Yehoba Umwesha Lukumo Lwanji ku Bepelula

“Mfweto ya kwipelula ne ya kwakamwa Yehoba bo bunonshi ne buneme ne bumi.”—BYAMBO BYA MANA 22:4.

1, 2. (a) Buku wa Byubilo bya Batumwa wamwesha byepi kuba’mba Setepena waji “muntu wayujile lwitabilo ne mupashi wazhila”? (b) Bishinka ka bimwesha’mba Setepena wajinga muntu wipelwile?

SETEPENA waji “muntu wayujile lwitabilo ne mupashi wazhila.” Kabiji “wayujile bupe ne bulume.” Byo ajinga umo wa mu baana ba bwanga batanshi ba kwa Yesu, waubilenga bya kukumya ne biyukilo bikatampe mu bantu. Kimye kimo kwaimene banabalume bamo bepachikilenga nanji, bino ‘kechi bakonsheshe kushinda aa maana ne mupashi ye aambilengamo ne.’ (Byubilo 6:5, 8-10) Kine Setepena waji na mukoyo wa kufunda Mambo a Lesa, ne kumona’mba Bayudea bantangi ba bupopweshi kechi beatamisha ne. Bishinka byaamba pe aye byanembwa mu Byubilo bya Batumwa kyapitala 7, byamwesha lusekelo lo ajinga nalo mu nkebelo ya Lesa yailenga na kufikizhiwa.

² Kupusanako na boba bantangi ba bupopweshi belundumikilenga ku bantu na mambo a bifulo ne maana o bajinga nao, Setepena wajinga muntu wipelwile. (Mateo 23:2-7) Nangwa kya kuba wayukishe bingi bulongo Binembelo, wajinga na lusekelo mu “mwingilo wa ku matebulu” ye apewe kwingila, ne kino kyalengejile batumwa kuswezhatu mu “lulombelo ne mu kusapwila mambo.” Setepena wajinga na byubilo byawama mu balongo ne onkao mambo naye bamusajile pamo na banabalume batelelwe bulongo batongwejilwe mwingilo wa ku matebulu wa pa juba pa juba. Waitabile kwingila uno mwingilo na kwipelula.—Byubilo 6:1-6.

3. Ñanyi lusa lukatampe lwa Lesa lwamwene Setepena?

³ Kwipelula kwa kwa Setepena, bumupashi ne bukishinka bwanji, byamwekele ku meso a Yehoba. Setepena byo asapwijilenga ku jibumba jabula lusa ja bantangi ba Bayudea mu Saniedilini, bamulengulwilenga “bamwene kilungi kyanji no kilungi kya malaika.” (Byubilo 6:15) Kilungi kyanji kyamwekele’mba kya muluwe wa Lesa, waletele mutende kufuma kwi Lesa wa lukumo, Yehoba. Panyuma ya kusapwila na kuchinchika ku kije kya Saniedilini, Setepena wamwene lusa lukatampe lwa Lesa. “Byo ayujile na mupashi wazhila, watajijishe mwiulu, wamwene lukumo lwa Lesa, ne Yesu kasa aimana ku kilujo kya Lesa.” (Byubilo 7:55) Kwi Setepena, kino kimwesho kyalumbulwile kifulo kya kwa Yesu amba Mwana Lesa kabiji Mesiasa. Kyakoseshe Setepena wipelwile ne kushiinwa’mba waji na bibusa bya Lesa.

4. Yehoba umwesha bañanyi lukumo lwanji?

⁴ Monka mwayila kimwesho kyamwene Setepena, Yehoba umwesha lukumo ne nkebelo yanji ku bantu bamwakamwa, bepelula ne kunemeka bulunda bwabo ne aye. Baibolo waamba’mba: “Mfweto ya kwipelula ne ya kwakamwa Yehoba bo bunonshi ne buneme ne bumi.” (Byambo bya Mana 22:4) Onkao mambo, kyanema bingi kuyuka kwipelula kwa kine byo kuji, byo twakonsha kwikala na kino kyubilo kyanema, ne byo tumwenamo mu kumwesha kino kyonka kyubilo mu bwikalo bwetu bonse.

