Ingilainga Mwingilo Wenu Wa Busapwishi
‘Ingila mwingilo wa busapwishi ne kupwisha bulongo mwingilo wobe.’—2 TIMO. 4:5.
MUSAKUKUMBULA’MBA KA?
Musapwishi ye ñanyi?
Mambo ka bantu o bakebewa kumvwa mambo awama?
Basapwishi bengila bulongo boba byepi?
1. Mambo ka Yehoba o afwainwa kutelelwa’mba Musapwishi mutanshi?
MUSAPWISHI ke muntu uya na kubula bakwabo mambo awama. Yehoba Lesa ye Musapwishi mutanshi. Aku bansemi betu batanshi bamusatukilatu, Yehoba waambile mambo awama a kuba’mba muloolo, ko kuba’mba Satana Diabola bakamonauna. (Nte. 3:15) Pa myaka yavula yapitapo, Yehoba watangijile banabalume bakishinka kunemba bintu bikobiwa pa kuba’mba mwenga akafume pa jizhina janji ne makatazho aleta Satana byo akafumapo ne bantu byo bakekala jibiji na bintu byawama byatayile Adama ne Evwa.
2. (a) Nga bamalaika bengila ñanyi lubaji mu mwingilo wa busapwishi? (b) Ñanyi kya kumwenako Yesu kyo ashijile basapwishi?
2 Bamalaika nabo basapwishi. Basapwila ne kukwasha bantu kusampanya mambo awama. (Luka 1:19; 2:10; Byu. 8:26, 27, 35; Lum. 14:6) Nga Mikela malaika mukatampe wingila ñanyi mwingilo? Byo ajinga pano pa ntanda saka atelwa’mba Yesu, washile mwakulondela basapwishi. Yesu wanemekele bingi mwingilo wa kusapwila mambo awama.—Luka 4:16-21.
3. (a) Nga mambo awama o tusapwila o aka? (b) Ñanyi mepuzho o twafwainwa kulangulukapo byo tuji basapwishi?
3 Yesu wakambizhe baana banji ba bwanga kwingila mwingilo wa busapwishi. (Mat. 28:19, 20; Byu. 1:8) Mutumwa Paulo watundaikile Timoti ye aingilanga nanji amba: ‘Ingila mwingilo wa busapwishi ne kupwisha bulongo mwingilo wobe.’ (2 Timo. 4:5) Nga mambo awama o tusapwila atweba baana ba bwanga ba kwa Yesu o aka? Ke mambo awama muji bukine bwa kuba’mba Shetu wa mwiulu Yehoba witutemwa bingi. (Yoa. 3:16; 1 Pe. 5:7) Bufumu bwa Lesa kyo kintu kikatampe Yehoba moamweshesha butemwe bwanji. Onkao mambo, tubulako bakwetu kuba’mba inge baikala bangikazhi ba buno Bufumu ne kukokela Lesa, kabiji ne kuba byaoloka bakonsha kwikala balunda nanji. (Sala. 15:1, 2) Yehoba ukafumyapo buyanji. Kabiji ukalengela bantu kuvulama bintu byatama byo bapichilemo kala. Ano ke mambo awama bingi! (Isa. 65:17) Byo tuji basapwishi, twayai twisambe pa ano mepuzho abiji anema: Mambo ka bantu o bakebewa kumvwa mambo awama lelo jino? Twakonsha kwingila byepi bulongo mwingilo wetu wa busapwishi?
MAMBO KA BANTU O BAKEBEWA KUMVWA MAMBO AWAMA?
4. Ñanyi bintu bimo bya bubela byamba bantu pe Lesa?
