Kechi Mumufichishe ku Muchima aye Mupashi Wazhila wa Yehoba Ne
‘Kechi mumufichishe ku muchima aye mupashi wazhila wa Lesa ne; mwi aye mo mwabikilwe kayukilo.’—EFI. 4:30.
1. Yehoba wibobila ka bantu bavula, kabiji baji na ñanyi mwingilo?
YEHOBA waubila bantu bavula ba mu ino ntanda ya makatazho kintu kyawama bingi. Wibaswisha kufwenya kwipi ne aye kupichila mu Mwananji yenkawa umo, Yesu Kilishitu. (Yoa. 6:44) Umvwe mwipana kwi Lesa ne kwikala mwayila kwipana kwenu ko kuba’mba muji pa bano bantu. Byo mwabatizwa mu jizhina ja mupashi wazhila, muji na mwingilo wa kwikela monka mwayila mupashi.—Mat. 28:19.
2. Mepuzho ka o tusakwisambapo?
2 Atweba ‘tubyajila mupashi’ twavwala bumuntu bupya. (Nga. 6:8; Efi. 4:17-24) Pano bino mutumwa Paulo witufundako ne kwitujimunako amba kechi tumufichishe ku muchima mupashi wazhila wa Lesa ne. (Tangai Efisesa 4:25-32.) Twayai pano twisambe pa lujimuno lwapaine uno mutumwa. Paulo walumbulwilenga ka byo aambile pa kufichisha mupashi wa Lesa ku muchima? Muntu wipana kwi Yehoba wakonsha kuba byepi bino? Kabiji twakonsha kuchinuzhuka byepi kufichisha mupashi wa Yehoba ku muchima?
Mo Atazhizhe Paulo
3. Mwakonsha kulumbulula byepi mwatala byambo byanembwa mu Efisesa 4:30?
3 Kitanshi, monai byambo bya kwa Paulo byanembwa mu Efisesa 4:30. Wanembele amba: ‘Kechi mumufichishe ku muchima aye mupashi wazhila wa Lesa ne; mwi aye mo mwabikilwe kayukilo ka kufika ne ku juba ja bukuzhi.’ Paulo kechi wasakilenga bakwabo ba mu lwitabilo kubika bumupashi bwabo mu kizumba ne. ‘Babikilwe kayukilo ka kufika ne ku juba ja bukuzhi’ kupichila mu mupashi wa Yehoba. Mupashi wazhila wa Lesa ye wajinga kayukilo kabiji ne luno ukiji kayukilo, nangwa amba “bukikizhi” bwa kulutwe bukobiwa ku bashingwa bakishinka. (2 Ko. 1:22) Kubikwa kayukilo kulumbulula kuba’mba bano bashingwa ke ba kwa Lesa kabiji bakekala na bumi mwiulu. Aba bo babikile kayukilo bajinga 144,000.—Lum. 7:2-4.
4. Mambo ka o kyanemena kubula kufichisha mupashi wa Lesa ku muchima?
4 Kufichisha mupashi ku muchima kyo kintu kitanshi kyakonsha kulengela mwina Kilishitu kubula kutangijilwa na bulume bukatampe bwa Lesa mu bwikalo bwanji. Kino kimwekela mu byambo byaambile Davida panyuma ya kulenga mambo ne Batesheba. Davida byo alapijile walombele kwi Yehoba amba: “Kechi mumpange mu kyenyi kyenu ne: Ne kuñangata Mupashi wenu wazhila ne.” (Sala. 51:11) Bashingwa bakosa mu “lwitabilo kufika ne ku lufu” bo bonka bakatambwila “munchinya” wa bumi bwa myaka mwiulu. (Lum. 2:10; 1 Ko. 15:53) Bena Kilishitu baji na luketekelo lwa kwikala na bumi panopantanda nabo bakebewa mupashi wazhila pa kuba’mba batwajijile kwikala bakishinka kwi Lesa ne kutambwila bupe bwa bumi kupichila mu kitapisho kya bukuzhi bwa kwa Kilishitu. (Yoa. 3:36; Loma 5:8; 6:23) Onkao mambo, atweba bonse twafwainwa kujimuka kuchina amba twakamufichisha mupashi wazhila wa Yehoba ku muchima.
