ខាងឆ្វេង: នៅឆ្នាំ១៩៤៥ នាក្រុងអែនហូវិន នៅប្រទេសហូឡង់ បងប្រុសម្នាក់ត្រូវគេចាប់ខ្លួនដោយសារគាត់ផ្សព្វផ្សាយ; ខាងស្ដាំ: តើច្បាប់នៃប្រទេសរបស់អ្នកផ្ដល់សិទ្ធិសេរីភាពឲ្យផ្សព្វផ្សាយសាសនាឬទេ?
ផ្នែកទី៤
ជ័យជម្នះរបស់រាជាណាចក្រព្រះ: ការធ្វើឲ្យដំណឹងល្អមានការទទួលស្គាល់តាមផ្លូវច្បាប់
សូមស្រមៃគិតថាអ្នកកំពុងផ្សព្វផ្សាយ ស្រាប់តែអ្នកឮសូរសំឡេងស៊ីរ៉ែនលាន់ឮពីចម្ងាយ។ សំឡេងស៊ីរ៉ែននោះចាប់ផ្ដើមឮកាន់តែខ្លាំងឡើងៗ។ កាលដែលអ្នកផ្សព្វផ្សាយដល់ម្ចាស់ផ្ទះ ដៃគូផ្សាយរបស់អ្នកងាកទៅឃើញឡានប៉ូលិសមកចតនៅមុខផ្ទះដែលអ្នកកំពុងផ្សព្វផ្សាយ។ ប៉ូលិសម្នាក់ចេញពីឡាន ដើរឆ្ពោះមករកអ្នកទាំងពីរ រួចសួរថា៖ «មនុស្សនៅតំបន់នេះបានទូរស័ព្ទប្ដឹងប៉ូលិសថា មានមនុស្សពីរនាក់កំពុងដើរពីផ្ទះមួយទៅផ្ទះមួយផ្សព្វផ្សាយអំពីគម្ពីរ។ នោះគឺពួកអ្នកទាំងពីរមែនទេ?»។ អ្នកឆ្លើយតាមរបៀបគោរព ហើយបញ្ជាក់ថាអ្នកជាសាក្សីព្រះយេហូវ៉ា។ តើអ្វីនឹងកើតឡើងក្រោយមក?
ចម្លើយចំពោះសំណួរនោះអាស្រ័យទៅលើអ្វីដែលបានកើតឡើងនៅអតីតកាលនាប្រទេសរបស់អ្នក។ តើរដ្ឋាភិបាលនៅប្រទេសរបស់អ្នកធ្លាប់ប្រព្រឹត្តយ៉ាងណាចំពោះសាក្សីព្រះយេហូវ៉ា? តើប្រទេសរបស់អ្នកផ្ដល់សិទ្ធិសេរីភាពខ្លះដល់សាសនាឬទេ? បើរដ្ឋាភិបាលផ្ដល់សិទ្ធិសេរីភាពមែន នេះទំនងជាដោយសារបងប្អូនរួមជំនឿរបស់អ្នក បានខំប្រឹងប្រែងអស់រាប់សិបឆ្នាំមកហើយ ដើម្បី‹ការពារនិងធ្វើឲ្យដំណឹងល្អមានការទទួលស្គាល់តាមផ្លូវច្បាប់›។ (ភី. ១:៧) ទោះជាអ្នករស់នៅប្រទេសណាក៏ដោយ ការពិចារណាអំពីរឿងក្ដីផ្សេងៗដែលសាក្សីព្រះយេហូវ៉ាបានឈ្នះ អាចពង្រឹងជំនឿរបស់អ្នកបាន។ ក្នុងផ្នែកនេះ យើងនឹងពិចារណាអំពីរឿងក្ដីខ្លះៗដែលយើងបានឈ្នះ។ ជ័យជម្នះរបស់យើង ជាភ័ស្តុតាងដ៏គួរឲ្យរំភើបចិត្តដែលបង្ហាញថា រាជាណាចក្ររបស់ព្រះគឺមានពិតប្រាកដ ពីព្រោះយើងមិនអាចឈ្នះរឿងក្ដីច្រើនបែបនេះដោយគ្មានជំនួយពីរាជាណាចក្ររបស់ព្រះបានឡើយ!