៧៨
អក្សរដៃនៅលើជញ្ជាំង
តើអ្វីកំពុងតែកើតឡើងនៅទីនេះ? មនុស្សទាំងនេះកំពុងតែធ្វើពិធីជប់លៀងយ៉ាងធំមួយ។ ស្តេចនៃសាសន៍បាប៊ីឡូនបានអញ្ជើញពួកភ្ញៀវសំខាន់ៗមួយពាន់នាក់។ ពួកគេកំពុងតែប្រើពែងមាស និងពែងប្រាក់ ហើយចានដែលបានយកពីព្រះវិហាររបស់ព្រះយេហូវ៉ានៅក្រុងយេរូសាឡិម។ ប៉ុន្តែ មួយរំពេចនោះ មានម្រាមដៃនៃមនុស្សលេចចេញមក ហើយក៏ចាប់ផ្ដើមសរសេរនៅលើជញ្ជាំង។ មនុស្សគ្រប់គ្នាបានភិតភ័យណាស់។
បេលសាសារដែលជាចៅរបស់ស្តេចនេប៊ូក្នេសា ឥឡូវនេះជាស្តេច។ ទ្រង់ក៏ស្រែកហៅពួកអ្នកប្រាជ្ញរបស់ទ្រង់ឲ្យចូលមក។ ស្តេចមានបន្ទូលថា៖ ‹អ្នកណាដែលអាចមើលអក្សរនេះបាន ហើយស្រាយន័យឲ្យយើងដឹង នឹងត្រូវជូនរង្វាន់ជាច្រើន ហើយនិងតាំងឡើងជាអ្នកគ្រប់គ្រងដ៏សំខាន់ទីបីក្នុងព្រះរាជាណាចក្រនេះ›។ ប៉ុន្តែ គ្មានអ្នកប្រាជ្ញណាមួយអាចមើលអក្សរនៅលើជញ្ជាំង ឬក៏អាចប្រាប់ន័យនោះបានឡើយ។
មាតារបស់ស្តេចបានឮសម្រែកនោះ ហើយក៏ចូលមកក្នុងបន្ទប់ជប់លៀង។ នាងទូលប្រាប់ស្តេចថា៖ ‹សូមទ្រង់កុំមានព្រះទ័យខ្លាចអ្វីឡើយ។ ដ្បិតនៅក្នុងព្រះរាជាណាចក្រទ្រង់ មានបុរសម្នាក់ដែលជាអ្នកស្គាល់ព្រះបរិសុទ្ធ។ ក្នុងកាលដែលជីតាទ្រង់ នេប៊ូក្នេសាសោយរាជ្យជាស្តេចនោះ ទ្រង់បានតាំងលោកនោះជាអធិបតីលើពួកអ្នកប្រាជ្ញទាំងអស់។ លោកឈ្មោះដានីយ៉ែល។ សូមចាត់ឲ្យលោកមក ហើយលោកនឹងទូលប្រាប់សេចក្ដីទាំងនេះថ្វាយទ្រង់›។
ដូច្នេះគេក៏នាំលោកដានីយ៉ែលមកភ្លាម។ ក្រោយពីបានបដិសេធនូវរង្វាន់ទាំងនោះហើយ លោកដានីយ៉ែលក៏ចាប់ផ្ដើមទូលប្រាប់នូវហេតុ ដែលព្រះយេហូវ៉ាបានទម្លាក់ស្តេចនេប៊ូក្នេសាជាជីតារបស់ស្តេចបេលសាសារចុះពីបល្ល័ង្ករាជ្យ។ លោកដានីយ៉ែលទូលថា៖ ‹ទ្រង់មានសេចក្ដីអំនួតណាស់ ហើយព្រះយេហូវ៉ាក៏បានដាក់ទណ្ឌកម្មដល់ទ្រង់›។
លោកដានីយ៉ែលទូលប្រាប់ស្តេចបេលសាសារទៀតថា៖ ‹តែទ្រង់វិញ បានជ្រាបដឹងពីអ្វីដែលបានកើតឡើងដល់ទ្រង់ ហើយនៅតែមានសេចក្ដីអំនួតដូចស្តេចនេប៊ូក្នេសាទៀត។ ទ្រង់បានយកពែង ហើយនិងចានពីព្រះវិហាររបស់ព្រះយេហូវ៉ា ហើយក៏សោយពីរបស់ទាំងនោះ។ ទ្រង់បានសរសើរដល់ព្រះដែលធ្វើពីឈើហើយពីថ្ម ហើយទ្រង់មិនបានគោរពអ្នកបង្កើតដ៏ខ្ពង់បំផុតរបស់យើងនោះទេ។ ហេតុនោះហើយ បានជាព្រះបានធ្វើឲ្យដៃនេះសរសេរពាក្យទាំងនេះ។
លោកដានីយ៉ែលទូលថា៖ ‹ឯពាក្យដែលបានសរសេរនោះ គឺថា៖ ‹មេនេ មេនេ ទេកិល អ៊ូផារស៊ីន›។
‹មេនេ មានន័យថាព្រះបានរាប់ថ្ងៃនៃរាជ្យទ្រង់ ហើយបានធ្វើឲ្យផុតទៅ។ ទេកិល មានន័យថាទ្រង់បានត្រូវថ្លឹងនឹងជញ្ជីង ហើយឃើញថាមិនល្អសោះ។ អ៊ូផារស៊ីន នោះមានន័យថា ព្រះរាជាណាចក្ររបស់ទ្រង់ត្រូវបែងចែកឲ្យទៅពួកសាសន៍មេឌី និងសាសន៍ពើស៊ីហើយ›។
សូម្បីតែក្នុងកាលដែលលោកដានីយ៉ែលកំពុងតែទូលនោះ ពួកសាសន៍មេឌីនិងសាសន៍ពើស៊ីបានចាប់ផ្ដើមវាយលុកក្រុងបាប៊ីឡូនហើយ។ ពួកគេចាប់យកក្រុងនោះ ហើយធ្វើគត់ដល់ស្តេចបេលសាសារទៅ។ អត្ថន័យនៃអក្សរដៃនៅលើជញ្ជាំងនោះ បានកើតពិតមែននៅវេលាយប់នោះ! ប៉ុន្តែ តើនឹងមានអ្វីកើតឡើងដល់ប្រជាជនអ៊ីស្រាអែលឥឡូវនេះ? បន្ដិចទៀតយើងនឹងពិនិត្យមើលនូវរឿងនោះ ប៉ុន្តែ ជាបឋមសូមឲ្យយើងមើលនូវអ្វីដែលកើតឡើងដល់លោកដានីយ៉ែលសិន។