គ្រួសាររបស់ព្រះយេហូវ៉ាមានឯកភាពដ៏មានតម្លៃ
«មើល ដែលបងប្អូននៅមូលជាមួយគ្នា ដោយចិត្តព្រមព្រៀង នោះជាការល្អ ហើយសមគួរយ៉ាងណាទៅ»។—ទំនុកដំកើង ១៣៣:១
១. តើគ្រួសារសព្វថ្ងៃនេះមានស្ថានភាពយ៉ាងណា?
សព្វថ្ងៃនេះគ្រួសារកំពុងតែមានវិបត្ដិ។ ក្នុងគ្រួសារជាច្រើន ចំណងអាពាហ៍ពិពាហ៍បានធ្លាក់ដល់កំរិតដ៏លំបាកមួយ។ ការលែងលះគ្នាមានកើនឡើងទូទៅ ហើយកូនក្មេងជាច្រើននៃឪពុកម្ដាយដែលលែងលះគ្នានោះ គឺកំពុងតែជួបការដុនដាបយ៉ាងខ្លាំង។ គ្រួសាររាប់លានមិនសប្បាយចិត្តហើយគ្មានឯកភាពនឹងគ្នាទេ។ ប៉ុន្តែ មានគ្រួសារមួយដែលដឹងស្គាល់អំពីការអរសប្បាយនិងឯកភាពពិត។ នេះជាគ្រួសារក្នុងសកលលោករបស់ព្រះយេហូវ៉ា។ ក្នុងគ្រួសារនោះ មានទេវតាជាច្រើនអនេកដែលអនុវត្តកិច្ចការរបស់គេ ស្របតាមគោលបំណងរបស់ព្រះ។ (ទំនុកដំកើង ១០៣:២០, ២១) ប៉ុន្តែ តើមានគ្រួសារលើផែនដីដែលមានឯកភាពបែបនេះទេ?
២, ៣. (ក) តើអ្នកណាដែលមានផ្នែកក្នុងគ្រួសារសកលលោករបស់ព្រះ ហើយតើយើងអាចប្រដូចស្មរបន្ទាល់ព្រះយេហូវ៉ាទាំងអស់សព្វថ្ងៃនេះទៅនឹងអ្វី? (ខ) តើមានសំនួរអ្វីខ្លះដែលយើងនឹងពិគ្រោះ?
២ សាវ័កប៉ុលបានសរសេរថា៖ «ដោយហេតុនោះបានជាខ្ញុំលុតជង្គង់ នៅចំពោះព្រះវរបិតានៃព្រះយេស៊ូវគ្រីស្ទជាព្រះអម្ចាស់នៃយើងរាល់គ្នា ដែលគ្រប់ទាំងគ្រួនៅស្ថានសួគ៌ ហើយនៅផែនដី មាននាមត្រកូលពីទ្រង់មក»។ (អេភេសូរ ៣:១៤, ១៥) ត្រកូលគ្រួសារគ្រប់ៗគ្នានៅលើផែនដីមានឈ្មោះដោយសារព្រះ ពីព្រោះទ្រង់ជាព្រះអាទិទេព។ ថ្វីបើគ្មានគ្រួសារមនុស្សនៅលើស្ថានសួគ៌ក៏ដោយ បើនិយាយជាប្រៀបប្រដូច ព្រះបានរៀបការជាមួយអង្គការស្ថានសួគ៌របស់ទ្រង់ ហើយព្រះយេស៊ូនឹងមានកូនក្រមុំខាងវិញ្ញាណមកចូលរួមជាមួយទ្រង់ក្នុងស្ថានសួគ៌។ (អេសាយ ៥៤:៥; លូកា ២០:៣៤, ៣៥; កូរិនថូសទី១ ១៥:៥០; កូរិនថូសទី២ ១១:២) ពួកស្មោះត្រង់ចាក់ប្រេងតាំងនៅលើផែនដី ឥឡូវនេះជាផ្នែកនៃគ្រួសារក្នុងសកលលោករបស់ព្រះ ហើយ«ចៀមឯទៀត»របស់ព្រះយេស៊ូ ដែលមានសង្ឃឹមរស់នៅលើផែនដី ក៏ជាសមាជិកនៃគ្រួសារនេះដែរ។ (យ៉ូហាន ១០:១៦; រ៉ូម ៨:១៤-១៧; ប៉មយាម ខែមករា ១៥ ១៩៩៦ ទំព័រ ៣១) ប៉ុន្តែ ស្មរបន្ទាល់ព្រះយេហូវ៉ាទាំងអស់នៅសព្វថ្ងៃនេះ អាចប្រដូចជាគ្រួសារពេញពិភពលោកដែលមានឯកភាព។
៣ តើអ្នកមានផ្នែកក្នុងគ្រួសារអន្តរជាតិដ៏អស្ចារ្យនៃអ្នកបំរើរបស់ព្រះទេ? បើមាននោះ អ្នកអាចមានពរដ៏ធំមួយ។ មនុស្សរាប់លាននាក់នឹងផ្ដល់ភស្តុតាងថា គ្រួសារពេញពិភពលោករបស់ព្រះយេហូវ៉ា—អង្គការដែលមើលឃើញរបស់ទ្រង់—ជាកន្លែងមានសន្ដិភាពនិងឯកភាពក្នុងតំបន់ដែលមានការទាស់ទែងនិងការគ្មានឯកភាព។ តើឯកភាពនៃគ្រួសារពេញពិភពលោករបស់ព្រះយេហូវ៉ា អាចរៀបរាប់យ៉ាងដូចម្ដេច? ហើយតើមានកត្ដាអ្វីដែលធ្វើឲ្យមានឯកភាពបែបនេះ?