Mwina Kilishitu Wakonsha Byepi Kufichisha Mupashi ku Muchima?
5, 6. Mwina Kilishitu wakonsha kufichisha byepi mupashi wa Yehoba ku muchima?
5 Byo tuji bena Kilishitu bepana, twakonsha kuchinuzhuka kufichisha mupashi ku muchima. Twakonsha kuba bino umvwe ‘twatwajijila kwenda ne kwikala na mupashi,’ umvwe twauba bino kechi tukashindwa na bya lwiso lwa buntunshi ne, kabiji kechi tukekala na byubilo byatama ne. (Nga. 5:16, 25, 26) Pano bino, bino byakonsha kupimpulwa. Twakonsha kufichisha mupashi wa Lesa ku muchima inge ketukumpulwe pachepache, kampe kwakubula nangwa kuyuka ne, kupichila mu kuba byubilo byo bakanya mu Mambo anembwa na mupashi wa Lesa.
6 Inge ketube byubilo byapusanako na mwayila mupashi wazhila, twakonsha kufichisha mupashi ne Yehoba ku muchima, aye Mwine mwina uno mupashi. Kwisamba pa Efisesa 4:25-32 kusakwitukwasha byo twakonsha kwikala na byubilo byawama ne byo twakonsha kuchinuzhuka kufichisha mupashi wa Lesa ku muchima.
Byo Twakonsha Kubula Kufichisha Mupashi ku Muchima
7, 8. Londololai ene mambo o twafwainwa kwambilanga bukine.
7 Twafwainwa kwikala bakishinka. Kwesakana na Efisesa 4:25, Paulo wanembele amba: ‘Pano byo mwataya bubela, iambilainga bya bukine anwe bene na bene; mambo atwe bene na bene twi bya mubiji umo.’ Byo twaikala ke “bya mubiji umo” ne kukwatankana, kechi twafwainwa kwikala ba bujimuku nangwa kongola bapopweshi bakwetu ne, mambo kuba bino po pamotu ne kwibabepa. Yense wakonsha kutwajijila kuba bino kechi wakonsha kwikala mulunda ne Lesa ne.—Tangai Byambo bya Mana 3:32.
8 Kwamba ne kuba byubilo bya bujimbijimbi kwakonsha kulengela kipwilo kubula kukwatankana. Onkao mambo, twafwainwa kwikala nobe ngauzhi Danyela wajinga wakishinka, kabiji bakwabo kechi bamwenemo kibi nangwa kimotu mwi aye ne. (Da. 6:4) Twafwainwa kuvuluka lujimuno lwa kwa Paulo lo ajimwine bena Kilishitu baji na luketekelo lwa kuya mwiulu lwa kuba’mba yense wa mu “mubiji wa Kilishitu” uji ku lubaji lwa bakwabo kabiji wafwainwa kutwajijila kukwatankena pamo na bano baana ba bwanga bashingwa ba kwa Kilishitu bakishinka. (Efi. 4:11, 12) Umvwe tuji na luketekelo lwa kwikala myaka ne myaka mu Paladisa panopantanda, ne atweba twafwainwa kwambanga bukine, kino kitulengela kukwatankena pamo na balongo betu mwaya ntanda.
9. Mambo ka o kyanemena kuba’mba tulondelenga byambo biji mu Efisesa 4:26, 27?
9 Twafwainwa kumukana Diabola, kwakubula kumushila mpunzha kuba’mba etukozhe ku mupashi ne. (Yako. 4:7) Mupashi wazhila witukwasha kumukana Satana. Kyakumwenako, twakonsha kuba bino kupichila mu kubula kwikala na kizhingijisha. Paulo wanembele amba: “Nangwa mwazhingila kechi mulenge mambo ne; kechi muleke juba jizhike kasa mwazhingila ne: nangwa kumushila mpunzha aye Diabola ne.” (Efi. 4:26, 27) Umvwe twazhingila, twafwainwa kulomba lulombelo lwa kishinshi ponkapotu lwakonsha kwitukwasha kwikala “na muchima watekanya” ne kwikanya, mu kifulo kya kubanga bintu mu jishinda jakonsha kufichisha mupashi wa Lesa ku muchima. (Mana 17:27) Onkao mambo, kechi twafwainwa kuzhingijila kitaala ne kushila Satana mpunzha ya kwitongwelamo kuba byatama ne. (Sala. 37:8, 9) Jishinda jimo jo twafwainwa kumukainamo ke kupichila mu kupwisha makatazho o tuji nao bukiji bukiji kwesakana na lujimuno lwa kwa Yesu.—Mat. 5:23, 24; 18:15-17.
