Twajijilai Kubika Bufumu Palutwe
1 Kubika Bufumu bwa Lesa palutwe mubwikalo bwetu nekutwajijila nakuba byonkabyo kechi kyapelane umvwe twaikala mulukatazho lwamali nangwa makatazho akwabotu. Tubika byepi Bufumu palutwe umvwe twaikala namakatazho? Ibyepi umvwe twatwela nkito ikeba’mba tubulenga kutanwa kukupwila nangwa yoya ibula kwitushilako kimye kyakuya mumwingilo wetu wamubujimi? Nanchi Bufumu twafwainwa kukibufungila pambaji bwaikala kekintu kyabubiji mubwikalo bwetunyi?
2 Twafwainwa Kwikala Nalwitabilo Lwakosa: Umvwe lwitabilo lwetu lwaesekwa namakatazho auno mutundu, kechi twafwainwa kuvulama mulaye wa Yehoba ne Yesu walailwe’mba Lesa uketukwasha inge twasambila kukebesha Bufumu ne. (Sala. 37:25; Mat. 6:31-34) Byakutabataba nebijikila byaino ntanda byakonsha kutabankanya milanguluko yetu nekwitulengela kukankalwa kutangizhako Bufumu. Bamo baswisha mulanguluko wakukeba bukulumpe pankito nangwa bunonshi kwikala kintu kikatampe mubwikalo bwabo. Bino nangwa byonkabyo, byonka byajinga Paulo, twafwainwa kulangulukapo bulongo nekumona bintu byanema mubwikalo bwetu.—Fili. 3:7, 8.
3 Abya Kwaluluka Kukebewanyi? Musapwishi umo waambile’mba: “Natele bingi muchima kubusulu. Kyokintu kikatampe kyonatemwishe. Nalangulukanga namba Bukamonyi kechi bupwane nangwa ñingiletu kimye kyabaya mubusulu.” Bino wakatazhiwanga bingi nakulanguluka’mba wakonsha kuba byavula mukwingijila Yehoba. Kyapeleleko, walekele busulu bwatabankenye nkomeno yanji yakumupashi. Byoepaine mwine mumwingilo wa Bufumu, waambile’mba: “Pano luno mbena kwiumvwa namba bwikalo bwami bubawame kumeso a Yehoba mambo mbena kumwingijila, kino kyokintu kikatampe.”
4 Kekyalutakaiko bingi pakumona’mba, bavula baleka makito akumubiji nekukebesha bunonshi bwavula, bapeezhako bwikalo bwabo apa bino nekutatula mwingilo wakimye kyonse. Bankwasho nebakulumpe mukipwilo bakyanyike bakyangye kusongola babena kutanwa ku Sukulu ya Lufunjisho lwa Mwingilo bauba byonkabyo kabiji babena kwiyowa uno mwingilo wawama bingi. Kulondela kyakumwenako kyawama kyakwa Paulo, nalusekelo batondwa nabintu byakumubiji byobaji nabyo byakwikwashishamo mubwikalo.—1 Ko. 11:1; 1 Timo. 6:6-8; Hebe. 13:5.
5 Nangwa kyakuba bantu bakukyalo bakonsha kwitwendeleka nabyotumona bwikalo, tuji nabibusa bya Yehoba. (1 Ko. 1:26-31) Abya nanchi kechi kitusangajika pakuyuka’mba ubena kwitwingijisha nekwitukwasha kwingila mwingilo wanji nenyi? Jishuko jotuji najo pakino kimye jakusapwila Bufumu bwa Lesa bwaikajikwa kechi jikabwelapo jibijine. Onkao mambo, kino kyokimye kyakutwajijila nakubika Bufumu palutwe mubwikalo bwetu.