ជាការល្អ ហើយសមគួរ!
៤. ក្នុងពាក្យរបស់អ្នក តើអ្នកអាចបញ្ចេញយោបល់យ៉ាងណាអំពីអ្វីៗដែលទំនុកដំកើង ១៣៣ ចែងអំពីឯកភាពនៃបងប្អូន?
៤ ដាវីឌ ជាអ្នកតែងបទទំនុកដំកើងអបអរយ៉ាងជ្រាលជ្រៅដល់ឯកភាពនៃបងប្អូន។ ព្រះបានបណ្ដាលឲ្យគាត់ច្រៀងអំពីរឿងនេះទៀតផង! ចូរគិតអំពីគាត់លេងពិណ កាលដែលគាត់ច្រៀងថា៖ «មើល! ដែលបងប្អូននៅមូលជាមួយគ្នា ដោយចិត្តព្រមព្រៀង នោះជាការល្អ ហើយសមគួរយ៉ាងណាទៅ នោះធៀបដូចជាប្រេងដ៏វិសេសដែលចាក់លើក្បាល ក៏ហូរចុះមកដល់ពុកចង្កា គឺជាពុកចង្ការបស់អើរ៉ុន រួចស្រក់ទៅដល់ជាយអាវរបស់លោកផង ក៏ធៀបដូចជាទឹកសន្សើមនៅលើភ្នំហ៊ើម៉ូន ដែលធ្លាក់មកលើភ្នំស៊ីយ៉ូន ដ្បិតនៅទីនោះព្រះយេហូវ៉ាបានប្រទានព្រះពរ គឺជាជីវិតដ៏នៅអស់កល្បជានិច្ច»។—ទំនុកដំកើង ១៣៣:១-៣
៥. ទៅលើមូលដ្ឋាននៃទំនុកដំកើង ១៣៣:១, ២ តើការប្រៀបធៀបអ្វីដែលអាចធ្វើឡើងរវាងពួកអ៊ីស្រាអែលនិងពួកអ្នកបំរើរបស់ព្រះសព្វថ្ងៃនេះ?
៥ ពាក្យទាំងនោះគឺទាក់ទងដល់ឯកភាពនៃប្រជារាស្ត្ររបស់ព្រះពីដើម គឺពួកអ៊ីស្រាអែល។ ពេលសំណាក់ក្នុងក្រុងយេរូសាឡិមសំរាប់ធ្វើបុណ្យបីថ្ងៃរបស់គេ ពួកគេបានរស់នៅជាមួយគ្នាដោយឯកភាពមែន។ ថ្វីបើពួកគេមកពីកុលសម្ព័ន្ធផ្សេងៗក៏ដោយ ពួកគេជាគ្រួសារតែមួយ។ ការមកជួបជុំគ្នាមានឥទ្ធិពលដ៏ល្អទៅលើគេ ដូចជាប្រេងដ៏វិសេសដែលមានក្លិនក្រអូប។ នៅពេលដែលប្រេងបែបនេះបានចាក់ទៅលើក្បាលអើរ៉ុន គឺបានហូរចុះដល់ពុកចង្កា រួចស្រក់ទៅដល់ជាយអាវរបស់លោកផង។ ចំពោះពួកអ៊ីស្រាអែល ការមកជួបជុំគ្នាមានឥទ្ធិពលដ៏ល្អ ដែលច្រៀបចូលដល់បណ្ដាជនទាំងមូល។ ការយល់ច្រឡំបានដោះស្រាយ ហើយបានផ្សព្វផ្សាយឲ្យមានឯកភាព។ ឯកភាពបែបនេះក៏មាននៅក្នុងគ្រួសារទូទៅរបស់ព្រះយេហូវ៉ាសព្វថ្ងៃនេះដែរ។ ការចូលរួមទៀងទាត់ជាមួយអ្នកជឿគ្នីគ្នា មានលទ្ធផលដ៏ល្អខាងវិញ្ញាណទៅលើពួកសមាជិកទាំងឡាយ។ ការយល់ច្រឡំណាមួយ ឬការពិបាកអ្វីមួយត្រូវបានយកចេញ កាលដែលគេអនុវត្តតាមឱវាទរបស់ព្រះ។ (ម៉ាថាយ ៥:២៣, ២៤; ១៨:១៥-១៧) ប្រជារាស្ត្ររបស់ព្រះយេហូវ៉ាអបអរយ៉ាងខ្លាំង ដល់ការលើកទឹកចិត្តគ្នាទៅវិញទៅមក ដែលមានមកពីឯកភាពនៃបងប្អូនរបស់គេ។
៦, ៧. តើតាមរបៀបណាដែលឯកភាពរបស់ពួកអ៊ីស្រាអែលដូចជាទឹកសន្សើមនៃភ្នំហ៊ើម៉ូន ហើយសព្វថ្ងៃនេះតើពររបស់ព្រះអាចរកឃើញនៅកន្លែងណា?