Kwipelula—Kyubilo kya Lesa

5, 6. (a) Nanchi kwipelula ko kuka? (b) Nga Yehoba wamwesha byepi kwipelula? (c) Kwipelula kwa Yehoba kwitulengela kuba byepi?

⁵ Kyakonsha kwikala kya kukumya ku bantu bamo kumvwa’mba Yehoba Lesa wakila bilengwa byonse, aye wa lukumo ye mwine wa kumwenako mu kwipelula. Mfumu Davida waambile kwi Lesa amba: “Mwampa jikebo ja lupulukilo lwenu; ne kuboko kwenu kwa kilujo kwañimanyika, kabiji kukokamuchima kwenu kwangalula ke mukatampe.” (Masalamo 18:35) Davida byo alondolwele kuba’mba Yehoba wipelula, waingijishe kine kyambo kya Kihebelu kilumbulula “kulambila panshi.” Kuji ne byambo bikwabo bipasha na kine kyambo kwafuma kyambo kya “kwipelula.” Bino byambo byavwangamo “kukoka muchima,” “bukimote,” ne “kwikepesha kwa muntu wakila.” Yehoba wipelwile byo emwesheshe aye mwine kwi Davida mbulwakoloka ne kumwikazha ke mfumu Wanji wa kumwimenako. Kwesakana na bilumbulula tubyambo twa peulu ya Salamo 18, Yehoba wazhikijile ne kukwasha Davida, wamupokolwele “mu maboko a balwanyi banji bonse, ne ku kuboko kwa Saulo.” Davida naye, wayukile kuba’mba kifulo nangwa lukumo lonse lo afwainwe kwikala nalo byo ajinga mfumu lwaishile na mambo a kuba Yehoba wipelwile mwine. Kulabijila kino kwakwashishe Davida kwikala wipelula.

⁶ Ibyepi kwi atweba? Yehoba wasalapo kwitufunjisha bukine, kabiji kimo kimye wakonsha kwitupapo mwingilo umo wanema mu jibumba janji nangwa wakonsha kwitwingijisha mu jishinda jikwabo ja kubilamo kyaswa muchima wanji. Twakonsha kumvwa byepi? Nanchi kuba twipelula nenyi? Nanchi kuba twasanchila Yehoba pa kwipelula kwanji, ne kuchinuzhuka kwitota, kwiletela atweba bene malwa nyi?—Byambo bya Mana 16:18; 29:23.

7, 8. (a) Yehoba wamwesheshe byepi kwipelula mu kwingila ne Manase? (b) Mu ñanyi jishinda Yehoba, ne Manase, mo baikela ba kumwenako bekepeshe bo twakonsha kulondela?

⁷ Yehoba kechi wamweshatu kwipelula konka mu kwingila na bantu bambulwakoloka ne, bino wamwesha ne kizaku kya kubila bantu bakoka michima lusa, ne kwibemanya, ko kuba’mba kubusha boba bepelula. (Masalamo 113:4-7) Kya kumwenako, langulukai pa mambo a Mfumu wa bena Yuda Manase. Waingijishe kifulo kyanji kya bufumu kutundaikilamo mpopwelo ya bubela. “Waubilenga bubi bwavujisha ku meso a Yehoba ne kumukolomona bukaji.” (2 Byambo bya Moba 33:6) Onkao mambo, Yehoba wafumishe Manase pa bufumu byo aswishishe mfumu wa bena Asilya kumukwata. Bino kimye Manase ajinga mu kaleya “wasashijilenga Yehoba Lesa wanji, ne kwipelula kya kine kine,” kuba’mba Yehoba amubwezhe ku Yelusalema mu bufumu bwanji. Kabiji Manase “wayukile’mba: Yehoba ye Lesa [wa kine].” (2 Byambo bya Moba 33:11-13) Kine, kwipelula kwa kwa Manase kwatokeshe Yehoba pa muchima, kabiji ne aye wamwesheshe kwipelula pa kumulekelako mambo ne kumubwezha pa bufumu.