4 Fwanyikizhai bemubula kuba’mba bashenu bemukaine pamo na kisemi kyonse. Kabiji aba bamba’mba bebayukile bemubula’mba bashenu bakanamine bingi, bafyanga bintu byawama, kabiji bashinchile bingi. Bakwabo nabo bakonsha ne kwimubula’mba bafwile kala ne kwimulengela kulanguluka’mba kyawamatu ne kuleka kwibakeba keba. Ne bantu bavula byo byo bebabula pe Lesa. Bebafunjisha kuba’mba kechi bakonsha kumuyuka bulongo ne, nangwa’mba washinta. Bantangi ba bupopweshi bamo bafunjisha’mba Lesa ukamanyika bantu boba byatama myaka ne myaka. Bakwabo nabo bamba’mba Lesa ye ulengela bantu kuyanda na bya malwa biyakotu bine. Nangwa kya kuba bino bya malwa bipaya bantu bawama ne batama, bamba’mba Lesa ye wibileta.
5, 6. Lufunjisho lwa kuba’mba bantu bafumine ku banyama ne mafunjisho akwabo a bubela alengela bantu kuba ka?
5 Bakwabo bamba’mba Lesa ufwako. Kino kimwekela mu lufunjisho lwa kuba’mba twafumine ku banyama. Bavula baitabila mu luno lufunjisho, bamba’mba bilengwa byaishilekotu bine. Kabiji bamba’mba kafwako Mulenga ne. Bamo bamba ne kuba’mba muntu naye nyama, onkao mambo, kechi twafwainwa kukumya inge wauba byubilo bya bunyama ne. Kabiji bamba’mba kijitu bulongo bantu baji na bulume kumanyika bakwabo inge ke batangijile. O ene mambo bavula kyo bambila’mba nshiji kechi ikapwa ne. Onkao mambo, bantu baitabila kuba’mba bantu bafumine ku banyama kechi bekala na luketekelo ne.
6 Lufunjisho lwa kuba’mba bantu bafumine ku banyama ne mafunjisho a bupopweshi bwa bubela alengelatu bantu kumanama mu ano moba apelako. (Loma 1:28-31; 2 Timo. 3:1-5) Ano mafunjisho a bantu kechi mambo awama ne. Byonka byaambile mutumwa Paulo, ano mafunjisho alengela milanguluko ya bantu kwikala ‘mu mfishi kabiji ebabanya ku bumi bufuma kwi Lesa.’ (Efi. 4:17-19) Kabiji lufunjisho lwa kuba’mba bantu bafumine ku banyama ne mafunjisho akwabo a bubela alengela bantu kubula kuswa mambo awama ne kwibafumya kwi Lesa.—Tangai Efisesa 2:11-13.
7, 8. Ñanyi jishinda jimo jakonsha kukwasha bantu kumvwisha mambo awama?
7 Pa kuba’mba bantu bapwane ne Lesa, patanshi bafwainwa kushiinwa kuba’mba Yehoba ko aji kabiji bafwainwa kuyuka buwame buji mu kufwenya kwipi ne aye. Twakonsha kwibakwasha kuyuka Lesa kupichila mu kwibatundaika kulanguluka pa bilengwa. Inge bantu ke balanguluke languluke pa bilengwa, bamona maana ne bulume bwa Lesa. (Loma 1:19, 20) Pa kukwasha bantu kwikala na moyo wa kwakamwa Lesa kupichila mu kupesa pesa bintu byo alenga, twakonsha kwingijisha buku wa Fwenyai Kwipi ne Yehoba. Nangwa byonkabyo, aba bafunjilatu maana a Lesa ku bilengwa kechi bakonsha kutana mikumbu ya mepuzho akilamo kunema ne. Nabiji a kuba’mba: Mambo ka Lesa o aswishisha buyanji? Lesa wakebelenga’mba pano pa ntanda pekale byepi? Nanchi Lesa wanta muchima nyi?
8 Bantu bakonshatu kumvwisha mambo awama aamba pe Lesa ne byo akeba kupichila mu kufunda Baibolo. Ke mwingilo wanema bingi ye tuji nanji wa kukwasha bantu kutana mikumbu ya mepuzho abo. Pa kuba’mba tufike pa michima ya bo tufunjisha, twafwainwa kwibalengela kushiinwa, kechi kwibabulatu bishinka ne. (2 Timo. 3:14) Twakonsha kukwasha bantu kwitabila inge ketulondele byafunjishanga Yesu. Ki ka kyamulengelanga kwitabisha bantu? Kintu kimo kyamukwashishe ke kwingijisha bulongo mepuzho. Twakonsha kulondela byepi byo aubanga?
