សំណួរពីយុវវ័យ
តើខ្ញុំត្រូវធ្វើអ្វីក្រោយពីទទួលការជ្រមុជទឹក? ភាគទី២៖ ចូររក្សាចិត្តស្មោះឥតងាករេ
គម្ពីរចែងថា «ព្រះយេហូវ៉ានឹងមិនហួងហែងអ្វីល្អៗឡើយ ពីអស់អ្នកដែលដើរដោយចិត្តស្មោះឥតងាករេ»។ (ចម្រៀងសរសើរព្រះ ៨៤:១១) តើ«ការដើរដោយចិត្តស្មោះឥតងាករេ»មានន័យអ្វី? គឺមានន័យថាប្អូនកំពុងរស់នៅស្របតាមការសន្យាចំពោះព្រះយេហូវ៉ា នៅពេលដែលប្អូនប្រគល់ខ្លួនជូនលោក។ (អ្នកទូន្មាន ៥:៤, ៥) ក្រោយពីបានទទួលការជ្រមុជទឹក តើប្អូនអាចដើរដោយចិត្តស្មោះឥតងាករេយ៉ាងដូចម្ដេច?
ក្នុងអត្ថបទនេះ
ចូរបន្តស៊ូទ្រាំនឹងបញ្ហាទាំងឡាយ
យោបល់ក្នុងគម្ពីរ៖ «យើងត្រូវចូលរាជាណាចក្រព្រះដោយឆ្លងកាត់ទុក្ខវេទនាជាច្រើន»។—សកម្មភាព ១៤:២២
តើខគម្ពីរនេះមានន័យយ៉ាងណា៖ គឺជាការពិតណាស់ គ្រិស្តសាសនិកទាំងអស់នឹងប្រឈមមុខនឹងបញ្ហាក្នុងជីវិត។ បញ្ហាដែលប្អូននឹងប្រឈមមុខ ដូចជាការចំអកមើលងាយ ឬប្រឆាំងដោយសារតែប្អូនជាគ្រិស្តសាសនិក។ បងប្អូនផ្សេងទៀតប្រឈមមុខនឹងបញ្ហាដែលមនុស្សទាំងអស់កំពុងតែជួប ដូចជាបញ្ហាខាងលុយកាក់ ឬបញ្ហាខាងសុខភាព។
អ្វីដែលនឹងកើតឡើង៖ ជួនកាលកាលៈទេសៈក្នុងជីវិតរបស់ប្អូនផ្លាស់ប្ដូរ ហើយធ្វើឲ្យប្អូនពិបាកទទួលយក។ គម្ពីរចែងថា ការអាក្រក់អាចកើតឡើងដល់មនុស្សទាំងអស់។ មិនថាជាគ្រិស្តសាសនិក ឬមិនមែនជាគ្រិស្តសាសនិក។—អ្នកទូន្មាន ៩:១១។
អ្វីដែលប្អូនអាចធ្វើ៖ ដោយដឹងថា ប្អូននឹងជួបបញ្ហាជាមិនខាន ដូច្នេះប្អូនអាចត្រៀមខ្លួនទុកជាមុនដើម្បីប្រឈមមុខនឹងបញ្ហាទាំងនោះ។ ចូរចាត់ទុកថានោះជាឱកាសដែលធ្វើឲ្យជំនឿរបស់ប្អូនរឹងមាំ ហើយពឹងផ្អែកទៅលើព្រះយេហូវ៉ាកាន់តែខ្លាំងថែមទៀត។ (យ៉ាកុប ១:២, ៣) ពេលនោះប្អូនក៏អាចនិយាយដូចសាវ័កប៉ូលថា៖ «ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ»។—ភីលីព ៤:១៣
រឿងពិត។ «មិនយូក្រោយពីខ្ញុំបានទទួលការជ្រមុជទឹក បងប្រុសរបស់ខ្ញុំបានចេញពីសេចក្ដីពិត ប៉ាម៉ាក់ក៏ឈឺ ហើយខ្ញុំក៏ឈឺដែរ។ នោះវាជាការងាយណាស់ដែលអាចឲ្យខ្ញុំចុះចាញ់ ហើយភ្លេចសន្យាពេលខ្ញុំប្រគល់ខ្លួនជូនព្រះថា ខ្ញុំនិងធ្វើឲ្យការគោរពប្រណិប័តន៍របស់ខ្ញុំចំពោះលោកជាអ្វីដែលសំខាន់បំផុតក្នុងជីវិត។ ប៉ុន្តែការប្រគល់ខ្លួនជូនលោកពិតជាបានជួយខ្ញុំឲ្យចេះប្រឈមមុខនឹងបញ្ហាទាំងនោះវិញ»។ ខារិន
យោបល់៖ សូមរៀនអំពីយ៉ូសែប។ ប្អូនអាចអានអំពីជីវិតរបស់គាត់នៅសៀវភៅដើមកំណើត ជំពូក៣៧និង៣៩ដល់៤១។ សូមពិចារណាអំពី៖ តើយ៉ូសែបបានជួបទុក្ខលំបាកអ្វីខ្លះដែលស្មានមិនដល់? ហើយតើគាត់បានប្រព្រឹត្តយ៉ាងណានៅពេលដែលគាត់ជួបទុក្ខលំបាកទាំងនោះ? តើព្រះយេហូវ៉ាបានជួយយ៉ូសែបយ៉ាងដូចម្ដេច?
