Yehoba Uketupesha Inge Saka Tukwasha Bakwetu

Bantu bavula pano pa ntanda bakeba kuja ne pa kulaala. Bakwabo bakeba bwikalo bwawama bwa kulutwe. Pano Lesa wakonsha kwitupesha byepi inge ketukwashe bantu bakajilwa?

BYAAMBAPO MAMBO A LESA

“Awa ubila byawama mulanda ukongwesha Yehoba, Ne aye ukamufweta pa bintu byo oba.”—BYAMBO BYA MAANA 19:17.

BYA KUKWASHA MUNTU UJI MU LUKATAZHO

Yesu waambile pa jishimikila ja mwanamulume ye bapumine ku tupondo ne kumusha saka apungila. (Luka 10:29-37) Muntu umo byo apichilenga wamutaine ne kumukwasha nangwa kya kuba kechi wamuyukile ne.

Uno muntu wamukwashishe ponkapotu, wamupeele mali ne byonse byakebewenga pa kuba’mba abukwe. Kabiji bino bintu byo bamubijile byamutekeneshe bingi.

Ñanyi kintu kyo tufunjilako ku jino jishimikila? Yesu walumbulwilenga kuba’mba twafwainwa kukwashanga bakwetu babena kupita mu makatazho. (Byambo bya Maana 14:31) Baibolo witufunjisha kuba’mba katatakatu Lesa akafumyepo makatazho onse pano pa ntanda. Kampe twakonsha kwipuzha’mba Lesa ukoba byepi kino, kabiji ñanyi kimye kyo akafumyapo makatazho? Mutwe walondelapo ukamba pa bintu byawama bitulaya Lesa wa butemwe.