Ebaruha Eyakabiri oku Timoteo
2 Busana n’ekyo, mwana waghe, wulhole embere eribana amaaka omwa lhukogho olhuli omu Kristo Yesu; 2 n’emyatsi eyo wowa erilhua okw’ingye eyo abema bangyi basighika, emyatsi eyi wuheyo abalhume abathaleghulha, nabo bakendi tholera ndeke erikangirirya abandi. 3 Ng’omusirikali mubuya wa Kristo Yesu, wulighe eriaghalhwa. 4 Sihali musirikali oyuwanga yingirya* omwa by’esuburu,* oyuwangasimwa n’oyuwamwingiraya mubwo. 5 Nibya n’omwa by’amasatha, owosi-wosi oyukasangira omwa malingwatha syalihebawa embiitha amathendi ghendera okwa bilhaghiro by’amalingwatha. 6 Omulimi oyukakolha kutsibu atholere iniabya w’erimbere erirya okwa bighuma. 7 Wubye wukalengekania okwa bya ngabugha; Omukama akendi kuha amenge* omo myatsi yosi.
8 Wibuke ngoku Yesu Kristo mwalhubukibwa okwa baholi kandi ngoku abya w’olhubutho lhwa Dawudi,* erikwamana n’engulhu yuwene eyo ngathulha, 9 eyikaleka ingaghalhwa kandi ingahirwa omwa ngomo ng’engoli y’ebibi. Aliwe ekinywe kya Nyamuhanga sikibohirwe. 10 Busana n’enzumwa eyi ngalholha embere eriyiyinirya emyatsi yosi busana n’abasombolhwa, nuku nabu bangabana omulhamu owakasa erilhabira omu Kristo Yesu, kuthya n’olhukengerwa lhwa kera na kera. 11 Ebinywe bino ni by’eriyikethera, bithi: Ahathe erithika-thika thwamabya imuthwaholha haghuma, kandi ithukendi syasuba haghuma; 12 thwamalholha embere eriyiyinia, kandi ithukendi syathabalha haghuma ng’abami; thwamamughana, nayu iniakendi syathughana; 13 thwamaleghulha, iyo akasighalha iniane muthaleghulha, kundi syanga yighana iyuwene-wene.
14 Wulhole embere eribibukya emyatsi eyi, eribakangirirya* embere sya Nyamuhanga wuthi isibalhwa busana n’ebinywe, ekindu ekithawithe mughaso nahake kundi kikaghalhaya* abahulikirire. 15 Wukole kutsibu eribya oyusimirwe embere sya Nyamuhanga, omukoli oyuthawithe eky’akakwir’isoni, erikolesya ndeke ekinywe ky’ekwenene. 16 Aliwe wughane ebinywe ebithawithe mughaso ebikatsandaya ekibuyirire, kundi bikalholha embere erikolya okwa buthakenga Nyamuhanga, 17 n’ekinywe kyabo kikalhandaghana ng’ekironda ekikathanda. Himeneo na Fileto ni baghuma b’okw’ibo. 18 Abalhume aba babirighenda lhuhandi okwa kwenene, bakabugha bathi erilhubuka lyabirinabya kandi banemuhindulha erikirirya ly’abandi. 19 Nomwabine, omusingyi wa Nyamuhanga owaghumire akasighalha inian’imene, inianeko ekiminyikalho kithi, “Yehova anasi abiwe,” kandi, “Obuli mundu oyukabirikira erina lya Yehova aghane ebithathunganene.”
20 Omwa nyumba nene muli ebindu, isi by’ehoro n’efeza bisa aliwe n’eby’omuthi n’eby’omuthaka, ebindi bikakolesibawa okwa mibiiri eyisikibirwe aliwe ebindi okwa yithasikibirwe. 21 Neryo omundu wosi-wosi amayilhusyako eby’emibiiri eyithasikibirwe, iniakendibya kindu ekyangakolesibwa okwa mibiiri eyisikibirwe, iniayirwa mwa mubuyirire, ow’omughaso embere sya mukama wiwe, eriyitheghekera obuli mubiiri owuwene. 22 Neryo wuthibithe wusaghe esyongumbu sy’obunyethu, aliwe wukwamirire erithunganene, erikirirya, olhwanzo, obuholho, kandi wubye haghuma n’abakabirikira Omukama omwa muthima owahenirye.
23 Eryongera okw’ekyo, wughane erikakalhukana ery’obukiru kandi ery’obuthaminya, iwunasi ngoku likalhwiririra mw’amalhwa. 24 Kundi omughombe w’Omukama syatholere akalhwa, aliwe atholere iniabya oyuhehere* embere sy’abosi, oyuwasi erikangirirya, oyukayikakiraya omughulhu bakamusoberaya, 25 oyukakangiriraya abahakani omwa bwolho. Obundi Nyamuhanga iniangana leka ibayisubamo* eribakolya okw’iminya erihikire ery’ekwenene, 26 kandi ibangana buka kw’obulengekania neryo ibatswa omwa kithegho kya Diabolo, kundi abiribahamba ibaneho nuku bakole erisonda liwe.