⁸ Kumulekelako mambo ko aubile Yehoba ne lulapilo lwanji aye Manase bipana lufunjisho lwanema lwa kwipelula kwi atweba. Twafwainwa kulabijila kimye kyonse kuba’mba byo tumona bantu betuzhingijisha ne byubilo byo tumwesha inge twalenga mambo byakonsha kuzhingijisha Yehoba nangwa kumulengela kusekela mwi atweba. Umvwe twalekelako mambo bakwetu betulenga mambo ne mu kwipelula twaitaba bilubo byetu, Yehoba wakonsha kwitubila lusa.—Mateo 5:23, 24; 6:12.

Lukumo lwa Lesa Lwamweshiwa ku Bepelula

9. Nanchi kwipelula kayukilo ka bukoke nyi? Londololai.

⁹ Bino, kwipelula ne byubilo bikwabo bipashako, kechi byafwainwa kumonwa amba bukoke nangwa’mba jishinda ja kwitabizhizhamo bubi ne. Byonka byaamba Binembelo Byazhila, Yehoba wipelula, bino umwesha bukaji ne bulume bwanji bulenga moyo mu koloka inge wauba’mba ebwingijishe. Na mambo a kuba Yehoba wipelula, watesha muchima ku bonse bakoka michima, ko kuba’mba wibalanguluka kimye kyonse, kabiji ku betota kechi watako muchima ne. (Masalamo 138:6) Nga Yehoba ulanguluka byepi ba mingilo banji bepelula?

10. Bika Yehoba byo amwesha bantu bepelula byaambiwapo mu 1 Kolinda 2:6-10?

¹⁰ Mu kimye kyanji mwine ne jishinda jo asala ja kumvwañenamo, Yehoba wibamwesha bantu bepelula byo akafikizha nkebelo yanji. Bino bya lukumo, byafyamika ku bantu bonse betota batemwa maana nangwa milanguluko ya ba panopantanda. (1 Kolinda 2:6-10) Bino bantu bepelula, bapewa maana alumbuluka a kuyuka nkebelo ya Yehoba, bapana lukumo kwi Yehoba mambo banemekesha lukumo lwanji.

11. Mu myaka kitota kitanshi, bamo bakankelwe byepi kwipelula, kabiji kino kibatamijile byepi?

¹¹ Mu myaka kitota kitanshi, bantu bavula, kuvwangako ne bebepela kwikala bena Kilishitu, bakankelwe kwipelula kabiji balefwilwe na byaambile mutumwa Paulo pa mambo a nkebelo ya Lesa. Paulo waalukile “mutumwa wa [mu] bagentila” kechi na mambo a bugentila, kwikala wafunda, wakoma, nangwa kwingila mingilo yawama pa myaka yavula ne. (Loma 11:13) Javula, bantu bamona bino nobe byo bintu bilengela Yehoba kutongola muntu ye afwainwa kwingijisha. (1 Kolinda 1:26-29; 3:1; Kolose 2:18) Bino, Paulo bamusajijile monka mwayijile lusa lwa Yehoba ne nkebelo yaoloka. (1 Kolinda 15:8-10) Bantu bo aambilepo Paulo amba “batumwa bakila,” pamo ne bantu bakwabo balengulwilenga, bakaine kumvwina Paulo ne mo alumbulwijile Binembelo. Kubula kwipelula kwabo kwibalengejile kubula kutambula maana ne kuyuka jishinda ja lukumo Yehoba jo akafikizhizhamo nkebelo yanji. Kange tubulenga kunemeka bo asala Yehoba mwine kwingijisha kufikizhizhamo kyaswa muchima wanji ne. Kechi twafwainwa nangwa pachechetu kwibasula ne.—2 Kolinda 11:4-6.

