តើអ្នកត្រៀមខ្លួនទទួល«ផែនដីជាមត៌ក»ហើយឬនៅ?
យើងទាំងអស់គ្នាទន្ទឹងរង់ចាំការសម្រេចនៃសេចក្ដីសន្យារបស់លោកយេស៊ូដែលថា៖ «អស់អ្នកដែលមានចិត្តស្លូតបូត នោះមានសុភមង្គលហើយ! ពីព្រោះអ្នកទាំងនោះនឹងទទួលផែនដីជាមត៌ក»។ (ម៉ាថ. ៥:៥) ពួកអ្នករើសតាំងនឹងទទួលផែនដីជាមត៌កដោយគ្រប់គ្រងជាស្ដេចជាមួយលោកយេស៊ូនៅស្ថានសួគ៌។ (បប. ៥:១០; ២០:៦) នៅសព្វថ្ងៃនេះ គ្រិស្តសាសនិកពិតភាគច្រើនទន្ទឹងរង់ចាំរស់នៅជារៀងរហូតលើផែនដី ដោយមានជីវិតល្អឥតខ្ចោះ មានសុភមង្គល និងរស់នៅដោយសុខសាន្ត។ ដើម្បីឲ្យនេះកើតឡើងបាន ពួកគេនឹងមានកិច្ចការសំខាន់ដែលត្រូវធ្វើ។ សូមគិតអំពីកិច្ចការបីគឺ៖ ការជួយធ្វើឲ្យផែនដីទៅជាសួនឧទ្យាន ការធ្វើឲ្យប្រាកដថាពួកអ្នកដែលបានត្រូវប្រោសឲ្យរស់ឡើងវិញមានអ្វីដែលពួកគេត្រូវការ និងការបង្រៀនពួកអ្នកទាំងនោះ។ សូមគិតផងដែរអំពីរបៀបដែលអ្នកអាចបង្ហាញថាសូម្បីតែនៅឥឡូវនេះ អ្នកចង់មានចំណែកក្នុងការធ្វើអ្វីទាំងនោះ។
តើអ្នកត្រៀមខ្លួនធ្វើឲ្យផែនដីទៅជាសួនឧទ្យានឬទេ?
ពេលព្រះយេហូវ៉ាបានបង្គាប់មនុស្សថា៖ «ចូរបង្កើតកូនឲ្យចម្រើនជាច្រើនឡើង ឲ្យមានពេញពាសលើផែនដីចុះ ហើយចូរគ្រប់គ្រងផែនដី» លោកបានលើកបញ្ជាក់ថាផែនដីទាំងមូលនឹងក្លាយទៅជាសួនឧទ្យាន។ (ដក. ១:២៨) ពួកអ្នកដែលនឹងរស់ជារៀងរហូតនៅផែនដី ក៏នឹងត្រូវធ្វើតាមបង្គាប់នេះដែរ។ ប៉ុន្តែដោយសារលែងមានសួនអេដែន នោះមិនមានសួនឧទ្យានឲ្យធ្វើជាទីចាប់ផ្ដើមទេ។ ភ្លាមៗក្រោយពីសង្គ្រាមអាម៉ាគេដូន នឹងមានកិច្ចការជាច្រើនដែលយើងត្រូវធ្វើដើម្បីសម្អាតផែនដីនៅកន្លែងណាដែលបានត្រូវបង្ខូច។ នោះនឹងតម្រូវឲ្យធ្វើកិច្ចការច្រើន។
នេះរំលឹកយើងអំពីកិច្ចការដែលជនជាតិអ៊ីស្រាអែលត្រូវធ្វើពេលដែលពួកគេបានត្រឡប់មកពីស្រុកបាប៊ីឡូនវិញ។ អស់៧០ឆ្នាំ គ្មាននរណាម្នាក់បានរស់នៅលើទឹកដីរបស់ពួកគេឡើយ។ ប៉ុន្តែ អេសាយបានប្រកាសទុកជាមុនថា ដោយមានជំនួយពីព្រះយេហូវ៉ា ពួកគេនឹងធ្វើឲ្យទឹកដីនោះស្រស់ស្អាតម្ដងទៀត។ ទំនាយនោះចែងថា៖ «លោកនឹងធ្វើឲ្យតំបន់ស្ងាត់ជ្រងំនៅទីនោះទៅជាស្រស់ស្អាត