Ithwamu Ebikaha Nyamuhanga y’Olhukengerwa
“Omugherekania akalebaya ndeke ngoku angaghenda.”—EMI. 14:15.
1, 2. (a) Ni kilhubirirwa kyahi kikulhu ekya thutholere ithwabya nakyo omw’ithwamu lyosi erya thukakolha? (b) Ni bibulyo byahi ebya thukendi kaniako?
OBULI kiro ni bingyi ebyangabya ibikathuyithaghisaya erithwamu. Ebikalhwiririramo omwa bingyi ebya thukathwamu ni bya mughulhu muke. Aliwe ebindi byangana hamba kutsibu oko syongebe syethu. By’ebyahi? Erithwamu. Omw’ithwamu lyosi erya thukakolha, mbulha ni linene kutse ni like, ekilhubirirwa kyethu kikulhu ly’eriha Nyamuhanga y’olhukengerwa.—Soma 1 Abanya Korinto 10:31.
2 Kikanakwolhobera erithwamu, kutse kikakukalira? Thwamabya b’erikulha-kulhana eribya Bakristayo abakulire bunyakirimu, thutholere ithw’igha erighabulha ekibuya oko kibi kandi ithwathwamu ebikakanganaya erikirirya lyethu, butsira ery’owundi mundu. (Abar. 12:1, 2; Ebr. 5:14) Ni sindi nzumwa syahi esikaleka ithwabya ithutholere erigha erithwamu ndeke? Busana naki hakanayira ikyakalha? Kandi ni biika byahi ebyo thwanga kwama nuku thulhangire thuthi thukathwamu ebikaha Nyamuhanga y’olhukengerwa?
Busana Naki Iwathwamu?
3. Ni kyahi ekya thuthatholere thukalighira eringirira erithwamu lyethu?
3 Thwamathendi anguhira erithwamu omughulhu ebihano bye Biblia bikahambawako, abo thukasoma nabu kutse abo thukakolha nabo ibangana ghunzerera bathi sithulighire ndeke ebyo thwikirirye neryo kyanganolhoba ithwe erithebibwa. Ibangana thulha amabehi, ibiba ebizamu, kutse ibiba neryo ibanza erithuthebererya bathi ‘thukwame endeko’ omw’ibayiyungako kutse omw’ibisa ebyo bakolire. (Eri. 23:2) Aliwe, omundu oyuwasi erithwamu ebikaha Nyamuhanga y’olhukengerwa syali lighira eryubaha kutse erianza eriliwa bikaleka akabya n’emibere eyihukene n’obunyamuthima-thima bwiwe obukangiriribwe ne Biblia.—Abar. 13:5.
4. Busana naki abandi bangananza erithuthwiramo?
4 Si bugha ambu abosi abanzire erithuthwiramu bakathusunzira nabi. Abanywani abawithe amalengekania awuwene bangana thuhathikana bathi thukwame erihabulha lyabu. Thwamabya ithwikere haali okw’eka yethu, abahughu bethu bakabya ibananzire kutsibu eriminya nga thuli ya thuthi neryo ibangananza erilholha embere eriyingirya omw’ithwamu lyethu likulhu erya thukakolha. Ng’eky’erileberyako, thalengekania okwa mwatsi w’emithambirire. E Biblia yikathanga ndeke-ndeke eky’erikolesya omusasi wa nabi. (Emib. 15:28, 29) Aliwe eyindi myatsi eyihambire oko maghalha wethu siyilhangirikire neryo yikayithagha obuli mughuma w’okw’ithwe eriyithwiramo nga ni mithambirire yahi eyo akendi ligha kutse erighana.a Abahughu bethu banganabya n’amalengekania awakalire oko myatsi eyi. Aliwe, bikahika oko myatsi eyi, obuli Mukristayo oyuwabiriyihayo n’eribatizibwa atholere iniaheka “omuheke wiwe-wiwe.” (Gal. 6:4, 5) Ekilhubirirwa kyethu kikulhu ly’eribya n’obunyamuthima-thima obuwene embere sya Nyamuhanga, butsira abandu.—1 Tim. 1:5.
