Bya Kuba pa Kuba’mba Kusambakana kwa Kuya mu Mwingilo Kuwamenga

Byonkatu biji kupwila konse kwa kipwilo, kusambakana kwa kuya mu mwingilo nako kuji pa bintu byawama bitupa Yehoba bitukwasha kwitundaika atweba bene na bene ne kwingila mingilo yawama. (Heb 10:24, 25) Kuno kusambakana kwafwainwa kwikala pakachi ka maminiti 5 kufika ku maminiti 7 kwapwa. Mu kino kimye mwavwangwa ne kwabanya baji mu jibumba, kwibabuula kwa kuya na kwingijila mu nyaunda yenu ne kulomba. (Inge kuno kusambakana kwaikalako panyuma ya kupwila, kechi kwafwainwa kufika ku ano maminiti ne.) Ubena kutangijila kuno kusambakana wafwainwa kunengezha bisakukwasha babena kuya mu mwingilo pa jojo juba. Nabiji pa Kibelushi, bavula batanwako kechi bayilepo mu mwingilo mukachi ka mulungu ne. Onkao mambo, kyakonsha kuwama kunengezhatu bya kwisamba na mwina nzubo. Ñanyi bintu bikwabo byo mwakonsha kwisambapo?

• Bya kwisamba na bantu mu Mutanchi wa Kupwila kwa Bwikalo ne Mwingilo Wetu wa Bwina Kilishitu

• Bya kwingijisha bibena kumweka nangwa byambo byo baamba pa mwela byamweka kutatwilamo mwisambo

• Bya kukumbula bantu bakeba kuchibikizha mwisambo

• Bya kutendeka mwisambo na muntu ye mwataana mu nyaunda yenu, nabiji wamba’mba Lesa ufwako, waitabila’mba bintu byaalukiletu, muntu wamba mulaka ungi nangwa muntu wa mu bupopweshi bwabula mu nyaunda yenu

• Bya kwingijisha byo babika pa keyala wa jw.org, pa JW Library^® app, nangwa Baibolo

• Bya kwingijisha mabuku nangwa mabuloshuwa o tufunjishamo bantu Baibolo

• Bya kwingila mbaji imo ya mwingilo isakwingijisha bamo nabiji, kusapwila pa foni, kunemba nkalata, kusapwila ku mvula bantu, kubwela ku bantu bo twasapwijile nangwa kufunjisha bantu Baibolo

• Kwibavululako byo bakonsha kwizhikijila, bya kwalaula mashinda pa kusapwila, kumwesha byubilo byawama, kwikala ba lusekelo nangwa bikwabotu bipasha na bino

• Kwisamba pa lufunjisho nangwa vidyo mu buloshuwa wa kuba’mba Teshaiko Muchima ku Kutanga ne Kufunjisha

• Bya kutundaika ne kukwasha ye mubena kwingila nanji mu mwingilo

• Kinembelo kyaamba pa mwingilo nangwa kyamwekele mu mwingilo kyakonsha kutundaika bonse