ដូចជាសួនអេដែន»។ (អេ. ៥១:៣) ព្រះយេហូវ៉ាបានជួយជនជាតិអ៊ីស្រាអែលឲ្យធ្វើឲ្យទឹកដីរបស់ពួកគេទៅជាកន្លែងដ៏ស្រស់ស្អាត។ ស្រដៀងគ្នាដែរ ដោយមានពរពីព្រះយេហូវ៉ា ពួកអ្នកដែលនឹងទទួលផែនដីជាមត៌កអាចធ្វើឲ្យផែនដីទៅជាសួនឧទ្យានដ៏ស្រស់ស្អាត។ ម្យ៉ាងទៀត សូម្បីតែនៅឥឡូវនេះ ក៏អ្នកអាចបង្ហាញថាអ្នកចង់មានចំណែកក្នុងកិច្ចការនោះ។
របៀបមួយគឺដោយខំអស់ពីសមត្ថភាពដើម្បីរក្សាផ្ទះនិងទីធ្លានៅជុំវិញឲ្យស្អាតបាតនិងមានរបៀបរៀបរយ។ អ្នកអាចធ្វើដូច្នេះ ទោះជាអ្នកជិតខាងរបស់អ្នកមិនធ្វើក៏ដោយ។ អ្នកក៏អាចជួយសម្អាតនិងថែទាំសាលប្រជុំនិងសាលសន្និបាតផងដែរ។ បើកាលៈទេសៈអនុញ្ញាត អ្នកក៏អាចដាក់ពាក្យសុំធ្វើជាអ្នកស្ម័គ្រចិត្តក្នុងតំបន់ដើម្បីចូលរួមក្នុងកិច្ចការផ្ដល់ជំនួយជាបន្ទាន់ពេលមានមហន្តរាយ។ ពេលអ្នកធ្វើដូច្នេះ នេះបង្ហាញថាអ្នកចង់ជួយបងប្អូនរួមជំនឿ បើមានសេចក្ដីត្រូវការ។ សូមសួរខ្លួនអ្នកថា ‹តើខ្ញុំអាចរៀនជំនាញណាខ្លះដែលខ្ញុំអាចប្រើ បើខ្ញុំបានត្រូវអនុញ្ញាតឲ្យរស់ជារៀងរហូតនៅលើផែនដី?›។
តើអ្នកត្រៀមខ្លួនដើម្បីជួយពួកអ្នកដែលនឹងត្រូវ ប្រោសឲ្យរស់ឡើងវិញឬទេ?
ភ្លាមៗក្រោយពីលោកយេស៊ូបានប្រោសកូនស្រីរបស់យ៉ែរ៉ូសឲ្យរស់ឡើងវិញ លោកបានប្រាប់គេឲ្យយកអាហារមកឲ្យកូននោះបរិភោគ។ (ម៉ាក. ៥:៤២, ៤៣) ប្រហែលជាមិនមែនជាការពិបាកឲ្យមើលថែក្មេងស្រីអាយុ១២ឆ្នាំនោះឡើយ។ ប៉ុន្តែ សូមគិតថាកិច្ចការដែលយើងនឹងត្រូវធ្វើគឺច្រើនយ៉ាងណាទៅ ពេលលោកយេស៊ូសម្រេចសេចក្ដីសន្យារបស់លោកដែលថា៖ «អស់អ្នកនៅក្នុងផ្នូរសម្រាប់ជាទីរំលឹក នឹងឮសំឡេងបុត្ររបស់លោក ហើយចេញមក»។ (យ៉ូន. ៥:២៨, ២៩) ទោះជាគម្ពីរមិនផ្ដល់ព័ត៌មានច្រើនក្ដី យើងអាចស្រមៃឃើញថាពួកអ្នកដែលនឹងត្រូវប្រោសឲ្យរស់ឡើងវិញនឹងត្រូវការជំនួយដើម្បីមានអាហារ កន្លែងស្នាក់នៅ និងសម្លៀកបំពាក់។ សូម្បីតែនៅឥឡូវនេះ តើអ្នកអាចបង្ហាញថាអ្នកចង់ជួយឬទេ? សូមគិតអំពីសំណួរដូចតទៅនេះ។
តើអ្នកអាចធ្វើអ្វីនៅឥឡូវនេះដើម្បីបង្ហាញថា អ្នកត្រៀមខ្លួនទទួលផែនដីជាមត៌ក?