BASAPWISHI BENGILA BULONGO BENGIJISHA BULONGO MEPUZHO
9. Pa kuba’mba tukwashe bantu kwikala na bulunda bwawama na Lesa, twafwainwa kuba ka?
9 Mambo ka o twafwainwa kwingijisha mepuzho pa kusapwila byonka byaubanga Yesu? Akifwanyikizhai kuba’mba dokotala wimwambila’mba ukeba kwimubula sawakya wawama. Wimubula kuba’mba wakonsha kubuka kikola kyenu inge wimusaya. Mwakonsha kuswa byo aamba. Pano ibyepi inge kya kuba wafikenatu kwimubula byo byo kwa kubula ne kwimwipuzha pa kuba’mba ayuke biji butuntulu bwenu bwa mubiji? Kechi mukamuketekela ne. Nangwa kya kuba uno dokotala wafunda kya mutundu ka, wafwainwa kwimwipuzha ne kuteleka byo mubena kumulumbulwila kikola kyenu pa kuba’mba ayuke bya kwimukwasha. Kyo kimotu ne atweba, pa kuba’mba tukwashe bantu kuswa mambo awama a Bufumu, twafwainwa kwikala na busendwe bwa kwipuzha bulongo mepuzho. Inge twauba bino, po po tukayuka bya kukwasha bantu.
10, 11. Kulondela mfunjishisho ya kwa Yesu kwakonsha kwitulengela kuba ka?
10 Yesu wayukile kuba’mba mepuzho awama akwasha mufunjishi kuyuka bulongo bilanguluka ye abena kufunjisha ne kulengela ubena kufunda kutako muchima. Kya kumwenako, Yesu byo akebelenga kufunjisha baana banji ba bwanga kwipelula, wibepwizhe bwipuzho bwibalengejile kulangulukapo. (Mako 9:33) Pa kufunjisha Petelo bya kwingijisha mafunde, Yesu wamwipwizhe bwipuzho ne kumubuula mikumbu yavula amba asalepo. (Mat. 17:24-26) Kabiji kimye Yesu kyo akebelenga kuyuka byajinga mu michima ya baana banji ba bwanga, wibepuzhe mepuzho avula. (Tangai Mateo 16:13-17.) Yesu kechi wabulangatu bantu bya kuba ne. Kupichila mu kwingijisha bulongo mepuzho, Yesu wibafikanga pa muchima ne kwibalengela kwikela mwayila mambo awama.
11 Inge twaingijisha mepuzho bulongo byonka byaubanga Yesu, kiketukwasha kuba bintu bisatu. Tukayuka bya kukwasha bantu bulongo, bya kuba na bantu bakeba kuchibikizha mwisambo ne kufunjisha bantu bepelula pa kuba’mba bamwenemo. Twayai twisambe pa bya kumwenako bisatu bibena kumwesha byo twakonsha kwingijisha bulongo mepuzho.
12-14. Mwakonsha kukwasha byepi mwanenu kukasuluka pa kwisamba mambo awama na bakwabo? Ambai kya kumwenako.
12 Kya kumwenako 1: Byo muji bansemi, mwakonsha kuba byepi inge mwanenu wimwipuzha bya kulumbulwila bakwabo ku sukulu byo aitabilamo pa bilengwa? Kwa kubula nangwa kuzhinaukatu ne, mwakonsha kukebesha kumukwasha kukasuluka pa kwisamba mambo awama na bakwabo. Byonka byaubanga Yesu, mwakonsha kumwipuzha mepuzho pa kuba’mba muyuke byo abena kulanguluka kukila kumulengulula nangwa kufikenatu mwa mubula bya kuba. Mwakonsha kuba byepi bino?