12. Kya kumwenako kya Mosesa kimwesha byepi kuba’mba Yehoba ubila bibusa bepelula?

¹² Kabiji, mu Baibolo muji bya kumwenako byavula byamwesha bantu bepelula byo baji na jishuko ja kumona lukumo lwa Lesa. Mosesa, “wajinga kimote kukila” bantu bonse, wamwene lukumo lwa Lesa ne kwikala mulunda nanji. (Kubala 12:3) Uno muntu wipelwile, waingijile mwingilo wasulwa wa bukafunga pa myaka 40, myaka yavula mu Alabya. Mulenga wamubijile bibusa mu mashinda avula bingi. (Kulupuka 6:12, 30) Yehoba wakwashishe Mosesa kwikala wa kumwambilako ne wa kunengezha mukoka wa bena Isalela. Wajinga wa kwamba ku mbaji yonse ibiji. Kupichila mu kimwesho, wamwene “kipasha kya Yehoba.” (Kubala 12:7, 8; Kulupuka 24:10, 11) Aba bayukile wa mwingilo wipelula kabiji muluwe wa Lesa nabo baubilwe bibusa. Kyo kimotu, netuwa tukobilwa bibusa umvwe twamuyuka ngauzhi mukatampe wakila Mosesa, aye Yesu, ne ‘kalume wa kishinka ne wa maana’ watongolwa kwi aye.—Mateo 24:45, 46; Byubilo 3:22.

13. Lukumo lwa Yehoba lwamweshiwe byepi ku bakafunga bepelwile mu myaka kitota kitanshi?

¹³ ‘Lukumo lwa [Yehoba] lwasamine’ ba ñanyi pamo na jiwi ja malaika jaletele mambo awama a kusemwa kwa ‘Mupulushi, Kilishitu Nkambo’? Kechi ku bantangi bafunda ba bupopweshi nangwa ku ba binemanga ne, bino wamwekele ku bakafunga bepelula “baikajile mungye bufuku na kulama jitanga jabo.” (Luka 2:8-11) Aba bantu kechi banemekelwe kya kine na mambo a mwingilo ye baingilanga ne. Bino, Yehoba bobo amwekejile ne kwibabula kusemwa kwa Mesiasa. Ee, Yehoba wasolwele lukumo lwanji ku bantu bepelwile kabiji bamwakaminwe.

14. Ñanyi mapesho Lesa o aletela bantu bepelula?

¹⁴ Bino bya kumwenako bitufunjisha ka? Bitubula’mba Yehoba ubila bibusa ne kusolwela maana ne kuyuka nkebelo yanji ku bantu bepelula. Usala bantu babula kufunda kufika palepa, baketekelwa ku bantu amba bo bafwainwa, ne kwibengijisha kubulañana nkebelo yanji ya lukumo ku bantu. Byo twafunda byafwainwa kwitutundaika kukeba bukwasho kwi Yehoba, Mambo anji a bungauzhi, ne mikambizho kupichila mu jibumba janji. Twakonsha kuketekela’mba Yehoba ukatwajijila na kubula ba mingilo banji bepelula bya nkebelo yanji ya lukumo. Ngauzhi Amosi waamba’mba: “Nkambo Yehoba kechi uba kintu kwa kubula kwikisolwela jimo ku bakalume banji bangauzhi ne.”—Amosi 3:7.

Komainga mu Kwipelula ne Kubilwa Bibusa na Lesa

15. Mambo ka o twakonshesha kutwajijila kwikala bekepesha, kabiji kino kyamweshiwe byepi mu mambo a Saulo Mfumu wa bena Isalela?