5. Thwanga yihighulha thuthi okw’itsekya erikirirya lyethu?
5 Eribya omwa mingangyi kyangana thughusa omo kabi. Omwigha Yakobo mwahandika athi oyuthyanguhirawa erithwamu “syasikire omo nzira siwe syosi.” (Yak. 1:8) Ng’omundu oyuli omo bwathu obutheko engahya oko ngetse eyiriko ekiyagha, iniakendi hekwa omwa malengekania w’abandu. Kyanganolhoba omundu oyo eritseka bunyakirimu neryo enyuma waho iniatsweba abandi busana n’emibere mibi eyo amabyamo eyo! (1 Tim. 1:19) Thwanga yihighulha thuthi okw’ekyo? Thutholere ‘ithwasika omw’ikirirya.’ (Soma Abanya Kolosai 2:6, 7.) Erithoka erisika omw’ikirirya, thutholere ithw’igha erithwamu ebikakanganaya ku thwikirirye omwa Kinywe kya Nyamuhanga. (2 Tim. 3:14-17) Aliwe ni byahi ebyanga lemesya amaaka wethu w’erithwamu ndeke?
Ekyanga leka Erithwamu Iryakalha
6. Obuba bwanga thuhambako buthi?
6 Obuba byangana thulemesya—erisagha erithwama nabi, erisagha erilemwa, kutse erisagha eribya bakiru embere sy’abandi. Amalengekania aya akayitheghereribawa. Sihali oyuwanganza erithwamu nabi, eryangana letha ebitsibu obundi n’ekihemu. Nibya erianza Nyamuhanga n’Ekinywe kiwe byangana leka ithwahwamo obuba. Omo nziraki? Mughulhu wosi erianza Nyamuhanga kikendi thuhira mw’omuhwa w’erilebya omo Kinywe kiwe n’ebitabu ebiseghemere oko Biblia thuthe thwakolha erithwamu likulhu. Neryo ithukendi kehya ebisobyo ebya thukakolha. Busana naki? Kundi e Biblia yanganaha “abakiru b’amenge, n’eriha omulhwana y’amenge n’erisombolha omwatsi.”—Emi. 1:4.
7. Eky’erileberyako ky’Omwami Dawudi kikathweghesayaki?
7 Ithwana thwamu ndeke mughulhu wosi? Eyihi. Ithwe bosi thukasobaya. (Abar. 3:23) Ng’eky’erileberyako, Omwami Dawudi abya mulhume w’amenge kandi muthaleghulha. Aliwe, ihakanayira iniathwamu nabi ikyalethera iyo n’abandi b’ebitsibu. (2 Sam. 12:9-12) Nomwabine, Dawudi mwathalighira ebisobyo biwe bikakakirya amaaka wiwe w’erithwamu ebikatsemesaya Nyamuhanga. (1 Bam. 15:4, 5) Thwangana nguhirwa erithwamu nomuthwangabya ithwanasobirye kera, nethu nga Dawudi, thuk’ibuka ngoku Yehova syendi handa omunwe w’okwa bisobyo byethu kandi ngoku akendi thughanyira ebibi byethu. Akendi lholha embere erisighika abamwanzire kandi abakamwowa.—Esy. 51:1-4, 7-10.
8. Ebya mukwenda Paulo abugha oko butheke bikathweghesayaki?
8 Thwangana kehya amaghaniryo agho thukathunga bikahika okw’ithwamu. Thuthi? Omw’iminya ngoku hakanayira ihabya ihane esyonzira nyingyi esihikire esyo thwanga sombolha. Thulebaye emibere omukwenda Paulo akanirayamu oko mwatsi w’obutheke. Omw’isondolibwa n’omulimu mwahandika athi: “Nikwa omundu amaghanirya athi sy’ikere ndeke busana n’oyo asimolhaya, amabya ane kighungutsya [iniabirilhaba omwa kanyethu kabehi, NWT]. Kandi amabya akaghaniraya athi litholere ibahikania, amabya anzire, sihali kibi, bahikanaye. Nikwa oyusikire omo muthima wiwe, isyali hathikanawa, kandi iniasi ekyo anzire ndeke, amasoha kwenene omo muthima iwe athi siendi syahikya omumbesa oyo, akakolha ndeke.” (1 Kor. 7:36-38) Paulo mwakania okwa buhuru ng’erithwamu eryuwene kutsibu, aliwe isi bugha indi eryo ly’erithwamu erihikire lisa.