13 Tangilai pamo na mwanenu byambo biji mu buku wa Fwenyai Kwipi ne Yehoba, panyuma ya kutanga, mwakonsha kumwipuzha bishinka byo amona’mba byakonsha kulengela bakwabo kutako muchima. Mwambilai ambe bishinka byamulengejile kushiinwa kuba’mba Mulenga ko aji ne kyo akebela kuba kyaswa muchima wa Lesa. (Loma 12:2) Mubulai kuba’mba bishinka byamulengejile kushiinwa byakonsha kupusana na bimulengejile anweba kushiinwa.
14 Lumbulwilai mwanenu kuba’mba pa kwisamba na bakwabo bo afunda nabo wafwainwa kulondela byo mwakuba. Ko kuba’mba wafwainwa kwambapo bishinka bimo ne kwipuzha mukwabo mepuzho alengela kulangulukapo. Kya kumwenako, wakonsha kwambila mukwabo mo bafunjila kutanga mafuka 11 ne 12 mu kitango 17 mu buku wa Fwenyai Kwipi ne Yehoba. Apa bino waipuzha’mba, ‘Nanchi kya kine kuba’mba bongo bwa muntu bwakonsha kulama byambo kukila kompyuta nyi?’ Kwa kubula nangwa kuzhinaukatu ne, mukwabo wakonsha kuswa amba ee. Kepo mwanenu akonsha kwipuzha’mba, ‘Pano inge kompyuta kuji beilengele, nanchi kechi kyailamo kuba’mba bongo nabo kuji wibulengele nenyi?’ Pa kuba’mba mukwashe mwanenu kwamba saka akasuluka pa kubulako bakwabo bintu byo aitabilamo, mwafwainwa kwisambangapo ne kumwesha bya kuba bino. Inge mwamufunjisha bya kwingisha bulongo mepuzho, mukamukwasha kwingila bulongo mwingilo wanji wa busapwishi.
15. Twakonsha kwingijisha byepi mepuzho pa kwisamba na bantu baitabila’mba Lesa ufwako?
15 Kya kumwenako 2: Mu mwingilo wetu wa busapwishi, tutana bantu bamba’mba Lesa ufwako. Kimye kimo muntu wakonsha kwamba’mba waitabila’mba Lesa ufwako. Mu kifulo kya kuleka kwisamba nanji na mambo a byo aamba, twakonsha kumwipuzha na mushingi amba mwaitabila’mba Lesa ufwako pa myaka inga kabiji ki ka kimulengejile? Panyuma ya kuteleka byo akumbula ne kumusanchila pa byo alangulukilepo bulongo pa kino, twakonsha kumwipuzha inge wakonsha kutemwa kutanga mabuku amwesha kuba’mba bilengwa byumi byalengelwe. Inge uno muntu wakasuluka, wakonsha kwamba’mba kijitu bulongo kutanga mabuku muji bino bishiino. Kepo twakonsha kumupa buku wa Fwenyai Kwipi ne Yehoba. Inge twaipuzha bulongo mepuzho, twakonsha kumulengela kutako muchima ku mambo awama.
16. Mambo ka o kyatamina kuleka bo tufunjisha Baibolo na kutangatu mikumbu yanembwa mu buku ye tubena kwingijisha?
16 Kya kumwenako 3: Pa kufunjisha bantu Baibolo, ki ka kyakonsha kubiwa inge twaleka ubena kufunda Baibolo na kutangatu mikumbu yanembwa mu buku ye tubena kwingijisha? Inge ke tube bino, tukamulengela kutola, kechi ukayuka Lesa bukiji ne. Mambo ka? Mambo muntu ufunda Baibolo utangatu mikumbu iji mu buku kwa kubula kulangulukapo, kechi ukekizha mizhazhi mu bukine ne. Byonka biji kichi kyabula kwikizha mizhazhi kileela inge kwaiya kyaashi, ne aye ukakankalwa kuchinchika inge wamanyikwa. (Mat. 13:20, 21) Pa kuba’mba kino kikabule kumumwekela, twafwainwa kumwipuzha byo abena kumona bintu byo abena kufunda. Mwipuzhai muyuke umvwe waswa byo byo bishinka. Kyakilamo kunema, mwambilai ambe ene mambo o aswila byo byo bishinka nangwa o akaina. Mukwashai kulanguluka pa Binembelo pa kuba’mba mwine etaine mukumbu wa kine. (Hebe. 5:14) Inge twaingijisha mepuzho bulongo, tukakwasha bo tufunjisha kwikala na lwitabilo lwakosa ne kutwajijila kwikala bakishinka inge kebebakanye nangwa kebakebe kwibatwala mungi. (Kolo. 2:6-8) Ñanyi kintu kikwabo kyo twakonsha kuba pa kuba’mba twingilenga bulongo mwingilo wetu wa busapwishi?