៦ តើតាមរបៀបណាដែលឯកភាពរបស់ពួកអ៊ីស្រាអែល ដូចជាទឹកសន្សើមនៃភ្នំហ៊ើម៉ូន? ពីព្រោះកំពូលភ្នំនេះមានកំពស់រហូតដល់២.៨០០ម៉ែត្រលើផ្ទៃសមុទ្រ នោះមានទឹកកកនៅលើកំពូលសឹងតែពេញមួយឆ្នាំ។ កំពូលភ្នំទឹកកកនៃភ្នំហ៊ើម៉ូនធ្វើឲ្យមានកំណនៃចំហាយពេលយប់ ម្ល៉ោះហើយក៏កើតមានទឹកសន្សើមបរិបូរ សំរាប់ដំណាំក្នុងរដូវស្ងួត។ ចរន្តខ្យល់ត្រជាក់ពីភ្នំហ៊ើម៉ូនអាចបក់ចំហាយនេះ ទៅដល់ទិសខាងត្បូងនៃតំបន់យេរូសាឡិម ដែលធ្វើឲ្យទៅជាទឹកសន្សើម។ ដូច្នេះ អ្នកតែងបទទំនុកដំកើងបាននិយាយយ៉ាងត្រឹមត្រូវអំពី‹ទឹកសន្សើមនៃភ្នំហ៊ើម៉ូនចុះពីទៅលើភ្នំស៊ីយ៉ូន›។ នេះជាការរំឭកអំពីឥទ្ធិពលដ៏ត្រជាក់ដែលធ្វើឲ្យមានឯកភាពនៃគ្រួសារអ្នកថ្វាយបង្គំរបស់ព្រះយេហូវ៉ា!
៧ មុនក្រុមជំនុំគ្រីស្ទានត្រូវបានស្ថាបនាឡើង ភ្នំស៊ីយ៉ូន ឬក្រុងយេរូសាឡិមជាមណ្ឌលនៃការថ្វាយបង្គំពិត។ ដូច្នេះហើយ បានជាព្រះបញ្ជាឲ្យមានពរមកដល់ទីនោះ។ ដោយព្រោះតែប្រភពនៃពរស្ថិតនៅក្នុងទីបរិសុទ្ធក្នុងយេរូសាឡិម ពរនឹងចេញពីទីនោះ។ ពីព្រោះតែការថ្វាយបង្គំពិតមិននៅកន្លែងពិតប្រាកដណាមួយនោះ ដូច្នេះពរ សេចក្ដីស្រឡាញ់ និងឯកភាពនៃពួកអ្នកបំរើរបស់ព្រះ អាចឃើញមានគ្រប់កន្លែងលើផែនដីសព្វថ្ងៃនេះ។ (យ៉ូហាន ១៣:៣៤, ៣៥) តើកត្ដាអ្វីខ្លះដែលធ្វើឲ្យមានឯកភាពនេះ?
កត្ដាដែលធ្វើឲ្យមានឯកភាព
៨. តើអ្វីដែលយើងរៀនអំពីឯកភាពក្នុងយ៉ូហាន ១៧:២០, ២១?
៨ ឯកភាពនៃពួកអ្នកថ្វាយបង្គំរបស់ព្រះយេហូវ៉ា គឺមានមូលដ្ឋានទៅលើការគោរពតាមបន្ទូលរបស់ព្រះដែលបានយល់យ៉ាងត្រឹមត្រូវ រួមបញ្ចូលការបង្រៀនរបស់ព្រះយេស៊ូគ្រីស្ទ។ ដោយសារព្រះយេហូវ៉ាបានបញ្ជូនរាជបុត្រារបស់ទ្រង់ឲ្យចូលមកក្នុងលោក ឲ្យធ្វើបន្ទាល់ដល់សេចក្ដីពិត ហើយឲ្យសោយទិវង្គតជាយញ្ញបូជា នេះបានបើកឲ្យបង្កើតក្រុមជំនុំគ្រីស្ទានដ៏មានឯកភាព។ (យ៉ូហាន ៣:១៦; ១៨:៣៧) ដែលថាត្រូវមានឯកភាពពិតក្នុងចំណោមសមាជិក ត្រូវបានបញ្ជាក់មកនៅពេលដែលព្រះយេស៊ូបានអធិស្ឋានថា៖ «ទូលបង្គំមិនអធិស្ឋាន ឲ្យអ្នកទាំងនេះតែប៉ុណ្ណោះ គឺឲ្យដល់ទាំងអ្នកណា ដែលនឹងជឿដល់ទូលបង្គំ ដោយសារពាក្យរបស់គេថែមទៀតដែរ ដើម្បីឲ្យទាំងអស់បានរួមមកតែមួយ ឱព្រះវរបិតាអើយ ដូចជាទ្រង់គង់ក្នុងទូលបង្គំ ហើយទូលបង្គំនៅក្នុងទ្រង់ដែរ គឺឲ្យអ្នកទាំងនោះបានរួមគ្នាតែមួយ នៅក្នុងយើង ប្រយោជន៍ឲ្យលោកីយបានជឿថា ទ្រង់ចាត់ឲ្យទូលបង្គំមកពិត»។ (យ៉ូហាន ១៧:២០, ២១) ពួកអ្នកកាន់តាមព្រះយេស៊ូបានទទួលឯកភាពដូចមានរវាងព្រះនិងរាជបុត្រារបស់ទ្រង់។ នេះគឺពីព្រោះពួកគេធ្វើតាមបន្ទូលរបស់ព្រះ និងតាមការបង្រៀនរបស់ព្រះយេស៊ូ។ អាកប្បកិរិយាដូចនេះជាកត្ដាដ៏ធំមួយក្នុងឯកភាពនៃគ្រួសាររបស់ព្រះយេហូវ៉ាពេញពិភពលោកសព្វថ្ងៃនេះ។
៩. តើវិញ្ញាណបរិសុទ្ធមានមុខនាទីអ្វីក្នុងឯកភាពនៃប្រជារាស្ត្ររបស់ព្រះយេហូវ៉ា?
