Musanchilainga Yehoba pa Bumpanyi Bwanji ne Kukoka Muchima
‘Yehoba ye wawama ku bonse; ne lusa lwanji luji pa mingilo yanji yonse.’—SALA. 145:9.
MWAKONSHA KULUMBULULA BYEPI?
Ñanyi byubilo bibiji bya kwa Yehoba byakonsha kwitulengela kumusanchila bingi?
Twakosha kwikala byepi bampanyi byonka biji Yehoba?
Mu ñanyi mashinda mo twakonsha kumweshesha kukoka muchima byonka biji Yehoba?
1, 2. Balunda ne Yehoba bakatwajijila kuba ka?
NYENGA Monika waambile’mba: “Twaikala myaka 35 mu masongola. Bamwatawami ne amiwa twiyuka bingi bulongo. Pano bino, nangwa kya kuba twaikala myaka yavula, ne luno kuji bintu bimo byo twiya kuyuka pa mukwetu byo twabujile kuyuka kala.” Byobyo kiji ne mu masongola avula ne ku balunda.
2 Tumvwa bingi bulongo kuyuka byavula pa bantu bo twatemwa. Mu bulunda bonse bo twisampa, kafwako bwanema kukila bulunda bwetu ne Yehoba ne. Kabiji kechi tukayuka byonse pe aye ne. (Loma 11:33) Byo tukekalanga myaka ne myaka, tukatwajijila kufunda byavula ne kumusanchila Yehoba pa byubilo byanji byawama.—Sapwi. 3:11.
3. Tusakwisamba pa ka mu uno mutwe?
3 Mutwe wafumako witukwashishe kuyuka byubilo bya kwa Yehoba bibiji. Twafunjile kuba’mba wakasuluka kabiji kechi uji na misalululo ne. Pano twayai twisambe pa byubilo bikwabo bibiji bya kwa Yehoba, bumpanyi ne kukoka muchima. Kuba bino kusakwitukwasha kuyuka kuba’mba ‘Yehoba ye wawama ku bonse; ne lusa lwanji luji pa mingilo yanji yonse.’—Sala. 145:9.
YEHOBA MPANYI
4. Kwikala mpanyi kulumbulula ka?
4 Kwikala mpanyi kulumbulula ka? Tutana mukumbu mu byambo bya kwa Yesu byanembwa mu Byubilo 20:35, bya kuba’mba: “Mu kupana mufuma lusekelo lukatampe kukila mu kutambula.” Kupichila mu bino byambo, Yesu walumbulwile mwatala bumpanyi bwa kine. Muntu upana, wingijisha kimye kyanji, ngovu yanji ne bintu byanji kukwasha bakwabo, kabiji uba bino na lusekelo. Bumpanyi buyukanyikilwa ku kyalengela kuba’mba muntu apane, kechi ku kubaya kwa kintu kyo apana ne. (Tangai 2 Kolinda 9:7.) Kafwako mpanyi wakila Yehoba, “Lesa [wetu] wa lusekelo” ne.—1 Timo. 1:11.
5. Mu ñanyi mashinda Yehoba mo amweshesha bumpanyi?
5 Yehoba umwesha byepi bumpanyi? Upa bantu byo bakeba, kubikapotu ne boba bakyangye kutendeka kumupopwela. Kya kine, “Yehoba ye wawama ku bonse.” Aye “uselesha juba janji ku babi ne ku bawama pamo; ne kunokesha mvula pa baoloka ne pa babula koloka pamo.” (Mat. 5:45) O ene mambo mutumwa Paulo o abujile bantu babula kwitabila amba Yehoba “waubile byawama kupichila mu kwimupa mvula ne kimye kya kupilamo kajo saka emupa kajo kavula ne kulengela michima yenu kusangalala.” (Byu. 14:17) Kya kine, Yehoba mpanyi ku bonse.—Luka 6:35.
6, 7. (a) Bañanyi Yehoba kikatakata bo atemwa kukwasha? (b) Ambai kyamwekele kibena kumwesha Lesa byo akwasha bapopweshi banji bakishinka.
6 Yehoba watemwa bingi kukwasha kikatakata bapopweshi banji bakishinka mu byo bakajilwa. Mfumu Davida waambile’mba: ‘Najinga mwanyike, pano kanji mukote; byonkabyo kechi namwenepo waoloka walekelelwa ne, nangwa baana banji saka balomba kajo ne.’ (Sala. 37:25) Bena Kilishitu bavula bakishinka bemwena Yehoba byo alama bantu banji. Akimonai kino kyamwekele.
