ខាងឆ្វេង: បងស្រីដែលជាអ្នកត្រួសត្រាយសម័យមុនកំពុងផ្សព្វផ្សាយនៅប្រទេសកូរ៉េ នាឆ្នាំ១៩៣១; ខាងស្ដាំ: ការផ្សព្វផ្សាយជាភាសាសញ្ញានៅប្រទេសកូរ៉េសព្វថ្ងៃនេះ
ផ្នែកទី២
ការផ្សព្វផ្សាយអំពីរាជាណាចក្ររបស់ព្រះ: ការផ្សាយដំណឹងល្អទូទាំងផែនដី
ពេលព្រលឹមនៅថ្ងៃឈប់សម្រាកពីការងារ អ្នកកំពុងរៀបចំសម្រាប់កិច្ចផ្សព្វផ្សាយ។ អ្នកស្ទាក់ស្ទើរដោយសារអ្នកអស់កម្លាំងបន្ដិច។ បើអាចសម្រាកមួយព្រឹកបាន នោះល្អណាស់! ប៉ុន្តែអ្នកអធិដ្ឋានអំពីរឿងនោះ ហើយតាំងចិត្តចេញទៅផ្សព្វផ្សាយ។ អ្នកផ្សព្វផ្សាយជាមួយនឹងបងស្រីវ័យចាស់ម្នាក់ដ៏ស្មោះត្រង់ ហើយការស៊ូទ្រាំនិងចិត្តស្លូតបូតរបស់គាត់លើកទឹកចិត្តអ្នក។ កាលដែលអ្នកផ្សព្វផ្សាយពីផ្ទះមួយទៅផ្ទះមួយ អ្នកនឹកឃើញថា បងប្អូនប្រុសស្រីរបស់អ្នកទូទាំងផែនដីកំពុងផ្សព្វផ្សាយប្រាប់ព័ត៌មានដូចគ្នា ដោយប្រើសៀវភៅដូចគ្នា ហើយបានទទួលការបង្ហាត់បង្រៀនដូចគ្នា។ ពេលដែលអ្នកមកដល់ផ្ទះវិញ អ្នកមានកម្លាំងឡើងវិញ។ អ្នកសប្បាយចិត្តណាស់ដែលអ្នកមិនបាននៅផ្ទះ!
នៅសព្វថ្ងៃនេះ កិច្ចផ្សព្វផ្សាយរបស់គ្រិស្តសាសនិកជាកិច្ចការសំខាន់បំផុតរបស់រាជាណាចក្រព្រះ។ លោកយេស៊ូបានប្រកាសទុកជាមុនថា កិច្ចផ្សព្វផ្សាយនឹងមានទំហំធំធេងក្នុងគ្រាចុងក្រោយបង្អស់។ (ម៉ាថ. ២៤:១៤) តើអ្វីដែលលោកប្រកាសនោះបានកើតឡើងយ៉ាងដូចម្ដេច? ក្នុងផ្នែកនេះ យើងនឹងពិចារណាអំពីមនុស្ស វិធីសាស្ត្រ និងជំនួយផ្សេងៗដែលសំខាន់ក្នុងកិច្ចបម្រើរបស់គ្រិស្តសាសនិកពិត ជាកិច្ចបម្រើដែលកំពុងជួយមនុស្សរាប់លាននាក់ទូទាំងផែនដី ឲ្យយល់ថារាជាណាចក្ររបស់ព្រះជារដ្ឋាភិបាលពិតប្រាកដ។