9. Mbwino amalengekania agho abandi bawithe okw’ithwamu lyethu anatholere iniathulyambya? Soborera.
9 Mbwino amalengekania agho abandi bawithe okw’ithwamu lyethu anatholere iniathulyambya? Oko lhulengo lhulebe. Lhangira ekya Paulo abugha oko mwatsi w’erirya ebyalya ebyangabya ibiryahererawa okwa syosanamu. Mwakangania ndeke ngoku erithwamu lirebe iryo lyanganabya isiriwire, aliwe iryanganahamba nabi oko mundu oyuwithe obunyamuthima-thima obutsekire. Paulo amanyisayaki? Mwahandika athi, “Neryo ebyalya byamaleka mulikyethu akakolha ebibi, sinendi syaswalya esiswi na kera, ngasyakolesya mulikyethu y’ebibi.” (1 Kor. 8:4-13) Nethu thutholere ithwalebya erithwamu lyethu nga likendi hamba lithi okwa bunyamuthima-thima bw’abandi. Ni kwenene, ekikulhu kutsibu ly’erilebya erithwamu lyethu nga likendi hamba lithi oko bughuma bwethu na Yehova. (Soma Abanya Roma 14:1-4.) Ni misingyi yahi eyikendi thuwathikya erithwamu ebikendiha Nyamuhanga y’olhukengerwa?
Ebiika Mukagha Ebyanga Kuwathikya Erithwamu Ndeke
10, 11. (a) Thwanga yihighulha thuthi okw’ibya n’emiyikangiriro omw’eka? (b) Ni byahi ebyo abasyakulhu batholere ibabya iban’ibukire bakathwamu ebikahamba oko kithunga?
10 Yihighule okwa miyikangiriro. Thuthe thwathwamu, thutholere ithwayibulya, ‘Mbwino ningye nga tholere erithwamu okw’eki?’ Omwami Solomono mwahandika athi: “Omughulhu eriyanza likahika, neryo esisoni sikahika; nikwa amenge ali haghuma n’abakayolhobeka.”—Emi. 11:2.
11 Ababuthi banganaha abaana babu b’akaghisa k’erithwamu okwa bindu birebe, aliwe abaana isibalengekanaya bathi bamabirihebwa obuthoki bw’erikolha ekyo. (Kol. 3:20) Abakali bathahibwa n’abamama banawithe obuthoki okwa lhulengo lhulebe omw’eka aliwe bakakolha ndeke erighondera obukulhu obwa bira babu. (Emi. 1:8; 31:10-18; Efe. 5:23) Kuthya, abiba batholere ibaminya ngoku obuthoki bwabu bunawithe aho bukasubulira kandi ngoku batholere ibaghondera Kristo. (1 Kor. 11:3) Abasyakulhu bakathwamu ebikahamba oko kithunga. Aliwe, bakalhangira bathi ‘sibali lhabaya oko myatsi eyabirihandikwa’ omwa Kinywe kya Nyamuhanga. (1 Kor. 4:6, NWT) Kandi bakakwama ndeke obusondoli obo bakahebawa erilhua okwa mughombe oyuthaleghulha. (Mt. 24:45-47) Ithwangana yilhamya n’abandi okwa maghaniryo n’obulighe ithunalyathwamu okwa bya thuhamulirwe erikolha bisa.
12. (a) Busana naki thutholere ithwasekulya? (b) Soborera ngoku omundu angasekulya.
12 Sekulhaya. Solomono mwahandika athi, “Amalengekania w’ab’omuhwa akaletha bingyi; nikwa obuli mundu w’epaku-paku ni bulha lisa.” (Emi. 21:5) Ng’eky’erileberyako, wunemwanza erikolha eby’ebizinesi? Isiwaghendera okw’iyowa lyawu. Sondaya okwenene kwosi okubihambireko, saba obuhabuli erilhua okwa basi ndeke emyatsi ng’eyo, kandi lebaya nga ni misingyi yahi ye Biblia eyihambire oko mwatsi oyo. (Emi. 20:18) Erithoka erithondekania erisekulya lyawu, thegheka esyolisiti ibiri—enguma eyiriko emighaso, n’eyindi kubye ebikakuyithaghisibawako. Wuthe wathwamu, ‘ghanza’ eby’erikolesya. (Lk. 14:28) Lengekanaya okwa mibere erithwamu lyawu eryo lyanga hambiramo okwa mingirirye yawu n’okwa bunyakirimu bwawu. Kikayithagha endambi n’akaghalha erisekulya. Omw’ikolha ekyo, iwangana yihighulha okw’ithwamu lhuba-lhuba erikakolhaya okwa maghaniryo owathatholere.