¹⁵ Pa kwikala na bibusa bya Lesa twafwainwa saka tukelwa mu kwipelula. Mambo inge muntu wipelula mu bwikalo bwanji kechi kilumbulula amba ukatwajijila byonkabyo na kwipelula ne. Kyakonsheka ku muntu pa kimye kimo kuleka kwipelula ne kutendeka kwitota ako kwakonsha kuleta malwa akatampe. Byo byaubile Saulo washingilwe kwikala mfumu mutanshi wa bena Isalela. Kimye kyo asajilwe, aye mwine wimwene “mucheche.” (1 Samwela 15:17) Bino, panyuma ya kwikala pa bufumu myakatu ibiji, watendekele kwilundumika. Wakankelwe kulondela lunengezho lwa Yehoba lwa kupana mulambo kupichila mwi ngauzhi Samwela ne kulomba lulekelo lwa mambo lwa kine kintu kyo apaine mulambo aye mwine. (1 Samwela 13:1, 8-14) Po patendekejile bintu byamwesheshe kubula kwipelula. Mupashi ne bibusa bya Lesa byafuminemo mwi aye, ne kyapeleleko wafwile lufu lwatama bingi. (1 Samwela 15:3-19, 26; 28:6; 31:4) Lufunjisho lwayukanyikwa: Twafwainwa kutwajijila kwipelula ne kwikala na lukokelo, kukokesha byubilo bya kwilundumika, kuchina’mba byakalengela Yehoba kubula kwitubila bibusa.

16. Kulanguluka pa bulunda bwetu ne Yehoba ne bakwetu kwakonsha kwitukwasha byepi kukomesha kwipelula?

¹⁶ Nangwa kya kuba kwipelula kechi kuji pa bipangwa bya mupashi wa Lesa ne, bino ke kyubilo kya Lesa kyo twafwainwa kukomesha. (Ngalatiya 5:22, 23; Kolose 3:10, 12) Byo mwavwangwa milanguluko yetu, ko kuba’mba byo twimona ne byo tumona bakwetu, kukomesha kwipelula kukebewa kwibikako. Kulanguluka langulukapo pa bulunda bwetu ne Yehoba ne bakwetu kwakonsha kwitukwasha kutwajijila kwikala bepelula. Ku meso a Lesa, bantu bauba nobe nsono iji na kimye kya kukomenamo, ne pa kupitapo kimye yuma. Bantu bamweka nobe batete mu lubanza. (Isaya 40:6, 7, 22) Nanchi lusono umo wakonsha kwitota amba mambo walepa kukila nsono ikwabo nyi? Abya tete wakonsha kwitota amba uji na bulume bingi mambo akuba wakonsha kukiluka kukila batete bakwabo nyi? Ndangulukilo ya uno mutundu imwesha kubula maana. Onkao mambo, mutumwa Paulo wavulwileko bena Kilishitu bakwabo amba: “Ñanyi wakumona’mba wakila mukwenu? Kabiji i ki ka kyo uji nakyo kyo wabujile kutambula? Kabiji umvwe wikitambwile, mambo ka o witotela nobe wabujile kwikitambula?” (1 Kolinda 4:7) Kulanguluka pa byambo biji mu Baibolo nobe bibye, kwakonsha kwitukwasha kukomesha ne kumwesha kwipelula.

17. Ki ka kyakwashishe ngauzhi Danyela kukomesha kwipelula, kabiji ki ka kyakonsha kwitukwasha netuwa kuba monka mo aubijile?

¹⁷ Ngauzhi Muhebelu, aye Danyela bamutongwele amba “muntu ye batemwa bingi” mambo a “kwipelula” ku meso a Lesa. (Danyela 10:11, 12) Ki ka kyakwashishe Danyela kukomesha kwipelula? Kitanshi, wamwesheshe luketekelo lwakosa mwi Yehoba, wakelwanga kikupu na kulomba kwi aye. (Danyela 6:10, 11) Kunungapo, Danyela waji na mukoyo wa kufunda Mambo a Lesa, ao amukwashishe kumvwisha nkebelo ya lukumo lwa Lesa. Kabiji wavulukile ne bilubo byanji, kechi bya bantu banji byonkatu ne. Wasekejile ne mu kutwala palutwe bololoke bwa Lesa, kechi bwanji bonkatu ne. (Danyela 9:2, 5, 7) Nanchi twakonsha kufunjilako kwi Danyela ne kweseka kukomesha ne kumwesha kwipelula mu bwikalo bwetu bonse nyi?

