Һин бә кӧ дь Ԛӧльхкьрьнеда Һе Щерʹьбанди би, Чахе Ньвисандьна Дьки

Тʹьме «һаш жь хԝә у һинкьрьна хԝә һәбә» (1 Тимтʹ. 4:16). Әв ширәта Паԝлосе шанди Тимотʹейорʹа, дьдә кʹьфше кӧ әм гәрәке жь алийе хԝәда һʹәму тьшти бькьн, ԝәки дь ԛӧльхкьрьнеда һе щерʹьбанди бьн. У фьрԛи тʹӧне әм тʹәзә дәстпедькьн даннасин бькьн, йан жи ида щерʹьбанди нә. Дь ве йәкеда ԝе али мә бькә рʹеза готаред тʹәзә, кʹижан кӧ дь «Ԛӧльхкьрьна Мәйә Пʹадшатийеда» ԝе һәбә, бь наве ӧса: «Һин бә кӧ дь Ԛӧльхкьрьнеда Һе Щерʹьбанди би». Дь һәр готарәкеда ԝе бе гьликьрьне дәрһәԛа ԝе йәке, кӧ чаԝа дь даннасинкьрьнеда һе щерʹьбанди бьн, у һьнә ширәт жи ԝе бенә дайине дәрһәԛа ԝе йәке кӧ чаԝа пешда һәрʹьн. Һәр кәс те һеланкьрьне, ԝәки нава ве мәһеда әван ширәта бьдә хәбате. Ле хьлазийа мәһе, ԝәде «Щьвата Ԛӧльхийе» мәщала мә ԝе һәбә кӧ щаба хԝә бьдьн, у бежьн ԝәки чь кʹар мә жь ве йәке сьтандийә, чахе дьхәбьтин кӧ щерʹьбанди бьн. Дь ве мәһеда әм тенә һеланкьрьне кӧ ньвисандьна бькьн, демәк бьньвисьн дәрһәԛа ԝан мәрийа, йед кӧ дьхԝазьн һе зедә пебьһʹәсьн.

Әв Йәк Чьрʹа Фәрз ә: Сәва кӧ бьԛәдиньн тʹәмийа кӧ мәрʹа һатийә дайине, әм гәрәке хенщи даннасинкьрьне һе зедә тьшт бькьн. Мәсәлә әм гәрәке диса бен щәм ԝан мәрийа, йед кӧ гӧһе хԝә данә мә у ԝана һин кьн. Демәк әм гәрәке нав ԝанада авдьн тʹӧхьме растийе, кʹижан кӧ мә дачʹькандийә (Мәт. 28:19, 20; 1 Корн. 3:6-9). Әв те һʹәсабе ԝәки бьвиньн әԝи мәрьви йе кӧ гӧһе хԝә дабу мә, хәбәр дьн дәрһәԛа проблемед ԝи у бәрдәԝан кьн хәбәрдана хԝәйә пешьн. Ләма жи чахе әм әԝи мәрьви бьвиньн, һьнге гәләк фәрз ә ԝәки әм дәрһәԛа ԝи ньвисандьна бькьн.

Чаԝа Бькьн:

• Баԝәр бә кӧ ԝәʹде даннасинкьрьне, щәм тә һәнә тьштед бона ньвисандьне. Ньвисаред тә бьра фәʹмдари, рʹаст у тʹәзәкьри бьн. Гава тә хәбәрдана хԝә хьлаз кьр, перʹа-перʹа ньвисандьна бькә.

• Ньвисандьнед хԝәда дәрһәԛа хԝәйе мале бьньвисә. Мәсәлә бьньвисә, нав, навнишан, һәжмара тʹела ԝи йан жи ә-намә (ә-майил). Тә дина хԝә дайе кӧ чь дькарә ԝи у малбәта ԝирʹа һʹәԝас бе?

• Һур бь һур бьньвисә дәрһәԛа хәбәрдана хԝә. Тә кʹижан рʹез хԝәнд? Хԝәйе мале дәрһәԛа баԝәрийа хԝә чь гот? Кʹижан әʹдәбийәт тә ԝирʹа һишт? Бьньвисә кʹижан сьһʹәте, кʹижан рʹоже у чәнде мәһе тӧ һати.

• Бьньвисә кӧ щара дьн чахе тӧ бей, те чь бьки. Тә дәрһәԛа чь соз дабу, кӧ хәбәр ди? Тә ԝирʹа ԝәʹде һатьна хԝә гот?

• Һәр щар чахе тӧ сәрледана дӧбарә дьки, тʹьме ньвисандьнед хԝә тʹәзә кә. Дь ве йәкеда тьштәки нәрʹаст тʹӧнә, һәгәр дь ньвисандьнед хԝәда тӧ тьштед ӧса жи бьньвиси чь кӧ нә һʹәԝщә йә.

Әве Йәке Ве Мәһеда Бьдә Хәбате:

• Чахе тӧ ньвисандьнед хԝә дьки, бежә ԝи һәвал-хьзмәткʹаре хԝәрʹа йе кӧ тʹәви тә даннасин дькә, бьра бьньһерʹә һәла тә чь ньвиси.