Nanchi Bafwa Bakonsha Kukwasha Bantu Bomi Nyi?

TAMBA, nsongwalume wikala ku muzhika wa Africa kwashajiletu moba acheche kunemba mpeso.a Bainanji bamwambijilenga’mba ukakonsha kuba bulongo umvwe walomba bukwasho ku balongo babo bafwa. Mu muzhi wa Palermo ne Silly, bamwendela ntanda baya na kumona bitumbi mu mazubo a panshi mobebilamina bya kutambisha. Bavula baitabila’mba bino bitumbi byo balama bizhikijila bantu bomi. Pa mwaka pa mwaka, bantu bavula baya ku muzhi wa Lily Dale waikela ku muzhika wa kyalo kya New York mu U.S.A., bekala ku ino mpunzha batemwa bingi kwisamba na bapashi. Ku ino mpunzha bantu bayako na mulanguluko wa kukeba bukwasho ku balongo nangwa balunda nabo bafwa.

Bantu bavula mwaya ntanda baitabila kuba’mba bafwa bakonsha kukwasha bantu bomi. Nga anweba mulangulukapo’mba ka? Kampe bemufunjishapo kala luno lufunjisho nangwa kampe mwikala na bantu baitabila mu luno lufunjisho. Mwayilatu kisemwa tutonga bingi batemwe betu bafwa. Besamba na bapashi bamba’mba besamba na bafwa. Byaambile umo wisamba na bapashi bebinembele mu pepala wa byambo umo, amba “bafwa benengezha kwitukwasha.” (Time magazine) Nanchi kine nyi? Nanchi kine bafwa bakonsha kukwasha bantu bomi nyi? Baibolo wakumbula bingi bulongo.

Nanchi Bafwa Kuji ko Baya na Kwikala na Bumi Nyi?

Baibolo walumbulula bingi bulongo biji bafwa. Akimonai byaamba Musapwishi 9:5 amba: “Mambo bomi bayuka’mba tukafwa, bino bafu kafwako kyo bayuka ne.” Nanchi bafwa bakonsha kuyuka bibena kumweka nyi? Kyepelo 6 kyakumbula’mba: “Butemwe bwabo ne lupato lwabo ne kichima kyabo byaonaika kala, kabiji mu byonse byo boba pano panshi kechi bakijimo na kyabo myaka ne myaka ne.” Kabiji monai ne byaamba kyepelo 10 kya kino kitango amba ‘mu Kalunga ka bafu mo mukaya, kafwamo mwingilo nangwa kulanguluka nangwa maana nangwa milangwe ne.’ Kyambo kya “Kalunga ka bafu” mu Kihebelu kilumbulula “bilende.” Kabiji mu Kingiliki kyambo kya “Kalunga” bekingijisha kulumbulula kwajinga Yesu kimye kyo afwile.—Byubilo 2:31.

Yesu wakwashishe bantu bavula kimye kyo ajinga mumi, bino wayukile’mba ukafwa. Nanchi waketekejile’mba ukatwajijila kukwasha bantu saka afwa mu kilende nyi? Ine. Wapashañenye lufu lwanji lwafwenyenye pepi ku kimye kya bufuku kibula kwikalako mingilo. (Yoano 9:4) Yesu wayukishetu bulongo kuba’mba umvwe bantu bafwa kechi baya “bakekala na bumi jibiji ne.”—Isaya 26:14.

Kabiji Yesu wapashañenye lufu ku kintu kikwabo pa kulumbulula kishinka kintutu kimo. Kimye kyafwile mulunda nanji Lazalasa, Yesu wapashañenye lufu ku tulo. (Yoano 11:11-13) Nanchi tuketekela muntu walala kwitukwasha nyi? Muntu walala kafwako kyo ayuka ne, kechi ukwashañana ne.

Nanchi Mweo Ufwa Nyi?

Bavula bebafunjisha’mba mweo ufumamo mu muntu umvwe wafwa. Baibolo ufunjisha byapusanako. Buku mutanshi mu Baibolo witulumbulwila biji mweo. Ntendekelo 2:7 yaamba’mba muntu mutanshi kulenga “waalukile ke mweo mumi.” Muntu mwine ye mweo, ne banyama nabo myeo. (Ntendekelo 1:20-25, NW) Onkao mambo, muntu nangwa nyama inge wafwa, mweo ufwa. Baibolo byo byo aamba.—Ezikyo 18:4.