10, 11. Mambo ka o twafwainwa kubujila kwiba nangwa kuba bintu byabulamo bukishinka?
10 Kechi twafwainwa kuponena mu lweseko lwa kwiba nangwa kubula bukishinka ne. Pa mambo a kwiba, Paulo wanembele amba: “Awa wiba kechi ebe jibiji ne: kana engile kyakosa, kasa engila na maboko anji kintu kyawama, amba amwenemo bya kupana kwi yewa wakajilwa.” (Efi. 4:28) Umvwe mwina Kilishitu wipana waiba, ko kuba’mba ‘wapeezha jizhina ja Lesa’ kupichila mu kwijiletela mwenga. (Mana 30:7-9) Nangwatu buyanji kechi bwafwainwa kulengela muntu kwiba ne. Aba batemwa Lesa ne bantu bayuka amba kwiba kechi kwawama ne.—Mako 12:28-31.
11 Paulo kechi waambatu pa byo twafwainwa kubula kuba ne, bino waamba ne pa byo twafwainwa kuba. Inge ketwikale ne kutangijilwa na mupashi wazhila, tukengilanga na ngovu kuba’mba tulamenga kisemi kyetu kabiji ne kwikala na “bya kupana kwi yewa wakajilwa.” (1 Timo. 5:8) Yesu ne batumwa banji banengezhangapo mali a kukwashishamo bayanji, bino aye Yudasa Isakaliota awo wajinga kamfutumfutu waibilepo mali amo. (Yoa. 12:4-6) Kya kine, kechi watangijilwanga na mupashi wazhila ne. Atweba tutangijilwa na mupashi wa Lesa ‘tuba bulongotu mu bintu byonse,’ byonka byaubanga Paulo. (Hebe. 13:18) Mu jino jishinda, tuchinuzhuka kufichisha mupashi wazhila wa Yehoba ku muchima.
Mashinda Akwabo a Kubula Kufichishishamo Mupashi ku Muchima
12, 13. (a) Kwesakana na byo kyaambiwapo pa Efisesa 4:29, ñambilo ka yo twafwainwa kubula kwamba? (b) Ñambilo yetu yafwainwa kwikala byepi?
12 Twafwainwa kulama lujimi wetu. Paulo waambile amba: “Kechi muleke byambo byatama bifume mu kanwa kenu ne, nangwa kimo ne, kana byonka byawama bibakomesha bantu, bibafwainwa mu kyonkakyo kimye, amba bibaletele bibusa abo bebyumvwa.” (Efi. 4:29) Apano napo mutumwa kechi witubulatu byo twafwainwa kubula kuba ne, bino witubula ne byo twafwainwa kubanga. Na lutangijilo lwa mupashi wa Lesa, twakonsha kwamba “byawama bibakomesha bantu, bibafwainwa mu kyonkakyo kimye, amba bibaletele bibusa abo bebyumvwa.” Kunungapo, kechi twafwainwa kuleka “byambo byatama” kufuma mu kanwa ketu ne. Kyambo kya Kingiliki kyatuntululwa amba “byatama” bekingijisha kulumbulwilamo kipangwa, masabi nangwa nyama yabola. Byonkatu byo twapata kano kajo kabola, byo byo twapata ne ñambilo yo amona Yehoba amba yatama.