៩ កត្ដាមួយទៀតដែលបង្រួបបង្រួមប្រជារាស្ត្ររបស់ព្រះយេហូវ៉ា គឺពីព្រោះយើងមានវិញ្ញាណបរិសុទ្ធរបស់ព្រះ ឬសកម្មពល។ នេះបានជួយយើងឲ្យយល់សេចក្ដីពិតនៃបន្ទូលរបស់ព្រះយេហូវ៉ាដែលបានលាតត្រដាងមក ម្ល៉ោះហើយយើងបំរើទ្រង់ដោយឯកភាព។ (យ៉ូហាន ១៦:១២, ១៣) វិញ្ញាណនេះជួយយើងឲ្យចៀសវាងកិច្ចការខាងសាច់ឈាមដែលធ្វើឲ្យបែកខ្ញែក ដូចជាការមិនស្រុះស្រួលគ្នា ការច្រណែន កំហឹង និងការទាស់ទែង។ ផ្ទុយទៅវិញ វិញ្ញាណរបស់ព្រះជួយយើងបណ្ដុះផលផ្លែដ៏បង្រួបបង្រួមនៃសេចក្ដីស្រឡាញ់ អំណរ មេត្រីភាព ចិត្តអត់ធ្មត់ ចិត្តសប្បុរស សេចក្ដីល្អ ជំនឿ ស្លូតបូត និងការទប់ចិត្ត។—កាឡាទី ៥:១៩-២៣
១០. (ក) តើមានការស្រដៀងគ្នាអ្វីរវាងសេចក្ដីស្រឡាញ់ដែលមានក្នុងគ្រួសាររបស់មនុស្ស និងសេចក្ដីស្រឡាញ់ដែលឃើញជាក់ស្តែងក្នុងចំណោមពួកថ្វាយបង្គំព្រះយេហូវ៉ា? (ខ) តើសមាជិកម្នាក់នៃគណៈអភិបាលបញ្ចេញអារម្មណ៍យ៉ាងណាអំពីកិច្ចប្រជុំជាមួយបងប្អូនខាងវិញ្ញាណរបស់គាត់?
១០ សមាជិកនៃគ្រួសារដែលមានសាមគ្គីភាព ស្រឡាញ់គ្នាទៅវិញទៅមក ហើយមានចិត្តរីករាយនៅជាមួយគ្នា។ ជាការស្រដៀងគ្នាដែរ ពួកអ្នកដែលនៅក្នុងគ្រួសារដែលថ្វាយបង្គំព្រះយេហូវ៉ាដោយឯកភាព គឺស្រឡាញ់ទ្រង់ រាជបុត្រារបស់ទ្រង់ និងពួកអ្នកជឿគ្នីគ្នា។ (ម៉ាកុស ១២:៣០; យ៉ូហាន ២១:១៥-១៧; យ៉ូហានទី១ ៤:២១) ដូចជាគ្រួសារដែលប្រកបដោយសេចក្ដីស្រឡាញ់មានចិត្តដ៏រីករាយក្នុងការបរិភោគអាហារជាមួយគ្នា ពួកអ្នកដែលថ្វាយបង្គំព្រះក៏មានចិត្តរីករាយក្នុងការមកកិច្ចប្រជុំគ្រីស្ទាន សន្និបាត មហាសន្និបាតដើម្បីទទួលប្រយោជន៍ពីការរួបរួមដ៏ល្អ ហើយអាហារខាងវិញ្ញាណដ៏ប្រសើរ។ (ម៉ាថាយ ២៤:៤៥-៤៧; ហេព្រើរ ១០:២៤, ២៥) សមាជិកនៃគណៈអភិបាលរបស់ព្រះយេហូវ៉ាម្នាក់ នៅពេលមួយបានមានប្រសាសន៍ថា៖ «ចំពោះខ្ញុំ ការមកជួបបងប្អូនជាអ្វីដ៏សប្បាយមួយក្នុងជីវិត ហើយជាប្រភពនៃការលើកទឹកចិត្តទៀតផង។ ខ្ញុំចូលចិត្តមកសាលព្រះរាជាណាចក្រមុនគេ ហើយចេញទៅផ្ទះក្រោយគេ បើអាចធ្វើទៅបាន។ ខ្ញុំមានចិត្តអរណាស់ នៅពេលដែលខ្ញុំនិយាយជាមួយប្រជារាស្ត្ររបស់ព្រះ។ នៅពេលដែលខ្ញុំនៅក្នុងចំណោមពួកគេ ខ្ញុំមានចិត្តធូរស្រាលល្ហែល្ហើយជាមួយគ្រួសាររបស់ខ្ញុំ»។ តើអ្នកមានអារម្មណ៍ដូចនេះទេ?—ទំនុកដំកើង ២៧:៤
១១. ក្នុងកិច្ចការអ្វីដែលស្មរបន្ទាល់ព្រះយេហូវ៉ាជាពិសេសមានចិត្តរីករាយធ្វើ ហើយមានលទ្ធផលយ៉ាងណា ដោយចាត់ទុកកិច្ចបំរើព្រះទីមួយក្នុងជីវិតរបស់យើង?
