Inge Kwamweka bya Malwa

Ba Andrew bekala ku Sierra Leone baambile’mba: “Kechi twayukile ne bya kuba kimye kyo kwajinga muyulo mukatampe ne. Byonse byo twajinga nabyo byaonaikile.”

Ba David bekala pa jikuji ja Virgin Islands baambile’mba: “Kinkunkwila kikatampe byo kyapwile, twabwelele ku nzubo yetu. Bipe byonse byo twajinga nabyo byaonaikile. Kino kintu kitukankamikile bingi. Mwanetu wa mukazhi waponene panshi ne kutendeka kujila.”

INGE mwapitapo kala mu bya malwa, mwafwainwa mwayuka byumvwa bantu bapita mu bya malwa. Bano bantu bekala bingi na bijikila ne kilabila. Bavula balefulwa bingi kabiji kibakatazha kuchinchika.

Inge bwikalo bwenu bwapimpulwa na mambo a bya malwa, ne anweba mwakonsha kumona nobe kuba mwachinchika makatazho o mubena kupitamo ne. Mwakonsha ne kutendeka kulanguluka’mba kechi kyanema kwikala na bumi ne. Bino Baibolo waamba’mba bumi bwenu bwanema bingi ne kuba’mba mwakonsha kwikala na luketekelo lwa bintu byawama biji kulutwe.

BUKINE BWA MU BAIBOLO BWITULENGELA KWIKALA NA LUKETEKELO

Kinembelo kya Musapwishi 7:8 kyaamba’mba: “Mpelo ya kintu yawama kukila ntendekelo yakyo.” Inge po po mwafumatu mu bya malwa, bwikalo bukatazha bingi. Pano bino, pa kuba’mba bwikalo bwenu buwame jikwabo, mwafwainwa kwibikako bingi.

Baibolo walaya’mba kulutwe na lwendo mu ntanda “kechi mukomvwanyikapo jibiji mabingo nangwa kujila na mambo a bya malwa ne.” (Isaya 65:19) Uno mulaye ukafika kimye ntanda kyo ikekala paladisa mu Bufumu bwa Lesa. (Salamo 37:11, 29) Pa kyokya kimye, bya malwa kechi bikekalako jibiji ne. Kabiji makatazho onse o tubena kupitamo kechi akekalako jibiji ne, mambo Lesa wa Bulume Bonse walaya’mba: “Bintu bya kala kechi bakebivulukapo jibiji ne, kabiji kechi bikeyapo jibiji mu michima yabo ne.”—Isaya 65:17.

Akilangulukai pa kino: Mulenga wetu wanengezha kwimupa “luketekelo ne bwikalo bwawama bwa kulutwe,” ko kuba’mba mu Bufumu bwanji. (Yelemiya 29:11) Kuyuka buno bukine kwakonsha kwimukwasha kwikala na lusekelo mu bwikalo bwenu. Ba Sally bo twaambapo mu mutwe mutanshi baambile’mba: “Kulanguluka pa bintu byawama bikoba Bufumu bwa Lesa kulutwe kwakonsha kwitukwasha kulubako ku bintu byatama byo tubena kupitamo.”

Twimutundaika kutwajijila kufunda pa bintu byawama Bufumu bwa Lesa byo bukobila bantu. Kuba bino kukemukwasha kwikala na lusekelo nangwa kya kuba mubena kupita mu makatazho. Twafwainwa kutwajijila kupembelela ntanda mukabula bya malwa. Mu Baibolo muji binembelo bitukwasha kuyuka bya kuba inge tubena kupita mu bya malwa. Akimonai bino binembelo bimo.

Binembelo Byakonsha Kwimukwasha

Ikalainga na Kimye Kyabaya kya Kulaala.

“Kyawama kukokolokako kukila kukizhamo kwingila mingilo ne kupulwilamotu mabuula.”—Musapwishi 4:6.

Bashayuka bataana kuba’mba “kubula kwikala na kimye kyabaya kya kulaala kulengela muntu wapita mu bya malwa kwikala bingi na bijikila na mambo a kuvula kwa milanguluko.” Onkao mambo kyanema bingi kulaala pa kimye kyabaya.

Buulaingako bakwenu bijikila byenu.

“Bijikila biji mu muchima wa muntu byo bilengela muchima kupopomenwa [nangwa’mba “kwikala na binyenge,” tubyambo twa munshi], pakuba byambo byawama bimusangajika.”—Byambo bya Maana 12:25.

Buulaiko mulongo wenu nangwa mulunda nenu ye mwaketekela bintu byo mubena kupitamo. Bano bantu bakonsha kuteleka ku byo mubena kwibabula ne kwimutundaika nangwa kwimukwasha na bya kuba na bijikila byo muji nabyo.a

Langulukainga pa bintu byawama bikekala mu bufumu bwa Lesa.

“Pakuba atweba tubena kutengela meulu apya ne ntanda ipya monka mwayila mulaye wanji, kabiji mu bino mo mukekala bololoke.”—2 Petelo 3:13.

a Muntu inge waikala na bijikila pa kimye kyabaya, wafwainwa kuya ku kipatela pa kuba’mba bakamukwashe.