7 Mu myaka ya panyuma po, Nancy nyenga uji mu mwingilo wa kimye kyonse wakajilwe bingi. Waambile’mba: “Nakebelenga mali a kusonkela nzubo o bakebelenga pa juba jalondejilepo.” Uvuluka’mba: “Kechi najingapo na kwakufumya ano mali ne. Nalombele pa lukatazho lo najinga nalo, kepo nayile ku nkito yami ya kupana kajo mu kishimikwa mwakujila. Kechi nayukile kuba’mba bantu basakumpapo mali avula a kunsanchila ne, mambo ajo juba kechi kwaiyanga bavula na kupota kajo ne. Nakuminye bingi, bantu bavula baishile na kupota kajo bobo bufuku. Byo nakombokele, nabajile mu mali o bampeletu, onse pamo akumenetu suka onka o nakebelenga.” Nyenga Nancy washiinwe kuba’mba Yehoba ye mpanyi wamupele o a mali o akebelenga.—Mat. 6:33.
8. Ñanyi bupe Yehoba bo apa bantu bonse?
8 Kuji bupe Yehoba bo apa bantu bonse. Ñanyi bupe bonkabo? Ke kitapisho kya bukuzhi bwa Mwananji. Yesu waambile’mba: “Lesa byo ebatemwishe ba pano pa ntanda wapaine Mwananji yenkawa umotu, kuba amba bonse bamwitabila kechi bakonaike ne, poso bakekale na bumi bwa myaka.” (Yoa. 3:16) “Ba pano pa ntanda” bo baambapo pa kikye kinembelo, ke bantu. Yehoba wapana bupe bukatampe ku bonse baswa kwibutambula. Bonse baitabila mwi Yesu bakatambula bumi bwa myaka ne myaka. (Yoa. 10:10) Kino kyo kiyukilo kikatampe kimwesha kuba’mba Yehoba mpanyi.
IKALAI BAMPANYI BYONKA BIJI YEHOBA
9. Twakonsha kwikala byepi bampanyi byonka biji Yehoba?
9 Twakonsha kwikala byepi bampanyi byonka biji Yehoba? Yehoba “witupa bintu byonse byo twatemwa,” onkao mambo, twafwainwa “kwikala bampanyi” ne kulengela bakwetu kwikala na lusekelo. (1 Timo. 6:17-19) Tupana na lusekelo bintu byetu ku bantu bo twatemwa ne kukwasha boba bakajilwa. (Tangai Mpitulukilo ya mu mizhilo 15:7.) Ki ka kyakonsha kwitukwasha kwikala bampanyi? Bena Kilishitu bamo boba bino: Inge batambula bupe, nabo bamonapo jishinda ja kupainamo bupe ku bakwabo. Mu kipwilo kya bena Kilishitu muji balongo ne banyenga bavula bingi bebikako kwikala bampanyi.
10. Ñanyi jishinda jimo jawama kupainamo?
10 Jishinda jimo jawama kupainamo ke kwipana atweba bene mu byambo ne mu byo tuba. Twakonsha kuba byepi bino? Twakonsha kuba bino kupichila mu kwingijisha kimye ne ngovu yetu kukwasha bakwetu ne kwibatundaika. (Nga. 6:10) Pa kuba’mba tuyuke inge tukwasha bakwetu ne kwibatundaika, twakonsha kwiipuzha’mba: ‘Nanchi bantu bamona’mba nkeba kukwasha bakwetu ne kuteleka inge babena kumbula makatazho abo nyi? Inge muntu wañambila’mba namukwasheko mwingilo umo nangwa kuya na kumusendelako bintu bimo, nanchi nswa nyi? Ñanyi kimye kyo natakaikilepo mulongo wami nangwa mukwetu wa mu lwitabilo?’ Inge ‘saka tupana,’ tukafwenya kwipi ne Yehoba ne balunda netu.—Luka 6:38; Mana 19:17.
11. Ñanyi mashinda amo mo twafwainwa kupela Yehoba?
11 Kabiji twakonsha ne kupana kwi Yehoba. Binembelo bitutundaika’mba: “Nemeka Yehoba na bintu byobe.” (Mana 3:9) Bino “bintu” ke kimye kyetu, ngovu ne bintutu bikwabo byo twakonsha kwingijisha mu mwingilo wanji. Ne baana nabo kuji byo bakonsha kupa Yehoba. Mwanamulume uji na baana aye Jason waambile’mba: “Inge kisemi kyetu kyanengezha kupana bupe ku Nzubo ya Bufumu, tutuma baana betu kubika mali mu kabokoshi ka bupe. Bomvwa bingi bulongo ‘kupapo Yehoba bintu bimo.’” Baana bapana bintu kwi Yehoba saka bakijitu banyike bakatwajijila kumupa ne kimye kyo bakakoma.—Mana 22:6.
