“Maola Anga o Nafwainwa Kunemba?”

Nanchi mwakiipuzhapo kala buno bwipuzho nyi? Mikambizho yo twafwainwa kulondela iji mu buku wa Bakwatankana pa mapa 86-87. Kabiji mikambizho ikwabo yanungwako pa uno mutwe itanwa jimo jimo mu Mwingilo Wetu wa Bufumu nabiji yoya iji mu kakitenguluzha kaji mu Mwingilo Wetu wa Bufumu wa September 2008. Na mambo a kuba’mba bwikalo bwaenda kupusana pusana, kechi betupa mutanchi wa mizhilo yonse ya kulondela ne. Onkao mambo, kechi kyafwainwa bakulumpe mu kipwilo nangwa bantu bakwabotu kulenga mikambizho ya kulondela ne.

Umvwe kwaikala bwipuzho kabiji kyatanyiwa’mba kafwako pa panembwa mikambizho ya kulondela ne, musapwishi yense wakonsha kwiipuzha’mba: Nanchi ano maola o o naingijile mu mwingilo nyi? Inyi ajingatu a ku bintu bikwabo byabula kulamata ku uno mwingilo? Maola o tunemba pa ñondo pa ñondo pa sawakya wa mu bujimi, afwainwa kwituletela lusekelo kechi kulengela jiwi jetu ja mu muchima kwitukatazha ne. (Byu. 23:1) Onkao mambo, kechi twafwainwa kuteshatu muchima ku kubala kimye ne, bino twafwainwa kwikingijisha bulongo kupichila mu kwingila na ngovu mu mwingilo.—Hebe. 6:11.