Sota Ndunge Iambote ia ku Boka
1. Ihi i tu tena o ku di longa mu maukexilu avulu a ku boka, a Jikidistá mu hâma ia dianga?
1 O Jikidistá mu hâma ia dianga, a bokele o njimbu iambote ku athu oso. (Kol. 1:23) Sumbala o njimbu ia lungile ni Utuminu ua Nzambi, ene akexile mu sota maka a uabhelele o athu. Mu kifika, kioso Phetele kia zuela ku akua Jijudé, a xikinine mu Bibidia, muene ua tumbula o kikanenu kia Jouele. (Ikalakalu 2:14-17) Ku mbandu ia mukua, tala o ukexilu ua Phaulu kia xinganeka ni akua Ngeleku mu divulu dia Ikalakalu 17:22-31. Lelu, saí athu mu diembu dietu a xikina mu Bibidia, mukonda dia kiki tu tena ku tanga o Bibidia ni ene, kioso ki tuia mu boka inzo ni inzo. Maji tua tokala ku dilanga kioso ki tua mu zuela ni ió ka xikina mu Bibidia, kaié mu Ngeleja mba ió a bhanga mbandu ia jingeleja ki Jikidistá.
2. Kiebhi ki tu tena o ku bhana madivulu a mbeji, phala ku kuatekesa oso a xikina mu Bibidia ni ió a kambe ku xikina?
2 Bhana o Madivulu a Mbeji Ienioió: Ku muvu iú ua sidivisu, tua-nda bhana dingi o Mulangidi ni Despertai! tumikanda ni tudivulu. Se o athu mu diembu dietu ka xikina mu Bibidia, ni uhete uoso tu tena kua bhana divulu dioso-dioso dia a uabhela. Né muene se ki tu tena ku tanga o Bibidia mu veji ia dianga ni muthu, se muene ua tu tambulula kiambote, mu ku vutuka phala ku mu kunda dingi, tu tena ku mu kuatekesa ku kala ni kixikanu ku Mubhangi ni ku Maka mê. Ku mbandu ia mukua, se tua mu boka mu ididi muala o athu a xikina mu Bibidia, tua tokala ku bhana o madivulu a bhangesa o athu ku xinganeka. Mu kidi, tu tena kua bhana o divulu Bibidia i Longa, Ívua Nzambi mba Ívua Nzambi ni u kale ku muenhu, né muene se ene ko madivulu a tokala kua bhana ku mbeji ienioió. O kima kia tokala, o ku sota ndunge iambote i bhangesa o athu ku zola Jihova.
3. Mu ukexilu uebhi o muxima ua athu mu diembu dietu, uedi kala mavu?
3 Dima o Mavu: O muxima ua muthu ua difu ni mavu. (Luka 8:15) Saí mixima ia bhingi ku i pelepalala phala o mbutu, o kidi kia Bibidia, ki sabhuke. O akunji mu hâma ia dianga, akexile mu kuna o mbutu mu mavu oso-oso. Mu ku bhanga kiki, ene a sangulukile kiavulu. (Ikalakalu 13:48, 52) Tu tena ué ku sanguluka mu ku sota ndunge iambote ia ku boka.