BASAPWISHI BENGILA BULONGO BEKWASHA BENE NA BENE
17, 18. Inge mwaya na mukwenu mu mwingilo wa bwina Kilishitu, mwakonsha kumukwasha byepi?
17 Yesu watumine baana banji ba bwanga babiji babiji mu mwingilo wa kusapwila. (Mako 6:7; Luka 10:1) Kabiji Paulo naye waambile pa ‘bakwabo bamingilo’ “baingijilenga ne [aye] na mambo a mambo awama.” (Fili. 4:3) Kwesakana na bino bya kumwenako bya mu Binembelo, mu 1953, basapwishi ba Bufumu batendekele kufunjisha bakwabo bya kwingila mwingilo wa kusapwila.
18 Inge mwaya na mukwenu mu mwingilo wa bwina Kilishitu, mwakonsha kumukwasha byepi? (Tangai 1 Kolinda 3:6-9.) Zhikulai Baibolo wenu pa binembelo bibena kwingijisha mukwenu. Talainga ubena kwamba, mukwenu nangwa mwina nzubo inge ubena kwamba. Taiko muchima ku mwisambo pa kuba’mba mukonshe kusunsapo inge mukwenu ke akebe kumukwashako kulumbulwila ye mwatana byo abena kukana. (Sapwi. 4:12) Pano bino, chinuzhukai kuchibikizha mulanguluko wawama ubena kukeba kwamba mukwenu. Inge mwaja kabakubaku mukafichisha mukwenu ku muchima ne kulengela ye mubena kusapwila kubula kumvwisha. Kimye kimo, kyawama kusunsapo pa mwisambo. Pano bino, inge kemukebe kwambapo, ambaitu byambo bicheche. Apa bino mwaleka mukwenu watwajijila na mwisambo.
19. Ñanyi kintu kyo twafwainwa kuvulukanga, kabiji mambo ka?
19 Mwakonsha kwikwasha byepi anweba bene na bene inge mubena kwingila mwingilo wa ku nzubo ku nzubo? Isambainga pa byo mwakonsha kuwamishako mfunjishisho yenu. Kange mwambenga bintu byatama pa bantu ba mu nyaunda yenu byakonsha kwimulefula ne. Kabiji chinuzhukainga kuyebeka basapwishi bakwenu. (Mana 18:24) Twafwainwa kuvulukanga kuba’mba twi bipe bya buchimba. Yehoba witumwesha lusa lukatampe pa kwitupa mwingilo wanema bingi wa kusapwila mambo awama. (Tangai 2 Kolinda 4:1, 7.) Onkao mambo, twayai atweba bonse tumweshenga kuba’mba twanemeka uno mwingilo kupichila mu kwibikako kwingila bulongo mwingilo wetu wa busapwishi.
[Mabulañano pa peja 5]
Pa kuba’mba tufike pa michima ya bantu, twafwainwa kwibalengela kushiinwa
[Kipikichala pa peja 6]
Mepuzho awama alengela bantu kulanguluka pa ene mambo o baitabila mu byo byo bintu
[Kipikichala pa peja 6]
Mepuzho alengela bantu kutako muchima ne kuswa bukine
[Kipikichala pa peja 6]
Mepuzho alengela bantu kulangulukapo ne kumona kuba’mba byo baitabilamo byafuma mu Baibolo