ពេលមានសេចក្ដីជូនដំណឹងថាអ្នកត្រួតពិនិត្យប្រចាំមណ្ឌលនឹងមកទស្សនកិច្ចក្រុមជំនុំរបស់អ្នក តើអ្នកអញ្ជើញគាត់ឲ្យពិសាអាហារជាមួយគ្នាឬទេ? ពេលអ្នកបម្រើពេញពេលពិសេសបានត្រូវផ្លាស់ប្ដូរភារកិច្ចពីបេតអែលទៅតំបន់ផ្សាយ ឬពេលអ្នកត្រួតពិនិត្យប្រចាំមណ្ឌលចប់អាណត្ដិរបស់គាត់ក្នុងកិច្ចការធ្វើដំណើរ តើអ្នកអាចជួយពួកគេឲ្យរកកន្លែងស្នាក់នៅឬទេ? បើមហាសន្និបាតតាមភូមិភាគឬមហាសន្និបាតពិសេសនឹងត្រូវធ្វើឡើងនៅតំបន់របស់អ្នក តើអ្នកអាចស្ម័គ្រចិត្តជួយធ្វើកិច្ចការមុននិងក្រោយកម្មវិធីនោះឬធ្វើជាអ្នកស្វាគមន៍អ្នកចូលរួមឬទេ?
តើអ្នកត្រៀមខ្លួនបង្រៀនពួកអ្នកដែលនឹងត្រូវ ប្រោសឲ្យរស់ឡើងវិញឬទេ?
យោងទៅតាមសកម្មភាព ២៤:១៥ យើងរំពឹងថាមនុស្សរាប់ពាន់លាននាក់នឹងត្រូវប្រោសឲ្យរស់ឡើងវិញ។ ពួកគេជាច្រើនមិនបានស្គាល់ព្រះយេហូវ៉ាមុនដែលពួកគេស្លាប់។ ប៉ុន្តែ ពួកគេនឹងមានឱកាសនេះក្រោយពីពួកគេបានត្រូវប្រោសឲ្យរស់ឡើងវិញ។a ពួកអ្នកបម្រើព្រះយ៉ាងស្មោះត្រង់ដែលមានបទពិសោធន៍នឹងជួយបង្រៀនពួកគេ។ (អេ. ១១:៩) បងស្រីហ្សាឡឹតដែលបានផ្សព្វផ្សាយនៅទ្វីបអឺរ៉ុប ទ្វីបអាម៉េរិកខាងត្បូងនិងទ្វីបអាហ្វ្រិក ទន្ទឹងរង់ចាំធ្វើកិច្ចការនោះ។ គាត់និយាយយ៉ាងសប្បាយថា៖ «ខ្ញុំទន្ទឹងរង់ចាំបង្រៀនមនុស្សពេលដែលមានការប្រោសឲ្យរស់ឡើងវិញ។ ពេលខ្ញុំអានអំពីបុគ្គលដែលបានរស់នៅសម័យមុន ខ្ញុំច្រើនតែគិតថា ‹បើបុគ្គលនោះបានស្គាល់ព្រះយេហូវ៉ា ជីវិតគាត់អាចខុសគ្នាឆ្ងាយ›។ ខ្ញុំទន្ទឹងរង់ចាំប្រាប់មនុស្សដែលនឹងត្រូវប្រោសឲ្យរស់ឡើងវិញថា ជីវិតរបស់ពួកគេនឹងល្អប្រសើរយ៉ាងណាទៅបើពួកគេបម្រើលោក»។