Bino bamo bakonsha kwipuzha’mba, ‘Pano nga byamba bantu amba besamba na bafwa, saka bebomvwa nangwa kwibamona?’ Ano mashimikila avula bingi mwaya ntanda. Alengela balongo ne balunda ba wafwa kwitabila ne kulengela bavula kongolokela ku besamba na bapashi, baamba’mba besamba na bafwa.

Nanchi ano mashimikila a kine nyi? Umvwe a kine, ko kuba’mba a bena kupusenamo na byaamba Baibolo, ke ibyo nenyi? Yesu Kilishitu waambile’mba Mambo a Lesa a kine. (Yoano 17:17) Bukine kechi bwikasa ne kwikasulula ne. Baibolo walondolola bingi bulongo pa byamba bantu amba bafwa bakonsha kukwasha bantu bomi. Baibolo waambapo pa muntu umo wayile na kukeba bukwasho ku bafwa. Kutanga jino jishimikila kusakwitukwasha kutana bukine.

Mfumu Wakeba Bukwasho ku Bafwa

Kyamwekele kimye kyo batalañene na balwanyi ku kabeta ka buyeke bwa Isalela. Mfumu Saulo ne bantu banji batalañene na nzhita ikatampe ya bena Filishitiya. Saulo byo amwene jibumba ja bena Filishitiya, “muchima wanji waubile moyo, ne kuzakama wazakaminenga bingi.” Pa kino kimye mu bukalama bwanji Saulo wasankijilepo bupopweshi bwa kine. Onka o mambo, misashijilo yanji Yehoba kechi wiikumbwile ne. Pano Saulo wakakebele kwepi bukwasho? Ngauzhi wa Lesa Samwela saka afwa kala.—1 Samwela 28:3, 5, 6.

Saulo wayile ku Enedola kwajinga wisamba na bapashi amba amubule bya kuba. Wamusashijile amba “nsolweleko Samwela” kufuma ku bafwa. Wisamba na bapashi wamwichile mufu. Uno “Samwela” wamwambijile Saulo amba bena Filishitiya basa kushinda kabiji Saulo ne baana banji basa kufwa mu nkondo. (1 Samwela 28:7-19) Nanchi kine Samwela wabwelele kufuma ku bafwa nyi?

Akilangulukaipo pa kino? Baibolo wamba’mba muntu umvwe wafwa “ubwela ku mushiji” kabiji “milanguluko yanji yonaika.” (Salamo 146:4) Bonse babiji ba Saulo ne Samwela bayukile’mba Yehoba washikwa kupwañana na besamba na bapashi. Kabiji Saulo patanshitu wakambizhe bonse kuleka kupopwela bapashi.—Bena Levi 19:31.

Akilangulukaipo bulongo. Umvwe Samwela muntu wakishinka wakijinga na bumi mu bumupashi, nanchi wakonsheshe kulala muzhilo wa Lesa ne kwingijila pamo na wisamba na bapashi amba amonañane ne Saulo nyi? Yehoba wakaine kwamba ne Saulo. Nanchi Lesa wa Bulume Bonse bakonsheshe kumukanjikizha kwisamba ne Saulo kupichila mu kwingijisha Samwela wafwa nyi? Ine. Kyamwekeshatu patoka kuba’mba uno “Samwela” kechi wajinga yewa ngauzhi wa kishinka wa Lesa ne. Wajinga mupashi wabipa, ndemona wibepekezhenga kwikala Samwela wafwile.

Bandemona ke bamalaika basatukijile bukalama bwa Lesa kuntendekelo ya bwikala bwa bantu. (Ntendekelo 6:1-4; Yuda 6) Bano bandemona bamona muntu saka akiji na bumi, bayuka byo aambanga, byo amwekanga ne byo aubanga. Bebikako kutundaika lufunjisho lwa bubela lwabula mu Baibolo. O ene mambo, Baibolo o etujimwina’mba tuchinuzhukenga bintu byonse byalamata ku bapashi. (Mpitulukilo ya mu mizhilo 18:10-12) Bapashi batama ne lelo jino bengila.