18. Ñanyi lukumo lupempelela bonse bepelula mu ano moba?

¹⁸ Byambo bya Mana 22:4 byaamba’mba: “Mfweto ya kwipelula ne ya kwakamwa Yehoba bo bunonshi ne buneme ne bumi.” Kine, Yehoba ubila bibusa bonse bepelula, ne kifumamo ke buneme ne bumi. Kwashajiletu pacheche kuba’mba nyimbi wa masalamo, aye Asafwa aleke mwingilo wa kwingijila Lesa, bino panyuma ya kumukwasha kwi Yehoba, mu kwipelula waambile’mba: “Mukantangijilanga na maana enu, kabiji ne kulutwe mukantambula mu lukumo.” (Masalamo 73:24) Nga mu ano moba? Ñanyi lukumo lupembelela bonse bepelula? Kununga pa kubilwa bibusa ne kwikala na bulunda bwa lusekelo ne Yehoba, bakonsha kutala kulutwe ne kumona kufikizhiwa kwa byambo byanembeshiwa na mupashi bya Mfumu Davida amba: “Bakimote bakaswana ntanda. Kabiji bakasangalela mu kuvula kwa mutende.” Kine, lukumo lukamweka mu kimye kya kulutwe!—Masalamo 37:11.

Mukivuluka Nyi?

• Setepena waikala byepi muntu wipelwile wa kumwenako Yehoba ye amwesheshe lukumo Lwanji?

• Mu ñanyi mashinda Yehoba Lesa mo amweshesha kwipelula?

• Bya kumwenako ka bimwesha’mba Yehoba umwesha lukumo lwanji ku bantu bepelula?

• Kya kumwenako kya kwa Danyela kyakonsha kwitukwasha byepi kukomesha kwipelula?

[Kitenguluzha pa peja 22]

Bakosa Bino Bepelula

Mu 1919 pa kupwila kwa nkambi kwa Bafunda Baibolo (bayukanyikwa ano moba amba Bakamonyi ba kwa Yehoba), kwajingako mu Cedar Point, Ohio, U.S.A., J. F. Rutherford wajinga na myaka ya kusemwa 50, mukulumpe watangijilenga mwingilo, wipaine kukwasha baishilenga ku kupwila kwibasendela bipe ne kwibashinjikinya ku bibamba byabo. Pa juba japeleleko ja kupwila, wasangajikile luonde lwa bantu 7,000 na byambo bya kuba’mba: “Anweba bantomesha ba Mfumu wa bamfumu ne Nkambo wa bankambo, mubena kutaya mbila ku bantu . . . ya bufumu bwa lukumo bwa Nkambo yetu.” Na mambo a kuba Mulongo Rutherford wajinga muntu wakosa mu lwitabilo, wayukanyikilwe kwamba na jiwi jakanza, ja bulume, kabiji wateshe muchima ku bintu byo aitabile kuba’mba bo bukine, wipelwile kya kine ku meso a Lesa. Kabiji javula kwipelula kwanji kwauvwanyikanga mu lulombelo lwanji mu kupwila kwa lukelo kwikalako pa Betele.

[Kipikichala pa peja 19]

Setepena, nangwa kya kuba wayukishe Binembelo, mu kwipelula waitabile kwingila mwingilo wa ku matebulu

[Kipikichala pa peja 20]

Bukimote bwa kwa Manase bwatokeshe Yehoba pa muchima

[Kipikichala pa peja 22]

Ki ka kyalengejile Danyela kwikala “muntu ye batemwa bingi”?