Kusapwila mu Nyaunda ya Busulu na Kuchinchika
1. Mambo ka o twafwainwa kubujila kulefwilwa inge ketumvwe moyo kusapwila mu nyaunda ya busulu?
1 Nanchi mumvwa moyo kusapwila mu nyaunda ya busulu nyi? Umvwe mumvwa moyo kange mulefulwe ne Paulo naye ‘wachinchikile’ pa kuba’mba asapwile kwa kubula moyo. (1 Tesa. 2:2) Tusakwisamba pa makatazho o tupitamo ne byo twakonsha kwiashinda.
2. Mambo ka a kubujila kwakaminwa kuzhingijisha basulu?
2 Nanchi Kusolomoka Bantu Baji pa Nkito Kwibazhingijisha Nyi? Basulu baikelako kukwasha bantu beya na kupota. Onkao mambo, baketekela kwibasolomoka ku bantu kimye kyonse. Bakemutambwila na mushingi, byo bakemumona amba mwaiya na kupota. Mvwajilo yawama ne kumwesha lusekelo kukebalengela kwimutambwila na mushingi.
3. Twakonsha kuba byepi pakuba’mba tubule kuzhingijisha bantu beya na kupota?
3 Nanchi Mwakonsha Kusolomoka Bantu Bavula Beya na Kupota Nyi? Inge kyakonsheka, monaipo kimye bantu kyo babula kuvula mu mashitolo nangwa kimye kya kushinkula mashitolo. Mwakonsha kusolomoka mukulumpe wa nkito kimye kyo mwamona’mba ujitu bunke. Isambaitu nanji byambo bicheche.
4. Twakonsha kwaamba’mba ka kimye kyotubena kwingijila mu nyaunda ya busulu?
4 Mwakonsha Kwaamba’mba Ka? Isambai na kapitawa inge paji ba nkito bavula. Mwakonsha kwamba’mba: “Kyakatazha bingi kutana bantu boba busulu pa mazubo, o ene mambo o twimufwakesha ku nkito. Nayuka namba muji pa nkito, nsakwambatu byambo bicheche.” Pa kuba’mba tubule kwibavulañanya, kyawama kubula kwamba pa lunengezho lwa mibingu kanatu baipuzha. Kwesakanatu na biji busulu, twakosha kulomba lūsa kumukulumpe wa nkito pa kuba’mba twisambeko pacheche na bamingilo banji. Ingijishai byambo biji ku ntatwilo ya jino jifuka pa kwibasolomoka. Inge wa mingilo ubena kumwekana kutabakana, ipipishai mwisambo wenu kabiji mu mushile talakiti. Kechi kyapela kwisamba na babena kwingila ne, kimye kimo bakonsha kwimuswisha kwibashila mabuku mu kibamba mo bakokolokela nangwa ku mpunzhatu ikwabo.
5. Bishinka ka byakonsha kwitulengela kwingijila mu nyaunda ya busulu?
5 Yesu ne Paulo basapwilanga bantu pa mapunzha abo a busulu na kuchinchika ne anweba mwafwainwa kusapwila. (Mat. 4:18-21; 9:9; Byu. 17:17) Lombai Yehoba kwimukwasha kwikala na muchima watekanya ne kuchinchika. (Byu. 4:29) Mu nyaunda ya busulu mo muji bantu babula kutanwa pa mazubo, mambo ka a kubujila kuya na kwingijilamo busapwishi bwakushukilwa?