-
តើបំណងប្រាថ្នារបស់ព្រះជាអ្វី?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
តើបំណងប្រាថ្នារបស់ព្រះជាអ្វី?
ព្រះចង់ឲ្យយើងរស់នៅដោយសុខសាន្តនិងមានសុភមង្គលក្នុងសួនឧទ្យាននៅផែនដីជារៀងរហូត
ដូច្នេះ លោកអ្នកប្រហែលជាឆ្ងល់ថា ‹តើបំណងប្រាថ្នារបស់ព្រះអាចសម្រេចបានយ៉ាងដូចម្ដេច?›។ គម្ពីរចែងថា រាជាណាចក្រព្រះនឹងធ្វើឲ្យបំណងប្រាថ្នានោះសម្រេច ហើយព្រះចង់ឲ្យមនុស្សទាំងអស់រៀនអំពីរាជាណាចក្រ និងគោលបំណងដែលលោកមានចំពោះយើង។—ទំនុកតម្កើង ៣៧:១១, ២៩; អេសាយ ៩:៧
ព្រះចង់ឲ្យយើងទទួលប្រយោជន៍
ដូចឪពុកដ៏ល្អម្នាក់ដែលចង់ឲ្យកូនៗរបស់គាត់មានសុភមង្គលច្រើនបំផុត នោះបិតារបស់យើងនៅស្ថានសួគ៌ក៏ចង់ឲ្យយើងមានសុភមង្គលជារៀងរហូតដែរ។ (អេសាយ ៤៨:១៧, ១៨) លោកបានសន្យាថា៖ «អ្នកណាដែលធ្វើតាមបំណងប្រាថ្នារបស់ព្រះ អ្នកនោះនឹងនៅជាប់ជារៀងរហូត»។—យ៉ូហានទី១ ២:១៧
ព្រះចង់ឲ្យយើងដើរតាមផ្លូវរបស់លោក
គម្ពីរចែងថា ព្រះដែលជាអ្នកបង្កើតចង់ «បង្រៀនយើងពីផ្លូវរបស់ទ្រង់» ដើម្បីយើងអាច«ដើរតាមផ្លូវទាំងនោះ»។ (អេសាយ ២:២, ៣) លោកបានរៀបចំ«រាស្ត្រមួយជាតំណាងនាមរបស់លោក» ដើម្បីឲ្យមនុស្សទូទាំងផែនដីស្គាល់អំពីបំណងប្រាថ្នារបស់លោក។—សកម្មភាព ១៥:១៤
ព្រះចង់ឲ្យយើងមានសាមគ្គីភាពក្នុងការគោរពប្រណិប័តន៍លោក
សេចក្ដីស្រឡាញ់ដ៏ស្មោះធ្វើឲ្យអ្នកគោរពប្រណិប័តន៍ពិតចំពោះព្រះយេហូវ៉ាមានសាមគ្គីភាព មិនមែនធ្វើឲ្យបែកបាក់គ្នាទេ។ (យ៉ូហាន ១៣:៣៥) នៅសព្វថ្ងៃនេះ តើអ្នកណាកំពុងបង្រៀនមនុស្សគ្រប់ទីកន្លែងអំពីរបៀបបម្រើព្រះដោយមានសាមគ្គីភាព? យើងសូមអញ្ជើញលោកអ្នកឲ្យរកចម្លើយតាមរយៈសៀវភៅស្តើងនេះ។
-
-
តើសាក្សីព្រះយេហូវ៉ាជាមនុស្សបែបណា?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី១
តើសាក្សីព្រះយេហូវ៉ាជាមនុស្សបែបណា?
ដាណឺម៉ាក
តៃវ៉ាន់
វេណេស៊ូអេឡា
ឥណ្ឌា
តើលោកអ្នកស្គាល់សាក្សីព្រះយេហូវ៉ាប៉ុន្មាននាក់? សាក្សីព្រះយេហូវ៉ាខ្លះប្រហែលជាអ្នកជិតខាងរបស់លោកអ្នក ជាអ្នករួមការងារ ជាមិត្តរួមថ្នាក់ ឬប្រហែលជាធ្លាប់ពិភាក្សាគម្ពីរជាមួយលោកអ្នក។ តើយើងជាអ្នកណា? ហើយហេតុអ្វីយើងប្រាប់ជំនឿរបស់យើងដល់អ្នកឯទៀត?