១១ គ្រួសារដែលប្រកបដោយឯកភាពមានសុភមង្គលក្នុងការធ្វើអ្វីជាមួយគ្នា។ ស្រដៀងគ្នានេះដែរ ពួកអ្នកដែលនៅក្នុងគ្រួសារនៃអ្នកថ្វាយបង្គំព្រះយេហូវ៉ា មានចិត្តអរសប្បាយក្នុងការផ្សាយព្រះរាជាណាចក្រនិងការបង្កើតឲ្យមានសិស្សជាមួយគ្នា។ (ម៉ាថាយ ២៤:១៤; ២៨:១៩, ២០) ការចូលរួមដ៏ទៀងទាត់ក្នុងកិច្ចការនេះ ធ្វើឲ្យយើងមកជិតស្មរបន្ទាល់ឯទៀតនៃព្រះយេហូវ៉ា។ ការចាត់ទុកការបំរើព្រះទីមួយក្នុងជីវិតរបស់យើង ហើយគាំទ្រកិច្ចការទាំងឡាយនៃប្រជារាស្ត្ររបស់ទ្រង់ ក៏ធ្វើឲ្យមានគំនិតខាងគ្រួសារក្នុងចំណោមយើងដែរ។
របៀបរៀបរយអធិតេយ្យគឺសំខាន់ណាស់
១២. តើអ្វីជាលក្ខណៈនៃគ្រួសារដ៏សប្បាយនិងមានឯកភាព ហើយមានរបៀបរៀបចំអ្វីដែលធ្វើឲ្យមានឯកភាពក្នុងក្រុមជំនុំគ្រីស្ទានក្នុងសតវត្សទីមួយ?
១២ គ្រួសារដែលមានមេដឹកនាំដ៏ម៉ឺងម៉ាត់និងប្រកបដោយសេចក្ដីស្រឡាញ់ ហើយដ៏រៀបរយ គឺប្រហែលជានឹងមានឯកភាពនិងសេចក្ដីរីករាយ។ (អេភេសូរ ៥:២២, ៣៣; ៦:១) ព្រះយេហូវ៉ាជាព្រះនៃរបៀបរៀបរយដ៏សុខសាន្ត ហើយពួកអ្នកដែលនៅក្នុងគ្រួសាររបស់ទ្រង់ ចាត់ទុកទ្រង់ជា«ព្រះដ៏ខ្ពស់បំផុត»។ (ដានីយ៉ែល ៧:១៨, ២២, ២៥, ២៧; កូរិនថូសទី១ ១៤:៣៣) ពួកគេក៏ទទួលស្គាល់ថាទ្រង់បានតែងតាំងរាជបុត្រារបស់ទ្រង់ ព្រះយេស៊ូគ្រីស្ទ ជាអ្នកទទួលមរតកនូវរបស់ទាំងអស់ ហើយបានផ្ទេរអំណាចទាំងអស់ដល់ទ្រង់ គឺទាំងក្នុងស្ថានសួគ៌និងនៅលើផែនដី។ (ម៉ាថាយ ២៨:១៨; ហេព្រើរ ១:១, ២) ដោយមានព្រះគ្រីស្ទជាអ្នកនាំមុខ ក្រុមជំនុំគ្រីស្ទានជាអង្គការដែលមានឯកភាពនិងរបៀបរៀបរយ។ (អេភេសូរ ៥:២៣) នៅសតវត្សទីមួយមានគណៈអភិបាល ដែលមានពួកសាវ័កនិង«មនុស្សចាស់»ឯទៀតដែលមានគំនិតចាស់ទុំខាងវិញ្ញាណ ដើម្បីត្រួតត្រាលើសកម្មភាពនៃក្រុមជំនុំ។ ក្រុមជំនុំនិមួយៗគឺមានអ្នកត្រួតពិនិត្យ ឬអ្នកចាស់ទុំ និងអ្នកងារជំនួយដែលបានតែងតាំងមក។ (កិច្ចការ ១៥:៦; ភីលីព ១:១) ការគោរពតាមពួកអ្នកដែលនាំមុខនេះ នឹងធ្វើឲ្យមានឯកភាព។—ហេព្រើរ ១៣:១៧
១៣. តើតាមរបៀបណាដែលព្រះយេហូវ៉ាទាញចិត្តមនុស្ស ហើយមានលទ្ធផលយ៉ាងណា?
១៣ ប៉ុន្តែតើរបៀបរៀបរយទាំងនេះ បង្ហាញថាឯកភាពនៃពួកអ្នកថ្វាយបង្គំព្រះយេហូវ៉ា មានឡើងដោយសារការដឹកនាំដ៏ម៉ឺងម៉ាត់និងគ្មានមេត្ដាឬ? គឺអត់ទេ! គឺគ្មានអ្វីដែលមិនស្រឡាញ់អំពីព្រះនិងអង្គការរបស់ទ្រង់ឡើយ។ ព្រះយេហូវ៉ាទាញយកមនុស្ស ដោយបង្ហាញសេចក្ដីស្រឡាញ់ ហើយរៀងរាល់ឆ្នាំរាប់សែននាក់បានស្ម័គ្រចិត្តយ៉ាងរីករាយ ក្លាយទៅជាផ្នែកនៃអង្គការរបស់ព្រះយេហូវ៉ា ដោយធ្វើបុណ្យជ្រមុជទឹក ជានិមិត្តរូបនៃការថ្វាយខ្លួនដ៏អស់ពីចិត្តរបស់គេទៅព្រះ។ ចិត្តគំនិតរបស់គេគឺដូចនឹងយ៉ូស្វេដែរ ដែលបានដាស់តឿនពួកអ៊ីស្រាអែលគ្នីគ្នាថា៖ «ចូររើសយកព្រះណា ដែលឯងចង់គោរពប្រតិបត្ដិនៅថ្ងៃនេះចុះ . . . តែឯអញនឹងពួកគ្រួអញ យើងទាំងអស់គ្នានឹងគោរពប្រតិបត្ដិដល់ព្រះយេហូវ៉ាតែមួយប៉ុណ្ណោះ»។—យ៉ូស្វេ ២៤:១៥
១៤. ហេតុអ្វីក៏យើងអាចនិយាយថា អង្គការរបស់ព្រះយេហូវ៉ាជាព្រះធិបតេយ្យ?