13 Ñambilo yetu yafwainwa kwikala yawama, ‘yalungwa na mukele.’ (Kolo. 3:8-10; 4:6) Bantu bafwainwa kumona amba twapusanako na bakwetu umvwe baumvwa byo twamba. Onkao mambo, twayai tukwashenga bakwetu kupichila mu kwamba “byawama bibakomesha bantu.” Kabiji twayai twiumvwenga byonka biumvwinenga nyimbi wa masalamo waimbile amba: “Byambo bya pa kanwa kami ne milanguluko ya mu muchima wami bikale byaitabilwa [bilete lusekelo, NW] ku meso enu, Anweba Yehoba, jibwe jami ne, mukuzhi wami.”—Sala. 19:14.
14. Kwesakana na byaamba Efisesa 4:30, 31, bintu ka byo twafwainwa kubula kuba?
14 Kechi twafwainwa kwikala na bululu, bukaji, kubukabukaji, mwenga, ne lupato lonse ne. Panyuma ya kujimunañanako pa mambo a kufichisha mupashi wa Lesa ku muchima, Paulo wanembele amba: “Bululu bonse, ne bukaji, ne kubukabukaji, ne kubwazanga, ne mwenga, ne lupato lonse mwibifumye mo muji.” (Efi. 4: 30, 31) Byo tuji bantu bambulwa kulumbuluka, atweba bonse twafwainwa kwingila na ngovu kuyuka bintu byo tulangulukapo ne byo tuba. Umvwe twanonkwa buzha ku “bululu bonse, ne bukaji, ne kubukabukaji,” twakonsha kufichisha mupashi wa Lesa ku muchima. Byo byo kyakonsha ne kwikala umvwe twajimina mukwetu kapila witutamisha, twazhingila ne kubula kupwanañana. Umvwe twatendeka kulengulula lujimuno lwa mu Baibolo, twakonsha kwikala na miteeto yakonsha kwitulengela kulenga mambo mupashi kabiji mwakonsha ne kufuma bintu byatama.
15. Umvwe mukwetu witulenga mambo, twafwainwa kuba byepi?
15 Twafwainwa kwikala ba lusa, ba michima yanekena, ne kwilekela mambo. Paulo wanembele amba: “Kasa mwiubila lusa anwe bene na bene, mwikale ba michima yanekena, ne kwilekela mambo anwe bene na bene, byonka byo emulekejile mambo aye Lesa mwi Kilishitu.” (Efi. 4:32) Nangwa betukozhepotu byepi ku muchima na mambo a kwitulenga mambo, twafwainwa kwibalekela mambo, byonka byuba Lesa. (Luka 11:4) Twambe amba mukwetu wa mu lwitabilo witwambila byambo byatama. Twamusolomoka pa kuba’mba tupwishe makatazho. Waswa bilubo ne kulomba lulekelo lwa mambo. Nangwa kya kuba twamulekela mambo, kuji byavula byo twafwainwa kuba. Pa Bena Levi 19:18 paamba amba: “Kechi ukashinkanye ne, nangwa kwikala na mfika na balongo bobe ne; pakuba ukatemwe mukwenu pamo byonka byo witemwa obe mwine; amiwa ne Yehoba.”
Twafwainwa Kujimuka
16. Ambaipo kyakumwenako kimwesha kuba’mba twakonsha kupimpulako bintu pa kuba’mba tubulenga kufichisha mupashi wa Yehoba ku muchima.
16 Nangwatu tuji kwabunke, twakonsha kwesekwa kuba kintu kyakonsha kufichisha Lesa ku muchima. Kyakumwenako, mulongo wakonsha kuba ke ateleke ku nyimbo yatama. Kokyakayanga, jiwi janji ja mu muchima jakonsha kumuzhachisha na mambo a kulengulula lujimuno lwa mu Baibolo lwanembwa mu mabuku a ‘kalume wakishinka kabiji wa maana.’ (Mat. 24:45) Wakonsha kulomba pa luno lukatazho kabiji ne kuvuluka byambo bya kwa Paulo byanembwa pa Efisesa 4:30. Byo akebesha kubula kuba kintu kyakonsha kufichisha mupashi wa Lesa ku muchima, wafuukulapo kuleka ponkapo kuteleka ku nyimbo yatama. Yehoba wakonsha kupesha uno mulongo pa byo auba. Onkao mambo, twayai tutwajijile kubula kufichisha mupashi wa Lesa ku muchima.