យើងជាមនុស្សធម្មតា។ យើងមកពីមជ្ឈដ្ឋានផ្សេងគ្នា ហើយមានប្រវត្ដិខុសគ្នា។ កាលពីមុនអ្នកខ្លះក្នុងចំណោមយើងធ្លាប់កាន់សាសនាផ្សេង រីឯអ្នកខ្លះទៀតមិនជឿទៅលើព្រះទេ។ ក៏ប៉ុន្តែ មុនក្លាយជាសាក្សីព្រះយេហូវ៉ា យើងទាំងអស់គ្នាបានចំណាយពេលពិនិត្យមើលសេចក្ដីបង្រៀនក្នុងគម្ពីរយ៉ាងហ្មត់ចត់។ (សកម្មភាព ១៧:១១) យើងយល់ស្របនឹងអ្វីដែលយើងបានរៀន បន្ទាប់មកយើងសម្រេចចិត្តគោរពប្រណិប័តន៍ព្រះយេហូវ៉ា។
យើងទទួលប្រយោជន៍ពីការសិក្សាគម្ពីរ។ ដូចមនុស្សឯទៀត យើងក៏ត្រូវប្រឈមមុខនឹងបញ្ហាផ្សេងៗ ហើយត្រូវខំយកឈ្នះគុណវិបត្ដិរបស់ខ្លួនដែរ។ ប៉ុន្តែដោយព្យាយាមធ្វើតាមគោលការណ៍គម្ពីរនៅក្នុងជីវិតប្រចាំថ្ងៃ នោះយើងធ្វើឲ្យជីវិតរបស់យើងកាន់តែប្រសើរឡើង។ (ទំនុកតម្កើង ១២៨:១, ២) នោះជាមូលហេតុមួយដែលយើងប្រាប់អ្នកឯទៀតអំពីអ្វីល្អៗដែលយើងបានរៀនពីគម្ពីរ។
យើងរស់នៅតាមគោលការណ៍សីលធម៌របស់ព្រះ។ គោលការណ៍សីលធម៌ទាំងនេះដែលយើងបានរៀនពីគម្ពីរជួយយើងឲ្យមានសុភមង្គល និងឲ្យគោរពអ្នកឯទៀត ព្រមទាំងអប់រំខ្លួនឲ្យមានគុណសម្បត្ដិដូចជា ចិត្តទៀងត្រង់ និងចិត្តសប្បុរស។ គោលការណ៍ទាំងនេះក្នុងគម្ពីរជួយមនុស្សឲ្យមានចិត្តគំនិតនិងការប្រព្រឹត្តល្អ ដែលមានប្រយោជន៍ដល់សង្គម ព្រមទាំងលើកទឹកចិត្តក្រុមគ្រួសារឲ្យមានសាមគ្គីភាព និងមានសីលធម៌ល្អ។ ដោយសារយើងជឿជាក់ថា«ព្រះមិនរើសមុខទេ» នោះយើងជាបងប្អូនរួមជំនឿដែលមកពីសាសន៍ផ្សេងៗ ហើយដែលមិនប្រកាន់ពូជសាសន៍និងនិន្នាការនយោបាយ។ ទោះជាយើងម្នាក់ៗជាមនុស្សធម្មតាក៏ដោយ យើងរួមគ្នាជាមនុស្សមួយក្រុមដ៏ពិសេស។—សកម្មភាព ៤:១៣; ១០:៣៤, ៣៥
តើសាក្សីព្រះយេហូវ៉ានិងមនុស្សឯទៀតមានអ្វីដែលស្រដៀងគ្នា?
តើគោលការណ៍សីលធម៌របស់អ្នកណាដែលសាក្សីព្រះយេហូវ៉ាបានរៀនពីគម្ពីរ? ហើយតើនេះនាំឲ្យពួកគេទទួលប្រយោជន៍អ្វី?
-
-
ហេតុអ្វីយើងមានឈ្មោះសាក្សីព្រះយេហូវ៉ា?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី២
ហេតុអ្វីយើងមានឈ្មោះសាក្សីព្រះយេហូវ៉ា?
