Serhatî 61

Dawid Dibe Padşa

ŞAWÛL dîsa nêt kire dilê xwe ku Dawid bigire. Ewî 3 000 eskerêd jibartî top kir, seva ku Dawid bigere. Çaxê Dawid derheqa vê yekê pêhesiya, ewî cesûs şand ku bivînin hela Şawûl û eskerêd wî îşev ku cîwar bûne. Paşê Dawid ji du mêra pirs kir: “Kî ji we wê tevî min bê ber çadira Şawûl?”

“Ezê bêm”, Avîşe gotê. Avîşe kurê xûşka Dawid Tserûya bû. Dawid û Avîşe hêdî-hêdî ketine nav çadirêd wan, çaxê Şawûl eskerêd xweva razayî bû. Wana rim û kûpê Şawûl ji ber serê wî usa hildan, ku eskerêd wî ne jî pêhesiyan, çimkî ewana gişk jî bi xewa giran raza bûn.

Lê binihêre, niha Dawid û Avîşe ku ne. Ewana sax-silamet ji wê derê derketin gihîştin çiyê, yê ku îda cîkî bêxof bû. Ji serê çiyê Dawid gazî serkarê eskera Abner kir û gotê: “Abner, tu çira miqatî padşê nabî? Hela binihêre, rim û kûpê wî ku ne?”

Şawûl hişyar bû. Tu dikarî Şawûl û Abner li ser vî şikilî bivînî. Şawûl dengê Dawid nas kir û jê pirsî: “Dawid, ev tu yî?”

Dawid jî cava xwe da: “Belê, ez im, xweyê min padşa”. Paşê Dawid serda zêde kir: “Çira tu pey min ketî? Min çi xiravî te kiriye? Wa rimê te vir e, ya padşa. Bira kesek ji eskerêd te bê û wîye hilde”.

Şawûl poşman bibû û gote Dawid: “Min şaşî kir, û kirêd min jî bêaqilî bûn”. Paşî van giliya Dawid çû riya xwe, Şawûl jî vegeriya mal. Lê Dawid dilê xweda digot: “Derbekê ezê bi destê Şawûl yeke bême kuştinê. Ka ez birevim li erdê filistîana û wir xwe veşêrim”. Lema jî ewî tiştekî usa kir, ewî filistîana da bawerkirinê yan çi ew îda ser aliyê wan e û pişta wan digire.

Hine wede şûnda filistîan derketin şer tevî îsraêliya. Di vî şerîda Şawûl û Yonatan hatin kuştinê. Ji vê yekê Dawid gele berxwe ket, û ewî kulamek nivîsî, nav kîjanî giliyê usa hebûn: “Dilê min ji bo te gele dişewite, birayê min, Yonatan. Tu seva min gele bi qîmet û delal bûy!”

Paşî vê yekê Dawid vegeriya şeherê Hebron. Li wir şer diçû orta piştovanê kurê Şawûl Îş-Boşet û mêrêd ku piştovanê Dawid bûn û dixwestin ku ew bibe padşa. Xilaziyê eskerêd Dawid şer birin û Dawid bû padşa. Wî çaxî ew 30 salî bû û ewî weke heft sala nîv li Hebronê serkartî dikir. Li wir Dawidra çend kur hatin bûyînê navêd wan ev in: “Amnon, Abşalom û Adoniya”.

Paşwextiyê Dawid û eskerêd wî şeherekî gele bedew Orşelîm zeft kirin. Wedê şerkirinê Yoab serkartî li ser xwe hildabû. Ew kurê xûşka Dawid Tserûya bû. Dawid Yoab kire serkarê temamiya eskera, û ji wir destpêbûyî Dawid îda di şeherê Orşelîmêda padşatî dikir.

1 Samûyêl 26:1-25; 27:1-7; 31:1-6; 2 Samûyêl 1:26; 3:1-21; 5:1-10; 1 Dîrok 11:1-9.