Kunekenena Lunengezho lwa Lesa

KUNEKENENA Lesa, Nkambo Walengele Bintu Byonse kwanema bingi inge tukeba’mba tukwatankane pa kuba kyaswa muchima wanji. Twayuka luusa luji na Mwananji pa kipwilo kya bena Kilishitu kabiji tulondela byaamba mafunde pa buntangi mu bwikalo bwetu bonse. Kunekenena lunengezho lwa Lesa lwa bumutwe kwa uno mutundu kulengela bonse kumwenamo bintu byawama.

² Jifunde ja kunekenena buntangi bejipaine ku bantu mu bujimi bwa Edena. Jino jifunde jiji mu mikambizho ya Lesa itanwa pa Ntendekelo 1:28 ne 2:16, 17. Banyama bafwainwe kunekenenanga bantu, kabiji ba Adama ne Evwa bafwainwe kukokela kyaswa muchima wa Lesa ne buntangi bwanji. Kukookela buno buntangi bwa Lesa kwafwainwe kuleta mutende ne kulengela bintu kwikela monka mo byalondankena. Jifunde ja bumutwe bejambapo ne pa 1 Kolinda 11:3. Mutumwa Paulo wanembele’mba: “Nakeba namba muyuke’mba, mutwe wa mwanamulume yense ye Kilishitu; kabiji mutwe wa mwanamukazhi ye mwanamulume; kabiji mutwe wa Kilishitu ye Lesa.” Kino kibena kumwesha’mba kufumyakotu Yehoba, atweba bonse twafwainwa kunekenenanga buntangi bo abikako.

³ Bantu bavula lelo jino kechi balondela mafunde aamba pa buntangi ne. Mambo ka? Lukatazho lwatendekejile mu Edena, kimye bansemi betu batanshi kyo balengulwijilemotu kyanshiji buntangi bwa Lesa. (Nte. 3:4, 5) Nangwa byonkabyo, kechi baikele na bwana bwa bene bwa kine ne. Batendekele kwibatangijila ku kilengwa kya mupashi kyatama, aye Satana Diabola. Bunsatuki butanshi bwaabenye bufunda bwajinga pa bantu ne Lesa. (Kolo. 1:21) Kyafumamo, bantu bavula lelo jino baji mu bulume bwa kwa aye mubi.—1 Yoa. 5:19.

⁴ Inge twatwajijila kufunda bukine buji mu Mambo a Lesa ne kwibwingijishanga, Satana kechi uketutwala mungi ne. Byo tuji Bakamonyi bepana kabiji babatizhiwa, tukookela Yehoba mambo ye Nkambo witupa bumi. Twaswa byambo byaambile Mfumu Davida bya kuba’mba, Yehoba ye “mwine [mutwe] wakila pa bonse.” (1 Moba 29:11) Twamba na kwipelula amba: “Yukai’mba Yehoba ye Lesa. Aye ye witulengele, ne atweba twi bantu banji. Twi bantu banji kabiji mikooko yanji yo ajiisha.” (Sala. 100:3) Twayuka’mba Yehoba ye mukatampe ne kuba’mba ye ye twafwainwa kunekenena na muchima yense, mambo ye walengele bintu byonse. (Lum. 4:11) Byo tuji ba mingilo ba Lesa wa kine, tulondela Yesu Kilishitu wamwesheshe byo twafwainwa kunekenenanga Lesa.

⁵ Yesu wafunjijileko ka ku bintu byo amanamineko kimye kyo ajinga pano pa ntanda? Buku wa Bahebelu 5:8 wakumbula’mba: “Nangwa kya kuba wajinga mwana, wafunjile lukookelo ku bintu byo amanamine.” Kwambatu kine, Yesu watwajijile kunekenena Shanji wa mwiulu mu bukishinka nangwatu kimye kyo apichilenga mu bya malwa. Kabiji Yesu kechi wiubijilepo kintu nangwa kimo aye mwine ne. Kechi waambanga bya ku muchima wanji mwine ne; kabiji kechi wikebelanga mwine lukumo ne. (Yoa. 5:19, 30; 6:38; 7:16-18) Byo aingijilenga mwingilo wanji pano pa ntanda, wataaine lusekelo mu kuba kyaswa muchima wa Shanji nangwa kya kuba uno mwingilo walengejile bantu kumushikwa ne kumumanyika. (Yoa. 15:20) Nangwa byonkabyo, Yesu wanekenenanga Lesa. Yesu “wipelwile mwine” kufikatu ne ku “lufu lwa pa kichi kya lumanamo.” Kunekenena Yehoba na muchima yense kwaletele mfweto mu mashinda avula bingi, mwafumine lupulukilo lwa bantu lwa myaka ne myaka, kutumbijikwa aye mwine ne kuletela Shanji lukumo.—Fili. 2:5-11; Hebe. 5:9.

