Kwikala Bulongo Mwikuyukila ku Ka?

JESSE Livermore muntu ye balanguluka ku bantu bamo amba wajinga bingi na bunonshi, bamuyukile’mba wajinga na maana awama a kubilamo busulu. Na mambo aano maana, kyamulengejile kwikala na bunonshi bwavula bingi. Wavwalanga bya kuvwala byawama bya mutengo, kabiji waikalanga mu nzubo ikatampe yajinga na bibamba 29 ne kwenda waendanga mu motoka ufita waendangamo babinemanga yoya myaka, utelwa’mba Rolls-Royce.

Davida naye wakebelenga kwikala munonshi. Byo ajinga mukulumpe wa nkito wa kibiji mu kampanyi kakatampe kalenga mafilimu, kulutwe na lwendo ye wafwainwe kwikala mukulumpe wa kampanyi. Watonganga bingi kwikala munonshi kabiji ne kukeba kunemekwa. Bino, David wafukwile kuleka nkito. Waambile’mba: “Nayuka kuba’mba kechi nkekalapo jibiji na kifulo kya munema kya uno mutundu ne.” Abya mubena kulanguluka’mba David kechi walangulukile bulongo nenyi?

Bavula balanguluka kuba’mba kwikala na bunonshi ne kuya nkuwa byo bilengela muntu kwikala bulongo. Nangwa byonkabyo, aba baji na bunonshi kechi batondwa ne, beletelatu milanguluko yavula bingi ne kumona nobe bumi kechi buji na nkebelo ne. Kino kyo kyamwekejile ba Livermore. Nangwa kya kuba bajinga bingi na bunonshi, kechi bwibamwineko ku makatazho ne bya bulanda byo bapichilengamo ne. Bapopomenwe bingi, bajinga na lukatazho mu masongola abo, kabiji kechi bajingapo na kimye kya kusangalela pamo na baana babo ne. Kyapeleleko, busulu bwabo bwabweleleko panyuma. Kabiji juba jimo ba Livermore bajinga mu kibamba kya kutomenamo malwa mu Hotela saka bejizhañanya pa busulu bwabo byo bwabwelele panyuma. Bapotele malwa, kabiji batolele kabuku kabo ne kunembamo byambo bya kulaya bakazhi babo. Byo bapwishishe kutoma malwa abo bayile mu kibamba kimo bibye, ne kwiipaya bene na buta.

Nangwa kya kuba kwikala na bunonshi bwavula kechi ko kwakonsha kulengela muntu kwiipaya mwine ne, kino kya kumwenako kibena kumwesha bukine bwa byambo biji mu Baibolo byaamba’mba: ‘Aba baji na muchima usaka bunonshi . . . beasa bene na bya bulanda byavula.’—1 Timoti 6:9, 10.

Nanchi aba balanguluka kuba’mba bunonshi, kupewa kifulo kikatampe pa nkito, nangwa kuya nkuwa byo bimwesha’mba muntu waikala bulongo kechi balanguluka bulongo nenyi? Nga anweba, nanchi mwimona’mba mubena kwikala bulongo nyi? Mambo ka? Ñanyi jishinda jo mubena kwingijisha pa kuba’mba muyuke’mba mubena kwikala bulongo? Ki ka kyo mubena kulanguluka kuba’mba kyo kimwesha’mba muntu waikala bulongo? Mutwe walondelapo waambapo mabulañano awama alengela bantu bavula kwikala bulongo. Twayai tumone nenuwa byo mwakonsha kwikala bulongo.

[Tubyambo twa mushi]