13. (a) N’ikakasya lyahi eriri omu Yakobo 1:5? (b) Erisaba Yehova y’amenge kyanga thuwathikya kithi?
13 Saba Yehova akuhe amenge. Ebya thukathwamu ibikendiha Nyamuhanga y’olhukengerwa ithunalyamusaba erithuwathikya thukathwamu. Omwigha Yakobo mwahandika athi: “Hamabya mundu omo kathi-kathi kenyu oyukabulha amenge, abulhaye Nyamuhanga oyukaha ndeke oko bandu bosi butsira buhemu; neryo omundu oyo asyahabwa amenge ayo.” (Yak. 1:5) Si bugha indi ithukendi hemuka thwamaligha ngoku thukayithagha amenge wa Nyamuhanga erithuwathikya erithwamu. (Emi. 3:5, 6) Kundi nibya, eriyikethera amaaka wethu kyangana thuherya. Thwamasaba Yehova y’amenge kandi thukasekulya omwa Kinywe kiwe mw’emisingyi, ithukendi lighira omulimu abuyirire erithuwathikya eriminya ebilhubirirwa byethu eby’erianza erikwama enzira ndebe.—Ebr. 4:12; soma Yakobo 1:22-25.
14. Busana naki thutholere ithwayihighulha okw’iyilhagha-lhagha?
14 Ithwamu. Isiwaharabanira erithwamu wuthe wasekulya n’erisaba Yehova y’amenge. Omundu w’amenge akathwalha endambi ‘erilebya ndeke ngoku angaghenda.’ (Emi. 14:15) Okwa lhundi lhuhandi, isiwayilhagha-lhagha. Oyukayilhagha-lhagha anganayisanga iniabiribana eby’eriyihambulyamo. (Emi. 22:13) Nomwabine akabya iniabirithwamu—akathwamu, ni bugha ambu, akalighira bandi erisondolha engebe yiwe.
15, 16. Ni byahi ebikayithaghisibawa erihira erithwamu ly’omwa mikolere?
15 Hira erithwamu lyawu ly’omwa mikolere. Akaghalha ako thukahiraho thukathwamu ndeke kanganakwa busa thwamathendi hira ebyo thwabirithwamo by’omwa mikolere. Solomono mwahandika athi, “Ekinduki ekyo ebyalha byawu bikabana erikolha, wukikole n’amaaka wawu wosi.” (Omu. 9:10) Erithoka erikolha ekyo, thutholere ithwabya ithunayitheghekire eribana ebikayithaghisibawa erihira ebya thukathwamu by’omwa mikolere. Ng’eky’erileberyako, omuthuliri omo kithunga anganathwamu erikolha obutemburi. Mbwino anemwendi thoka? Iniangana thoka amathendi lighira omubiiri w’ekihugho n’eby’eriyitsemesya erirya akaghalha kiwe n’erimulira endambi eyo akayithagha erikolha omubiiri w’erithulira.
16 Erithwamu eryuwene mughulhu mungyi ly’ery’abandu bathanguhirawa erihira omwa mikolere. Busana naki? Kundi “ekihugho kyosi kiri omo buthoki bw’omubi.” (1 Yn. 5:19) Thutholere ithwalhwa ‘n’abathabali, n’ab’amaaka, n’ab’ehamuli b’omw’iramya muna-kihugho, n’emilhondo y’ebirimu by’ebibi ebiri omo kyanya.’ (Efe. 6:12) Omukwenda Paulo n’omwigha Yuda mubakangania ngoku abakathwamu eriha Nyamuhanga y’olhukengerwa bakendi syabya omo malhwa.—1 Tim. 6:12; Yuda 3.
17. Bikahika okw’ithwamu eryo thukakolha, Yehova anzire ithwakolhaki?
17 Lebaya erithwamu lyawu kandi kolha esyombinduka kyamayithaghisibwa. Si bugha ambu erithwamu lyosi likabya ngoku wulhue wutheghekire. “Endambi n’ebikawa kitsumbukirania” bikahika okwa bosi. (Omu. 9:11, NWT) Nomwabine bithya, Yehova anzire ithwaghumira erithwamu lirebe nomuthwangabana ebitsibu. Omundu erithwamu eriyihayo oku Yehova kutse eriyilhagha eringira omwa butheke sikiribya mw’eriyisubako. Nyamuhanga anzire ithwaberererya erithwamu ng’eryo. (Soma Esyonyimbo 15:1, 2, 4.) Aliwe erindi ithwamu siriwithe bulitho bunene. Ow’amenge akendibya inianemulebya erithwamu liwe. Syendi lighira emiyiheko kutse olhughalha-lhagha bikamukakirya okw’ikolha esyombinduka omw’ithwamu liwe. (Emi. 16:18) Ekilhubirirwa kiwe kikulhu ly’erilhangira athi engebe yiwe yikalholha embere eriha Nyamuhanga y’olhukengerwa.