17. Ki ka kyakonsha kumweka inge twabula kujimuka, kabiji kechi tubena kulomba ne?
17 Umvwe twabula kujimuka, kabiji kechi tubena kulomba ne, twakonsha kongolokela ku byubilo byatama byakonsha kufichisha mupashi ku muchima. Na mambo a kuba mupashi wazhila upanga bipangwa bimwesha Shetu wa mwiulu byo alanguluka ne mo amwena bintu, uno mupashi inge twamuzhingijisha, ko kuba amba twazhingijisha ne Shetu nangwa kumumvwisha bulanda. Kechi tukeba kumuzhingijisha ne. (Efi. 4:30) Banembeshi Bayudea ba mu myaka kitota kitanshi balengele mambo kupichila mu kwamba amba bya kukumya byaubilenga Yesu byafuminenga kwi Satana. (Tangai Mako 3:22-30.) Bano balwanyi ba kwa Kilishitu ‘bamubilenga mwenga mupashi wazhila,’ ne mu jino jishinda balengele mambo a kubulwa kulekelwa. Ne atweba kechi twafwainwa kuba bino ne!
18. Twakonsha kuyuka byepi amba kechi twalenga mambo a kubula kulekelwa ne?
18 Byo kiji kuba’mba kechi tukeba nangwa pacheche kulenga mambo a kubula kulekelwa ne, twafwainwa kuvuluka byaambile Paulo pa mambo a kubula kufichisha mupashi ku muchima. Pano ibyepi inge kya kuba twalenga mambo akatampe? Inge twalapila, kabiji ne bakulumpe mu kipwilo betukwasha, twakonsha kupwisha mu muchima wetu kuba’mba Lesa witulekelako mambo, kabiji ne kuba’mba kechi twalenga mambo mupashi wazhila ne. Na bukwasho bwa Lesa, ne atweba twakonsha kuchinuzhuka kufichisha mupashi ku muchima.
19, 20. (a) Bintu ka bimo byo twafwainwa kuchinuzhuka? (b) Twafwainwa kukebesha kuba ka?
19 Lesa wingijisha mupashi wanji wazhila kutundaikilamo butemwe, lusekelo ne lukwatankano lwa bantu banji. (Sala. 133:1-3) Onkao mambo, twafwainwa kuchinuzhuka kufichisha mupashi ku muchima kupichila mu kubula kwivwanga mu miyebe nangwa kwamba bintu bya kulengulwisha boba bakafunga batongolwa na mupashi. (Byu. 20:28; Yuda 8) Pakuba, tukeba kutundaika lukwatankano ne kwinemeka atwe bene na bene mu kipwilo. Kya kine, kechi twafwainwa kulenga tumabumba mukachi ka bantu ba Lesa ne. Paulo wanembele amba: “Nemusashijila, anwebakwetu, monka mu jizhina ja Nkambo yetu Yesu Kilishitu, namba, bonse kasa mwamba jiwi jimo jonka, kechi mwikale ne mapata mwenu ne; poso mulamankane pamo na muchima umo ne milanguluko imo.”—1 Ko. 1:10.
20 Yehoba wakebesha bingi kwitukwasha kubula kufichisha mupashi wanji ku muchima kabiji uji na bulume bwa kuba bino. Twayai tutwajijile kulomba mupashi wazhila ne kumona kuba’mba kechi twamufichisha ku muchima ne. Twayai tutwajijile ‘kubyajila mupashi,’ ne kwibikishangako kutangijilwanga ne aye pa kino kimye ne myaka yonsetu.
Musakukumbula’mba Ka?
• Kufichisha mupashi wa Lesa ku muchima kilumbulula ka?
• Muntu wipana kwi Yehoba wakonsha kufichisha byepi mupashi wa Lesa ku muchima?
• Mu ñanyi mashinda mo twakonsha kuchinuzhukila kufichisha mupashi wazhila ku muchima?
[Kipikichala pa peja 30]
Pwishai makatazho bukiji bukiji
[Kipikichala pa peja 31]
Ñambilo yenu imwesha ñanyi kipangwa?