១៤ ជាផ្នែកនៃគ្រួសាររបស់ព្រះយេហូវ៉ា យើងមិនគ្រាន់តែមានចិត្តសប្បាយប៉ុណ្ណោះទេ ថែមទាំងសុខទៀតផង។ នេះគឺពីព្រោះអង្គការរបស់ទ្រង់ជាព្រះធិបតេយ្យ។ ព្រះរាជាណាចក្ររបស់ព្រះ គឺព្រះធិបតេយ្យ (ពីពាក្យក្រិក the·osʹ មានន័យថាព្រះ និង kraʹtos គ្រប់គ្រង) គឺមានព្រះជាអ្នកគ្រប់គ្រង តែងតាំងនិងស្ថាបនាដោយទ្រង់។ «សាសន៍បរិសុទ្ធ»របស់ព្រះយេហូវ៉ាដែលបានចាក់ប្រេងតាំង គឺចុះចូលនឹងការគ្រប់គ្រងរបស់ទ្រង់ ហើយក៏ជាព្រះធិបតេយ្យដែរ។ (ពេត្រុសទី១ ២:៩) ដោយមានព្រះយេហូវ៉ាជាព្រះធិបតេយ្យដ៏ឧត្តម ជាចៅក្រមរបស់យើង អ្នកប្រទានច្បាប់ និងជាព្រះមហាក្សត្រ យើងគួរតែមានចិត្តស្ងប់សុខសាន្ត។ (អេសាយ ៣៣:២២) ប៉ុន្តែ ចុះយ៉ាងណាវិញ បើមានការទាស់គ្នាហើយអាចគំរាមកំហែងដល់ឯកភាព សន្ដិសុខនិងអំណររបស់យើងនោះ?
គណៈអភិបាលចាត់វិធានការ
១៥, ១៦. តើការទាស់ទែងគ្នាអ្វីបានកើតឡើងក្នុងសតវត្សទីមួយ ហើយហេតុអ្វី?
១៥ ដើម្បីរក្សាឲ្យមានឯកភាពក្នុងគ្រួសារមួយ មួយដងមួយកាលគឺត្រូវតែដោះស្រាយការទាស់គ្នា។ ដូច្នេះ ឧបមាថាមានបញ្ហាខាងវិញ្ញាណដែលត្រូវតែដោះស្រាយ ដើម្បីរក្សាឯកភាពនៃគ្រួសារថ្វាយបង្គំរបស់ព្រះ ក្នុងសតវត្សទីមួយក្នុងសករាជយើង។ តើនឹងត្រូវធ្វើយ៉ាងណា? គណៈអភិបាលនឹងចាត់វិធានការ ក្នុងការដោះស្រាយបញ្ហាខាងវិញ្ញាណ។ យើងមានភស្តុតាងនៃការចាត់វិធានការបែបនេះ។
១៦ ក្នុងប្រហែលឆ្នាំ៤៩ស.យ. គណៈអភិបាលបានមកប្រជុំគ្នាក្នុងក្រុងយេរូសាឡិម ដើម្បីដោះស្រាយបញ្ហាដ៏ធំមួយ ហើយក្រោយមកបានរក្សាឯកភាពនៃ«ដំណាក់របស់ព្រះ»។ (អេភេសូរ ២:១៩) ប្រមាណ១៣ឆ្នាំមុននោះ សាវ័កពេត្រុសបានផ្សាយទៅកូនេលាស ហើយដល់មនុស្សនៃសាសន៍ដទៃជាលើកដំបូង ដែលបានទៅជាអ្នកជឿដែលបានធ្វើបុណ្យជ្រមុជទឹក។ (កិច្ចការ ជំពូក១០) ក្នុងកំឡុងធ្វើដំណើរសាសនទូតលើកដំបូងរបស់ប៉ុល មានមនុស្សសាសន៍ដទៃជាច្រើនបានទទួលយកសាសនាគ្រីស្ទាន។ (កិច្ចការ ១៣:១–១៤:២៨) តាមការពិត ក្រុមជំនុំនៃគ្រីស្ទានរបស់សាសន៍ដទៃត្រូវបានស្ថាបនាឡើងក្នុងអាន់ទីយ៉ូកនៃស្រុកស៊ីរី។ ពួកគ្រីស្ទានសាសន៍យូដាខ្លះមានអារម្មណ៍ថា ពួកសាសន៍ដទៃដែលជឿព្រះ ត្រូវតែកាត់ស្បែក ហើយរក្សាទុកក្រិត្យរបស់លោកម៉ូសេ ប៉ុន្តែមនុស្សដទៃទៀតមិនយល់ស្របទេ។ (កិច្ចការ ១៥:១-៥) ការទាស់ទែងគ្នានេះអាចនាំឲ្យបាត់បង់ឯកភាព ព្រមទាំងអាចនាំឲ្យមានក្រុមជំនុំយូដាផ្សេងនិងសាសន៍ដទៃផ្សេង។ ដូច្នេះហើយ គណៈអភិបាលបានចាត់វិធានការភ្លាមដើម្បីរក្សាឯកភាពគ្រីស្ទាន។
១៧. តើមានទម្រង់ការខាងព្រះធិបតេយ្យដ៏ស្រុះស្រួលអ្វី ដែលបានរៀបរាប់មកក្នុងកិច្ចការជំពូក ១៥?