Thendeka Abandi Bathwemu Ebikaha Nyamuhanga y’Olhukengerwa
18. Ababuthi banga thendeka bathi abaana babu erithwamu ndeke?
18 Ababuthi bangana kolha bingyi eriwathikya abaana babu erithwamu ebikaha Nyamuhanga y’olhukengerwa. Eribya ky’erileberyako ekyuwene ky’ekikakangiriraya ndeke. (Lk. 6:40) Kyamathokekana, ababuthi ibangana soborera abaana babu ebiika ebyo ibo bakolha bakakolha erithwamu lirebe. Kandi bangananza erilighira abaana babu erikolha erithwamu lirebe neryo ibabasima erithwamu lyabu likalhwiriramo ebibuya. Kandi ibbwa omwana amathwamu nabi? Ekilhubirirwa ky’erimbere eky’omubuthi kyanganabya iry’eritheya omwana wiwe okwa bitsibu ebikalhwiririramo, aliwe erikolha ekyo kyanganabya isi kyo omwana akayithagha mughulhu wosi. Ng’eky’erileberyako, omubuthi iniangana lighira omwana wiwe erithunga elayisisi y’erifugha ematoka. Thubughe thuthi omwana iniathwa ekilhaghiro ky’erighendya ematoka neryo iniatswerwa efayini. Omubuthi iniangana thuha efayini eyo. Aliwe, omwana amabya w’erikolha nuku athuhe efayini eyo, inianganongera eriminya ngoku ebyo alyakolha biri okwa muthwe wiwe.—Abar. 13:4.
19. Ni byahi ebyo thwanga kangirirya abigha be Biblia, kandi thwanga kolha ekyo kya thuthi?
19 Yesu mwabwira abigha biwe athi bakangiriraye abandi. (Mt. 28:20) Erighuma ly’okwa masomo makulhu agho thwanga kangirirya abigha be Biblia ly’eribeghesya ngoku banga thwamu ndeke. Erithoka erikolha ekyo kya ndeke, thutholere ithwayihighulha okw’anza eribabwira eky’erikolha. Ni kikulhu ithwe eribakangirirya ngoku banga ghanirya oko misingyi ye Biblia nuku banga thoka eriyithwiramo. Kundi nibya, “obuli mundu asyakangania Nyamuhanga ebyo akolha.” (Abar. 14:12) Busana n’ekyo, ithwe bosi thuwithe enzumwa mbuya esy’erithwamu ebikaha Nyamuhanga y’olhukengerwa.
[Omwatsi ahikwa]
a Eriminya bingyi ebihambire oko mwatsi oyu, lebaya omwatsi “Obutsweka-Butsweka Obuli Omwa Musasi n’Emithambirire Eyiri mw’Erikolesya Omusasi, Nga Bilhangira Indi?,” okwa lhupapura olhw’omwakathi olhw’Omubiiri Wethu ow’Obwami, olhwa Novemba 2006, olhupapura 3-6.
Wanga Subirya Wuthiki?
• Busana naki thukayithagha erigha erithwamu ndeke?
• Obuba bwanga thuhambako buthi, kandi thwanga busingura thuthi?
• Ni biika byahi mukagha ebyanga thuwathikya erithwamu ebikaha Nyamuhanga y’olhukengerwa?
[Akasanduko/Ekisasani]
Ebiika Ebyanga Kuwathikya Erithwamu Ndeke
1 Yihighule okwa miyikangiriro
2 Sekulhaya
3 Saba Yehova y’amenge
4 Ithwamu
5 Hira erithwamu lyawu ly’omwa mikolere
6 Lebaya kandi kolha esyombinduka
[Ekisasani]
Oyuthyanguhirawa erithwamu ali ng’omundu oyuli omo bwathu obutheko engahya oko ngetse eyiriko ekiyagha