Lupimpu ku Kupwila kwa Mukachi ka Mulungu

Kutendeka mu mulungu wa September 3, lufunjisho lwa Baibolo lwa Kipwilo bakelupimpula kufuma pa maminiti 25 kuya pa maminiti 30. Mulongo ukatangijilanga lufunjisho, mu miniti umo ukambanga byambo bya kutendekelako pa byafunjiwe mu lufunjisho lwafumineko. Kimye kya Kupwila kwa Mwingilo nakyo kikapimpulwa kufuma pa maminiti 35 kubwela pa maminiti 30. Kechi kukekalanga lubaji lwa bya kubijika ne. Nangwa byonka byo, inge kuji bya kubijika, byafwainwa kubijikwa mu jashi jitanshi. Javula bikekalangatu bya kubijika bichechetu umvwe kibena kukebewa, kabiji kechi mwafwainwa kubijika mutanchi wa kupwila ne. Bya kubijika bya kusambakana pa kuya mu mwingilo, mutanchi wa kuwamisha pa nzubo ya Bufumu ne bya mitende kechi byafwainwa kubijikwa ne. (km 10/08 ji. 1, jifu. 4) Umvwe bya kubijika bibena kukebewa byavula, kyakonsha kuwama aba baji na mbaji mu kupwila kwa mwingilo kuyukila jimo pa kuba’mba bepipisheko majashi abo.