ត្រូវការជំនួយបន្ថែម?
សូមអាន៖
«តើខ្ញុំអាចដោះស្រាយបញ្ហាតាមរបៀបណា?»
សូមថតចម្លងវីដេអូ៖
«ពេលឪពុកឬម្ដាយឈឺ»
ចូរបន្តទប់ទល់នឹងការល្បួងឲ្យធ្វើខុស
យោបល់ក្នុងគម្ពីរ៖ «ប៉ុន្តែ មនុស្សម្នាក់ៗត្រូវល្បងលដោយសេចក្ដីប៉ងប្រាថ្នារបស់ខ្លួនទាក់ទាញនិងល្បួងលួងលោម»។ (យ៉ាកុប ១:១៤)
តើខគម្ពីរនេះមានន័យយ៉ាងណា៖ យើងទាំងអស់គ្នាមានការល្បួងពីសេចក្ដីប៉ងប្រាថ្នារបស់ខ្លួន បើសិនយើងមិនចេះទប់ចិត្តទេ នោះនឹងនាំឲ្យយើងធ្វើអ្វីដែលខុស។
តើអ្វីនឹងកើតឡើង៖ ក្រោយពីបានទទួលការជ្រមុជទឹក ប្អូននឹងជួបការល្បួងពី «សេចក្ដីប៉ងប្រាថ្នាខុសឆ្គង»។ (ពេត្រុសទី២ ២:១៨) ប្អូនប្រហែលជាមានការល្បួងឲ្យរួមភេទមុនរៀបការ។
អ្វីដែលប្អូនអាចធ្វើ៖ គិតចាប់ពីពេលនេះតទៅ គឺមុនពេលមានការល្បួងនាំឲ្យធ្វើខុស ធ្វើដូច្នេះ ពេលជួបការល្បួងប្អូននឹងមិនចុះចាញ់នឹងសេចក្ដីប៉ងប្រាថ្នារបស់ខ្លួនឡើយ។ សូមចាំនូវប្រសាសន៍របស់លោកយេស៊ូដែលថា៖ «គ្មានអ្នកណាអាចធ្វើជាខ្ញុំបម្រើរបស់ម្ចាស់ពីរបានឡើយ»។ (ម៉ាថាយ ៦:២៤) ប្អូនអាចជ្រើសរើសអ្នកណាដែលជាម្ចាស់របស់ប្អូនបាន។ សូមឲ្យប្អូនជ្រើសរើសយកព្រះយេហូវ៉ា។ មិនថាសេចក្ដីប៉ងប្រាថ្នាខុសឆ្គងរបស់ប្អូនខ្លាំងប៉ុណ្ណាទេ ប្អូនអាចជ្រើសរើសមិនធ្វើតាមសេចក្ដីប៉ងប្រាថ្នានោះ។—កាឡាទី ៥:១៦
យោបល់៖ រៀនសម្គាល់ភាពខ្លាំងនិងភាពទន់ខ្សោយរបស់ខ្លួន ហើយជ្រើសរើសមិត្តភក្តិដែលជួយឲ្យប្អូនមានគុណសម្បត្តិល្អៗ។ ចូរជៀសចេញពីមនុស្ស ទីកន្លែង ឬកាលៈទេសៈណាដែលនាំឲ្យប្អូនធ្វើខុស។—ចម្រៀងសរសើរព្រះ ២៦:៤, ៥
ត្រូវការជំនួយបន្ថែម?
សូមអាន៖
«តើខ្ញុំអាចយកឈ្នះការល្បួងលដោយរបៀបណា?»
«តើខ្ញុំធ្វើយ៉ាងណាដើម្បីមិនឲ្យគិតពីការរួមភេទ?»
«តើតាមរបៀបណាខ្ញុំអាចយកឈ្នះលើការបង្ខិតបង្ខំពីមនុស្សស្រករគ្នា?»