១៧ យោងទៅតាមកិច្ចការ ១៥:៦-២២ «ពួកសាវ័ក នឹងពួកចាស់ទុំ ក៏ប្រជុំគ្នាប្រឹក្សាពីដំណើរនោះ»។ ពួកអ្នកដែលមកប្រជុំឯទៀត គឺរួមបញ្ចូលពួកអ្នកដែលមកពីក្រុងអាន់ទីយ៉ូក។ មុនដំបូង ពេត្រុសបានពន្យល់ថា‹តាមពាក្យសំដីរបស់គាត់មនុស្សនៃសាសន៍ដទៃបានឮអំពីដំណឹងល្អហើយក៏ជឿទៅ›។ រួចមក «ពួកជំនុំទាំងអស់គ្នា»បានស្ដាប់បាណាបាសនិងប៉ុល «រ៉ាយរឿងប្រាប់ពីទីសម្គាល់ នឹងការអស្ចារ្យទាំងប៉ុន្មាន ដែលព្រះបានធ្វើក្នុងពួកសាសន៍ដទៃ ដោយសារខ្លួន»។ បន្ទាប់មក យ៉ាកុបបានឲ្យយោបល់នូវរបៀបដោះស្រាយសំនួរនេះ។ ក្រោយពីគណៈអភិបាលបានសម្រេចចិត្ត យើងឃើញថា៖ «ពួកសាវ័ក នឹងពួកចាស់ទុំ ព្រមទាំងពួកជំនុំគ្រប់គ្នាក៏យល់ព្រមថា គួរនឹងរើសយកអ្នកខ្លះក្នុងពួកគេ . . . ដើម្បីនឹងចាត់ឲ្យទៅឯអាន់ទីយ៉ូក ជាមួយនឹងប៉ុល ហើយនឹងបាណាបាស»។ ‹បុគ្គលរើសតាំង›ទាំងនោះ—យូដាសនិងស៊ីឡាស—បានយកសំបុត្រដ៏លើកទឹកចិត្តដល់ពួកអ្នកជឿគ្នីគ្នា។
១៨. គណៈអភិបាលបានសម្រេចចិត្តអ្វី ដែលទាក់ទងនឹងក្រិត្យរបស់លោកម៉ូសេ ហើយតើនេះមានឥទ្ធិពលយ៉ាងណាទៅលើពួកគ្រីស្ទានសាសន៍យូដានិងសាសន៍ដទៃ?
១៨ សំបុត្រដែលប្រកាសអំពីសេចក្ដីសម្រេចរបស់គណៈអភិបាល ចាប់ផ្ដើមថា៖ «សំបុត្រយើងខ្ញុំ ជាពួកសាវ័ក ពួកចាស់ទុំ នឹងពួកបងប្អូនទាំងអស់គ្នា ផ្ញើមកជំរាបសួរដល់ពួកបងប្អូនសាសន៍ដទៃ»! បងប្អូនប្រុសឯទៀតមកប្រជុំដែរ ប៉ុន្តែតាមមើលទៅមានតែគណៈអភិបាលទេ ដែលជា«ពួកសាវ័ក ពួកចាស់ទុំ»។ វិញ្ញាណរបស់ព្រះបានដឹកនាំគេ ពីព្រោះសំបុត្រនេះចែងថា៖ «ព្រះវិញ្ញាណបរិសុទ្ធ នឹងយើងខ្ញុំរាល់គ្នា បានយល់ឃើញថា មិនគួរគប្បីនឹងដាក់បន្ទុកអ្វីទៀតលើអ្នករាល់គ្នា ក្រៅពីសេចក្ដីទាំងនេះដែលត្រូវតែកាន់នោះឡើយ គឺឲ្យចៀសវាងចំពោះរបស់ដែលបានថ្វាយដល់រូបព្រះ១ ឈាម១ សត្វដែលសំឡាប់ដោយច្របាច់ក១ នឹងសេចក្ដីកំផិត១»។ (កិច្ចការ ១៥:២៣-២៩) ពួកគ្រីស្ទានមិនចាំបាច់កាត់ស្បែកហើយរក្សាទុកក្រិត្យរបស់លោកម៉ូសេនោះទេ។ សេចក្ដីសម្រេចនេះបានជួយពួកគ្រីស្ទានសាសន៍យូដានិងសាសន៍ដទៃ ឲ្យប្រព្រឹត្តហើយនិយាយដោយមានឯកភាព។ ក្រុមជំនុំមានសេចក្ដីរីករាយ ហើយឯកភាពដ៏មានតម្លៃក៏នៅមានជាបន្ត សូម្បីតែដល់សព្វថ្ងៃនេះនៃគ្រួសាររបស់ព្រះលើផែនដី ក្រោមការដឹកនាំពីគណៈអភិបាលនៃស្មរបន្ទាល់ព្រះយេហូវ៉ា។—កិច្ចការ ១៥:៣០-៣៥
បំរើដោយមានឯកភាពព្រះធិបតេយ្យ
១៩. ហេតុអ្វីក៏មានឯកភាពក្នុងគ្រួសារនៃអ្នកថ្វាយបង្គំរបស់ព្រះយេហូវ៉ា?
