ខាងឆ្វេង: នៅឆ្នាំ១៩២៦ ក្រុមគ្រួសារបេតអែលនៅក្រុងប៊្រុគ្លីន បានធ្វើបុណ្យណូអែលជាលើកចុងក្រោយ; ខាងស្ដាំ: មនុស្សកត់សម្គាល់ថាសាក្សីព្រះយេហូវ៉ា គឺខុសពីអ្នកឯទៀត
ផ្នែកទី៣
គោលការណ៍នៃរាជាណាចក្ររបស់ព្រះ: ការស្វែងរកសេចក្ដីសុចរិតរបស់ព្រះ
ថ្មីៗនេះ អ្នកឃើញថាអ្នកជិតខាងរបស់អ្នកកំពុងសង្កេតមើលអ្នកនិងក្រុមគ្រួសាររបស់អ្នក។ នៅថ្ងៃមួយ អ្នកសួរសុខទុក្ខគាត់កាលដែលអ្នកដើរទៅផ្ទះរបស់អ្នក។ គាត់សួរសុខទុក្ខអ្នកដែរ រួចសួរថា៖ «ខ្ញុំសុំសួរមួយបានទេ? ហេតុអ្វីអ្នករាល់គ្នាខុសពីអ្នកឯទៀត?»។ អ្នកសួរតបទៅវិញថា៖ «តើអ្នកចង់ដឹងអំពីអ្វី?»។ គាត់ឆ្លើយថា៖ «អ្នករាល់គ្នាជាសាក្សីព្រះយេហូវ៉ាមែនទេ? អ្នករាល់គ្នាមិនដូចសាសនាឯទៀតទេ។ ខ្ញុំចង់និយាយថា អ្នកមិនធ្វើបុណ្យ មិនចូលរួមក្នុងនយោបាយ ក៏មិនធ្វើសង្គ្រាមដែរ។ គ្មានសាក្សីព្រះយេហូវ៉ាណាម្នាក់ជក់បារីទេ។ ម្យ៉ាងទៀត តាមមើលទៅក្រុមគ្រួសាររបស់អ្នកប្រកាន់ខ្ជាប់គោលការណ៍សីលធម៌ដ៏ខ្ពង់ខ្ពស់។ តើអ្វីធ្វើឲ្យសាសនារបស់អ្នករាល់គ្នាខុសពីសាសនាឯទៀតខ្លាំងម្ល៉េះ?»។
អ្នកដឹងថាមានចម្លើយតែមួយគត់ គឺយើងរស់នៅក្រោមការគ្រប់គ្រងនៃរាជាណាចក្ររបស់ព្រះ។ ក្នុងនាមជាស្តេចរបស់យើង លោកយេស៊ូកំពុងសម្រិតសម្រាំងយើង ហើយជួយយើងឲ្យដើរតាមលំអានដានរបស់លោក។ យ៉ាងនោះ មនុស្សអាចឃើញច្បាស់ថាយើងខុសគ្នាឆ្ងាយពីអ្នកឯទៀតក្នុងពិភពលោកដ៏អាក្រក់នេះ។ ក្នុងផ្នែកនេះ យើងនឹងរៀនអំពីរបៀបដែលរាជាណាចក្ររបស់មេស្ស៊ីកំពុងសម្រិតសម្រាំងរាស្ត្ររបស់ព្រះខាងការគោរពប្រណិប័តន៍ ខាងសីលធម៌ និងខាងរបៀបរៀបចំរបស់ពួកគេ។ យើងក៏នឹងឃើញដែរថា ការសម្រិតសម្រាំងនេះនាំឲ្យព្រះយេហូវ៉ាទទួលការសរសើរតម្កើង។