ជំពូកទី៦
បុត្រដែលព្រះបានសន្យា
ទារកយេស៊ូបានត្រូវកាត់ចុងស្បែក ហើយក្រោយមកនាំទៅវិហារ
យ៉ូសែបនិងម៉ារៀមិនទាន់ត្រឡប់ទៅក្រុងណាសារ៉ែតវិញទេ តែពួកគាត់បន្តស្នាក់នៅក្រុងបេថ្លេហិម។ ពួកគាត់បានយកទារកយេស៊ូទៅកាត់ចុងស្បែក ពេលទារកមានអាយុ៨ថ្ងៃ។ នេះស្របតាមច្បាប់របស់ព្រះសម្រាប់ជនជាតិអ៊ីស្រាអែល។ (លេវីវិន័យ ១២:២, ៣) ម្យ៉ាងទៀតតាមទម្លាប់ ឪពុកម្ដាយត្រូវដាក់ឈ្មោះកូនប្រុសនៅពេលនោះដែរ។ យ៉ូសែបនិងម៉ារៀបានដាក់ឈ្មោះកូនរបស់ពួកគាត់ថាយេស៊ូ ដូចទេវតាបានប្រាប់។
ជាងមួយខែក្រោយមក ទារកយេស៊ូមានអាយុ៤០ថ្ងៃ។ ឥឡូវ តើឪពុកម្ដាយនឹងនាំទារកនោះទៅកន្លែងណា? គឺទៅវិហារនៅក្រុងយេរូសាឡិម ដែលមិនសូវឆ្ងាយប៉ុន្មានពីកន្លែងដែលពួកគាត់កំពុងស្នាក់នៅ។ ច្បាប់ម៉ូសេបានចែងថា ៤០ថ្ងៃក្រោយពីស្ត្រីម្នាក់បានសម្រាលកូនប្រុស នាងត្រូវជូនគ្រឿងបូជានៅវិហារដើម្បីធ្វើឲ្យខ្លួនស្អាតបរិសុទ្ធ។—លេវីវិន័យ ១២:៤-៨
តាមច្បាប់ម៉ូសេ គ្រឿងបូជានោះគួរជាចៀមឈ្មោលមួយនិងព្រាបជំទើរមួយ។ ប៉ុន្តែ បើម្ដាយមិនអាចជូនចៀមឈ្មោលបានទេ នាងគួរជូនសត្វលលកមួយគូ ឬសត្វព្រាបស្ទាវពីរក្បាលវិញ។ ម៉ារៀបានធ្វើតាមច្បាប់នោះ។ នាងយកសត្វលលកមួយគូសម្រាប់ធ្វើជាគ្រឿងបូជា។ នេះបង្ហាញថាម៉ារៀមានជីវភាពខ្វះខាត។
នៅវិហារ បុរសវ័យចាស់ម្នាក់ឈ្មោះស៊ីម្មានបានមកជួបយ៉ូសែបនិងម៉ារៀ។ ព្រះយេហូវ៉ាបានបើកបង្ហាញឲ្យគាត់ឃើញថា មុនគាត់ស្លាប់ គាត់នឹងឃើញគ្រិស្តឬមេស្ស៊ីដែលព្រះបានសន្យា។ នៅថ្ងៃនោះ សកម្មពលបរិសុទ្ធបាននាំស៊ីម្មានទៅវិហារ ហើយគាត់បានឃើញយ៉ូសែបនិងម៉ារៀព្រមទាំងបុត្រតូចរបស់ពួកគាត់។ បន្ទាប់មក ស៊ីម្មានលើកបីបុត្រតូចនោះ។
ពេលស៊ីម្មានកំពុងបីទារកយេស៊ូ គាត់អរគុណព្រះដោយនិយាយថា៖ «ម្ចាស់ដ៏ឧត្តមបំផុត ឥឡូវលោកកំពុងដោះលែងខ្ញុំបម្រើរបស់លោក ឲ្យទៅដោយមានសេចក្ដីសុខសាន្ត សមស្របតាមប្រសាសន៍របស់លោក ពីព្រោះភ្នែកខ្ញុំបានឃើញរបៀបដែលលោកនឹងផ្ដល់សេចក្ដីសង្គ្រោះ ហើយលោកបានតាំងឲ្យប្រជាជាតិទាំងអស់ឃើញ អ្នកនោះគឺជាពន្លឺដែលនឹងយកស្បៃងងឹតពីប្រជាជាតិទាំងឡាយចេញ ក៏ជាសិរីរុងរឿងរបស់អ៊ីស្រាអែល ជារាស្ត្ររបស់លោក»។—លូកា ២:២៩-៣២
ពេលយ៉ូសែបនិងម៉ារៀឮពាក្យទាំងនោះ ពួកគាត់នឹកអស្ចារ្យក្នុងចិត្តយ៉ាងខ្លាំង។ ស៊ីម្មានជូនពរពួកគាត់ ហើយប្រាប់ម៉ារៀថាកូនប្រុសនាង«នឹងទៅជាហេតុឲ្យមនុស្សជាច្រើននៅអ៊ីស្រាអែលដួល ក៏នឹងទៅជាហេតុឲ្យមនុស្សជាច្រើនក្រោកឡើងវិញ» ហើយការឈឺចាប់ដែលប្រៀបដូចជាដាវមុត នឹងចាក់ទម្លុះចិត្តរបស់នាង។—លូកា ២:៣៤
នៅថ្ងៃនោះមានបុគ្គលម្នាក់ទៀតដែលបានមកជួបយ៉ូសែបនិងម៉ារៀ។ បុគ្គលនោះគឺស្ត្រីអាយុ៨៤ឆ្នាំ ឈ្មោះអាណាដែលជាអ្នកប្រកាសទំនាយ។ អាណាមិនដែលខានទៅវិហារឡើយ។ នៅទីនោះនាងបានជួបយ៉ូសែប ម៉ារៀនិងទារកយេស៊ូ ហើយអាណាចាប់ផ្ដើមអរគុណព្រះ ថែមទាំងនិយាយអំពីទារកយេស៊ូទៅអស់អ្នកដែលព្រមស្ដាប់។
យ៉ូសែបនិងម៉ារៀច្បាស់ជាមានអំណរខ្លាំងណាស់ ដោយសារហេតុការណ៍ដែលបានកើតឡើងក្នុងវិហារ! នេះធ្វើឲ្យពួកគាត់ដឹងយ៉ាងច្បាស់ថា កូនរបស់ពួកគាត់គឺជាអ្នកដែលព្រះបានសន្យា។