YEHOBA WAKOKA MUCHIMA
12. Kukoka muchima kulumbulula ka?
12 Kyubilo kikwabo kyawama kya kwa Yehoba ke kukoka muchima. Kukoka muchima kulumbulula ka? Kyambo kya Kihebelu kyatuntululwa’mba “kukoka muchima” mu Baibolo wa Binembelo bya Ntanda Ipya bya Kingiliki bya Bwina Kilishitu kilumbulula “kunekenena.” (Titu. 3:1, 2) Muntu unekenena kechi ukoselatu byaamba mizhilo, kukosa muchima nangwa kushinta ne. Muntu wakoka muchima ubila bakwabo lusa ne kwibalangulukilako mu bintu bimo. Uteleka inge bakwabo babena kwamba, kabiji pa bimye bimo unekenena byo babena kukeba.
13, 14. (a) Yehoba umwesha byepi byo akoka muchima? (b) Twakonsha kufunjilako ka kwi Lesa byo amwesheshe kukoka muchima kwi Lota?
13 Yehoba umwesha byepi byo akoka muchima? Pa kuba bintu ulanguluka ne pa biumvwa bapopweshi banji, kabiji javula wibobila byo bakeba. Akilangulukai pa byo aubile na Lota muntu waoloka. Yehoba byo aambile’mba usakonauna muzhi wa Sodoma ne Gomola, wabujile Lota amba anyemene ku mitumba. Pa kuba Lota walombele kuba’mba aye ku mpunzha ikwabo. Akikilangulukaipotu, Lota waambijile Yehoba kwalula mukambizho wanji.—Tangai Ntendekelo 19:17-20.
14 Mwakonsha kwamba’mba Lota kechi wajinga na lwitabilo lwakosa ne, nangwa’mba kechi wajinga na lukokelo ne. Byo kiji kuba’mba Yehoba wakonsheshe kumulama konse ko afwainwe kuya, Lota kechi wafwainwe kwikala na moyo ne. Nangwa byonkabyo, Lota waumvwine moyo, kabiji Yehoba wamubijile byo akebelenga. Wamuswishishe kunyemena ku muzhi ye akebelenga konauna. (Tangai Ntendekelo 19:21, 22.) Yehoba kechi wakosa muchima ne, kabiji kechi ukoselatu pa byo akeba ne. Aye wakoka muchima kabiji unekenena.
15, 16. Mizhilo Lesa yo apele Mosesa imwesha byepi Yehoba byo akoka muchima? (Monai kipikichala kitanshi.)
15 Langulukai pa kintu kikwabo kimwesha Yehoba byo akoka muchima kitanwa mu Mizhilo yo apele Mosesa. Inge mwina Isalela muyanji wakankalwa kupana mwana mukoko nangwa mbuzhi wa kulambula, wapananga tutela nangwa bangalamwe babiji. Pano ibyepi inge wayanda kya kuba wakankalwa kupana bangalamwe babiji? Inge kyaikala bino, Yehoba waswishishe bena Isalela bayanji kupana bunga. Pano bino, muzhilo waambile’mba bafwainwe kupana “bunga bwalamba,” kechi kupanatu amba kikulu bunga ne. (Nte. 18:6.) Mambo ka kuba bino o kwanemejile?—Tangai Bena Levi 5:7, 11.
16 Fwanyikizhai kuba’mba mwi mwina Isalela wayanda bingi. Pa kufika ku tente wa lusambakeno na bunga bwalamba bwa kulambula, mwamona bena Isalela banonka na kuleta banyama. Mwakonsha kumvwa bumvu na mulambo wa bunga ye mwaleta na mambo a kumweka kubula kunema. Kepo mwavuluka kuba’mba mulambo wenu wanema bingi kwi Yehoba. Mambo ka? Mambo Yehoba waambile’mba bunga bwafwainwa kwikala bwawamisha. Kijitu nobe Yehoba waambijile bena Isalela bayanji amba: ‘Nangwa mwakankalwa kupana bibena kupana bakwenu, pano bino nayuka kuba’mba ne anweba mubena kupana byenu byawamisha.’ Kwambatu kine, Yehoba umwesha byo akoka muchima kupichila mu kulanguluka pakonsha kupelela bapopweshi banji ne bintu byo biji.—Sala. 103:14.
