O Kwila o Kukamba o Kuyuka Mwaxaxi ka Jinguvulu Kwandabhwa?

O kukamba o kuyuka ku athu abhanga mbandu ku jinguvulu kwene mubhekela maka mu ngongo yoso ni ibhidi yavulu ku athu.a Mukifika, mukithangana kya dibhebhu dya COVID-19, sayi athu abhanga mbandu mu kisangela kya jinguvulu mu jixi javulu a atatela kukatula o kitadi kyexile mu bhaka phala kukwatekesa o athu kudibhana ni uhaxi wa Covid 19. O athu mukonda dya kukamba o kuyuka afidisa akwa kutambula o ukexilu watokala wa kwa asaka, o kiki kibhangesa o athu kutala hadi ni kufwa.

O kima kibhekesa o kukamba o kuyuka kwa jinguvulu, o athu katena kukizubha. David Cameron wexile o dimixi dya dyanga mu ixi ya Reino Unido wambe kwila: “O kukamba o kuyuka kima kyadikota kala wandanda, o jixi joso kwene kwanaminina— kifwa, mu jinguvulu joso sayiku muthu unyanaku kitadi.”

Maji tutena kudyela kwila mu kithangana ni mbandu o jinguvulu joso ja kambe o kuyuka kijandakalaku dingi. Mukonda dyahi? Tala ihi yamba o Bibidya yalungu ni ihi yandabhanga Nzambi.

Kyebhi kitwejiya kwila Nzambi wandabhanga kima phala kuzubha o kukamba o kuyuka?

O Bibidya itulembalesa se ihi ibanza Nzambi yalungu ni maka enya: “Eme ngi Jihova, kya ngi wabhela o kuyuka, kya ngi ibhila o kubhanga kya yibha mba o kukamba o kuyuka.”b (Izaya 61:8) Kyoso o athu kyatala hadi mukonda dya kukamba o kuyuka kya akwa, Nzambi wamumona yoso yamubhita. (Jisabhu 14:31) Mwene wambe: “Mukonda-phe dya ngadyama a mu tatesa, . . . ngi balumuka kyá.”—Jisálamu 12:5.

Ihi yandabhanga Nzambi? Muveji dya kulungulula o jinguvulu jalaku, mwene wandakwabhinganesa ni nguvulu yê yadyulu, a ixana “Utuminu wa Nzambi.” (Máluku 1:14, 15; Matesu 6:10) O Bibidya yamba: “O Nzambi ya dyulu wa kà bheka-ku o utuminu . . . wa kà sasujula o mautuminu moso’ama anga a-bhwa-ku, maji o wene wa kà xalela ni kutumina mu thembu joso katé ku hádya ni hádya.” (Daniyele 2:44) M’ukexilu yú, Nzambi wandazubha o kukamba o kuyuka kutwene mumona lelu.

Nguvulu wayuka

Kyebhi kitwejiya kwila o Utuminu wa Nzambi wandakala unguvulu wayuka? Tala o ima yakayela.

1. 1. Kutena. O Utuminu yú wandatambula kutena kwa Nzambi Muteni a Yoso.—Dijingunwinu 11:15.

   Mukonda dyahi twabhingi kwijiya: O jinguvulu mu ixi abhindamena o kitadi kibhana o athu atokala mu ixi yiyi. Avulu mudya asota kubhomba o mixima ya akwa, anyana, ajijidika akwa kubhanga o ima yamesena ene. Maji, o Utuminu yú wala ni kikwatekesu kya Nzambi Muteni a Yoso, wala jinga ni kutena kwa kubhana yoso yabhindamena o jiselevende jê.—Jisálamu 145:16.

2. 2. Nguvulu. Nzambi wasolo Jezú Kidistu kala o sobha ya Utuminu.—Daniyele 7:13, 14.

   Mukonda dyahi twabhingi kwijiya: O Jinguvulu ja ngongo atena kwa funyisa ku muthu wengi phala atene kubhanga ima yayibha. (Ndongixi 7:20) Kumbandu yengi Jezú walondekesa kwila katena kumufunyisa mba kumubhomba o muxima. (Matesu 4:8-11) O kya mukwa we, mwene wehela o henda yakidi kumwendesa mu ibhangelu yê yoso, wamesena kyavulu o mbote ya jiselevende jê.—Jisálamu 72:12-14.

3. 3. Itumu. O itumu ya Utuminu wa Nzambi, itumu yayuka, ibheka kusanguluka kwa yó amubelesela.—Jisálamu 19:7, 8.

   Mukonda dyahi twabhingi kwijiya: O itumu ya athu mungongo kubhonza ku itendela, kubhonza ku ikumbidila, mba ka ikayela mu ukexilu watokala, mukonda dya kiki kibhangesa o athu kukalakala sé kuyuka. Kumbandu yengi o itumu ya Nzambi yabhebhuluka, ni kwila ibhekela mbote. (Izaya 48:17, 18) Kikyene ngó, o itumu yiyi ki idikwatenena ngó mu ibhangelu ya muthu maji we mu kima kyamumubhangesa kubhanga o kima kiki. (Matesu 22:37, 39) Mu kidi, Nzambi wejiya o mixima yetu, mwene utonginina kwila o itumu yiyi wa mu ibhana ni henda yoso.—Jelemiya 17:10.

Twa kwixana phala kudilonga dingi o ikanenu ya Bibidya yalungu ni hádya mwandakala o nguvulu yayuka.

• Tanga o milongi “O Utuminu ua Nzambi—Unguvulu ua Iuka” phala kudilonga dingi ima itatu ilondekesa se mukonda dyahi o Utuminu wa Nzambi nuka wandakalakala se kuyuka.

• Tala o vidyu O Utuminu wa Nzambi Ihi? Phala kwijiya dingi yalungu ni unguvulu wa Nzambi ni ihi yandabhanga.

• Sota kudilonga o Bibidya phala umone kyebhi ki utena kukatula mbote mu ikanenu ya Bibidya.