Kuwamishako Busendwe Bwetu bwa Kusapwila—Kunemba Mazhina a Bantu Bakeba Kufunda Baibolo

“Saka wiketa obe mwine ne lufunjisho lobe.” (1 Timo.4:16) Luno lujimuno mutumwa Paulo lo ajimwineko Timoti lumwesha kuba’mba atweba basapwishi bonse, babanda ne bakatataka, twafwainwa kwibikako kuwamisha busendwe bwetu bwa kusapwila. Pa kuba’mba tube bino, mu Mwingilo Wetu wa Bufumu mukekalanga kibaba kiketukwashanga bingi kya kuba amba, “Kuwamishako Busendwe Bwetu bwa Kusapwila.” Kibaba kyonse kikambanga pa busendwe bumo bwanema ne mabulañano a byo twakonsha kuwamishako bobo busendwe. Pa kwingila mukachi ka ñondo, bonse batundaikwa kwingijisha bobo busendwe. Ñondo inge wapwa, mu Kupwila kwa Mwingilo mukekalanga lubaji lwa kwambapo byo twamwenejilemo mu kwingijisha buno busendwe. Mu uno ñondo twatundaikwa kuwamishako busendwe bwetu kupichila mu kwikala na buku mwa kunemba mazhina a bakeba kufunda Baibolo.

Ene Mambo o Kyanemena: Pa kuba’mba twingile bulongo mwingilo wetu, kechi twafwainwa kupelelatu pa kusapwila konka ne. Twafwainwa kubwelako ku bantu bakeba kufunda ne kwibafunjisha, ko kuba’mba kutekezha nkunwa ya bukine yo twabyajile. (Mat. 28:19, 20; 1 Ko. 3:6-9) Pa kuba’mba tube bino, twafwainwa kubwelako jikwabo ku muntu ye twisambile nanji ne kwisamba nanji pa bintu bimukatazha mu milanguluko, kabiji twafwainwa kutendekela mwisambo wetu pa bintu byo twisambilepo kimye kitanshi. Onkao mambo, inge twatana muntu ukeba kufunda, twafwainwa kunemba jizhina janji ne ko ekala.

Byo Mwafwainwa Kuba:

• Mwafwainwa kwikala na bingijisho byonse bikebewa mu kyola kyenu. Mwafwainwa kumona kuba’mba byo mwingijisha pa kunemba bintu bikebewa bibena kumweka bulongo. Mwafwainwa kunemba aku mupwishatu kwisamba na muntu kimye kitanshi.

• Nembai byo mwamona pa muntu ye mwisamba nanji. Nembai jizhina janji, ko ekala, nambala ya foni nangwa keyala wa e-mail. Ñanyi bintu byo mwamwene kimye kyo mwisambilenga nanji byakonsha kwimukwasha pa kubwelako?

• Nembai byo mwisambapo na mwina nzubo. Ñanyi binembelo byo mwa kutanga? Waambapo’mba ka pa bintu byo aitabilamo? Ñanyi mabuku o mwa mushila? Nembai kimye ne juba jo mwamonañana nanji.

• Nembai byo mukoba kimye kyo mukabwelako. Ñanyi bintu byo mwalaya amba mukesambepo? Mwalaya kubwelako ñanyi juba?

• Kimye kyonse kyo mwabwelako mwafwainwa kunemba bintu byo mwisambapo. Kunemba bintu byavula pa muntu ye mwisamba nanji kechi kwatama ne.

Esekai Kuba Bino:

• Pa kunemba bintu bikebewa, bulai bo mubena kwingila nabo bintu byo mubena kunemba.