប្រាប់ស្ត្រីនេះថា៖ ‹សូមឲ្យក្មេងប្រុសនេះមកខ្ញុំចុះ›។
លោកអេលីយ៉ាយកកូនស្លាប់នេះឡើងទៅបន្ទប់លើ រួចផ្ដេកវានៅលើគ្រែ។ បន្ទាប់មក លោកអធិស្ឋានថា៖ ‹ឱព្រះយេហូវ៉ាអើយ សូមព្រះអង្គប្រោសក្មេងនេះឲ្យរស់ឡើងវិញផង›។ រួចក្មេងនោះក៏ចាប់ដកដង្ហើមវិញ! ខណៈនោះ លោកអេលីយ៉ាក៏យកកូននោះចុះទៅក្រោមវិញ ហើយមានប្រសាសន៍ទៅកាន់ស្ត្រីថា៖ ‹មើល កូនរបស់អ្នកនៅរស់ទេតើ›! នេះហើយជាអ្វីដែលធ្វើឲ្យម្ដាយមានចិត្តសប្បាយណាស់នោះ។
ព្យាការីដ៏សំខាន់ម្នាក់ទៀតនៃព្រះយេហូវ៉ាឈ្មោះអេលីសេ។ លោកជាអ្នកជំនួយដល់លោកអេលីយ៉ា។ ប៉ុន្តែ នៅពេលក្រោយមក ព្រះយេហូវ៉ាក៏ប្រើលោកអេលីសេឲ្យសម្ដែងអព្ភូតហេតុជាច្រើនដែរ។ ថ្ងៃមួយលោកអេលីសេធ្វើដំណើរទៅឯក្រុងស៊ូណែម ដែលមានស្ត្រីម្នាក់មានចិត្តសប្បុរសណាស់ចំពោះលោក។ ក្រោយមក ស្ត្រីម្នាក់នេះសំរាលបានកូនប្រុសមួយ។
នៅវេលាព្រឹកមួយ ក្រោយពីកូននោះបានធំហើយ នោះវាក៏ចេញទៅចូលរួមជាមួយឪពុករបស់វាដែលកំពុងតែធ្វើការនៅឯវាលចំការ។ ស្រាប់តែភ្លាមនោះ ក្មេងនោះស្រែកឡើងថា៖ ‹ក្បាលខ្ញុំឈឺណាស់›! ក្រោយពីគេបានយកវាមកដល់ផ្ទះ ក្មេងប្រុសនោះក៏ស្លាប់ទៅ។ នេះធ្វើឲ្យម្ដាយមានចិត្តស្រងូតស្រងាត់ណាស់! នោះនាងក៏ទៅជំរាបលោកអេលីសេភ្លាម។
កាលដែលលោកអេលីសេមកដល់ លោកក៏យកក្មេងស្លាប់នោះចូលទៅក្នុងបន្ទប់។ លោកអធិស្ឋានទៅព្រះយេហូវ៉ា រួចក៏ផ្ដេកខ្លួនលោកទៅលើកាយក្មេងនោះ។ មួយរំពេចនោះ កាយក្មេងនោះក៏ចាប់មានកំដៅឡើង ហើយវាកណ្ដាស់ប្រាំពីរដង។ ម្ដាយកូននោះមានចិត្តសប្បាយរីករាយណាស់ កាលដែលចូលមកឃើញកូនខ្លួនបានរស់ឡើងវិញ!
មនុស្សជាច្រើនអនេកបានស្លាប់ទៅ។ នេះបានធ្វើឲ្យគ្រួសារនិងមិត្តរបស់គេស្រងូតស្រងាត់ចិត្តណាស់។ យើងពុំមានឥទ្ធិពលនឹងប្រោសមនុស្សស្លាប់ឲ្យរស់ឡើងវិញបានទេ។ ប៉ុន្តែ ព្រះយេហូវ៉ាទ្រង់មានឥទ្ធិពលនឹងធ្វើការនេះបាន។ នៅពេលក្រោយ យើងនឹងរៀនអំពីរបៀបដែលទ្រង់នឹងប្រោសមនុស្សរាប់លាននាក់ឲ្យមានជីវិតរស់ឡើងវិញ។
ពង្សាវតារក្សត្រទី១ ១៧:៨-២៤; ពង្សាវតារក្សត្រទី២ ៤:៨-៣៧