Naqewime ku Padşatiya Xwedê bedena fîzîkîda be

Gelo Padşatiya Xwedê Dilê Merivada ne?

Caba Kitêba Pîroz

Na, Padşatiya Xwedê dilê merivada nîne.a Kitêba Pîroz dibêje ku ew padşatiya ezmana ye û şirovedike ku bi rastî ew kîderê ye (Metta 4:17). Were em şêwir kin, ku ça Kitêba Pîroz dide kifşê, wekî ew padşatî rêalî ye, kîjan ku ji ezmên serwêrtiyê dike.

Padşatiya Xwedêda hene serwêr, binelî û qanûn. Û îzina vê Padşatiyê heye, wekî qirara Xwedê ser ezmana û ser erdê hîmlî ke (Metta 6:10; Eyantî 5:10).
Serwêrtiya Xwedê, yanê Padşatiya Xwedê wê ser cimet, “milet û kesên ji her zimana” serwêrtiyê bike (Daniyêl 7:13, 14). Ne ku bineliya serwêr kifşkirine, lê Xwedê ewana kifş kirine (Zebûr 2:4-6; Îşaya 9:7).
Îsa şandiyên xweye aminra got, wekî ewana Padşatiya ezmênda wê tevî wî “ser kursiya rûnên” (Lûqa 22:28, 30).
Dijminên vê Padşatiyê hene û ewê wana kuta ke (Zebûr 2:1, 2, 8, 9; 110:1, 2; 1 Korintî 15:25, 26).

Kitêba Pîroz hîn nake ku Padşatiya Xwedê dilê merivada ne û bi saya dil serwêrtiyê dike. Lê ew dide kifşê ku “xebera Padşatiyê” yanê “Mizgîniya Padşatiyê”, dikare û gerekê ser dilê meriva hukum ke (Metta 13:19; 24:14).

Çi tê hesabê “Padşatiya Xwedê hindurê weda ye”?

Hine welgerandinên kitêba Lûqa 17:21, meriya dixalifînin vê yekêda, ku Padşatiya Xwedê bi rastî kîderê ye. Mesele welgerandina “Vêrsîa Aqûbê Padşa” ya ser zimanê Înglîzî usa dibêje: “Padşatiya Xwedê hindurê weda ye”. Seva ku evê rêzê rind fem kin, were em dîna xwe bidin kontêksta vê.

Hine serwêrên rêlîgî, yên ku miqabilî Îsa bûn — Padşatiya Xwedê dilê neyarên Îsada nîbû, yên ku dixwestin wî bikujin

Ew gilî Îsa Fêrisiyara got, dêmek serwêrên rêlîgiyayêra, yên ku miqabilî wî derdiketin û her tişt dikirin, wekî ew bê kuştinê (Metta 12:14; Lûqa 17:20). Gelo bi logîkî ye bifikirin, wekî Padşatiya Xwedê dilê wan miqabilada bû? Îsa gote wan: “Hindurva hûn durû ne û neheq in” (Metta 23:27, 28).

Welgerandinên dinda giliyê Îsaye ji Lûqa 17:21 diha zelal in: “Padşatiya Xwedê nava weda ye” (Welgerandina Mizgînî). Padşatiya ezmana bi vê nêtê “nava” Fêrisiyada bû, ku Îsa Padşê aliyê Xwedêda kifşkirî, ber wan sekinî bû (Lûqa 1:32, 33).

a Gelek rêlîgiya, hîn dikin wekî Padşatiya Xwedê dilê merivada ne. Li gora baweriya babtîsta Padşatiya Xwedê parek e “kîjan ku dil û jîyîna merivada ne”. Bavê Romê, Bênêdîktê XVI kitêba xweda ya bi navê “Îsayê ji Nisretê”, usa nivîsî: “Padşatiya Xwedê bi saya dilê guhdar tê”.