Pano twayuka ene mambo bantu o bambila’mba “bomvwa’ nangwa “kumona” batemwe babo bafwa. Nangwa kya kuba kimye kimo bandemona bobila bantu byawama, bino baimana pa kongola bantu.b (Efisesa 6:12) Kabiji akilangulukaipo ne pa kino: Yehoba ke Lesa wa butemwe wituta muchima. Umvwe bafwa kuji ko baya na kwikala na bumi ne kubwela babwela na kukwasha balongo ne balunda nabo bomi, nanchi kine Mulenga wetu wa butemwe wakonsha kwitukanya kwisamba nabo ne kwikimona kwikala kya “bunya” nyi? Ine, kechi wakonsha kuba byo byo ne! (1 Petelo 5:7) Pano nanchi kujipo wakonsha kwitukwasha nyi?

Kufuma Bukwasho bwa Bantu Bomi ne Bafwa

Twaumvwa mu byo twisambapo kuba’mba bafwa kechi bakonsha kukwasha bantu bomi ne. Kine kyo twaambapo ke kya kuba’mba kukeba bukwasho ku bafwa kechi kintu kyapelatu ne, ke kulala muzhilo wa Lesa ne kwitwezha mu kizumba kya bandemona.

Baibolo witubula kwa kulomba bukwasho, kwi Yehoba, Mulenga wetu. Aye wakonsha kwitupokolola ku lufu. (Salamo 33:19, 20) Witukwasha ne lelo jino. Witupa luketekelo lwa kine kechi lwa bubela lwa besamba na bapashi ne.

Tamba watongolwa kuntendekelo ya kino kibaba wafunjile lupusano luji pa kuketekela mu bya bubela byamba besamba na bapashi ne mu bukine bwitupa Yehoba. Besamba na bapashi bamwambijile’mba wafwainwa kulambula ku bashakulu banji, inge ne kuba byo byo ne, kechi ukakonsha kuba bulongo mu mpeso ne. Tamba watendekele kufunda Baibolo na Bakamonyi ba kwa Yehoba. Wafunjile pa biji bafwa ne kufuma bebepekezha kwikala bashakulu bafwile kala. Nangwa kya kuba bainanji bamukanjikizhenga’mba alombe bukwasho ku bashakulu bafwile kala, Tamba wakaine ne kwibambila bainanji amba, “Umvwe nkankalwe kuba bulongo, nkebikako mwaka wiya.”

Ki ka kyamwekele? Ye mutanshi wapwishishe kunemba mpeso! Bainanji bakuminye ne kulengulula besamba na bapashi kabiji balekele kwamba pa milambo ya uno mutundu. Tamba wafunjile’mba Yehoba witujimuna’mba twafwainwa kuchinuzhukanga ‘kwipuzha bafu amba bakwashe bomi.” (Isaya 8:19) Kufunda Baibolo kwalengejile Tamba kuyuka’mba umvwe muchima wanji wamutokela monka mu mizhilo ya Lesa, ukekala bulongo.—Salamo 1:1-3.

Pano kiji byepi na batemwe betu bafwa? Nanchi kujipo luketekelo pe abo nyi? Yehoba kechi ukwashatu atweba bomi kwapwa ne, walaya ne kukwasha boba baji mu bilende. Panyuma ya kulumbulula amba bafwa kafwako byo baji ne, monai ngauzhi Isaya byo aambile mu kitango 26, kyepelo 19 amba: “Bantu benu bafwa bakekala na bumi jibiji. . . . Anweba muji mu maloba, bukai, mwimbe na mambo a lusekelo.” Bungauzhi bwanungapo’mba “mushiji ukalupula bafu bajimo” kabiji bakekala na bumi jibiji.

Akifwanyikizhai kino! Mamilyonyi a bantu bafwa bakasangulwa ne kwikala na bumi jibiji. Kabiji Baibolo waamba’mba Yehoba ‘usaka’ kupa bumi bafwa. (Yoba 14:14, 15) Nanchi ino milaye kine ikafika nyi? Yesu Kilishitu washiinwe amba luno luketekelo lwa kine mambo waambile pa bafwa amba kwi Yehoba baji nobe bomi.—Luka 20:37, 38.

Nanchi mukeba kwikala na luno luketekelo nyi?c Twajijilai kufunda maana alumbuluka a mu Baibolo. Byo musa kufundanga bikemulengela kusumininwa’mba Yehoba ukwasha bomi ne bafwa kabiji milaye yanji ya ‘kishinka ne ya kine.’—Lumwekesho 21:4, 5.

[Tubyambo twa mushi]

[Mabulañano pa peja 21]

Atweba bonse tutonga bingi batemwe betu bafwa

[Kipikichala pa peja 22]

Nanchi ngauzhi Samwela wabwelele kufuma ku bafwa ne kwisamba na mfumu Saulo nyi?