17. Mwashiinwa’mba Yehoba usekela mu mingilo ya mutundu ka?
17 Kuyuka kuba’mba Yehoba wakoka muchima kwitutekenesha bingi mambo kwitulengela kuyuka kuba’mba utambwila byo tumwingijila na muchima yense. (Kolo. 3:23) Constance, nyenga wakikulumpe mwina Italy waambile’mba: “Natemwa bingi kwisamba na bantu pa Mulenga kabiji nguba bino na muchima yense. O ene mambo o natwajijila na kusapwila ne kufunjisha bantu Baibolo. Kimye kimo ndanguluka’mba, na mambo a kukolwa kolwa, kechi mbena kwingila kya kine ne. Nangwa byonkabyo, mvuluka kuba’mba Yehoba wayuka byonji, wantemwa kabiji wanemeka bingi byo na mwingijila na muchima yense.”
IKALAI BAKOKA MUCHIMA BYONKA BIJI YEHOBA
18. Bansemi bakonsha kulondela byepi Yehoba?
18 Twakonsha kwikala byepi bakoka muchima byonka biji Yehoba? Akilangulukai pa byaubile Yehoba kwi Lota. Yehoba wajinga na luusa, bino watelekele Lota byo aambilenga byajinga ku muchima. Kabiji Lesa waswile byakebelenga Lota. Inge mwi bansemi, nanchi kechi mwafwainwa kulondela byaubile Yehoba nenyi? Nanchi mwakonsha kuteleka ku bibena kukeba baana benu, ne kwalulako bintu inge byailamo nyi? Mwakonsha kuba byepi bino? Kyamba kya Usopa kya September 1, 2007 kyaambile’mba, bansemi bamo besambila pamo na baana babo mizhilo ya kulondela pa nzubo. Kya kumwenako, bansemi bafuukulapo kimye baana babo kyo bafwainwa kubwela pa nzubo, kabiji baji na luusa lwa kutongola kimye baana kyo bafwainwa kukonkananga pa nzubo. Nangwa byonkabyo, bansemi bena Kilishitu bafwainwa kulanguluka ne pa byaamba baana babo pa kimye kyo batongola. Kimo kimye bansemi bakonsha kulondela byafuukulapo baana umvwe kya kuba kechi byalala mafunde a mu Baibolo ne. Inge bansemi besambila pamo na baana babo pa kulenga mizhilo ya pa nzubo, baana bayuka mwatala yoyo mizhilo kabiji kibapelela bingi kwiilondela.
19. Bakulumpe mu kipwilo bakonsha kulondela byepi kya kumwenako kya kwa Yehoba kya kukoka muchima?
19 Bakulumpe mu kipwilo bakonsha kulondela kya kumwenako kya kwa Yehoba kya kukoka muchima kupichila mu kulanguluka pa bintu bibena kupitamo bakwabo ba mu lwitabilo. Vulukai kuba’mba Yehoba wanemekele milambo yapananga bena Isalela bayanji. Ne lelo jino byo byo kiji, balongo ne banyenga bamo kechi bengila kimye kyabaya mu mwingilo wa kusapwila ne, kampe na mambo a kukolwa nangwa bukote. Ibyepi inge kya kuba baikala na kijikila na mambo a kubula kwingila kimye kyabaya mu mwingilo? Bakulumpe mu kipwilo bafwainwa kwibabula kuba’mba Yehoba utemwa bingi pa mingilo yo babena kwingila papelela bulume bwabo.—Mako 12:41-44.
20. Nanchi kukoka muchima kulumbulula kubula kwibikako kwingijila Lesa nyi? Lumbululai.
20 Bino kwikala bakoka muchima kechi kulumbulula’mba twafwainwa kwingilanga mwingilo wa Lesa na mulele ne. (Mat. 16:22) Kechi twafwainwa kwingilangatu pacheche ne kwikangaizha bino saka tuji na bulume bwa kwingila ne. Atweba bonse twafwainwa ‘kwibikishako’ kwingila mingilo itundaika Bufumu. (Luka 13:24) Twafwainwa kuyuka pa kupelela pa kulondela ano mafunde abiji. Twafwainwa kwibikishako kwingila mwingilo wetu kwa kubula kubwela panyuma, akwe saka tuvuluka kuba’mba Yehoba kechi witukebela bintu byakila pa bulume bwetu ne. Inge ke tumwingijile na muchima yense twafwainwa kushiinwa kuba’mba usekelamo. Nanchi kechi tumvwa bulongo kwingijila Nkambo yetu usanta kabiji wakoka muchima nenyi? Mu mutwe walondelapo tukesamba pa byubilo bikwabo bibiji bya kwa Yehoba byawama.—Sala. 73:28.
[Kipikichala pa peja 13]
Bena Isalela bebatundaikile kwikala bampanyi byonka biji Yehoba (Monai jifuka 9)
[Kipikichala pa peja 14]
“Nemeka Yehoba na bintu byobe.”—Mana 3:9 (Monai jifuka 11)
“Byonse byo muba, mwibyubenga na mweo yense.”—Kolo. 3:23 (Monai jifuka 17)