Teshai Muchima ku Kukajilwa kwa Bashinka Matwi

¹ Bashinka matwi bavula babena kwiya kwi kafunga wawama ne kwikala balunda bepana kwi Yehoba Lesa. (Yoa. 10:3, 11) Bakwabo, kikatakata bakulumpe mu kipwilo, bafwainwa kuyuka kukajilwa kwa ku mupashi kwa balongo ne banyenga yetu bashinka matwi.

² Kukwasha Bashinka Matwi: Panengezhewa lunengezho lwa kulumbulwila banshinka matwi majashi pa kupwila umvwe paji bantu bayuka kwamba nabo. Umvwe pa kipwilo kafwapo wayuka kwamba na bashinka matwi, kyakonsha kuwama kwibatuma ku kipwilo kiji kwipi muji bayuka kwamba nabo. Pano bino, umvwe mu mpunzha yenu kafwamo luno lunengezho mwakonsha kusala basapwishi bafwainwa kwikala nabo pamo ne kwibanembela bishinka bikatampe bibena kwambiwapo.

³ Lunengezho lwa pa Kupwila kwa Kipwilo ne pa Kupwila kwa Kijiiji: Lunengezho lwa kutuntulula kwa kwamba na maboko pa kupwila kwa kijiiji ne pa kupwila kwiikajila lunengezhewa na paina wingijila kijiiji. Mukulumpe mu kipwilo nangwa nkwasho wafikapo wafwainwa kusalwa kwikala wakunengezha bino. Balongo ne banyenga baji na byakumwenako byawama bafikapo bakonsha kupewa uno mwingilo wa kulumbulwila bashinka matwi majashi pa kupwila kwa kijiiji ne kwiikajila. Luno lunengezho lo lwafwainwa ne kulondelwa pa kipwilo, ne kumona’mba mwateshako muchima ku kukajilwa kwa bashinka matwi.

⁴ Bashinka matwi bafwainwa kwikala pa mpunzha po bakonsha kumona bulongo ubena kwibalumbulwila majashi kabiji bafwainwa kutalañana na pulatifomu. Byo byo kyafwainwa kunengezhewa ne pa kupwila kwa kipwilo ne pa kupwila kwa kijiiji. Umvwe bashinka matwi kechi bavulamo mu kipwilo ne, ubena kwibalumbulwila wafwainwa kwikala pa kipona. Ko kyakonsha kubiwa, bakulumpe mu kipwilo bafwainwa kwipuzha mulongo washinka matwi wakoma, pa lunengezho lwa kwibanengezhezha pa kwikala pakonsha kwibawamina.

⁵ Umvwe wafunda bya kwamba na bashinka matwi mukulumpe mu kipwilo nangwa nkwasho kabiji balongo ne banyenga bashinka matwi bavula, bakulumpe mu kipwilo bakonsha kufuukula kuba’mba kupwila kumo kubiwengatu mu mulaka wa bashinka matwi. Kupwila kwa Lufunjisho lwa Buku ko kwafwainwa kunengezhewa patanshi. Umvwe kipwilo kikeba kunengezhezha bashinka matwi kupwila konse kutanu, kyafwainwa kubula Sosaiti pa luno lunengezho.

⁶ Nangwa kya kuba kwisamba pakachi ka bashinka matwi ne bantu bomvwa kukebewa kwibikako na ngovu ku mabumba onse abiji, bantu bonse mu kipwilo bafwainwa kweseka kwipwiluluka bene na bene pa kuba’mba pekale kwikosesha kwa kine kine. (Hebe. 10:24) Balongo inge bamwesha bino byubilo bakalengela bakatataka kwiumvwa batambwilwa.