Ûsiv tim hazir bû ku guh bide rêberiya Yehowa. Loma ew zilamekî baş bû. Qet nebe sê caran, Xwedê di heqê malbata wî de rêberî da wî. Çi qas zehmet bû jî, Ûsiv her car zû guh dida Yehowa (Meta 1:20; 2:13-15, 19-21). Di netîceyê de, Ûsiv Meryem diparast û xwedî lê derdiket. Îcar xeyal bike ku Meryemê çi qas qedrê Ûsiv digirt û jê hez dikir! Zilamno, ji bo xwedîkirina malbata xwe, hûn dikarin di Kitêba Pîroz de li şîretan bigerin û bi vî rengî Ûsiv ji xwe re mîsal bigirin. Gava hûn – çi qas zehmet be jî – guh didin van şîretan, hûn nîşan didin ku hûn ji jina xwe hez dikin û dixwazin zewaca xwe xurttir bikin. Xwişkeke li girava Vanûatûyê, ya ku zêdetirî 20 salan zewicî ye, dibêje: “Gava zilamê min li rêberiya Yehowa digere û xîret dike ku li gor vê rêberiyê bimeşe, ez zêdetir qedrê wî digirim. Ez xwe rihet hîs dikim û dizanim ku qerarên wî pir baş in.” w23.05 21 par. 5

Cihûyên ku ji Babîlê vegeriyabûn welatê xwe, bûn “miletekî ji Xwedayê xwe Xudan re pîroz” (5. Mûsa 7:6, Mizgînî). Lê ji bo ku Yehowa ji wan razî bûya, hewce bû ku ew jiyana xwe biguherînin. Piraniya Cihûyan li Babîlê hatibûn dinyayê, û hînî adet û fikrên Babîliyan bûbûn. Gelek sal piştî ku Cihûyên pêşîn vegeriyabûn Îsraêlê, Nehemyayê Walî dît ku zarokên ku li Îsraêlê hatibûn dinyayê bi zimanê Îbranî nizanin (5. Mûsa 6:6, 7; Nehemya 13:23, 24). Gelo zimanê Îbranî çima ew qas muhîm bû? Zimanê Îbranî, zimanê sereke yê Peyva Xwedê bû. Loma, ji bo ku ew ji Yehowa hez bikin û ji wî re îbadetê bikin, hewce bû ku ew ji vî zimanî rind fehm bikin (Esra 10:3, 44). Ji ber vê yekê, lazim bû ku wan Cihûyan guhertinên mezin bikirana. Ev yek wê li welatê Îsraêlê hêsantir bûya, çimkî li wê derê, îbadeta Yehowa gav bi gav dihat avakirin (Nehemya 8:8, 9). w23.05 15 par. 6-7

Xwestina me çi qas hebe yan em çi qas xîret bikin jî, dibe ku hinek zehmetî derkevin pêşiya me. Mesela, hin tiştên ku ji nişka ve diqewimin dikarin wexta ku ji bo gihîştina hedefa me lazim e ji me bistîne (Waiz 9:11, NWT). Carinan em dikarin ji ber problemên xwe qewet û cesareta xwe winda bikin (Methelokên Silêman 24:10). Yan dibe ku qisûrdariya me li ser me tesîr bike ku em ji armanca xwe dûr bikevin (Romayî 7:23). Yan jî, dibe ku em xwe westiyayî hîs dikin (Meta 26:43). Çi dikare alî me bike ku em van rojên dijwar derbas bikin? Eger tiştek bibe sebeb ku tu negihîjî hedefa xwe, ev yek nayê maneya ku ne lazim e ku tu xîret bikî. Kitêba Pîroz dibêje ku zor û zehmetî dikarin gelek caran derkevin pêşiya me. Lê dîsa jî, Peyva Xwedê dibêje ku em dikarin bi ser bikevin. Belê, kesê ku xîret dike ku li gel astengan bigihîje hedefa xwe îsbat dike ku ew dixwaze dilê Yehowa xweş bike. Gava Yehowa xîreta me dibîne, ew ji me razî dibe! w23.05 30 par. 14-15