ចូរបន្តពង្រឹងចិត្តខ្នះខ្នែងរបស់ប្អូន
យោបល់ក្នុងគម្ពីរ៖ «បង្ហាញចិត្តឧស្សាហ៍ដូចកាលពីដើម . . . រហូតដល់ទីបញ្ចប់ ដើម្បីកុំឲ្យអ្នករាល់គ្នាក្លាយទៅជាមនុស្សខ្ជិលឡើយ»។—ហេប្រឺ ៦:១១, ១២
តើខគម្ពីរនេះមានន័យយ៉ាងណា៖ អ្នកដែលមិនផ្ដោតអារម្មណ៍លើកិច្ចការរបស់ខ្លួន អាចនាំឲ្យកាត់បន្ថយកិច្ចបម្រើ ហើយក្លាយទៅជាមនុស្សខ្ជិល។
តើអ្វីនឹងកើតឡើង៖ ប្អូនពិតជារំភើបចិត្ត និងពោពេញដោយចិត្តខ្នះខ្នែងក្រោយពីប្អូនបានទទួលការជ្រមុជទឹក។ ប្អូនមានសេចក្ដីស្រឡាញ់ដ៏ពោរពេញចំពោះព្រះយេហូវ៉ា។ ប៉ុន្តែបន្តិចក្រោយមក ប្អូនប្រហែលជាមានការពិបាកឲ្យបន្តស្ដាប់បង្គាប់ព្រះយេហូវ៉ាក្នុងគ្រប់ការទាំងអស់ នោះជាហេតុធ្វើឲ្យប្អូនធ្លាក់ទឹកចិត្តហើយចិត្តខ្នះខ្នែងរបស់ប្អូនក៏ថយទៅ។—កាឡាទី ៥:៧
អ្វីដែលប្អូនអាចធ្វើ៖ សូមបន្តធ្វើអ្វីដែលត្រឹមត្រូវ ទោះជាពេលខ្លះចិត្តមិនចង់ធ្វើក៏ដោយ។ (កូរិនថូសទី១ ៩:២៧) ទន្ទឹមនឹងពេលនោះដែរ ចូរចូលទៅជិតព្រះយេហូវ៉ាដែលជាបិតានៅស្ថានសួគ៌ដើម្បីស្គាល់លោកឲ្យកាន់តែច្បាស់ជាង ដោយនិយាយជាមួយលោកតាមរយៈការអធិដ្ឋានជាញឹកញាប់។ ហើយបន្តបង្កើនចំណងមិត្តភាពជាមួយអស់អ្នកដែលស្រឡាញ់និងបម្រើលោក។
យោបល់៖ សូមចាំថាព្រះយេហូវ៉ាស្រឡាញ់ប្អូនខ្លាំងណាស់ ហើយបម្រុងនឹងជួយប្អូន។ សូមកុំគិតថា លោកមិនសប្បាយចិត្តដោយសារប្អូនបាត់បង់ចិត្តខ្នះខ្នែងមួយរយៈនោះឡើយ។ គម្ពីរចែងថា៖ «លោកផ្ដល់កម្លាំងដល់អ្នកដែលល្វើយ ហើយចំពោះអ្នកដែលខ្សោយ លោកផ្ដល់កម្លាំងខ្លាំងក្លាដល់ពួកគេ»។ (អេសាយ ៤០:២៩) លោកគង់តែនិងផ្ដល់ពរដល់ការខំប្រឹងរបស់ប្អូន ដើម្បីប្អូនមានចិត្តខ្នះខ្នែងមកវិញ។
ត្រូវការជំនួយបន្ថែម?
សូមអាន៖
«ប្អូនវ័យក្មេង សូមបន្តធ្វើឲ្យសេចក្ដីសង្គ្រោះរបស់ប្អូនបានសម្រេច»
«តើតាមរបៀបណាខ្ញុំអាចធ្វើឲ្យមានអំណរក្នុងការគោរពប្រណិប័តន៍ព្រះ?»
សូមទស្សនាវីដេអូ៖
ទស្សនៈពីមនុស្សស្រករប្អូន ជីវិតដ៏មានន័យខ្លឹមសារបំផុត
សរុបសេចក្ដី៖ បើប្អូនដើរដោយចិត្តស្មោះឥតងាករេ នោះប្អូននឹងធ្វើឲ្យចិត្តព្រះយេហូវ៉ាត្រេកអរ! (សុភាសិត ២៧:១១) ព្រះយេហូវ៉ានឹងសប្បាយរីករាយដែលប្អូនជ្រើសរើសនៅខាងលោក ហើយលោកនឹងផ្ដល់អ្វីៗដែលប្អូនត្រូវការដើម្បីយកឈ្នះការវាយប្រហាររបស់សាថាន។