ណូអេ
អាប្រាហាំ និងសារ៉ា
ម៉ូសេ
លោកយេស៊ូគ្រិស្ត
មនុស្សជាច្រើនគិតថា សាក្សីព្រះយេហូវ៉ាគឺជាឈ្មោះនៃសាសនាថ្មីមួយ។ ក៏ប៉ុន្តែ ជាង២.៧០០ឆ្នាំមុន ព្រះពិតតែមួយបានហៅអ្នកបម្រើរបស់លោកថា«ស្មរបន្ទាល់»ឬសាក្សី។ (អេសាយ ៤៣:១០-១២) រហូតដល់ឆ្នាំ១៩៣១ មនុស្សជាទូទៅស្គាល់យើងថាជានិស្សិតគម្ពីរ។ ហេតុអ្វីយើងបានដាក់ឈ្មោះថាសាក្សីព្រះយេហូវ៉ា?
ឈ្មោះសាក្សីព្រះយេហូវ៉ាបញ្ជាក់អំពីព្រះរបស់យើង។ យោងទៅតាមឯកសារពីសម័យបុរាណ យេហូវ៉ាដែលជានាមរបស់ព្រះមានរាប់ពាន់ដងក្នុងគម្ពីរ។ ការបកប្រែជាច្រើនបានដាក់ឋានៈដូចជាព្រះអម្ចាស់ ឬព្រះជំនួសឈ្មោះនេះ។ ក៏ប៉ុន្តែ ព្រះពិតបានប្រាប់ម៉ូសេឲ្យស្គាល់នាមរបស់លោកគឺយេហូវ៉ា ដោយមានប្រសាសន៍ថា៖ «នោះជាឈ្មោះអញនៅអស់កល្បជានិច្ច»។ (និក្ខមនំ ៣:១៥) តាមរបៀបនេះ លោកបានធ្វើឲ្យឃើញថាលោកខុសពីព្រះក្លែងក្លាយទាំងអស់។ យើងមានមោទនភាពតំណាងនាមដ៏បរិសុទ្ធរបស់ព្រះ។
ឈ្មោះសាក្សីព្រះយេហូវ៉ាបញ្ជាក់អំពីភារកិច្ចរបស់យើង។ នៅសម័យបុរាណ ចាប់តាំងពីអេបិលមក មនុស្សជាច្រើនតំណបានធ្វើជាសាក្សីបញ្ជាក់អំពីជំនឿរបស់ពួកគេលើព្រះយេហូវ៉ា។ ក្នុងអំឡុងជាច្រើនសតវត្សរ៍ ណូអេ អាប្រាហាំ សារ៉ា ម៉ូសេ ដាវីឌ និងអ្នកឯទៀតបានចូលរួមជាមួយនឹង«សាក្សីមួយក្រុមធំ»នេះ។ (ហេប្រឺ ១១:៤–១២:១) ដូចបុគ្គលម្នាក់អាចធ្វើជាសាក្សីនៅមុខតុលាការដើម្បីជួយជនស្លូតត្រង់ម្នាក់ នោះយើងតាំងចិត្តប្រកាសសេចក្ដីពិតអំពីព្រះរបស់យើង។
យើងកំពុងយកតម្រាប់តាមលោកយេស៊ូ។ គម្ពីរហៅលោកថាជា«សាក្សីស្មោះត្រង់និងពិតត្រង់»។ (ការបើកបង្ហាញ ៣:១៤) លោកយេស៊ូបាននិយាយអំពីខ្លួនលោកថា លោក‹បានសម្ដែងឲ្យស្គាល់នាមរបស់ព្រះ› ហើយបានបន្ត«ធ្វើជាសាក្សីបញ្ជាក់អំពីសេចក្ដីពិត»អំពីព្រះ។ (យ៉ូហាន ១៧:២៦; ១៨:៣៧) ដូច្នេះ អ្នកកាន់តាមពិតរបស់គ្រិស្តត្រូវតំណាងនាមរបស់ព្រះយេហូវ៉ា ហើយត្រូវប្រកាសនាមនោះ។ នេះជាអ្វីដែលសាក្សីព្រះយេហូវ៉ាកំពុងព្យាយាមធ្វើ។
ហេតុអ្វីនិស្សិតគម្ពីរដាក់ឈ្មោះថាសាក្សីព្រះយេហូវ៉ា?
តើព្រះយេហូវ៉ាមានសាក្សីនៅផែនដីតាំងពីពេលណាមក?
តើអ្នកណាជាសាក្សីដ៏ឧត្តមបំផុតរបស់ព្រះយេហូវ៉ា?
-