BAÑANYI BO TWAFWAINWA KUNEKENENANGA?

⁶ Inge twanekenena Lesa pa kuba kyaswa muchima wanji, kechi tukekala na bijikila ne makatazhotu akwabo eya pa bantu bakana kukookela buntangi bwa Yehoba ne. Kimye kyonse mulwanyi wetu Diabola ukebesha kwituja. Yehoba uketupokolola ku uno mubi umvwe twamwimena saka twakosa ne kwipelula kwi Yehoba na muchima wetu yense.—Mat. 6:10, 13; 1 Pe. 5:6-9.

⁷ Mu kipwilo kya bena Kilishitu, tulondela Kilishitu mutwe wa kipwilo ne kukookela “kalume wa kishinka kabiji wa maana.” Kino kitukwasha kwikala na byubilo byawama na bakwetu. Kunekenena lunengezho lwa Lesa mu kipwilo kuketulengela kukookela Mambo a Lesa mu mbaji yonse ya mpopwelo yetu. Kuno kukookela kwavwangamo kwingilako mwingilo wetu wa kusapwila, kutanwa ku kupwila ne kukumbulapo, kukookela bakulumpe mu kipwilo ne kulondela mikambizho iji mu jibumba ja Lesa.—Mat. 24:45-47; 28:19, 20; Hebe. 10:24, 25; 13:7, 17.

⁸ Kunekenena Lesa kwitulengela kwikala mu mutende, kwituzhikijila ne kulengela bintu kwenda bulongo mu kipwilo kya bena Kilishitu. Byubilo bya Yehoba bimwekela mu bantu banji bamunekenena. (1 Ko. 14:33, 40) Bintu byo twimwena atweba bene mu jibumba ja Yehoba, bitulengela kwamba byambo byaambilepo Mfumu Davida. Byo amwene lupusano luji pa bakalume ba Yehoba ne babi, Davida wabijikile na lusekelo amba: “Bo bene ba lusekelo bantu baji na Lesa wabo Yehoba!”—Sala. 144:15.

⁹ Mu masongola ne mu bisemi, “mutwe wa mwanamukazhi ye mwanamulume.” Kabiji banabalume nabo bafwainwa kunekenena Kilishitu, kabiji mutwe wa Kilishitu ye Lesa. (1 Ko. 11:3) Banabakazhi bafwainwa kunekenena bamwatawabo. Kabiji baana nabo bafwainwa kunekenena bansemi babo. (Efi. 5:22-24; 6:1) Mu kisemi mwikala mutende inge bonse ke balondele jifunde jaamba pa kunekenena mutwe.

¹⁰ Mwanamulume wafwainwa kwingijisha bumutwe mu jishinda ja butemwe ne kulondela Kilishitu. (Efi. 5:25-29) Inge mwanamulume keengijishe bulongo bumutwe bwanji, kipelela bingi mukazhanji ne baana banji kumunekenena. Mwingilo wa mwanamukazhi ke wa kwikala nkwasho wafwainwa. (Nte. 2:18) Umvwe saka akwasha ne kunemeka mwatawanji na butekanye, mwatawanji ukamutemwa ne kupana lukumo kwi Lesa. (1 Pe. 3:1-4) Inge ba mulume ne mukazhi saka balondela byaamba Baibolo mu kisemi kyabo, bakafunjisha baana babo kunekenenanga Lesa.

¹¹ Kunekenena Lesa kwitulengela ne kunekenena “bakulumpe balama kyalo,” ‘Lesa bo aswisha kwikala pa bifulo byabo.’ (Loma 13:1-7) Byo baji bangikazhi bakookela mizhilo, bena Kilishitu bapana misonko ne kupana “bintu bya kwa Kesala kwi Kesala, kabiji bintu bya kwa Lesa, kwi Lesa.” (Mat. 22:21) Kabiji pa kunengezha kwingijila mu nyaunda yabaya, londelai mikambizho yo bemupa yaamba pa kwimuzhikijila. Kunekenena ne kukookela buntangi mu bintu byonse bibula kupusenamo na mizhilo ya Yehoba yaoloka, kwitulengela kwingijisha ngovu yetu bulongo mu mwingilo wa kusapwila.—Mako 13:10; Byu. 5:29.

¹² Twafwainwa kunekenenanga Lesa mu bwikalo bwetu bonse. Tutengela kimye bantu bonse kyo bakanekenenanga Yehoba Lesa. (1 Ko. 15:27, 28) Aba bonse bakatwajijila kunekenena buntangi bwa Yehoba ne kumukookela bakebapesha bingi!