១៩ ឯកភាពនឹងលូតលាស់ឡើង នៅពេលដែលសមាជិកនៃគ្រួសារធ្វើការស្របនឹងគ្នា។ នេះក៏ជាការពិតចំពោះគ្រួសារនៃពួកអ្នកថ្វាយបង្គំរបស់ព្រះយេហូវ៉ាដែរ។ ប្រកបដោយព្រះធិបតេយ្យ ពួកចាស់ទុំនិងអ្នកដទៃក្នុងក្រុមជំនុំគ្រីស្ទាននៅសតវត្សទីមួយ បានបំរើព្រះដោយស្រុះស្រួលជាមួយគណៈអភិបាល ហើយទទួលព្រមសេចក្ដីសម្រេចនោះ។ ដោយមានជំនួយពីគណៈអភិបាល ពួកចាស់ទុំ‹ផ្សាយបន្ទូល› ហើយពួកសមាជិកក្នុងក្រុមជំនុំទូទៅ‹និយាយស្រុះស្រួលនឹងគ្នា›។ (ធីម៉ូថេទី២ ៤:១, ២; កូរិនថូសទី១ ១:១០) ដូច្នេះសេចក្ដីពិតដូចគ្នាត្រូវបានយកមកផ្សាយហើយនៅឯកិច្ចប្រជុំគ្រីស្ទាន មិនថានៅក្នុងក្រុងយេរូសាឡិម អាន់ទីយ៉ូក រ៉ូម កូរិនថូស ឬកន្លែងផ្សេងៗទៀត។ ឯកភាពព្រះធិបតេយ្យបែបនេះក៏មាននៅសព្វថ្ងៃនេះដែរ។
២០. ដើម្បីរក្សាឯកភាពគ្រីស្ទានរបស់យើង តើយើងត្រូវធ្វើអ្វី?
២០ ដើម្បីរក្សាឯកភាពរបស់យើង យើងគ្រប់ៗគ្នាដែលមានផ្នែកក្នុងគ្រួសាររបស់ព្រះយេហូវ៉ាពេញពិភពលោក ត្រូវខំប្រឹងបង្ហាញសេចក្ដីស្រឡាញ់ព្រះធិបតេយ្យ។ (យ៉ូហានទី១ ៤:១៦) យើងត្រូវតែចុះចូលនឹងបំណងព្រះហឫទ័យរបស់ព្រះ ហើយបង្ហាញសេចក្ដីគោរពជ្រាលជ្រៅដល់‹អ្នកបំរើស្មោះត្រង់› និងគណៈអភិបាល។ ប្រាកដហើយ ដូចជាការថ្វាយខ្លួនរបស់យើងជូនព្រះ ការគោរពតាមរបស់យើង គឺធ្វើឡើងដោយស្ម័គ្រពីចិត្តនិងដោយអំណរ។ (យ៉ូហានទី១ ៥:៣) ជាការសមណាស់ ដែលអ្នកតែងបទទំនុកដំកើងភ្ជាប់អំណរនិងការគោរពតាមជាមួយគ្នានោះ! គាត់បានច្រៀងថា៖ «ចូរសរសើរដល់ព្រះយេហូវ៉ា! មានពរហើយ អ្នកណាដែលកោតខ្លាចដល់ព្រះយេហូវ៉ា ហើយមានសេចក្ដីអំណរជាខ្លាំងចំពោះសេចក្ដីបង្គាប់របស់ទ្រង់»។—ទំនុកដំកើង ១១២:១
២១. តើយើងអាចបង្ហាញថា ខ្លួនយើងប្រកបដោយព្រះធិបតេយ្យយ៉ាងណា?
២១ ព្រះយេស៊ូ ជាមេដឹកនាំនៃក្រុមជំនុំ គឺប្រកបដោយព្រះធិបតេយ្យ ហើយតែងតែធ្វើតាមបំណងរបស់ព្រះវរបិតាទ្រង់ជានិច្ច។ (យ៉ូហាន ៥:៣០) ដូច្នេះ សូមឲ្យយើងកាន់តាមគំរូនេះ ធ្វើតាមបំណងរបស់ព្រះយេហូវ៉ាដោយឯកភាពនិងព្រះធិបតេយ្យភាព ដោយស្រុះគ្នាជាមួយអង្គការរបស់ទ្រង់។ រួចមកដោយមានអំណរនិងកតញ្ញូធម៌ដ៏ខ្លាំង យើងអាចច្រៀងចំរៀងរបស់អ្នកតែងបទទំនុកដំកើងថា៖ «មើល! ដែលបងប្អូននៅមូលជាមួយគ្នា ដោយចិត្តព្រមព្រៀង នោះជាការល្អ ហើយសមគួរយ៉ាងណាទៅ»!
តើអ្នកនឹងឆ្លើយយ៉ាងណា?
◻ តើឯកភាពគ្រីស្ទានរបស់យើងទាក់ទងនឹងទំនុកដំកើង ១៣៣ យ៉ាងណា?
◻ តើមានកត្ដាអ្វីខ្លះដែលធ្វើឲ្យមានឯកភាព?
◻ ហេតុអ្វីរបៀបរៀបរយខាងព្រះធិបតេយ្យសំខាន់ចំពោះឯកភាពនៃប្រជារាស្ត្ររបស់ព្រះ?
◻ តើគណៈអភិបាលនៃសតវត្សទីមួយប្រព្រឹត្តយ៉ាងណាដើម្បីរក្សាឯកភាព?
◻ តើការបំរើដោយឯកភាពព្រះធិបតេយ្យមានន័យយ៉ាងណាចំពោះអ្នក?
[រូបភាពនៅទំព័រ២៥]
គណៈអភិបាលបានចាត់វិធានការរក្សាឯកភាព