Сәрһати 15

Жьна Лут Пьшт Хԝәва Зьвьрʹи

ЛУТ малбате хԝәва тʹәви Бьраһим дь Кәнанеда дьжитьн. Рʹожәке Бьраһим готә Лут: «Әв әʹрд тʹера һʹәму һʹәйԝанед мә накә. Кʹа әм һәв щьһе бьн. Кʹәрәм кә, һәрге тӧ ви алива һәрʹи әзе алийе дьнва һәрʹьм».

Лут дора хԝә ньһерʹи у әʹрдәки гәлә бәдәԝ дит, пе чʹәма у шинкайийе гәләки баш бона һʹәйԝанед хԝә. Әв әʹрд дор-бәре чʹәме Урдӧне бу. Ләма жи Лут малбате у һʹәйԝанед хԝәва дәрбази ԝи әʹрди бу. Ле ахьрийе әԝана дь шәһәре Содомеда щиԝар бун.

Мәрийед Содоме гәлә хьрав бун. Лут жь ве йәке гәлә әʹщьз дьбу, чьмки әԝ мәрики баш бу. Дьле Йаһоԝа жи жь ве йәке гәлә дешийа. Ләма жи Хԝәде дӧ мьлйакʹәт шанд бал Лут, ԝәки әԝ әʹламәти кьн, кӧ Содом у шәһәре кʹеләка Гомора, сәва шьхӧлед хԝәйи хьрав, ԝе бенә ԛьрʹкьрьне.

Мьлйакʹәта Лутрʹа готьн: «Ләз кʹәвә! Жьна хԝә у дӧ ԛизед хԝә һьлдә у жь вьр бьрʹәвьн!» Лут у нәфәре ԝи әглә дьбун у ләма жи мьлйакʹәта дәсте ԝан гьртьн, кʹәтьнә пешийа ԝан у жь шәһәре ԝана дәрхьстьн. Паше мьлйакʹәтәк гот: «Бьрʹәвьн, хԝә хьлаз кьн! Пьшт хԝәва нәньһерʹьн. Бьрʹәвьн бәрбь чʹийа, һәрге дьхԝазьн сагʹ бьминьн».

Лут у дӧ ԛизед ԝи гӧрʹа мьлйакʹәта кьрьн у жь Содоме дур кʹәтьн. Әԝана дәԛәке жи нәсәкьнин у пьшт хԝәва нәзьвьрʹин. Ле жьна ԝи гӧрʹа мьлйакʹәта нәкьр. Әԝе һьнәки рʹәви, паше сәкьни у пьшт хԝәва зьвьрʹи. Ләма жи әԝ перʹа-перʹа бу стуна хԝе. Һәла бьньһерʹә сәр шькьл, тӧ ԝе дьвини?

Жь ве йәке әм дькарьн дәрсәк сәва хԝә һьлдьн. Әв мәсәлә нишани мә дькә, кӧ Хԝәде хьлаз дькә ԝана кʹи гӧрʹа ԝи дькә. Ле кʹи гӧрʹа Хԝәде накә, әԝана жийина хԝә ԝе ӧнда кьн.

Дәстпебун 13:5-13; 18:20-33; 19:1-29; Луԛа 17:28-32; 2 Пәтрус 2:6-8.