សូម្បីតែអ្នកបម្រើដ៏ស្មោះត្រង់របស់ព្រះយេហូវ៉ាដែលបានរស់នៅមុនលោកយេស៊ូមកផែនដី ក៏ត្រូវរៀនច្រើនដែរ។ សូមស្រមៃគិតថាយើងនឹងសប្បាយនិងមានកិត្តិយសយ៉ាងណាដើម្បីពន្យល់ទៅដានីយ៉ែលអំពីការសម្រេចនៃទំនាយដែលគាត់បានសរសេរតែមិនយល់។ (ដាន. ១២:៨) ចុះយ៉ាងណាការជួយរូថនិងណាអូមីឲ្យដឹងថាពួកគាត់ជាសែស្រឡាយនៃមេស្ស៊ី? យើងនឹងរីករាយបង្រៀនមនុស្សនៅទូទាំងផែនដី ដោយគ្មានការបង្ខិតបង្ខំឬការបង្វែរអារម្មណ៍ពីពិភពលោកដ៏ទុច្ចរិតនៅសព្វថ្ងៃនេះទេ។
តើអ្នកអាចធ្វើអ្វីនៅឥឡូវនេះដើម្បីត្រៀមខ្លួនជួយបង្រៀនពួកអ្នកដែលនឹងត្រូវប្រោសឲ្យរស់ឡើងវិញ? របៀបដ៏សំខាន់មួយគឺដោយព្យាយាមបង្កើនសមត្ថភាពបង្រៀនរបស់អ្នកនិងដោយចូលរួមជាទៀងទាត់ក្នុងកិច្ចការផ្សព្វផ្សាយទូទាំងពិភពលោកនៅសព្វថ្ងៃនេះ។ (ម៉ាថ. ២៤:១៤) ទោះជាអ្នកមិនអាចផ្សព្វផ្សាយបានច្រើនដូចដែលអ្នកចង់ធ្វើនៅឥឡូវនេះដោយសារអាយុឬមូលហេតុផ្សេងទៀតក្ដី អ្នកអាចបង្ហាញថាអ្នកចង់បង្រៀនពួកអ្នកដែលនឹងត្រូវប្រោសឲ្យរស់ឡើងវិញ ដោយខំអស់ពីសមត្ថភាពក្នុងកិច្ចការផ្សព្វផ្សាយនៅឥឡូវនេះ។
គឺជាការល្អឲ្យគិតអំពីសំណួរសំខាន់ដូចតទៅនេះ៖ តើអ្នកពិតជាទន្ទឹងរង់ចាំទទួលផែនដីជាមត៌កឬទេ? តើអ្នករំភើបចិត្តដើម្បីធ្វើឲ្យផែនដីក្លាយទៅជាសួនឧទ្យាន ព្រមទាំងជួយពួកអ្នកដែលបានត្រូវប្រោសឲ្យរស់ឡើងវិញមានអ្វីដែលពួកគេត្រូវការនិងបង្រៀនពួកគេឬទេ? អ្នកអាចបង្ហាញថាអ្នកត្រៀមខ្លួនរស់នៅជារៀងរហូតលើផែនដីដោយចូលរួមក្នុងកិច្ចការដែលស្រដៀងនឹងកិច្ចការដែលអ្នកនឹងធ្វើពេលអ្នកទទួលផែនដីជាមត៌ក។
a សូមមើលអត្ថបទដែលមានចំណងជើងថា «ការនាំមនុស្សជាច្រើនមកឯសេចក្ដីសុចរិត»ក្នុងទស្សនាវដ្ដីប៉មយាម ខែកញ្ញា ឆ្នាំ២០២២។